36 C
Phnom Penh

លោក មុត ចន្ថា បដិសេធ​រួបរួម​ជាមួយ​ក្រុម​ណា​ដែល​ធ្វើ​ឱ្យ​មាន​អំពើ​ហិង្សា​បំផ្លាញ​ប្រជាធិបតេយ្យ​សេរី​ពហុបក្ស​ឡើយ

ដោយ ឌឹ ខេមបូឌា ដេលី

បទវិភាគ

អតីត​នាយក​ខុទ្ទកាល័យ​ប្រធាន​បក្ស​ប្រឆាំង​ភាគី​លោក កឹម សុខា លើកឡើង​ថា ពួកគេ​នឹង​ធ្វើ​ការ​រួបរួម​ជាមួយ​ក្រុម​ណា​ដែល​ធ្វើ​សកម្មភាព​ដើម្បី​លទ្ធិប្រជាធិបតេយ្យ សេរីភាព និង​យុត្តិធម៌ ប៉ុន្តែ​ពួកគេ​នឹង​មិន​រួបរួម​ជាមួយ​ក្រុម​ណា​ដែល​តស៊ូ​មតិ​ឱ្យ​មាន​អំពើ​ហិង្សា បំផ្លាញ​គោលការណ៍​ប្រជាធិបតេយ្យ​សេរី​ពហុបក្ស​ឡើយ។

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក មុត ចន្ថា សរសេរ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃទី​១៦ វិច្ឆិកា នេះ​ថា ការ​រួបរួម​ជាមួយ​អ្នក​ស្រឡាញ់​ប្រជាធិបតេយ្យ សេរីភាព និង​យុត្តិធម៌ នៅតែ​ជា​បំណង​ប្រាថ្នា​របស់​អ្នក​ប្រជាធិបតេយ្យ និង​ជា​បំណង​របស់​ពលរដ្ឋ​ខ្មែរ​ដែល​ស្អប់ខ្ពើម​អំពើ​ជិះជាន់​គាប​សង្កិន គំរាមកំហែង និង​ការ​បំបិទ​សិទ្ធិ​សេរីភាព ហើយ​ជំហរ​បែប​នេះ​នឹង​មិន​អាច​លុប​បំបាត់​ចេញពី​ឧត្តមគតិ​របស់​អ្នក​ស្នេហា​ជាតិ​ខ្មែរ​គ្រប់​រូប​បាន​ឡើយ។

លោក មុត ចន្ថា លើកឡើង​ថា ក្នុង​នាម​ជា​អ្នក​ប្រជាធិបតេយ្យ គឺ​យល់​យ៉ាង​ច្បាស់​ថា ការ​បែកបាក់​នឹង​នាំមក​នូវ​ការ​ចុះ​ខ្សោយ​នៃ​កម្លាំង​អ្នក​ប្រជាធិបតេយ្យ ដែល​ជា​ហេតុ​ធ្វើ​ឱ្យ​អ្នក​មាន​ចេតនា​បំផ្លាញ​ជាតិ ដឹកនាំ​ឆ្ពោះ​ទៅ​កាន់​អំណាច​ប្រមូល​ផ្ដុំ និង​អំណាច​ផ្ដាច់ការ​ដោយ​ជោគជ័យ។

លោក​បន្ថែម​ថា កាលណា​លទ្ធិប្រជាធិបតេយ្យ​ស្លាប់ ពលរដ្ឋ​ខ្មែរ​ម្ចាស់​អំណាច​នឹង​បាត់បង់​នូវ​អំណាច​អធិបតេយ្យ​ដោយ​ស្វ័យប្រវត្តិ ហើយ​ជោគវាសនា​ជាតិ នឹង​អន្តរាយ​ក្នុង​ដៃ​ជន​ផ្ដាច់ការ​យ៉ាង​ពិតប្រាកដ។

មន្ត្រី​ជាន់ខ្ពស់​អតីត​បក្ស​ប្រឆាំង​ដ៏​ធំ​នៅ​កម្ពុជា​រូប​នេះ បញ្ជាក់​ថា ក្នុង​ស្ថានភាព​ដ៏​មហា​សែន​តូច​ចង្អៀត​សព្វថ្ងៃ​នេះ បាន​រុញច្រាន​ឱ្យ​អ្នក​ប្រជាធិបតេយ្យ​ខ្លះ​ដើរ​ខុស​ទិសដៅ​បន្តិច​ក៏​ពិត​មែន ប៉ុន្តែ​បេះដូង​ស្នេហា​លទ្ធិប្រជាធិបតេយ្យ​របស់​ពួកគេ ច្បាស់​ជា​មិន​ប្រែប្រួល​ឡើយ ដែល​នៅតែ​អាច​រួបរួម​គ្នា​ជា​ធ្លុង​មួយ ដើម្បី​បន្ត​ដំណើរ​ទៅ​មុខ​ឆ្ពោះ​ទៅ​រក​គោលដៅ​ស្ដារ និង​សង្គ្រោះ​លទ្ធិប្រជាធិបតេយ្យ និង​សេរីភាព​នៅ​កម្ពុជា​នា​ពេល​ខាងមុខ​ឡើងវិញ។

កាលពី​ថ្ងៃទី​១២ ខែ​វិច្ឆិកា ឆ្នាំ​២០២៣ សមាជិក​គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក (CNRP USA) បាន​ចេញ​សេចក្តី​ប្រកាស​ព័ត៌មាន​មួយ បន្ទាប់ពី​មាន​ការ​ជួបជុំ​អ្នកគាំទ្រ​អតីត​គណបក្ស​សង្គ្រោះ​ជាតិ​នៅ​ក្រៅ​ស្រុក​ក្នុង​សិក្ខាសាលា​មួយ​ស្ដីពី​ពន្លឺ​ប្រជាធិបតេយ្យ នៅ​ក្នុង​ទីក្រុង​អាល់វីន រដ្ឋ​តិចសាស សហរដ្ឋ​អាមេរិក។

សេចក្តី​ប្រកាស​ព័ត៌មាន​ខាងលើ​បញ្ជាក់​ថា បន្ទាប់ពី​កិច្ចប្រជុំ​បាន​ដំណើរ​អស់​រយៈពេល ២​ថ្ងៃ គឺ​នៅ​ថ្ងៃទី​១១ និង​ថ្ងៃទី​១២ ខែ​វិច្ឆិកា អង្គ​សិក្ខាសាលា​ទាំងមូល​បាន​សម្រេច​ជា​ឯកច្ឆន្ទ​បង្កើត​គណៈកម្មាធិការ​ចំពោះ​កិច្ច​នៃ​អ្នក​ប្រជាធិបតេយ្យ ដើម្បី​ស្ដារ​លទ្ធិប្រជាធិបតេយ្យ​នៅ​កម្ពុជា​ឡើង​វិញ ក្នុង​គោលដៅ​បង្រួបបង្រួម​អ្នក​ប្រជាធិបតេយ្យ​ឈាន​ទៅ​រក​ការ​ផ្សះផ្សា​ជាតិ។

តំណាងរាស្ត្រ​អតីត​គណបក្ស​សង្គ្រោះ​ជាតិ​លោក សួន សុរីដា បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​១៤ វិច្ឆិកា នេះ​ថា ដោយ​មើល​ឃើញ​ពី​ការ​ធ្លាក់​ចុះ​នៃ​ការ​ដឹកនាំ​តាម​បែប​ប្រជាធិបតេយ្យ​ក្រោម​ការ​ដឹកនាំ​បក្ស​កាន់​អំណាច​សព្វថ្ងៃ​នេះ ក្រុម​អ្នក​ប្រជាធិបតេយ្យ​នៅ​លើ​ពិភពលោក​កាលពី​ដើម​សប្តាហ៍​កន្លង​ទៅ បាន​ប្រមូល​កម្លាំង​ស្នេហា​ជាតិ​ឡើងវិញ ក្នុង​បំណង​សង្គ្រោះ​ប្រជាធិបតេយ្យ​នៅ​កម្ពុជា​ដែល​កំពុង​ធ្លាក់​ដុនដាប​សព្វថ្ងៃ​នេះ។

លោក សួន សុរីដា លើកឡើង​ថា ក្នុង​កិច្ចប្រជុំ​ពិសេស​នេះ បាន​ពិភាក្សា​គ្នា​ផ្ដោត​ទៅ​លើ​ផែនការ​អនាគត​ក្នុង​ការ​ស្ដារ​លទ្ធិប្រជាធិបតេយ្យ​ដែល​ជា​សកម្មភាព​ស្នូល​របស់​ខ្លួន ដើម្បី​ជួយ​ឱ្យ​ពលរដ្ឋ​ដែល​ជា​ម្ចាស់​ប្រទេស​ទទួល​បាន​សិទ្ធិ​ពេញលេញ​ក្នុង​ការ​សម្រេច​ជោគវាសនា​ជាតិ​របស់​ខ្លួន​ដូច​ដែល​មាន​ចែង​ក្នុង​រដ្ឋធម្មនុញ្ញ។

តំណាងរាស្ត្រ​អតីត​គណបក្ស​សង្គ្រោះ​ជាតិ​រូប​នេះ​បញ្ជាក់​ថា ការ​បង្កើត​គណៈកម្មាធិការ​ចំពោះ​កិច្ច​នៃ​អ្នក​ប្រជាធិបតេយ្យ​នេះ គឺ​ធ្វើ​ឡើង​ដោយ​បើកចំហ​ទទួល​យក​ការ​ចូលរួម​ពី​គ្រប់​មជ្ឈដ្ឋាន និង​គ្រប់​និន្នាការ​ទាំងអស់​ដែល​ជា​អ្នក​ស្នេហា​ប្រជាធិបតេយ្យ សិទ្ធិ​សេរីភាព ក្នុង​គោលដៅ​រួម​តែ​មួយ គឺ​ដើម្បី​ស្ដារ​លទ្ធិប្រជាធិបតេយ្យ​នៅ​ប្រទេស​កម្ពុជា​ឡើងវិញ​ឱ្យខាងតែ​បាន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស