32 C
Phnom Penh

អង្គការ​សង្គម​ស៊ីវិល​នឹង​ជួបជុំ ៥០០​នាក់​ធ្វើ​យុទ្ធនាការ​ប្រឆាំង​អំពើ​ហិង្សា​លើ​ស្ត្រី និង​ក្មេង​ស្រី

ដោយ ឌឹ ខេមបូឌា ដេលី

បទវិភាគ

នៅ​សល់​តែ ៦​ថ្ងៃ​ទៀត មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស ដែល​ហៅ​កាត់​ថា សង់ត្រាល់ នឹង​ប្រារព្ធ​ទិវា​នៃ​យុទ្ធនាការ​ប្រឆាំង​អំពើ​ហិង្សា​យេនឌ័រ ឬ​ភេទ​មនុស្ស ក្រោម​ប្រធានបទ គ្មាន​អំពើ​ហិង្សា​លើ​ស្ត្រី និង​ក្មេង​ស្រី ដើម្បី​សេដ្ឋកិច្ច និង​យុត្តិធម៌​សង្គម នៅ​ទីលាន​ប្រជាធិបតេយ្យ​ដែល​មាន​ការ​ជួបជុំ​គ្នា​ប្រមាណ ៥០០​នាក់។

អង្គការ​សង់ត្រាល់ សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​២៧ វិច្ឆិកា ថា អង្គការ​សមាគម​ចំនួន ២១​ស្ថាប័ន​ដែល​ធ្វើការ​លើក​កម្ពស់​សិទ្ធិ​ការងារ សិទ្ធិ​ស្ត្រី និង​សមភាព​ភេទ​មនុស្ស ឬ​យេនឌ័រ​នៅ​ប្រទេស​កម្ពុជា កំពុង​ធ្វើ​យុទ្ធនាការ ១៦​ថ្ងៃ​នៃ​ភាព​សកម្ម​និយម​ប្រឆាំង​អំពើ​ហិង្សា​ផ្អែក​លើ​យេនឌ័រ ចាប់ពី​ថ្ងៃទី​២៥ ខែ​វិច្ឆិកា ដល់​ថ្ងៃទី​១០ ខែ​ធ្នូ ឆ្នាំ​២០២៣ ដែល​ត្រូវ​នឹង​ទិវា​សិទ្ធិមនុស្ស ដើម្បី​បង្ហាញ​ពី​វិធានការ​ទប់ស្កាត់​ឱ្យ​មាន​ប្រសិទ្ធភាព​ចំពោះ​អំពើ​ហិង្សា និង​ការ​បៀតបៀន​គ្រប់​ទម្រង់​លើ​ក្មេង​ស្រី និង​ស្ត្រី។

អង្គការ​សង់ត្រាល់ បញ្ជាក់​ថា ក្នុង​ឱកាស​ប្រារព្វ​ទិវា​យុទ្ធនាការ ១៦​ថ្ងៃ​នៃ​ភាព​សកម្ម​និយម​ប្រឆាំង​អំពើ​ហិង្សា​ផ្អែក​លើ​យេនឌ័រ ក្នុង​ឆ្នាំ​២០២៣ នេះ ក្រុម​សកម្មជន សមាគម សហជីព និង​អង្គការ​សង្គម​ស៊ីវិល នឹង​ប្ដូរ​ស៊ុម​រូបភាព​ប្រូហ្វាល់​ហ្វេសប៊ុក ព្រមទាំង​បង្ហោះ​សារ​ផ្សេងៗ​ទាក់ទង​នឹង​ការ​បញ្ឈប់​អំពើ​ហិង្សា និង​ដំណោះស្រាយ​ជា​អាទិភាព​របស់​ស្ត្រី និង​ក្មេង​ស្រី​ផង​ដែរ។

ក្រៅពី​នេះ មាន​អ្នក​ចូលរួម​ឆ្លើយ​សំណួរ​ទាក់ទង​នឹង​ប្រធានបទ «យុទ្ធនាការ ១៦​ថ្ងៃ​នៃ​ភាព​សកម្ម​និយម​ប្រឆាំង​អំពើ​ហិង្សា​ផ្អែក​លើ​យេនឌ័រ» នេះ ក៏​អាច​ឈ្នះ​រង្វាន់​ផ្សេងៗ​ថែម​ទៀត ដូចជា ដប​ទឹក កាបូប និង​រង្វាន់​ជាច្រើន​ទៀត ជាដើម។

កាលពី​ថ្ងៃទី​២៤ ខែ​វិច្ឆិកា ឆ្នាំ​២០២៣ អង្គការ​ស្ថាប័ន​ចំនួន ២១ ដូចជា មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស សម្ព័ន្ធ​សហជីព​កម្មករ​និយោជិត​វិស័យ​ទេសចរណ៍​កម្ពុជា និង​អង្គការ​សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស ជាដើម បាន​ចេញ​សេចក្តី​ប្រកាស​ព័ត៌មាន​រួម​គ្នា​អំពី​យុទ្ធនាការ​ប្រឆាំង​អំពើ​ហិង្សា​យេនឌ័រ ១៦​ថ្ងៃ ដើម្បី​ជំរុញ​ឱ្យ​រាជរដ្ឋាភិបាល​កម្ពុជា​ការពារ​សិទ្ធិមនុស្ស​ឱ្យ​បាន​ម៉ឺងម៉ាត់ ជាពិសេស​ការពារ​សិទ្ធិមនុស្ស​ជា​ស្ត្រី និង​ដោះស្រាយ​បញ្ហា​ប្រឈម​របស់​ស្ត្រី និង​ក្មេង​ស្រី​ឱ្យ​មាន​ប្រសិទ្ធភាព​ផង​ដែរ។

សេចក្តី​ប្រកាស​ព័ត៌មាន​នេះ អះអាង​ថា យុទ្ធនាការ ១៦​ថ្ងៃ​នេះ​មាន​គោលបំណង​លើក​កម្ពស់​ការ​យល់ដឹង និង​ផ្តល់​ឱកាស​ដល់​សកម្មជន អ្នក​ការពារ​សិទ្ធិមនុស្ស​ជា​ស្ត្រី ឱ្យ​ពួកគេ​លើកឡើង​នូវ​បញ្ហា​ប្រឈម​ដែល​បាន​ជួបប្រទះ ខណៈ​ដែល​ខ្លួន​អនុវត្ត​សិទ្ធិ​ស្រប​ច្បាប់ ហើយ​ជាមួយ​គ្នា​នោះ ក៏​មាន​ការ​ជួបជុំ​ថ្លែង​សារ​នូវ​បញ្ហា​ពី​វិស័យ​ផ្សេងៗ​ដែល​កំពុង​កើត​មាន​លើ​ក្មេង​ស្រី និង​ស្ត្រី​ផង​ដែរ ដើម្បី​ពិនិត្យ និង​ឆ្លុះបញ្ចាំង​ពី​ការ​ទាមទារ​របស់​ពួកគេ​នា​ពេល​កន្លង​មក។

សេចក្តី​ប្រកាស​ព័ត៌មាន​ដដែល​បញ្ជាក់​ថា យុទ្ធនាការ​នេះ​នឹង​បែងចែក​ការ​ផ្សព្វផ្សាយ​ទៅ​តាម​ថ្ងៃ​ជាបន្តបន្ទាប់ ក្នុង​នោះ នៅ​ថ្ងៃទី​៣ ខែ​ធ្នូ ឆ្នាំ​២០២៣ ពួកគេ​នឹង​ចេញ​ផ្សាយ​វីដេអូ​មួយ​ស្ដីពី សិទ្ធិ​ស្ត្រី​ក្នុង​ការ​ចូលរួម​ការងារ​សង្គម និង​ការ​តស៊ូ​មតិ រួម​ទាំង​មាន​កម្មវិធី​ជួបជុំ​អ្នក​ចូលរួម​នៅ​ទីលាន​ប្រជាធិបតេយ្យ​ចំនួន ៥០០​នាក់ និង​ការ​ផ្សាយ​វីដេអូ​ខ្លី​ដែល​លើកឡើង​ពី​តម្រូវការ​ផ្សេងៗ​របស់​ស្ត្រី និង​ក្មេង​ស្រី​ថែម​ទៀត។

យុទ្ធនាការ ១៦​ថ្ងៃ ដើម្បី​បញ្ឈប់​អំពើ​ហិង្សា​លើ​ស្ត្រី និង​ក្មេង​ស្រី បាន​ចាប់ផ្ដើម​ឡើង​នៅ​ក្នុង​ឆ្នាំ​១៩៩១ ដោយ​ក្រុម​បុរស​ជនជាតិ​កាណាដា​មួយ​ក្រុម។ ក្រោយ​មក យុទ្ធនាការ​នេះ​ត្រូវ​បាន​រៀបចំ​ធ្វើឡើង​នៅ​គ្រប់​ទីកន្លែង​នៅ​លើ​ពិភពលោក រហូត​ដល់​ទិវា​នេះ​ក្លាយ​ទៅ​ជា​ទិវា​អន្តរជាតិ ដែល​អង្គការ​សហប្រជាជាតិ​បាន​កំណត់​ជា​ផ្លូវការ​កាលពី​ថ្ងៃទី​១៧ ខែ​ធ្នូ ឆ្នាំ​១៩៩៩ ព្រមទាំង​ត្រូវ​បាន​ប្រកាស​ទទួល​ស្គាល់​ថា ជា​ទិវា​អន្តរជាតិ​លុបបំបាត់​អំពើ​ហិង្សា​លើ​ស្ត្រី តាមរយៈ​មហាសន្និបាត​លើក​ទី​៨៣ នៃ​អង្គការ​សហប្រជាជាតិ​ផង​ដែរ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ធ្លាប់​លើកឡើង​កាលពី​ពេល​ថ្មីៗ​នេះ​ថា ស្ត្រី​ដែល​ជា​ជនរងគ្រោះ​ពី​អំពើ​ហិង្សា​នៅ​កម្ពុជា មិន​មែន​កើតឡើង​តែ​ក្នុង​គ្រួសារ​របស់​ពួកគេ​ទេ ប៉ុន្តែ​ក៏​បាន​រង​នូវ​អំពើ​ហិង្សា​នានា​ដែល​កើត​ចេញពី​ការ​អនុវត្ត​សិទ្ធិ​បញ្ចេញមតិ​ដើម្បី​សិទ្ធិ​សេរីភាព និង​សិទ្ធិ​លំនៅឋាន​របស់​ពួកគេ​ដែរ ជាពិសេស​សកម្មជន​សិទ្ធិមនុស្ស​ដែល​ជា​ស្ត្រី​តែង​រង​នូវ​ការ​ធ្វើ​ទុក្ខបុកម្នេញ​ពី​អាជ្ញាធរ​កម្ពុជា​ជា​បន្តបន្ទាប់ បើ​ទោះបីជា​ពួកគេ​អនុវត្ត​សិទ្ធិ​ដូច​ដែល​មាន​ចែង​ក្នុង​រដ្ឋធម្មនុញ្ញ​ក៏ដោយ។

លោក ស៊ឹង សែនករុណា អំពាវនាវ​ឱ្យ​រដ្ឋាភិបាល​យកចិត្ត​ទុកដាក់​លើ​ការ​ទប់ស្កាត់​អំពើ​ហិង្សា​លើ​ស្ត្រី និង​ក្មេង​ស្រី​ឱ្យ​មាន​ប្រសិទ្ធភាព ជាពិសេស​កន្លង​មក មន្ត្រី​អនុវត្ត​ច្បាប់​មួយ​ចំនួន​ក៏​លេច​ធ្លាយ​នូវ​ការ​ប្រើ​អំពើ​ហិង្សា​លើ​ស្ត្រី​ដែល​ជា​ភរិយា​របស់​ពួកគេ​ដែរ ដែល​បញ្ហា​នេះ​គឺជា​គំរូ​ដ៏​អាក្រក់​ក្នុង​សង្គម​ក្នុង​នាម​ជា​អ្នក​អនុវត្ត​ច្បាប់ ដែល​មាន​កាតព្វកិច្ច​ត្រូវ​ធានា​ការពារ​នូវ​សិទ្ធិ​របស់​ពលរដ្ឋ ជាពិសេស​គឺ​សិទ្ធិ​នារី​ក្នុង​នាម​ជា​ភេទ​ងាយ​រងគ្រោះ​តែម្តង។

ទាក់ទិន​នឹង​បញ្ហា​នេះ ក្រសួង​កិច្ចការ​នារី បាន​បញ្ចេញ​សេចក្តី​រាយការណ៍​កាលពី​ពេល​កន្លង​ទៅ​ថា នៅ​ប្រទេស​កម្ពុជា ស្ត្រី​នៅតែ​ប្រឈម​នឹង​ការ​ទទួល​រង​អំពើ​ហិង្សា​ផ្លូវកាយ ផ្លូវភេទ ផ្លូវចិត្ត ដែល​អំពើ​ហិង្សា​ទាំងនោះ​អាច​កើត​មាន​ទាំង​នៅ​ក្នុង​ផ្ទះ នៅ​កន្លែង​ធ្វើការ និង​ក្នុង​សហគមន៍ ហើយ​ទម្រង់​នៃ​អំពើ​ហិង្សា​លើ​ស្ត្រី​ដែល​កើតឡើង​ភាគច្រើន​ក្នុង​ព្រះរាជាណាចក្រ​កម្ពុជា គឺ​អំពើ​ហិង្សា​ក្នុង​គ្រួសារ និង​អំពើ​ហិង្សា​ផ្លូវភេទ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស