សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អំពាវនាវឱ្យបុគ្គលិកក្រុមហ៊ុនណាហ្គាវើលដ៍ដែលនៅមានជីវិតទាំងអស់ ដោះស្រាយវិវាទការងារជាមួយសហជីព ដើម្បីបានជាបុណ្យកុសលបញ្ជូនទៅឱ្យថៅកែក្រុមហ៊ុនណាហ្គាវើលដ៍លោក CHEN LIP KEONG ដែលទើបទទួលមរណភាពកាលពីពេលថ្មីៗនេះ។
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានចេញលិខិតរំលែកទុក្ខមួយកាលពីថ្ងៃទី១១ ខែធ្នូ ឆ្នាំ២០២៣ នេះដោយលើកឡើងថា នៅពេលដែលលោក CHEN LIP KEONG លាចាកលោកនេះទៅ គាត់មិនអាចយកអ្វីទៅជាមួយបានទេ ក្រៅតែពីបុណ្យកុសលដែលគាត់ធ្លាប់បានប្រព្រឹត្ត និងការបន្សល់នូវកេរ្តិ៍ឈ្មោះ ដូច្នេះបុគ្គលិកដែលកំពុងនៅរស់ផ្សេងទៀត គួរតែនាំគ្នាដោះស្រាយវិវាទការងារជូនកម្មករនិយោជិតដែលខ្លួនធ្លាប់បានរំលោភបំពានសិទ្ធិការងារដោយការបញ្ឈប់កម្មករនិយោជិតទាំងអយុត្តិធម៌កន្លងមក ដើម្បីបានជាកុសលផលបុណ្យជូនដល់វិញ្ញាណក្ខន្ឋរបស់លោក CHEN LIP KEONG ដែលទទួលអនិច្ចធម្មទៅនោះ។
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បួងសួងសុំឱ្យវិញ្ញាណក្ខន្ធរបស់លោក CHEN LIP KEONG ទៅកាន់សុគតិភព ហើយពួកគេដែលជាបុគ្គលិកកម្មករ និងជាសមាជិកសហជីពនៃក្រុមហ៊ុនណាហ្គាវើលដ៍ដែលរងនូវការរំលោភសិទ្ធិការងារកន្លងមក សូមអហោសិកម្មនូវរឿងរ៉ាវដែលកើតឡើងកន្លងមក ដល់សពរបស់លោក CHEN LIP KEONG ផងដែរ។
កាលពីថ្ងៃទី១១ ខែធ្នូ ឆ្នាំ២០២៣ ក្រុមហ៊ុន NagaCorp បានចេញសេចក្តីប្រកាសព័ត៌មានថា លោក Tan Sri Dr. Chen Lip Keong បានទទួលមរណភាពក្នុងវ័យ ៧៥ឆ្នាំ កាលពីថ្ងៃទី៨ ខែធ្នូ ឆ្នាំ២០២៣ ដោយរោគាពាធ។ ក្រោយពីមរណភាពរបស់ Dr. Chen Lip Keong ក្រុមប្រឹក្សាភិបាលនៃក្រុមហ៊ុន NagaCorp បានសម្រេចតែងតាំងលោក Chen Yiy Fon ដែលជាកូនប្រុសបង្កើតរបស់លោក CHEN LIP KEONG ឱ្យឡើងកាន់តំណែងជានាយកប្រតិបត្តិ (CEO) បន្តផងដែរ។
អតីតមេដឹកនាំបក្សប្រឆាំងលោក សម រង្ស៊ី បានសរសេរលើទំព័រហ្វេសប៊ុករបស់លោកនៅថ្ងៃទី១២ ធ្នូ នេះថា មរណភាពរបស់លោក ចេន លីប គង់ (Chen Lip Keong) ថៅកែក្រុមហ៊ុនណាហ្គាវើលដ៍ (Naga World) បានធ្វើឱ្យរបបលោក ហ៊ុន សែន និងលោក ហ៊ុន ម៉ាណែត បាត់បង់បង្គោលទ្រទ្រង់អំណាចរបស់វង្សត្រកូលហ៊ុនមួយហើយ។
លោក សម រង្ស៊ី លើកឡើងថា ក្រុមហ៊ុនល្បែងស៊ីសងកាស៊ីណូណាហ្គាវើលដ៍ បានបំផ្លាញសង្គមខ្មែរច្រើនណាស់ ប៉ុន្តែជាថ្នូរដើម្បីរក្សាមុខជំនួញល្បែងរបស់ខ្លួន លោក ចេន លីប គង់ បានចិញ្ចឹមត្រកូលហ៊ុនយូរឆ្នាំមកហើយដែរ ដូច្នេះហើយបានជាក្រុមហ៊ុនល្បែងស៊ីសងមួយនេះហ៊ានប្រើរដ្ឋអំណាចពុករលួយ ឲ្យវាយបង្ក្រាបបុគ្គលិកនៃក្រុមហ៊ុនណាហ្គាវើលដ៍ (NagaWorld) ដែលតវ៉ាសុំឲ្យកែលម្អលក្ខខណ្ឌការងារកន្លងមកនោះ។
អតីតមេដឹកនាំបក្សប្រឆាំងរូបនេះ បញ្ជាក់ថា លោក ចេន លីប គង់ បានប្រើលោក ហ៊ុន សែន ឲ្យចាប់ប្រធានសហជីព កញ្ញា ឈឹម ស៊ីថរ ដាក់ពន្ធនាគាររហូតដល់ថ្ងៃនេះ ហើយទ្រព្យសម្បត្តិមួយផ្នែកធំរបស់ថៅកែក្រុមហ៊ុនណាហ្គាវើលដ៍រូបនេះប្រមាណជាង ១ពាន់លានដុល្លារអាមេរិក (១៣០០លានដុល្លារ) នៅពេលនេះ ក៏បានមកពីញើសឈាម និងទឹកភ្នែករបស់ប្រជារាស្ត្រខ្មែរដែរ។
កាលពីថ្ងៃទី៨ ខែមេសា ឆ្នាំ២០២១ កន្លងទៅ ក្រុមហ៊ុនណាហ្គាវើលដ៍ បានបញ្ឈប់កម្មករនិយោជិតជាង ១ពាន់នាក់ (១៣២៩នាក់) ក្នុងបំណងរំលាយក្រុមសហជីពក្នុងក្រុមហ៊ុននេះ ក្រោមលេសជួបវិបត្តិជំងឺកូវីដ-១៩ ព្រោះថា បុគ្គលិកទាំងជាង ១ពាន់នាក់នេះ គឺសុទ្ធសឹងតែជាថ្នាក់ដឹកនាំ និងជាសមាជិកសហជីពទាំងអស់។
ក្រោយប្រកាសបញ្ឈប់បុគ្គលិកដោយរំលោភលើសិទ្ធិការងារ នៅថ្ងៃទី១៨ ខែធ្នូ ឆ្នាំ២០២១ កម្មករដែលត្រូវបញ្ឈប់ពីការងារ ក៏បាននាំគ្នាធ្វើកូដកម្មទាមទារយុត្តិធម៌តែម្តង ប៉ុន្តែរហូតមកទល់ខែធ្នូ ឆ្នាំ២០២៣ នេះ គឺមានរយៈពេលជិត ២ឆ្នាំហើយ ហើយវិវាទនេះនៅតែគ្មានដំណោះស្រាយដដែល ខណៈប្រធានសហជីពកញ្ញា ឈឹម ស៊ីថរ ក៏ត្រូវបានសមត្ថកិច្ចក្រុងភ្នំពេញចាប់ឃុំខ្លួន និងក្រុមកូដករមួយចំនួនផ្សេងទៀត កំពុងរងនូវបណ្តឹងតាមផ្លូវតុលាការសព្វថ្ងៃនេះ។
រហូតដល់ពេលនេះ បុគ្គលិកក្រុមហ៊ុនណាហ្គាវើលដ៍ ដែលត្រូវបានបញ្ឈប់ពីការងារដោយបង្ខំ បាននាំគ្នាធ្វើកូដកម្មជាបន្តបន្ទាប់ ដើម្បីទាមទារឱ្យថៅកែក្រុមហ៊ុនណាហ្គាវើលដ៍ ទទួលយកពួកគេធ្វើការងារវិញ ខណៈថៅកែបនល្បែងស៊ីសងមួយនេះនៅតែមិនដោះស្រាយតាមសំណើរបស់កម្មករ និងនៅតែបន្តចោទប្រកាន់លើថ្នាក់ដឹកនាំ និងសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ថែមទៀតដដែល។
សព្វថ្ងៃនេះ ក្រុមកូដករណាហ្គាវើលដ៍ចំនួន ៩នាក់ កំពុងរងនូវបណ្តឹងតាមផ្លូវតុលាការ ក្រោមបទចោទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ដូចជា ប្រធានទ្រទ្រង់សិទ្ធិការងារកម្មករខ្មែរ កញ្ញា ឈឹម ស៊ីថរ ថ្នាក់ដឹកនាំសហជីព កញ្ញា ឈឹម សុខន សកម្មជនសហជីពអ្នកស្រី រី សុវណ្ណឌី ជាដើម ក្រោយពេលក្រុមកូដករទាំងនោះធ្វើកូដកម្មទាមទារឲ្យថៅកែក្រុមហ៊ុនណាហ្គាវើលដ៍ដោះស្រាយវិវាទការងារជាមួយខ្លួននាពេលកន្លងមក។
មាត្រា៣៥ នៃរដ្ឋធម្មនុញ្ញ ចែងថា ពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយសេដ្ឋកិច្ច សង្គម និងវប្បធម៌របស់ប្រទេសជាតិ ខណៈសេចក្តីស្នើទាំងឡាយរបស់ពលរដ្ឋ ត្រូវបានដោះស្រាយ និងពិនិត្យយ៉ាងហ្មត់ចត់ពីអង្គការរដ្ឋ ប៉ុន្តែរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ បានឃុបឃិតជាមួយក្រុមហ៊ុនណាហ្គាវើលដ៍បំបិទសេរីភាពរបស់ពលរដ្ឋដែលរងនូវការរំលោភបំពានសិទ្ធិការងារទៅវិញ៕