ក្រុមមេដឹកនាំនៃប្រទេសឧស្សាហកម្មជឿនលឿន G-7 គ្រោងពិភាក្សាគ្នាអំពីច្បាប់ថ្មីមួយដែលអាចបើកផ្លូវឲ្យមានការរឹបអូសទ្រព្យសម្បត្តិរបស់រុស្ស៊ី ទំហំ ៣០០ពាន់លានដុល្លារ ដែលស្ថិតក្នុងបញ្ជីនៃការបង្កកក្រោមទណ្ឌកម្មប្រឆាំងក្រុងមូស្គូ ដែលលើកទ័ពលុកលុយប្រទេសអ៊ុយក្រែន។
តាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៩ ខែធ្នូ មេដឹកនាំប្រទេស G-7 នឹងជួបគ្នានៅក្នុងខែកុម្ភៈ ឆ្នាំក្រោយនេះ។
តាមប្រភពដដែលឲ្យដឹងថា ក្រុមមន្ត្រីសហរដ្ឋអាមេរិក និងអង់គ្លេស បានខិតខំធ្វើការរួមគ្នាក្នុងរយៈពេលប៉ុន្មានខែមកនេះ ដើម្បីឈានដល់ការចាត់វិធានការតាមផ្លូវច្បាប់ក្នុងការរឹបអូសទ្រព្យសម្បត្តិរបស់រុស្ស៊ី ដែលត្រូវបានបង្កកនៅក្នុងប្រទេសនានានៅអឺរ៉ុប រួមទាំងនៅលើទឹកដីសហរដ្ឋអាមេរិក ជប៉ុន និងកាណាដា។
គេរំពឹងថា មេដឹកនាំ G-7 អាចព្រមព្រៀងគ្នាចេញសេចក្តីថ្លែងការណ៍រួមក្នុងកិច្ចប្រជុំកំពូលនៅខែកុម្ភៈ ឆ្នាំ២០២៤ ហើយច្បាប់ថ្មីនេះនឹងក្លាយជាវិធានការច្បាប់រឹបអូសទ្រព្យសម្បត្តិប្រទេសណាដែលធ្វើសង្គ្រាមឈ្លានពានដោយខុសច្បាប់ទៅលើប្រទេសមួយដែលមានអធិបតេយ្យភាព។
តាមស្មារតីច្បាប់ថ្មីនេះ នឹងអនុញ្ញាតឲ្យមានការរឹបអូសទ្រព្យសម្បត្តិរបស់ប្រទេសរុស្ស៊ី ដោយផ្អែកលើកាលៈទេសៈជាក់ស្ដែងដូចសព្វថ្ងៃនេះ ដែលប្រទេសនេះធ្វើសកម្មភាពកងទ័ពឈ្លានពានប្រទេសអ៊ុយក្រែន។
សហរដ្ឋអាមេរិកជាអ្នកផ្ដួចផ្ដើមគំនិតដែលទទួលការគាំទ្រពីចក្រភពអង់គ្លេស ជប៉ុន និងកាណាដា បានស្នើឲ្យក្រុមការងារ G-7 បង្កើតលក្ខខណ្ឌច្បាប់ត្រឹមត្រូវមួយអំពីការរឹបអូសទ្រព្យសម្បត្តិរបស់រុស្ស៊ី។
កាលពីសប្ដាហ៍កន្លងមកនេះ សហភាពអឺរ៉ុបក៏បានសម្រេចឱ្យមានការរឹបអូសទ្រព្យសម្បត្តិរបស់ប្រទេសរុស្ស៊ី ដែលមាននៅក្នុងអឺរ៉ុប ហើយនឹងផ្ទេរទ្រព្យសម្បតិ្តទាំងនោះទៅជាហិរញ្ញវត្ថុដើម្បីប្រគល់ឱ្យទៅប្រទេសអ៊ុយក្រែន ដែលគេថាជាការជួយសេដ្ឋកិច្ចអ៊ុយក្រែន ដែលត្រូវបានបំផ្លាញដោយសង្គ្រាមឈ្លានពានពីសំណាក់ប្រទេសរុស្ស៊ី។
តែចំពោះវិធានការរបស់ក្រុមប្រទេស G-7 ដែលជាផែនការរបស់អាមេរិក ធ្វើឡើងចំពេលដែលរដ្ឋការរបស់ប្រធានាធិបតី លោក ចូ បៃដិន កំពុងប្រឈមនឹងការជំទាស់ពីគណបក្សសាធារណរដ្ឋជុំវិញសំណើសុំកញ្ចប់ជំនួយជាង ៦០ពាន់លានដុល្លារបន្ថែមទៀតទៅឱ្យអ៊ុយក្រែន ហើយកំពុងជាប់គាំងនៅព្រឹទ្ធសភា ដែលនាំឱ្យក្រុមមន្ត្រីសេតវិមានព្រមានអំពីផលវិបាករបស់អ៊ុយក្រែន ដែលខ្វះគ្រាប់កាំភ្លើង និងអាវុធប្រឆាំងនឹងការឈ្លានពានពីសំណាក់ប្រទេសរុស្ស៊ី ខណៈរុស្ស៊ីបង្កើនការវាយលុកយ៉ាងខ្លាំង។
ចំពោះអ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova ព្រមានថានឹងសងសឹក បើពួកបស្ចិមប្រទេសហ៊ានរឹបអូសទ្រព្យសម្បត្តិរបស់រុស្ស៊ី នៅក្រៅប្រទេស។ អ្នកស្រីព្រមានថា ទ្រព្យសម្បត្តិរបស់ពួកបស្ចិមប្រទេសនៅលើទឹកដីរុស្ស៊ី ក៏នឹងត្រូវរឹបអូសផងដែរ។ មិនតែប៉ុណ្ណោះ អ្នកស្រីព្រមានថា រុស្ស៊ីនឹងផ្ដាច់ទំនាក់ទំនងការទូតជាមួយប្រទេសទាំងអស់នោះទៀតផង។
ជាមួយនឹងស្ថានភាពកាន់តែអាក្រក់សម្រាប់សេដ្ឋកិច្ចរុស្ស៊ី ដែលរងទណ្ឌកម្មពីក្រុមសម្ព័ន្ធមិត្តបស្ចិមប្រទេស ហើយស្របពេលធនាគារពិភពលោកព្រមានថា ក្នុងឆ្នាំ២០២៤ នេះ សេដ្ឋកិច្ចអាចនឹងដើរដល់ស្ថានភាពដុនដាបកាន់តែធ្ងន់ធ្ងរ ប្រជាជនរុស្ស៊ីជាង ៧៤% បានទាមទារឱ្យលោក ពូទីន បិទបញ្ចប់សង្គ្រាមនៅលើទឹកដីអ៊ុយក្រែន។
ក្នុងសភាពបែបនេះ ក្រុមអ្នកជាតិនិយមរុស្ស៊ី ចាប់ផ្ដើមបន្ទោសលោក ពូទីន ដែលបរាជ័យមិនអាចវាយចូលរដ្ឋធានីគៀវ ហើយជាពិសេសមិនអាចវាយផ្ដួលរំលំការដឹកនាំរបស់លោក ហ្សេឡេនស្គី គឺមិនដូចអ្វីដែលវិមានក្រឹមឡាំងអួតថា រយៈពេលយ៉ាងយូរ ១០ថ្ងៃ វាយយកបានក្រុងគៀវ។
គេនៅចាំបានថា នៅមុនសង្គ្រាមរុស្ស៊ីបង្កទៅលើប្រទេសអ៊ុយក្រែន ការស្ទង់មតិរបស់មជ្ឈមណ្ឌល Levada ក្រុងមូស្គូ បានរកឃើញការគាំទ្រលោក ពូទីន ដែលលើកទ័ពវាយចូលអ៊ុយក្រែន មានផែនការផ្ដួលរំលំរដ្ឋាភិបាលលោក ហ្សេឡេនស្គី មានជិត ៦០%។ តែក្រោយមកទៀត នៅពេលរុស្ស៊ីបាក់ទ័ពផ្ទួនៗក្នុងឆ្នាំ២០២២ អ្នកគាំទ្រសង្គ្រាមរបស់លោក ពូទីន ចាប់ផ្ដើមធ្លាក់ចុះជាលំដាប់ រហូតនៅសល់ជិត ៤០% ប៉ុណ្ណោះ។
ជាថ្មីម្ដងទៀត កាលពីចុងខែវិច្ឆិកា មជ្ឈមណ្ឌល Levada ក្រុងមូស្គូ បានធ្វើការស្ទង់មតិឡើងវិញដោយរកឃើញថា ការគាំទ្រសង្គ្រាមរបស់លោក ពូទីន នៅលើទឹកដីអ៊ុយក្រែន ធ្លាក់មកដល់ក្រោម ៣០%។ តាមការស្ទង់មតិនេះ អ្នកដែលឆ្លើយថាសង្គ្រាមគួរតែបិទបញ្ចប់មានជិត ៦០% ហើយ ៧៤% ឆ្លើយដោយភាពច្បាស់លាស់ថា បើលោក ពូទីន ធ្វើសង្គ្រាមមិនឈ្នះអ៊ុយក្រែនទេ គឺត្រូវតែបញ្ចប់សង្គ្រាម។
មកដល់ពេលនេះ សង្គ្រាមរុស្ស៊ីឈ្លានពានអ៊ុយក្រែន បានចូលដល់ខែទី២២ នេះ រុស្ស៊ីបាត់បង់ទ័ពជាង ៣២ម៉ឺននាក់។ នេះបើតាមភ្នាក់ងារចារកម្មសហរដ្ឋអាមេរិក CIA។ តែសម្រាប់លោក ពូទីន បានថ្លែងថា លោកចង់ឱ្យមានការចរចាឡើងវិញ តែលោកថា អ៊ុយក្រែន និងលោកខាងលិចត្រូវទទួលលក្ខខណ្ឌរបស់រុស្ស៊ី។ ករណីនេះ លោក ហ្សេឡេនស្គី ប្រកាសច្រានចោលដោយទាមទារថា រុស្ស៊ីទេត្រូវទទួលលក្ខខណ្ឌរបស់អ៊ុយក្រែន គឺការដកទ័ពរុស្ស៊ីទាំងស្រុងចេញពីប្រទេសអ៊ុយក្រែន៕