មន្ត្រីជាន់ខ្ពស់របស់គណបក្សភ្លើងទៀន លើកឡើងថា ការចងសម្ព័ន្ធភាពឆ្ពោះទៅមុខរបស់គណបក្សភ្លើងទៀន ជាមួយគណបក្សនយោបាយក្រៅរដ្ឋាភិបាលចំនួន៣ ផ្សេងទៀត គឺពិតជាសមស្របនឹងស្ថានភាពនយោបាយរបស់ប្រទេសកម្ពុជាបច្ចុប្បន្ន ហើយសម្ព័ន្ធភាពនេះក៏មានការសហការគ្នាបានល្អដែរ ក្នុងគោលដៅស្ដារលទ្ធិប្រជាធិបតេយ្យនៅកម្ពុជាទៅថ្ងៃមុខ។
អនុប្រធានគណបក្សភ្លើងទៀន លោក សុន ឆ័យ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៣ ខែមករា ឆ្នាំ២០២៤ នេះថា ដំណើររួបរួមរបស់គណបក្សក្រៅរដ្ឋាភិបាលដែលមានគណបក្សភ្លើងទៀនក្នុងសម្ព័ន្ធភាពនេះ នឹងអនុវត្តតាមគោលការណ៍រួមគ្នាតែមួយ គឺការលើកស្ទួយការគោរពសិទ្ធិមនុស្ស និងស្ដារលទ្ធិប្រជាធិបតេយ្យជាដើម ដូច្នេះនៅពេលដែលគណបក្សក្នុងសម្ព័ន្ធទាំងនេះឯកភាពគ្នាក្នុងការអនុវត្តគោលការណ៍រួមនេះហើយនោះ គឺមានន័យថា សម្ព័ន្ធភាពនេះនឹងមានភាពរឹងមាំយ៉ាងពិតប្រាកដ។
លោក ស៊ុន ឆ័យ លើកឡើងថា បើទោះបីជាសម្ព័ន្ធភាពរវាងគណបក្សទាំង ៤ នេះអាចរៀបចំចងក្រងកម្លាំងនយោបាយ និងអ្នកគាំទ្របានច្រើន និងលឿនកម្រិតណាក៏ដោយ ក៏អាស្រ័យទៅលើស្ថានភាពនយោបាយក្នុងប្រទេសកម្ពុជាមួយផ្នែកធំដែរ ព្រោះថាបើគណបក្សកាន់អំណាចមិនមានចេតនាលើកស្ទួយការគោរពសិទ្ធិមនុស្ស ឬស្ដារលទ្ធិប្រជាធិបតេយ្យទេ នោះដំណើរការនៃសម្ព័ន្ធភាពនេះអាចនឹងមានឧបសគ្គខ្លះដែរ ដែលជាកត្តានាំឱ្យរាំងស្ទះដល់ដំណើរការក្នុងការឆ្ពោះទៅរកគោលដៅរបស់ខ្លួនផងដែរ។
លោក សុន ឆ័យ បញ្ជាក់ថា ការចងសម្ព័ន្ធភាពរវាងគណបក្សភ្លើងទៀន ជាមួយនឹងគណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន គឺជាការសម្រេចចិត្តដ៏ត្រឹមត្រូវបំផុតក្នុងការរួបរួមកម្លាំងអ្នកប្រជាធិបតេយ្យ ក្នុងកាលៈទេសៈនយោបាយរបស់ប្រទេសកម្ពុជានៅពេលនេះ ព្រោះថាស្ថាប័នជាតិទាំងអស់ត្រូវធ្លាក់ទៅក្នុងការគ្រប់គ្រងរបស់បក្សកាន់អំណាចទាំងអស់ទៅហើយ ដូច្នេះគណបក្សដែលតស៊ូដើម្បីលទ្ធិប្រជាធិបតេយ្យ មិនអាចធ្វើនយោបាយតទល់នឹងបក្សកាន់អំណាចដោយឯកឯងបានឡើយ។
ការអះអាងនេះ ធ្វើឡើងបន្ទាប់ពីមានការរិះគន់ជាច្រើនជុំវិញសកម្មភាពគណបក្សភ្លើងទៀន ទាក់ទិននឹងការចងសម្ព័ន្ធភាពជាមួយនឹងគណបក្សក្រៅរដ្ឋាភិបាលផ្សេងទៀតនាពេលកន្លងមកនេះ។
អ្នកស្រាវជ្រាវការអភិវឌ្ឍសង្គម បណ្ឌិត សេង សារី លើកឡើងក្នុងកម្មវិធីជជែកដេញដោលនេះថា ការចងសម្ព័ន្ធរវាងគណបក្សភ្លើងទៀន ជាមួយគណបក្ស ៣ ផ្សេងទៀតនៅពេលនេះ មិនមែនដើម្បីប្រជាធិបតេយ្យ ឬដើម្បីលើកស្ទួយការគោរពសិទ្ធិមនុស្សអ្វីនោះទេ គ្រាន់តែដើម្បីរកវិធីដោះខ្លួនពីភាពទាល់ច្រករបស់គណបក្សភ្លើងទៀនខ្លួនឯង ដែលត្រូវបានរារាំងពីកត្តាផ្លូវច្បាប់រហូតមិនអាចចូលរួមការបោះឆ្នោតបាន ដោយសារតែគណបក្សនេះគ្មានសំបុត្រកំណើតប៉ុណ្ណោះ។
បណ្ឌិត សេង សារី បញ្ជាក់ថា បច្ចុប្បន្ននេះលោកមើលមិនឃើញថា គ្មានគណបក្សណាមួយអាចជាកន្លែងកក់ក្តៅសម្រាប់អ្នកចូលរួមតស៊ូដើម្បីប្រជាធិបតេយ្យនៅឡើយទេ ចំណែកសម្ព័ន្ធភាពរបស់គណបក្សទាំង ៤ នេះ ក៏អាចនឹងឈានដល់ការបែកបាក់នៅក្រោយការបោះឆ្នោតព្រឹទ្ធសភាខាងមុខនេះដែរ។ លើសពីនេះទៀត មន្ត្រីជាន់ខ្ពស់របស់គណបក្សភ្លើងទៀនខ្លះ ក៏អាចនឹងរំលាយបក្សខ្លួនឯង រួចហើយនាំគ្នារត់ទៅជ្រកក្រោមគណបក្សនយោបាយផ្សេងថែមទៀតផង។
យ៉ាងណាក៏ដោយ អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នេះដែរថា ជម្រើសល្អតែមួយគត់សម្រាប់អ្នកប្រជាធិបតេយ្យក្នុងកាលៈទេសៈនេះ គ្មានអ្វីក្រៅពីស្វែងរកការចងសម្ព័ន្ធរវាងគ្នានិងគ្នានោះទេ។ ធ្វើបែបនេះ គឺដើម្បីចៀសវាងពីការធ្វើទុក្ខបុកម្នេញពីបក្សកាន់អំណាច ព្រោះថា ប្រសិនបើគណបក្សប្រជាជនកម្ពុជាចង់គាបសង្កត់គណបក្សណាមួយក្នុងសម្ព័ន្ធនេះ ក៏មិនអាចធ្វើឱ្យប៉ះពាល់ដល់កម្លាំងគាំទ្ររបស់កម្លាំងរួមដែលគណបក្សទាំងនោះបានចងសម្ព័ន្ធនឹងគ្នារួចហើយនេះដែរ។
លោក គឹម សុខ បញ្ជាក់ថា ការចងសម្ព័ន្ធនឹងគ្នានេះ ពិតមែនថាមានភាពយឺតយ៉ាវបន្តិច ប៉ុន្តែមិនមែនឥតប្រយោជន៍ទេ ក្នុងនោះក៏ជាគំរូដ៏ល្អសម្រាប់អ្នកប្រជាធិបតេយ្យក្នុងការស្វែងរកកម្លាំងរួបរួមសម្រាប់ប្រកួតប្រជែងជាមួយបក្សកាន់អំណាចដែរ។ ផ្ទុយទៅវិញ ប្រសិនបើគណបក្សណាមួយព្យាយាមធ្វើនយោបាយតែម្នាក់ឯងរហូតមានកម្លាំងប្រកួតប្រជែងជាមួយបក្សកាន់អំណាច គណបក្សនោះច្បាស់ជាប្រឈមនឹងការធ្វើទុក្ខបុកម្នេញរហូតឈានដល់ការរំលាយជាក់ជាមិនខាន។
កាលពីថ្ងៃទី១១ ខែតុលា ឆ្នាំ២០២៣ គណបក្សចំនួន ៤ បានធ្វើពិធីបង្កើតសម្ព័ន្ធភាពឆ្ពោះទៅអនាគត ដូចជា គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សកែទម្រង់កម្ពុជា និងគណបក្សឆន្ទៈខ្មែរ ដើម្បីប្រមូលកម្លាំងអ្នកប្រជាធិបតេយ្យឡើងវិញ ក្រោយកម្លាំងទាំងនេះបែកខ្ញែកគ្នានាពេលកន្លងមក។
ក្រោយកម្មវិធីចុះហត្ថលេខាចងសម្ព័ន្ធភាព គណបក្សទាំង ៤ បានចេញសេចក្តីថ្លែងការណ៍រួមគ្នាដោយបញ្ជាក់ថា សម្ព័ន្ធភាពឆ្ពោះទៅអនាគត នឹងក្លាយជាកម្លាំងចលករថ្មីមួយសម្រាប់ជាការជំរុញ និងលើកទឹកចិត្ត ព្រមទាំងជាជម្រើសរបស់ពលរដ្ឋខ្មែរក្នុងការកសាងសង្គមប្រជាធិបតេយ្យសម្រាប់ប្រជាជាតិខ្មែរនាពេលអនាគតដ៏រឹងមាំ ហើយសម្ព័ន្ធភាពនេះនឹងបើកចំហសម្រាប់ការចូលរួមពីគ្រប់និន្នាការនយោបាយ និងគណបក្សនយោបាយទាំងអស់ផងដែរ៕