38 C
Phnom Penh

សង្គម​ស៊ីវិល​ចាត់ទុក​ការ​ឃាត់​ខ្លួន​ប្រធាន​ស្ដីទី​បក្ស​ភ្លើង​ទៀន​រាជធានី​ភ្នំពេញ​ដោយ​គ្មាន​ដីកា​គឺជា​ការ​អនុវត្ត​តួនាទី​ផ្ទុយ​ពី​ច្បាប់

ដោយ ឌឹ ខេមបូឌា ដេលី

បទវិភាគ

មន្ត្រី​សង្គម​ស៊ីវិល​ទទួល​បន្ទុក​សិទ្ធិមនុស្ស ចាត់ទុក​ការ​ឃាត់​ខ្លួន​ប្រធាន​ស្ដីទី​គណបក្ស​ភ្លើង​ទៀន រាជធានី​ភ្នំពេញ លោក ខឹម ចាន់វណ្ណៈ ដោយ​គ្មាន​ដីកា​តុលាការ និង​មិន​បង្ហាញ​ឲ្យ​សាច់ញាតិ​ដឹង​ពី​មូលហេតុ​ជាក់លាក់​នៃ​ការ​ឃាត់​ខ្លួន​នោះ គឺជា​ការ​អនុវត្ត​តួនាទី​ផ្ទុយ​ពី​ក្រម​នីតិវិធី​ព្រហ្មទណ្ឌ​របស់​ប្រទេស​កម្ពុជា​ដែល​បាន​ចែង។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​១៦ មករា នេះ​ថា ការ​ឃាត់​ខ្លួន​ជន​ណា​ម្នាក់​ដោយ​គ្មាន​ដីកា​ឃាត់​ខ្លួន និង​មិន​បង្ហាញ​ឲ្យ​សាច់ញាតិ​ដឹង​ពី​មូលហេតុ​ពិតប្រាកដ​នៃ​ការ​ឃាត់​ខ្លួន​នោះ គឺជា​ការ​អនុវត្ត​ផ្ទុយ​ពី​ក្រម​នីតិវិធី​ព្រហ្មទណ្ឌ​របស់​ប្រទេស​កម្ពុជា​ដែល​បាន​ចែង​ទាំងស្រុង ដែល​ជា​សកម្មភាព​មួយ​ធ្វើ​ឱ្យ​ប្រជាពលរដ្ឋ​មើល​ឃើញ​ថា​ជា​ទង្វើ​រំលោភ​បំពាន​ច្បាប់​យ៉ាង​ធ្ងន់ធ្ងរ​ផង​ដែរ។

លោក ស៊ឹង សែនករុណា លើកឡើង​ថា ការ​ឃាត់​ខ្លួន​បុគ្គល​ណា​ម្នាក់ ទោះ​បុគ្គល​រូប​នោះ​ជា​ពលរដ្ឋ​សាមញ្ញ​ទូទៅ ឬ​ជា​សកម្មជន​នយោបាយ ឬ​ជា​សកម្មជន​សង្គម​នានា​ក៏ដោយ សមត្ថកិច្ច​មាន​កាតព្វកិច្ច​អនុវត្ត​តួនាទី​របស់​ខ្លួន​ឱ្យ​ទៅ​តាម​ខ្លឹមសារ​ច្បាប់​ដែល​បាន​ចែង​ជា​ដាច់ខាត ដោយឡែក​ការ​អនុវត្ត​តួនាទី​ដោយ​ខុស​នីតិវិធី​បែប​នេះ ប្រាកដ​ណាស់​ប្រជាពលរដ្ឋ​មុខ​ជា​នឹង​រិះគន់​លើ​រដ្ឋាភិបាល និង​ការ​បំពេញ​តួនាទី​របស់​សមត្ថកិច្ច​ជាមិនខាន។

មន្ត្រី​ជាន់ខ្ពស់​សង្គម​ស៊ីវិល​រូប​នេះ​បញ្ជាក់​ថា អង្គការ​សង្គម​ស៊ីវិល​ដែល​ធ្វើការ​លើ​វិស័យ​ការពារ​សិទ្ធិមនុស្ស តែងតែ​ចង់​ឃើញ​រដ្ឋាភិបាល​បើក​លំហ​សេរីភាព​នយោបាយ ដោយ​បញ្ឈប់​ការ​ធ្វើ​ទុក្ខបុកម្នេញ ការ​ប្រើប្រាស់​អំពើ​ហិង្សា​គ្រប់​រូបភាព និង​ការ​ឃាត់​ខ្លួន​លើ​ពលរដ្ឋ អ្នក​នយោបាយ សកម្មជន​នយោបាយ និង​សកម្មជន​សង្គម ជាដើម ខុសពី​នីតិវិធី​ច្បាប់​បន្ត​ទៀត ដើម្បី​លើក​កម្ពស់​ការ​អនុវត្ត​ច្បាប់​នៅ​កម្ពុជា និង​លើក​ស្ទួយ​ការ​គោរព​សិទ្ធិមនុស្ស​ឱ្យ​មាន​ប្រសិទ្ធភាព​ផង​ដែរ។

លោក ស៊ឹង សែនករុណា អំពាវនាវ​ឱ្យ​រដ្ឋាភិបាល​ថ្មី​របស់​លោក ហ៊ុន ម៉ាណែត ពិចារណា​ឲ្យ​ដោះលែង​លោក ខឹម ចាន់វណ្ណៈ និង​អ្នក​ជាប់​ឃុំ​នយោបាយ​ដទៃ​ទៀត​ឲ្យ​មាន​សេរីភាព​ឡើងវិញ ដើម្បី​ឲ្យ​ពួកគាត់​អនុវត្ត​សិទ្ធិ​សេរីភាព​ជា​មូលដ្ឋាន ជាពិសេស​គឺ​សិទ្ធិ​នយោបាយ​ដែល​មាន​ចែង​ក្នុង​រដ្ឋធម្មនុញ្ញ​របស់​ប្រទេស​កម្ពុជា និង​ដើម្បី​លើក​កម្ពស់​ការ​អនុវត្ត​លទ្ធិប្រជាធិបតេយ្យ​ឱ្យ​កាន់តែ​ល្អ​ប្រសើរ​ទៅ​ថ្ងៃ​មុខ។

ការ​អះអាង​នេះ ធ្វើឡើង​បន្ទាប់ពី​សមត្ថកិច្ច​ក្រុង​ភ្នំពេញ​ចាប់​ខ្លួន​ប្រធាន​ស្ដីទី​គណបក្ស​ភ្លើង​ទៀន រាជធានី​ភ្នំពេញ លោក ខឹម ចាន់វណ្ណៈ ដោយ​គ្មាន​ដីកា​ឃាត់​ខ្លួន​កាលពី​ថ្ងៃ​ចន្ទ ទី​១៥ មករា។

នៅ​ថ្ងៃទី​១៦ ខែ​មករា ឆ្នាំ​២០២៤ នេះ អង្គភាព​អ្នក​នាំពាក្យ​រាជរដ្ឋាភិបាល​កម្ពុជា​បាន​ផ្សព្វផ្សាយ​លិខិត​ចំនួន​ពីរ គឺ​សេចក្តី​ប្រកាស​ព័ត៌មាន​របស់​ស្នងការ​នគរបាល​ជាតិ​ផង និង​ដីកា​បញ្ជា​ឱ្យ​នាំ​ខ្លួន​លោក ខឹម ចាន់វណ្ណៈ របស់​សាលាដំបូង​រាជធានី​ភ្នំពេញ​ផង​ដែរ ក្នុង​នោះ ស្នងការ​នគរបាល​ជាតិ​អះអាង​ថា ការ​ឃាត់​ខ្លួន​លោក ខឹម ចាន់វណ្ណៈ គឺ​ធ្វើឡើង​ដោយ​មាន​ពាក្យ​បណ្តឹង​ពី​ជនរងគ្រោះ ៣​នាក់ ពី​បទ​ក្លែង​បន្លំ​ឯកសារ ស្នាម​មេដៃ និង​ហត្ថលេខា​ក្លែងក្លាយ ជុំវិញ​ការ​ចុះបញ្ជី​បេក្ខជន​ក្រុមប្រឹក្សា​ឃុំ-សង្កាត់​ដោយ​គ្មាន​ការ​អនុញ្ញាត​ពី​សាមី​ខ្លួន។ ចំណែក​ដីកា​របស់​សាលាដំបូង​រាជធានី​ភ្នំពេញ បាន​បញ្ជា​ឱ្យ​នាំ​ខ្លួន​លោក ខឹម ចាន់វណ្ណៈ មក​សាកសួរ​អំពី​ដំណើរ​ក្លែង​បន្លំ​ឯកសារ ស្នាម​មេដៃ និង​ហត្ថលេខា​ក្លែងក្លាយ។

កាលពី​ថ្ងៃទី​១៥ ខែ​មករា ឆ្នាំ​២០២៤ សមត្ថកិច្ច​ក្រុង​ភ្នំពេញ​ប្រមាណ ២០​នាក់ ស្ថិត​ក្នុង​សម្លៀកបំពាក់​ជា​ឯកសណ្ឋាន​កងកម្លាំង​ប្រដាប់​អាវុធ និង​ស៊ីវិល​ចម្រុះ​គ្នា បាន​សម្រុក​ចូល​ផ្ទះ​លោក ខឹម ចាន់វណ្ណៈ និង​ឃាត់​ខ្លួន​ប្រធាន​ស្ដីទី​គណបក្ស​ភ្លើង​ទៀន​រាជធានី​ភ្នំពេញ​រូប​នេះ​ទាំង​កម្រោល​នៅ​ក្នុង​គេហដ្ឋាន​របស់​លោក ស្ថិត​ក្នុង​សង្កាត់​កាកាប ខណ្ឌ​ពោធិ៍សែនជ័យ រាជធានី​ភ្នំពេញ។

លោក ខឹម សុវណ្ណមង្គល ដែល​ត្រូវ​ជា​កូនប្រុស​លោក ខឹម ចាន់វណ្ណៈ អះអាង​ថា ការ​ឃាត់​ខ្លួន​ឪពុក​របស់​លោក​នៅ​ពេល​នេះ សមត្ថកិច្ច​មិន​បាន​បង្ហាញ​ដីកា​ឃាត់​ខ្លួន​របស់​តុលាការ​ទេ។ មិន​តែ​ប៉ុណ្ណោះ សមត្ថកិច្ច​ក៏​បាន​ដកហូត​ទូរសព្ទ​របស់​ឪពុក​លោក និង​ក្រុម​គ្រួសារ​របស់​លោក​ថែម​ទៀត។

ក្រោយពី​លោក ខឹម ចាន់វណ្ណៈ ត្រូវ​ចាប់​ខ្លួន​បាន​ប៉ុន្មាន​ម៉ោង គណបក្ស​ភ្លើង​ទៀន​ក៏​បាន​ចេញ​សេចក្តី​ថ្លែងការណ៍​ភ្លាមៗ​ដែរ ដោយ​ចាត់ទុក​ការ​ចាប់​មន្ត្រី​ជាន់ខ្ពស់​របស់​គណបក្ស​ប្រចាំ​រាជធានី​ភ្នំពេញ​រូប​នេះ គឺជា​រូបភាព​គំរាមកំហែង​ដើម្បី​បំបាក់​ស្មារតី​ប្រជាពលរដ្ឋ​ខ្មែរ មិន​ឲ្យ​ចូលរួម​សកម្មភាព​នយោបាយ​ជាមួយ​គណបក្ស​ភ្លើង​ទៀន និង​ជា​ការ​ធ្វើ​ឲ្យ​បរិយាកាស​នយោបាយ​មុន​ការ​បោះឆ្នោត​អសកល​ក្នុង​ឆ្នាំ​២០២៤ នេះ រឹតតែ​មាន​ភាព​អាប់អួរ។

គណបក្ស​ភ្លើង​ទៀន ថ្កោលទោស​ដាច់អហង្ការ​ចំពោះ​ទង្វើ​អាជ្ញាធរ​ក្រុង​ភ្នំពេញ​ដែល​អនុវត្ត​តួនាទី​ចាប់​ខ្លួន​ប្រធាន​ស្តីទី​គណៈកម្មាធិការ​ប្រតិបត្តិ​គណបក្ស​ភ្លើង​ទៀន រាជធានី​ភ្នំពេញ ដោយ​មិន​មាន​ដីកា​របស់​តុលាការ ក្នុង​នោះ​គណបក្ស​ភ្លើង​ទៀន ទាមទារ​ឱ្យ​អាជ្ញាធរ​មាន​សមត្ថកិច្ច​ដោះលែង​លោក ខឹម ចាន់វណ្ណៈ ឲ្យ​មាន​សេរីភាព​ឡើងវិញ​ជាបន្ទាន់ ដោយ​ឥត​លក្ខខណ្ឌ និង​បញ្ឈប់​ការ​ចាប់​ខ្លួន ការ​ឃុំ​ខ្លួន ការ​គំរាមកំហែង និង​ការ​ធ្វើ​ទុក្ខបុកម្នេញ​តាម​គ្រប់​រូបភាព​មក​លើ​ថ្នាក់​ដឹកនាំ សមាជិក និង​សកម្មជន​គណបក្ស​ភ្លើង​ទៀន​ផង​ដែរ។

សារព័ត៌មាន The Cambodia Daily នៅ​ពុំ​ទាន់​អាច​ទាក់ទង​អ្នក​នាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សំ វិច្ឆិកា ដើម្បី​បំភ្លឺ​ពី​បញ្ហា​នេះ​បាន​នៅឡើយ​ទេ​រហូត​ដល់​ម៉ោង​ផ្សាយ​នេះ។

រដ្ឋាភិបាល​កម្ពុជា​ស្ថិត​ក្រោម​ការ​ដឹកនាំ​របស់​គណបក្ស​ប្រជាជន​កម្ពុជា ដែល​បន្ត​ការ​គ្រប់គ្រង​ពី​លោក ហ៊ុន សែន មក​ដល់​លោក ហ៊ុន ម៉ាណែត ត្រូវ​គេ​មើល​ឃើញ​ថា ស្ថានភាព​នៃ​ការ​រឹតត្បិត​សេរីភាព​របស់​ពលរដ្ឋ និង​សិទ្ធិ​នយោបាយ នៅតែ​មាន​ភាព​ចង្អៀត​ដដែល។ ជាក់ស្តែង ក្រោយពី​លោក ហ៊ុន ម៉ាណែត ឡើង​កាន់​អំណាច​ជា​នាយករដ្ឋមន្ត្រី​ជាង ៤​ខែ​មក​នេះ ក្នុង​នោះ​ការ​រឹតត្បិត​សេរីភាព​ចាប់ផ្តើម​លេច​ចេញ​ជា​បណ្តើរៗ​នៅ​ដើម​ឆ្នាំ​នេះ ដូចជា ការ​ចាប់​ខ្លួន​លោក នី ណាក់ ការ​ឃាត់​ខ្លួន​សកម្មជន​ចលនា​មាតា​ធម្មជាតិ​ដែល​ផ្សព្វផ្សាយ​ពី​ការ​ការពារ​កោះកុង​ក្រៅ និង​ការ​ចាប់​ខ្លួន​លោក ខឹម ចាន់វណ្ណៈ នៅ​ពេលនេះ​ជាដើម។

របាយការណ៍​ស្ដីពី​នីតិរដ្ឋ​ឆ្នាំ​២០២៣ នៃ​គម្រោង​យុត្តិធម៌​ពិភពលោក (The World Justice Project) បាន​ដាក់​ចំណាត់ថ្នាក់​លេខ​១៤១ ក្នុង​ចំណោម​ប្រទេស​១៤២ ដល់​កម្ពុជា ដោយសារតែ​គេ​រក​ឃើញ​ពី​ការ​ដឹកនាំ​គ្មាន​តម្លាភាព ការ​គំរាមកំហែង​សិទ្ធិ​ជា​មូលដ្ឋាន​របស់​ពលរដ្ឋ និង​ការ​មិន​ធានា​បាន​នូវ​ប្រព័ន្ធ​យុត្តិធម៌​របស់​ខ្លួន​តាម​ផ្លូវ​តុលាការ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស