អគ្គលេខាធិការអង្គការណាតូ (NATO) លោក Jen Stoltenberg ទទូចម្ដងទៀតឱ្យអ្នកនយោបាយសហរដ្ឋអាមេរិក ត្រូវតែប្រុងប្រយ័ត្ន គឺមិនត្រូវបណ្ដោយឱ្យអ៊ុយក្រែន ធ្លាក់ដៃក្នុងសង្គ្រាមឈ្លានពានរបស់រុស្ស៊ី នោះទេ។
បើតាមមេដឹកនាំណាតូរូបនេះ ឲ្យដឹងថា ពេលនេះរុស្ស៊ីកំពុងតែឡើងដៃក្នុងសង្គ្រាមអ៊ុយក្រែន ព្រោះតែមេដឹកនាំផ្ដាច់ការទាំងឡាយផ្ដល់ជំនួយឱ្យរុស្ស៊ី ហើយពួកគេនៅតែសម្លឹងមើលមិនដាក់ភ្នែកក្នុងសង្គ្រាមនេះ ហាក់បីដូចជាចង់ឃើញរុស្ស៊ី ឈ្នះសង្គ្រាមអ៊ុយក្រែន ដែលជាការវាយបំបាក់ពួកបស្ចិមប្រទេស។
លោកទទូចឱ្យសមាជិកសភាសហរដ្ឋអាមេរិក រៀបចំខ្លួនពង្រឹងស្មារតីឡើងវិញ ប្រយុទ្ធដើម្បីសេរីភាពសម្រាប់ប្រជាជនអ៊ុយក្រែន ក៏ដូចជាដើម្បីអឺរ៉ុបទាំងមូល ហើយថាបើពុំនោះទេ វានឹងក្លាយជាបទពិសោធន៍ដ៏គ្រោះថ្នាក់បំផុត បើអនុញ្ញាតឱ្យអ៊ុយក្រែន ចាញ់សង្គ្រាមមែននោះ។
ការថ្លែងរបស់ប្រមុខណាតូរូបនេះ កើតមានឡើងក្នុងពេលអាមេរិកកំពុងជួបវិបត្តិដោយសារតែសមាជិកសភាមកពីគណបក្សសាធារណរដ្ឋ បន្ថយជំនួយឱ្យអ៊ុយក្រែន ហើយមិនតែប៉ុណ្ណោះ បែរជាមិនទទួលយកកញ្ចប់ជំនួយរបស់រដ្ឋការរបស់លោក ចូ បៃដិន ដែលថាការផ្ដល់ជំនួយនាពេលកន្លងមកមានច្រើនហួសហេតុទៅហើយ។
តែយ៉ាងណា ប្រមុខណាតូអះអាងថា ប្រទេសនៅអឺរ៉ុបបើទោះមិនស្មើនឹងអាមេរិក ក៏គេនៅតែរួបរួមគ្នាជួយអ៊ុយក្រែន ដែរ។
លោកជំរុញឱ្យអាមេរិកបន្តដើរតួនាទីធំ និងមិនត្រូវឱ្យរុស្ស៊ីឈ្លានពានអ៊ុយក្រែនឈ្នះសង្គ្រាមនោះទេ។
ដំណាក់កាលចុងក្រោយនេះ គេឃើញប្រទេសនៅអឺរ៉ុបកំពុងតែមមាញឹកផ្គត់ផ្គង់អាវុធឲ្យអ៊ុយក្រែន ដូចជា បារាំង អាល្លឺម៉ង់ ហុឡង់ដ៍ បែលហ្សិក ដាណឺម៉ាក រូម៉ានី ហើយសូម្បីតែសហភាពអឺរ៉ុប មិនមែនជាផ្នែកមួយនៃយោធាក៏ដោយ ក៏កំពុងតែផលិតគ្រាប់កាំភ្លើងធំរាប់លានគ្រាប់សម្រាប់អ៊ុយក្រែន ដែរ។
ក្នុងពេលនេះ អ៊ុយក្រែន កំពុងតែទន់ដៃក្នុងការប្រយុទ្ធនឹងរុស្ស៊ី ហើយមូលហេតុគឺដោយសារតែសហរដ្ឋអាមេរិកបន្ថយជំនួយឱ្យអ៊ុយក្រែន។
ប្រមុខយោធាណាតូ ព្រមានថា ប្រទេសលោកសេរីទាំងឡាយមិនត្រូវទុកឱកាសឱ្យរុស្ស៊ីវាយយកអ៊ុយក្រែន នោះទេ បើដូច្នេះមែន មុខជាសង្គ្រាមផ្សេងទៀតអាចនឹងផ្ទុះឡើង ហើយថាចិនក៏កំពុងតែសម្លឹងមិនដាក់ភ្នែកនោះដែរ។
លោកបន្តថា ពេលនេះចិនក៏កំពុងតែបញ្ជូនអាវុធទៅឲ្យរុស្ស៊ី ដើម្បីយកឈ្នះអ៊ុយក្រែន ដែរ ពីព្រោះចិនច្បាស់ណាស់នឹងលើកទ័ពលុកលុយចូលកោះតៃវ៉ាន់ នៅពេលរុស្ស៊ី អាចយកឈ្នះអ៊ុយក្រែន។
លោកថា តាមពិត ឱកាសដែលចិនចង់លុកលុយចូលកោះតៃវ៉ាន់ ក៏នៅដំណាលគ្នានឹងរុស្ស៊ី ឈ្លានពានអ៊ុយក្រែន ផងដែរ តែថាចិនលុកលុយតៃវ៉ាន់ម្ដេចនឹងកើត បើរុស្ស៊ីមិនទាន់ឈ្នះសង្គ្រាមលើអ៊ុយក្រែន ផងនោះ។
លោកថា បើរុស្ស៊ីឈ្នះលើអ៊ុយក្រែន នោះ រុស្ស៊ីនឹងបង្ហាញកម្លាំងរួបរួមនឹងចិន ហើយចិននឹងលុកលុយតៃវ៉ាន់។
អង្គការណាតូ មិនដែលចាត់ទុកតៃវ៉ាន់ ជាដែនកោះទន់ខ្សោយនោះទេ គឺមានសមត្ថភាពការពារខ្លួន តែមិនអាចប្រៀបធៀបបាននឹងចិន នោះទេ។ តៃវ៉ាន់ដែលចិនចាត់ទុកថាជាកោះអាណាខេត្តរបស់ខ្លួននោះ មានទ័ពត្រឹមតែ ៣០ម៉ឺននាក់ប៉ុណ្ណោះ បើធៀបនឹងចិន មានទ័ពរាប់លាននាក់។
យ៉ាងណាមិញ តៃវ៉ាន់មានសព្វាវុធច្រើនទៅហើយដែលជាសព្វាវុធផលិតនៅសហរដ្ឋអាមេរិក ដូចជាមីស៊ីលផ្លោង រថក្រោះ កាំភ្លើងធំ ក៏ដូចជាយន្តហោះចម្បាំង F-16 រាប់រយគ្រឿងដែលតៃវ៉ាន់មាននៅក្នុងដៃផងដែរ។
បើទោះជាយ៉ាងនេះក្ដី លោក Stoltenberg នៅតែទទូចសុំឱ្យសហរដ្ឋអាមេរិកការពារប្រជាធិបតេយ្យដែនកោះមួយនេះរហូតដល់ដំណាក់កាលដែលក្រុងប៉េកាំង បញ្ឈប់ការគំរាមកំហែងកោះតៃវ៉ាន់។
សហរដ្ឋអាមេរិកតែងតែព្រមានចិន ថា កុំបង្កសង្គ្រាមវាយតៃវ៉ាន់ ឱ្យសោះ ហើយថាអាមេរិកមិនអាចឈរឱបដៃមើលតៃវ៉ាន់ត្រូវគេឈ្លានពាននោះទេ គឺអាចអន្តរាគមន៍ជួយកងទ័ពតៃវ៉ាន់។
លោក បៃដិន ប្រាប់លោក ស៊ី កន្លងមកថា លោកទទួលស្គាល់នយោបាយចិនតែមួយ តែមិនអត់ឱនការវាយប្រហារតៃវ៉ាន់នោះទេ។
តៃវ៉ាន់នាពេលនេះមានប្រធានាធិបតីថ្មី គឺលោក ឡៃ ជិងតេ។ លោក ឡៃ ជិងតេ ជាអ្នកនយោបាយមកពីគណបក្សរបស់អ្នកស្រី សៃ អ៊ឹងវិន ដែលកន្លងមកបានបញ្ជូនលិខិតសុំកម្លាំងជំនួយរបស់សហរដ្ឋអាមេរិក។ បុរសនេះត្រូវចិន ចាត់ទុកថាជាមេនយោបាយដែលមាននិន្នាការជ្រុលនិយម។ ចិន ហៅបុរសនេះថាជាមេក្រុមឧទ្ទាមទៀតផង។
កាលពីអំឡុងការឃោសនារកសំឡេងឆ្នោត មេដឹកនាំថ្មីតៃវ៉ាន់រូបនេះបានប្រាប់ប្រជាពលរដ្ឋតៃវ៉ាន់ កុំធ្វើឱ្យតៃវ៉ាន់ក្លាយជាហុងកុង គឺមិនត្រូវជ្រកក្រោមដំបូលប៉េកាំងនោះទេ ព្រោះជាដំបូលបក្សកុម្មុយនីស្ត។
លោកទទូចថា តៃវ៉ាន់មានស្មារតីដើម្បីការពារប្រជាធិបតេយ្យ និងសេរីភាពរបស់ខ្លួន។ តៃវ៉ាន់តែងតែត្រៀមខ្លួនគ្រប់កាលៈទេសៈដើម្បីការពារសេរីភាពនេះ។
យ៉ាងណា ប្រមុខយោធាណាតូ សង្ឃឹមថា សហរដ្ឋអាមេរិកនឹងមិនបោះបង់ចោលអ៊ុយក្រែន ហើយទុកឱកាសឱ្យរុស្ស៊ីឈ្នះអ៊ុយក្រែន ផ្ដល់លទ្ធភាពឱ្យចិន មានឱកាសឈ្លានពានតៃវ៉ាន់ នោះទេ៕