ក្រុមកូដករនៃក្រុមហ៊ុនណាហ្គាវើលដ៍ ស្នើឱ្យតុលាការ នាយករដ្ឋមន្ត្រី ថៅកែណាហ្គាវើលដ៍ និងរដ្ឋមន្ត្រីក្រសួងការងារ ផ្តល់យុត្តិធម៌ឱ្យក្រុមខ្លួន និងស្នើឱ្យដោះលែងកញ្ញា ឈឹម ស៊ីថរ ព្រមទាំងទទួលយកកម្មករដែលត្រូវបានបញ្ឈប់ ឱ្យបានចូលធ្វើការវិញ បន្ទាប់ពីពួកគេស្វែងរកយុត្តិធម៌អស់រយៈពេលជាង ២ឆ្នាំមិនបានផល។
ក្រុមកូដករក្រុមហ៊ុនណាហ្គាវើលដ៍ជាង ២០នាក់ បានប្រមូលផ្តុំគ្នានៅមុខក្រុមហ៊ុនបនល្បែងស៊ីសងណាហ្គាវើលដ៍២ កាលពីថ្ងៃទី១៤ ខែកុម្ភៈ ឆ្នាំ២០២៤ ដោយកាន់បដាមានសរសេរអក្សរ ដូចជា LRSU តំណាងឱ្យសិទ្ធិការងារ មានសហជីព មានសិទ្ធិការងារ Naga World Don’t Use $ to Buy Rights ដែលប្រែថា ណាហ្គាវើលដ៍ កុំប្រើលុយដុល្លារទិញសិទ្ធិ កាន់រូបថតកញ្ញា ឈឹម ស៊ីថរ និងកាន់ផ្កាកុលាបតំណាងឱ្យថ្ងៃនៃក្តីស្រឡាញ់ ១៤កុម្ភៈ ផងដែរ។
ក្រុមកូដករទាំងនោះលើកឡើងថា មានតែសហជីពប៉ុណ្ណោះដែលអាចមានសិទ្ធិពេញលេញក្នុងការការពារសិទ្ធិកម្មករនិយោជិតដែលប្រឈមនឹងការរំលោភបំពាននៅកន្លែងធ្វើការ ប៉ុន្តែអស់រយៈពេលជាង ២ឆ្នាំហើយដែលសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ត្រូវបានថៅកែក្រុមហ៊ុនបនល្បែងណាហ្គាវើលដ៍ធ្វើទុក្ខបុកម្នេញក្នុងចេតនាដើម្បីរំលាយ ដោយការបញ្ឈប់សមាជិក និងថ្នាក់ដឹកនាំសហជីព រួមទាំងបានចោទ ប្តឹង និងចាប់ឃុំប្រធានសហជីពកញ្ញា ឈឹម ស៊ីថរ ដាក់ពន្ធនាគារទាំងអយុត្តិធម៌ថែមទៀត។
ក្រុមកូដករក្រុមហ៊ុនណាហ្គាវើលដ៍ បញ្ជាក់ថា ការទាមទាររបស់កម្មករនិយោជិតឱ្យថៅកែណាហ្គាវើលដ៍ដោះលែងកញ្ញា ឈឹម ស៊ីថរ ទទួលយកកម្មករនិយោជិតឱ្យចូលធ្វើការវិញ បញ្ឈប់ការរើសអើងលើសហជីព និងទម្លាក់រាល់បទចោទលើកម្មករនិយោជិតដែលចូលរួមធ្វើកូដកម្ម មិនមែនជារឿងហួសហេតុដែលភាគីក្រុមហ៊ុនមិនអាចធ្វើបាននោះទេ ប៉ុន្តែការមិនទទួលយកសំណើរបស់កម្មករបែបនេះ គឺដោយសារតែថៅកែក្រុមហ៊ុនណាហ្គាវើលដ៍មានបំណងរំលាយសហជីពឱ្យផុតចេញពីក្រុមហ៊ុនរបស់ពួកគេតែប៉ុណ្ណោះ។
កាលពីថ្ងៃទី៨ ខែមេសា ឆ្នាំ២០២១ កន្លងទៅ ក្រុមហ៊ុនណាហ្គាវើលដ៍បានបញ្ឈប់កម្មករនិយោជិតជាង ១ពាន់នាក់ (១៣២៩នាក់) ក្នុងបំណងរំលាយក្រុមសហជីពក្នុងក្រុមហ៊ុននេះ ក្រោមលេសជួបវិបត្តិជំងឺកូវីដ-១៩ ព្រោះថាបុគ្គលិកទាំងជាង ១ពាន់នាក់នេះ គឺសុទ្ធសឹងតែជាថ្នាក់ដឹកនាំ និងសមាជិកសហជីពដែលតែងតែតវ៉ាទាមទារសិទ្ធិការងារជូនកម្មកររងគ្រោះកន្លងមក។
កម្មករនិយោជិតដែលត្រូវក្រុមហ៊ុនបញ្ឈប់ពីការងារ អះអាងថា ការកាត់បន្ថយបុគ្គលិករបស់ក្រុមហ៊ុននេះក្នុងចេតនាដើម្បីលុបបំបាត់ក្រុមសហជីពដែលតែងតែជួយការពារពីការរំលោភសិទ្ធិការងារពីក្រុមហ៊ុនប៉ុណ្ណោះ មិនមែនដោយសារក្រុមហ៊ុនជួបវិបត្តិកូវីដ-១៩ នោះទេ ត្បិតក្រុមហ៊ុនមានចេតនាគេចវេះពីការផ្តល់ប្រាក់ឈ្នួលឱ្យកម្មករនិយោជិតទៅតាមច្បាប់ការងារដែលបានកំណត់ ដែលតែងតែត្រូវបានជំទាស់ និងតវ៉ាទាមទារដោយក្រុមសហជីពទាំងនោះ។
ក្រោយពីប្រកាសបញ្ឈប់បុគ្គលិកដោយរំលោភលើសិទ្ធិការងារ នៅថ្ងៃទី១៨ ខែធ្នូ ឆ្នាំ២០២១ កម្មករដែលត្រូវបញ្ឈប់ពីការងារ ក៏បាននាំគ្នាធ្វើកូដកម្មទាមទារយុត្តិធម៌តែម្តង ប៉ុន្តែរហូតដល់ដើមឆ្នាំ២០២៤ នេះ គឺមានរយៈពេលជាង ២ឆ្នាំហើយ វិវាទនេះនៅតែគ្មានដំណោះស្រាយដដែល ខណៈប្រធានសហជីពកញ្ញា ឈឹម ស៊ីថរ ក៏ត្រូវបានសមត្ថកិច្ចក្រុងភ្នំពេញចាប់ឃុំខ្លួន និងក្រុមកូដករមួយចំនួនផ្សេងទៀតកំពុងរងនូវបណ្តឹងតាមផ្លូវតុលាការសព្វថ្ងៃនេះ។
សព្វថ្ងៃនេះ ក្រុមកូដករណាហ្គាវើលដ៍ចំនួន ៩នាក់ កំពុងរងនូវបណ្តឹងតាមផ្លូវតុលាការ ក្រោមបទចោទ “ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម” ដូចជា ប្រធានទ្រទ្រង់សិទ្ធិការងារកម្មករខ្មែរ កញ្ញា ឈឹម ស៊ីថរ ថ្នាក់ដឹកនាំសហជីព កញ្ញា ឈឹម សុខន សកម្មជនសហជីពអ្នកស្រី រី សុវណ្ណឌី ជាដើម ក្រោយក្រុមកូដករទាំងនោះធ្វើកូដកម្មទាមទារឲ្យថៅកែក្រុមហ៊ុនណាហ្គាវើលដ៍ដោះស្រាយវិវាទការងារជាមួយខ្លួននាពេលកន្លងមក។
ទាក់ទិននឹងបញ្ហានេះ អង្គការឃ្លាំមើលសិទ្ធិមនុស្សអន្តរជាតិ Human Rights Watch រិះគន់កាលពីពេលកន្លងទៅថា ការមិនអើពើពីសំណាក់រាជរដ្ឋាភិបាលជុំវិញវិវាទនៃក្រុមកូដករណាហ្គាវើលដ៍ និងការចោទប្រកាន់របស់តុលាការចំពោះកម្មករទាំងនេះ បង្ខំឱ្យកម្មកររងគ្រោះទាំងនោះប្រឈមមុខកាន់តែខ្លាំងមួយកម្រិតទៀតជាមួយនឹងអាជ្ញាធរបន្ថែមពីលើការប្រឈមជាមួយនឹងម្ចាស់ក្រុមហ៊ុនណាហ្គាវើលដ៍ ដែលបានរំលោភច្បាប់បញ្ឈប់ពួកគេពីការងារខុសពីលក្ខខណ្ឌច្បាប់ស្ដីពីការងារនៅប្រទេសកម្ពុជាដែលមានចែង៕