ព្រះមហាក្សត្រខ្មែរសម្តេចព្រះបរមនាថ សីហមុនី ត្រាស់បង្គាប់តែងតាំងតួនាទីបន្ថែមដល់ប្រធានតុលាការកំពូល លោក ជីវ កេង ជាសហប្រធានគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ខណៈលោក កេង សុម៉ារិទ្ធ ដែលត្រូវជាកូនប្រុស ក៏ត្រូវបានតែងតាំងជាអគ្គលេខាធិការនៃអគ្គលេខាធិការដ្ឋានគណៈកម្មាធិការនេះដែរ។
ព្រះមហាក្សត្រខ្មែរសម្តេចព្រះបរមនាថ សីហមុនី បានចេញព្រះរាជក្រឹត្យមួយកាលពីថ្ងៃទី៨ ខែកុម្ភៈ ឆ្នាំ២០២៤ ដែលត្រូវបានផ្សព្វផ្សាយនៅថ្ងៃទី១២ កុម្ភៈ សម្រេចត្រាស់បង្គាប់តែងតាំងតួនាទីបន្ថែមដល់ប្រធានតុលាការកំពូល និងជាសមាជិកឧត្ដមក្រុមប្រឹក្សានៃអង្គចៅក្រម លោក ជីវ កេង ជាសហប្រធានគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ដែលមានសមាជិកជិត ៣០នាក់ (២៥នាក់)។
ព្រះមហាក្សត្រខ្មែរបានត្រាស់បង្គាប់ក្នុងព្រះរាជក្រឹត្យមួយផ្សេងទៀតកាលពីថ្ងៃទី៨ ខែកុម្ភៈ ដដែល ដោយតែងតាំងរដ្ឋលេខាធិការនៃក្រសួងយុត្តិធម៌ម្នាក់ដែលត្រូវជាកូនប្រុសបង្កើតរបស់លោក ជីវ កេង គឺលោក កេង សុម៉ារិទ្ធ ជាអគ្គលេខាធិការនៃអគ្គលេខាធិការដ្ឋានគណៈកម្មាធិការដឹកនាំការកែទម្រង់ប្រព័ន្ធយុត្តិធម៌នេះឱ្យមានឋានៈស្មើរដ្ឋមន្ត្រីផងដែរ។
ការតែងតាំងសមាសភាពមន្ត្រីរដ្ឋាភិបាលសម្រាប់អាណត្តិថ្មីនេះ ត្រូវគេមើលឃើញថាជាការរៀបចំសែស្រឡាយពូជពង្សវង្សត្រកូលអ្នកមានអំណាច ដើម្បីគ្រប់គ្រងស្ថាប័នរដ្ឋពីឪពុកទៅកូន ដើម្បីរក្សាអំណាចក្រុមគ្រួសារ និងបក្ខពួកប៉ុណ្ណោះ។
កម្ពុជាស្ថិតនៅក្រោមការត្រួតត្រាអស់រយៈពេលជាង ៤០ឆ្នាំរបស់លោក ហ៊ុន សែន ត្រូវគេមើលឃើញថា ដែនដីសុវណ្ណភូមិមួយនេះកំពុងធ្លាក់ទៅក្នុងការគ្រប់គ្រងតាមបែបគ្រួសារនិយមដូចប្រទេសកុម្មុយនីស្តផ្ដាច់ការទៅហើយសព្វថ្ងៃនេះ។
ជាក់ស្តែង នៅពេលនេះ លោក ហ៊ុន សែន បានបង្ហាញពីអំណាចចាត់ចែងក្នុងនាមជាឪពុកនាយករដ្ឋមន្ត្រីនៃប្រទេសកម្ពុជា ដែលគាត់បានលើកបន្តុបនៅក្រោយការបោះឆ្នោតកាលពីថ្ងៃទី២៣ ខែកក្កដា ឆ្នាំ២០២៣ កន្លងទៅនេះ ដូច្នេះធនធានមនុស្សដែលអាចដឹកនាំប្រទេសឱ្យរីកចម្រើន មិនមានឱកាសនឹងបង្ហាញស្នាដៃរបស់ខ្លួនទេ គឺមានតែបក្ខពួក និងក្រុមគ្រួសារសាច់ញាតិលោក ហ៊ុន សែន ប៉ុណ្ណោះ ដែលអាចចូលទៅក្តោបក្តាប់ប្រព័ន្ធរដ្ឋបាលរបស់ប្រទេសជាតិបាន។
ទាក់ទិននឹងបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ធ្លាប់បានលើកឡើងកាលពីពេលថ្មីៗនេះថា រដ្ឋាភិបាលដែលដឹកនាំដោយលោក ហ៊ុន សែន ដែលបានផ្ទេរទៅឱ្យលោក ហ៊ុន ម៉ាណែត នៅពេលនេះ គ្រាន់តែជាកងកម្លាំងឧទ្ទាមរំលោភច្បាប់ដែលគ្រប់គ្រងដោយគ្រួសារហ៊ុនប៉ុណ្ណោះ មិនមែនជាសមាសភាពរដ្ឋាភិបាលសម្រាប់ដឹកនាំប្រទេសកម្ពុជានោះទេ ព្រោះលោក ហ៊ុន ម៉ាណែត មិនមែនជាធនធានមនុស្សដែលអាចដឹកនាំប្រទេសកម្ពុជាបានឡើយ ក្រៅតែពីទទួលបញ្ជាពីលោក ហ៊ុន សែន ដែលជាឪពុកនោះ។
ក្រោយពីលោក ហ៊ុន ម៉ាណែត ប្រកាសឡើងកាន់តំណែងជានាយករដ្ឋមន្ត្រីបន្តពីលោក ហ៊ុន សែន ដែលជាឪពុក កូនៗនៃមន្ត្រីរដ្ឋាភិបាលរបស់គណបក្សប្រជាជនកម្ពុជាជាច្រើនទៀត ក៏ត្រូវប្រកាសតែងតាំងឱ្យបន្តតំណែងពីឪពុកជាបន្តបន្ទាប់ដែរ ដូចជា លោក ស សុខា កាន់តំណែងជំនួសលោក ស ខេង លោក ទៀ សីហា ជំនួសតំណែងលោក ទៀ បាញ់ និងអ្នកស្រី ជា សិរី ជំនួសតំណែងលោក ជា ចាន់តូ កាន់តំណែងជាអគ្គទេសាភិបាលធនាគារជាតិនៃកម្ពុជា ជាដើម។
ក្រៅពីការរៀបចំតែងតាំងឱ្យជំនួសតំណែងឪពុក កូនៗមន្ត្រីជាន់ខ្ពស់ផ្សេងទៀតក៏ត្រូវបានតែងតាំងឱ្យកាន់តំណែងតាមក្រសួងស្ថាប័ននានាផងដែរ ស្របពេលដែលឪពុករបស់ពួកគេក៏កំពុងកាន់តួនាទីសំខាន់ៗតាមក្រសួងស្ថាប័នដែរនោះ ដូចជា លោក ឌិត ទីណា កូនប្រុសអតីតប្រធានតុលាការកំពូលលោក ឌិត មុន្ទី កាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក សាយ សំអាល់ កូនប្រុសលោក សាយ ឈុំ កាន់តំណែងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងកូនប្រសាប្រុសលោក ជា សុផារ៉ា គឺលោក អ៊ាង សុផាល្លែត កាន់តំណែងជារដ្ឋមន្ត្រីក្រសួងបរិស្ថាន ជាដើម ហើយកូនៗមន្ត្រីរដ្ឋាភិបាលទាំងនេះ គឺសុទ្ធសឹងតែជាសាច់ញាតិប្រទាក់ក្រឡាគ្នារបស់ពួកគេទាំងអស់។
ទាក់ទិននឹងបញ្ហានេះ សមាគមអ្នកសារព័ត៌មានកម្ពុជា ខេមបូចា បានលាតត្រដាងក្នុងសេចក្តីរាយការណ៍ស៊ើបអង្កេតរបស់ខ្លួនកាលពីពេលកន្លងទៅថា ពួកគេបានរកឃើញសែស្រឡាយបក្ខពួករបស់លោក ហ៊ុន សែន ជាច្រើននាក់តាមរយៈបញ្ជីឈ្មោះបេក្ខជនតំណាងរាស្ត្រខាងគណបក្សប្រជាជនកម្ពុជា ដែលមានរហូតដល់ទៅជិត ១ភាគ៤ ដែលត្រូវបានដាក់ឱ្យឈរឈ្មោះជាបេក្ខជនតំណាងរាស្ត្រសម្រាប់ការបោះឆ្នោតកាលពីខែកក្កដា ឆ្នាំ២០២៣ កន្លងទៅនោះ។
សេចក្តីរាយការណ៍ដដែលបង្ហាញថា តាមរយៈបញ្ជីឈ្មោះផ្លូវការនៃបេក្ខជនតំណាងរាស្ត្រសម្រាប់ការបោះឆ្នោតឆ្នាំ២០២៣ គណបក្សប្រជាជនកម្ពុជាបានរៀបចំសាច់ញាតិរបស់ខ្លួនឱ្យឈរឈ្មោះជាបេក្ខជនតំណាងរាស្ត្រយ៉ាងប្រទាក់ក្រឡាចាក់ស្រេះគ្នា ដើម្បីចូលទៅដឹកនាំរដ្ឋាភិបាលថ្មីដែលនឹងចាត់ចែងដោយលោក ហ៊ុន ម៉ាណែត ខណៈមន្ត្រីតាមស្ថាប័នជាន់ខ្ពស់នានា ត្រូវគេមើលឃើញថាត្រូវស្ថិតក្រោមការគ្រប់គ្រងរបស់អ្នកស្រី ប៊ុន រ៉ានី និងលោក ហ៊ុន សែន ផងដែរ ដែលមានន័យថា ឪពុកម្ដាយគ្រប់គ្រងមន្ត្រីជាន់ខ្ពស់ចាស់ៗ ចំណែកកូនគ្រប់គ្រងកូនដែលទើបនឹងត្រូវតែងតាំងថ្មី៕