មន្ត្រីអគ្គនាយកដ្ឋានគយជាច្រើននាក់បានទម្លាយថា អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានសូកប៉ាន់អ្នកស្រី ពេជ ចន្ទមុន្នី ភរិយារបស់លោក ហ៊ុន ម៉ាណែត សុំពន្យារពេលចូលនិវត្តន៍ដល់ឆ្នាំ២០២៨ បន្ទាប់ពីលោកត្រូវបានលោក ហ៊ុន សែន កំណត់ឱ្យចូលនិវត្តន៍នៅឆ្នាំ២០២៥ ខាងមុខនេះ។
ប្រភពដដែលបញ្ជាក់ថា មន្ត្រីគយផ្សេងទៀតក៏បានស្នើសុំពន្យារពេលចូលនិវត្តន៍នេះដែរ តែធ្វើឡើងតាមរយៈលោក គុណ ញឹម ដែលជាហេតុធ្វើឱ្យលោកមេគយកម្ពុជារូបនេះអាចប្រមូលលុយបានប្រមាណជា ៥០លានដុល្លារអាមេរិកត្រឹមតែរយៈពេលប៉ុន្មានសប្តាហ៍ចុងក្រោយនេះ។
មន្ត្រីអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានផ្ញើលិខិតមួយមកកាន់សារព័ត៌មាន The Cambodia Daily ដែលបានរៀបរាប់ក្នុងលក្ខខណ្ឌមិនបញ្ចេញឈ្មោះនៅថ្ងៃទី១ ឧសភា នេះថា លោក គុណ ញឹម កំពុងប្រព្រឹត្តអំពើពុករលួយដោយការប្រមូលលុយដែលមានចំនួនប្រមាណជា ៥០លានដុល្លាអាមេរិកត្រឹមតែរយៈពេលប៉ុន្មានសប្តាហ៍ប៉ុណ្ណោះ ក្រោមរូបភាពធ្វើកំណែទម្រង់ផ្លាស់ប្ដូរមន្ត្រីក្នុងអគ្គនាយកដ្ឋានគយ និងរដ្ឋាករកម្ពុជា ដោយការពន្យារអាយុចូលនិវត្តន៍ និងការផ្លាស់ប្ដូរមន្ត្រីគយពីប៉ុស្តិ៍មួយទៅប៉ុស្តិ៍មួយផ្សេងទៀតនៅទូទាំងប្រទេសសព្វថ្ងៃនេះ។
មន្ត្រីអគ្គនាយកដ្ឋានគយដដែលបានលើកឡើងថា មន្ត្រីក្នុងអគ្គនាយកដ្ឋានគយ និងរដ្ឋាករកម្ពុជា ដែលបានសូកលុយឱ្យលោក គុណ ញឹម ពន្យារពេលចូលនិវត្តន៍ និងផ្លាស់ប្ដូរប៉ុស្តិ៍ប្រចាំការមានចំនួន ១៥០នាក់ ខណៈមន្ត្រីគយប្រមាណជា ៣០០នាក់ទៀត ក៏កំពុងត្រៀមសូកលុយលោក គុណ ញឹម ដើម្បីផ្លាស់ប្ដូរប៉ុស្តិ៍របស់ពួកគេដែរ។
ប្រភពដដែលអះអាងថា ករណីជាក់ស្តែង លោក គុណ ញឹម បានដំឡើងឋានៈលោក កើត សុធារ៉ា ពីប្រធានគយចល័តនៅទូទាំងប្រទេស ឱ្យទៅជាអគ្គនាយករងនៃអគ្គនាយកដ្ឋានគយ និងរដ្ឋាករកម្ពុជា ប៉ុន្តែគាត់បានដំឡើងឋានៈមេគយសាខាខេត្តបន្ទាយមានជ័យ លោក នូ ស៊ីថា ឱ្យមកកាន់តំណែងប្រធានគយចល័តនៅទូទាំងប្រទេសជំនួសវិញ ដែលគេដឹងថា លោក គុណ ញឹម បានទទួលសំណូកពីលោក នូ ស៊ីថា ប្រមាណជា ៤លានដុល្លារអាមេរិក ខណៈតំណែងមេគយសាខាខេត្តបន្ទាយមានជ័យ កំពុងរក្សាទុកឱ្យនៅទំនេរ ដើម្បីរង់ចាំអ្នកហ៊ានដេញថ្លៃចូលកាន់តំណែងនេះ។
មន្ត្រីគយដដែលបញ្ជាក់ថា ភរិយារបស់លោក គុណ ញឹម គឺអ្នកស្រី ប៉ាន់ ត្រាប្រណី មានអំណាចខ្លាំងណាស់ក្នុងអគ្គនាយកដ្ឋានគយ និងរដ្ឋាករកម្ពុជា ក្នុងការផ្លាស់ប្ដូរមន្ត្រីគយទាំងអស់ ខណៈមន្ត្រីគយទាំងនោះក៏ខ្លាចអំណាចជំទាវម្នាក់នេះខ្លាំងណាស់ដែរ ដោយសារតែគាត់អាចដកតំណែងមន្ត្រីគយណាក៏បានតាមទំនើងចិត្ត។ ជាងនេះទៀត ក៏ដោយសារតែអ្នកស្រី ប៉ាន់ ត្រាប្រណី មានទំនាក់ទំនងជិតស្និទ្ធជាមួយអ្នកស្រី ពេជ ចន្ទមុន្នី ភរិយារបស់លោក ហ៊ុន ម៉ាណែត ដែរ។
ទាក់ទិននឹងបញ្ហានេះ សារព័ត៌មាន The Cambodia Daily ធ្លាប់ទទួលបានព័ត៌មានពីផ្ទៃក្នុងរបស់អគ្គនាយកដ្ឋានគយ និងរដ្ឋាករកម្ពុជា កាលពី ១ឆ្នាំមុនថា ប្រធានគយចល័តនៅទូទាំងប្រទេស លោក កើត សុធារ៉ា បានប្រព្រឹត្តនូវអំពើពុករលួយធ្ងន់ធ្ងរ ដោយការប្រមូលលុយមួយថ្ងៃៗយ៉ាងតិច ១សែនដុល្លារអាមេរិកឲ្យលោក គុណ ញឹម ប៉ុន្តែពេលនេះបែរជាលោក គុណ ញឹម ដកតំណែងបញ្ឈរជើងទៅវិញ។
កាលពីអំឡុងឆ្នាំ២០២៣ ប្រភពពីមន្ត្រីគយនៅក្នុងអគ្គនាយកដ្ឋានគយ និងរដ្ឋាករ ក៏បានប្រាប់សារព័ត៌មាន The Cambodia Daily ដែរថា ចាប់តាំងពីចូលកាន់តំណែងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានប្រព្រឹត្តអំពើពុករលួយខ្លាំងក្លាគ្រប់រូបភាពយ៉ាងអនាធិបតេយ្យ។
មន្ត្រីគយទាំងនោះអះអាងថា រៀងរាល់ដើមខែ លោក គុណ ញឹម តែងបើកកិច្ចប្រជុំដើម្បីត្រួតពិនិត្យការងាររបស់ប្រធានប៉ុស្តិ៍ និងប្រធានទីស្នាក់ការគយ ក្នុងការប្រមូលពន្ធ ប៉ុន្តែក្រោយកិច្ចប្រជុំប្រចាំខែ លោក គុណ ញឹម តែងតែទទួលស្រោមសំបុត្រពីមេគយគ្រប់ច្រក គ្រប់ប៉ុស្តិ៍មិនតិចជាង ១០ម៉ឺនដុល្លារនោះទេក្នុងមួយខែៗ គឺមេគយតាមប៉ុស្តិ៍បង់លុយតាមតូចតាមធំ តាមតិចតាមច្រើនចាប់ពី ១ពាន់ដុល្លារដល់ ៥ពាន់ដុល្លារ ឬ ១ម៉ឺនដុល្លារសហរដ្ឋអាមេរិកក្នុងម្នាក់ៗ។
ក្រៅពីការប្រព្រឹត្តអំពើពុករលួយដោយការសូកប៉ាន់ពីមេប៉ុស្តិ៍គយនានា ក៏មានការប្រព្រឹត្តអំពើពុករលួយដោយសារពន្យារពេលចូលនិវត្តន៍ដែរ។ ជាក់ស្តែង លោក ប៉ោ សួន ដែលជាប្រធានក្រុមអនុលោម ជាដើម ក៏ត្រូវបានលោក គុណ ញឹម លួចក្លែងឯកសារសាធារណៈកែអាយុមន្ត្រីអនុលោមរូបនេះពីឆ្នាំកំណើតឆ្នាំ១៩៦៤ មកកើតឆ្នាំ១៩៧៤ វិញដែរ ដែលអាចពន្យារពេលចូលនិវត្តន៍ឱ្យលោក ប៉ោ សួន បានរហូតដល់ទៅដល់ ១០ឆ្នាំទៀត។
ប្រភពដដែលបញ្ជាក់ថា ក្រៅពីការសូកប៉ាន់ពន្យារអាយុចូលនិវត្តន៍ ក៏មានការសូកប៉ាន់ផ្លាស់ប្ដូរប៉ុស្តិ៍ប្រចាំការដែរ ក្នុងនោះ ការប្ដូរប៉ុស្តិ៍ល្មមៗដូចជាកម្រិត ឬថ្នាក់ការិយាល័យ នាយកដ្ឋាន ឬសាខាគយខណ្ឌ ជាដើម ក៏ត្រូវចំណាយប្រាក់សូកប៉ាន់យ៉ាងតិច ១០ម៉ឺនដុល្លារដែរ។
រីឯប៉ុស្តិ៍មេគយរាជធានីភ្នំពេញ និងមេគយខេត្ត ដូចជាខេត្តព្រះសីហនុ និងខេត្តបន្ទាយមានជ័យ ដែលជាកន្លែងអាចប្រព្រឹត្តអំពើពុករលួយបានច្រើន ត្រូវបានសូកប៉ាន់ចាប់ពី ១លាន ៥សែនទៅ ២លានដុល្លារអាមេរិក។
លោក គុណ ញឹម ដែលជាប្រតិភូរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ត្រូវគ្រប់អាយុចូលនិវត្តន៍ចាប់តាំងពីថ្ងៃទី២៥ ខែមករា ឆ្នាំ២០២១ មកម្ល៉េះ ប៉ុន្តែលោកត្រូវបានលោក ហ៊ុន សែន ដែលជានាយករដ្ឋមន្ត្រីកម្ពុជានៅពេលនោះ ប្រកាសឲ្យបន្តតំណែងរហូតដល់ឆ្នាំ២០២៥ ដោយសារតែលោក គុណ ញឹម ជាមនុស្សដែលគាត់ជឿទុកចិត្តផង និងជាមនុស្សជំនិតរបស់លោក អូន ព័ន្ធមុនីរ័ត្ន ផង ប៉ុន្តែនៅពេលនេះ លោក គុណ ញឹម ត្រូវបានក្រុមមន្ត្រីគយរាយការណ៍មកថា លោកបានសូកប៉ាន់អ្នកស្រី ពេជ ចន្ទមុន្នី ភរិយារបស់លោក ហ៊ុន ម៉ាណែត សុំពន្យារពេលចូលនិវត្តន៍ចំនួន ៣ឆ្នាំទៀត៕