30 C
Phnom Penh

ប្រព័ន្ធ​ផ្សព្វផ្សាយ​និង​អ្នក​សារព័ត៌មាន​ឯករាជ្យ​នៅតែ​បន្ត​ប្រឈម​នឹង​ឧបសគ្គ​ក្នុង​ការ​បំពេញ​វិជ្ជាជីវៈ​របស់​ខ្លួន​បន្ទាប់​ពី​រដ្ឋាភិបាល​បង្ក្រាប​ដូច​ភ្លៀង​រលឹម​នៅ​ខែ​វស្សា

ដោយ ឌឹ ខេមបូឌា ដេលី

បទវិភាគ

អត្ថបទ​ដោយ៖ តាំង សារ៉ាដា

ថ្ងៃទី​០៣ ខែ​ឧសភា ឆ្នាំ​២០២៤ ជា​ទិវា​សេរីភាព​សារព័ត៌មាន​ពិភពលោក។ ទិវា​នេះ​ប្រារព្ធ​ឡើង​ដើម្បី​គោរព​ដល់​តួនាទី​ដ៏​សំខាន់​របស់​អ្នក​សារព័ត៌មាន ក្នុង​ការ​នាំ​យក​ព័ត៌មាន​ដែល​ត្រឹមត្រូវ និង​អាច​ទុកចិត្ត​បាន​ដល់​សាធារណជន ពេល​ខ្លះ​ពួកគេ​ប្រឈម​នឹង​គ្រោះថ្នាក់​ដល់​អាយុ​ជីវិត​របស់​ខ្លួន។

នៅ​ក្នុង​ប្រទេស​កម្ពុជា​ឯណេះ​វិញ គេ​សង្កេត​ឃើញ​ថា​ប្រព័ន្ធ​ផ្សព្វផ្សាយ និង​អ្នក​សារព័ត៌មាន​ឯករាជ្យ​នៅតែ​បន្ត​ប្រឈម​នឹង​ឧបសគ្គ​ជាច្រើន​នៅ​ក្នុង​ការ​បំពេញ​វិជ្ជាជីវៈ​របស់​ខ្លួន​ដោយ​សេរី។ ចំណែកឯ​ភាគី​រដ្ឋាភិបាល​នៅតែ​បន្ត​អះអាង​ការពារ​ខ្លួន​ថា ស្ថានភាព​សេរីភាព​សារព័ត៌មាន​នៅ​កម្ពុជា​ដែល​មាន​ភាព​ល្អ​ប្រសើរ ព្រោះ​មាន​ចំនួន ៧៩,៨% នៃ​អ្នក​សារព័ត៌មាន​ដែល​បាន​ជួប​សម្ភាស បាន​អះអាង​ថា សេរីភាព​សារព័ត៌មាន​នៅ​កម្ពុជា​ក្នុង​ពេល​បច្ចុប្បន្ន​មាន​ភាព​ល្អ​ប្រសើរ​ជាង​ពី​មុន។

នៅ​ថ្ងៃទី​៣ ខែ​ឧសភា ជា​រៀង​រាល់​ឆ្នាំ អង្គការ​សមាគម​អ្នក​សារព័ត៌មាន​នៅ​ទូទាំង​ពិភពលោក តែង​រៀបចំ​ពិធី​ប្រារព្ធ​ទិវា​សេរីភាព​សារព័ត៌មាន។

ទិវា​នេះ​ក៏​ជា​ការ​រំលឹក​ដល់​រដ្ឋាភិបាល​នៅ​ជុំវិញ​ពិភពលោក ឱ្យ​បង្កើន​នូវ​បរិយាកាស​ដែល​សេរីភាព​សារព័ត៌មាន​ត្រូវ​បាន​ផ្ដល់​នូវ​អំណាច និង​ការ​ការពារ ដែល​អាច​ឱ្យ​ប្រព័ន្ធ​ផ្សព្វផ្សាយ និង​អ្នក​សារព័ត៌មាន​ឯករាជ្យ​បំពេញ​តួនាទី​ដ៏​មាន​សារសំខាន់​របស់​ខ្លួន​ដោយ​សេរី មិន​មាន​ការ​បៀតបៀន ឬ​ភ័យខ្លាច​នូវ​ការ​តបត។

ប៉ុន្តែ​នៅ​ប្រទេស​កម្ពុជា​វិញ អ្នក​សារព័ត៌មាន​ឯករាជ្យ​នៅតែ​បន្ត​ប្រឈម​នឹង​ឧបសគ្គ​ជាច្រើន​នៅ​ក្នុង​ការ​បំពេញ​វិជ្ជាជីវៈ​របស់​ខ្លួន។ ចំណែក​អ្នក​សារព័ត៌មាន​ដែល​មាន​និន្នាការ​រណប​នឹង​បក្ស​កាន់​អំណាច និង​អ្នក​មាន​លុយ បាន​បង្កប់​ខ្លួន​ធ្វើការ​នៅ​ក្នុង​ស្ថាប័ន​សារព័ត៌មាន​ឯករាជ្យ ត្រូវ​បាន​ជ្រោមជ្រែង​ឲ្យ​បាន​ទទួល​តួនាទី​គ្រាក់ៗ​នៅ​ក្នុង​ជួរ​រដ្ឋាភិបាល​ដែល​មាន​គោរមងារ​ជា​លោកជំទាវ ឯកឧត្តម ខណៈ​អ្នក​សារព័ត៌មាន​ដែល​ធ្វើការ​ប្រកាន់ខ្ជាប់​នូវ​ឯករាជភាព​របស់​ខ្លួន ខ្លះ​ត្រូវ​បង្ខំ​ចិត្ត​បែកបាក់​គ្រួសារ​ទៅ​ធ្វើការ​នៅ​ក្រៅ​ប្រទេស និង​មួយ​ចំនួន​ទៀត​ក៏​សម្រេច​ចិត្ត​បោះបង់​អាជីព​ជា​អ្នក​សារព័ត៌មាន​ផ្ទាល់​តែម្តង។

អ្នក​សារព័ត៌មាន​ម្នាក់​ដែល​កំពុង​បម្រើ​ការងារ​ឲ្យ​ស្ថាប័ន​សារព័ត៌មាន​ឯករាជ្យ​ដែល​មាន​មូលដ្ឋាន​នៅ​ក្រៅ​ប្រទេស ដែល​កំពុង​ធ្វើការ​ចេញពី​ប្រទេស​ជិតខាង បាន​ថ្លែង​ក្នុង​លក្ខខណ្ឌ​មិន​បញ្ចេញ​ឈ្មោះ បាន​លើកឡើង​ថា អ្នក​សារព័ត៌មាន​នៅ​កម្ពុជា​ត្រូវ​បាន​អ្នក​នយោបាយ និង​អ្នកជំនួញ​ព្យាយាម​បំបែក​ឲ្យ​ចែក​ចេញ​ជា​ពីរ​ប្រភេទ បន្ទាប់ពី​បោះឆ្នោត​នៅ​ឆ្នាំ​២០១៣ រួច​មក គឺ​អ្នក​សារព័ត៌មាន​ដែល​ធ្វើ​ការងារ​ឲ្យ​ស្ថាប័ន​អ្នក​នយោបាយ ឬ​គ្រួសារ​នៃ​អ្នក​នយោបាយ ត្រូវ​បាន​ផ្តល់​សិទ្ធិ​ពេញទី​ក្នុង​ការ​ធ្វើ​សេចក្តី​រាយការណ៍​ព័ត៌មាន ដែល​បង្ហាញ​តែ​សកម្មភាព​ថ្នាក់​ដឹកនាំ​ចុះ​ទៅ​ចែក​អំណោយ ជួប​កម្មករ​កម្មការិនី​រោងចក្រ ប៉ុន្តែ​ពុំ​បាន​រំលេច​នូវ​ព័ត៌មាន​សំខាន់​ទៅ​ដល់​ពលរដ្ឋ​នោះ​ទេ។

ប្រភព​ដដែល​បាន​លើកឡើង​ថា ចំណែក​អ្នក​សារព័ត៌មាន​មួយ​ប្រភេទ​ទៀត​ដែល​ធ្វើការ​ឲ្យ​ស្ថាប័ន​សារព័ត៌មាន​ឯករាជ្យ ដែល​ខិតខំ​ឈ្មុសឈ្មុល​ប្រមូល​ព័ត៌មាន​ពិត​ជូន​ពលរដ្ឋ​គ្រប់​មជ្ឈដ្ឋាន​ទូទៅ ត្រូវ​បាន​ក្រុម​មន្ត្រី​រដ្ឋាភិបាល​ដែល​ប្រឹង​បិទបាំង​ការពិត ធ្វើការ​ចោទប្រកាន់ និង​លាប​ពណ៌​ថា​ជា​ព័ត៌មាន​ដែល​មាន​ចេតនា​ញុះញង់ មួលបង្កាច់​រដ្ឋាភិបាល បើ​ទោះជា​ព័ត៌មាន​នោះ​ធ្វើការ​ប្រកប​ដោយ​វិជ្ជាជីវៈ និង​ក្រមសីលធម៌​ក៏ដោយ។

ប្រភព​ដដែល​បាន​លើកឡើង​ថា អ្នក​សារព័ត៌មាន​ដែល​ធ្វើការ​ប្រកាន់​នូវ​ជំហរ​កណ្តាល នៅ​ពេល​ដែល​បើក​កុំព្យូទ័រ​ធ្វើការ​ម្តងៗ ហាក់ដូចជា​ឃើញ​ទ្វារ​គុក​បើក​ទ្វារ​ចាំ​ទទួល​អ៊ីចឹង​ដែរ ទោះបី​អ្នក​ខ្លះ​ពួន​សម្ងំ​ធ្វើការ​នៅ​ក្រៅ​ប្រទេស​ក៏ដោយ ពីព្រោះ​មន្ត្រី​ចារកម្ម​ស្លៀក​សម្លៀកបំពាក់​ស៊ីវិល តាមដាន​គ្រប់​ទីកន្លែង និង​គ្រប់​ច្រក​ល្ហក។

ប្រភព​ដដែល​ឲ្យ​ដឹង​ថា ភាគី​រដ្ឋាភិបាល​គួរតែ​ទទួល​យក​ការពិត និង​បើក​ចំហ​សេរីភាព​ទៅ​ដល់​អ្នក​សារព័ត៌មាន​គ្រប់​រូប មិនមែន​បើក​ចំហ​សម្រាប់​តែ​អ្នក​សារព័ត៌មាន​ដែល​គាំទ្រ​ខ្លួន​នោះ​ទេ។

សាស្ត្រាចារ្យ​ផ្នែក​សារព័ត៌មាន លោក ម៉ៃ ទិត្យថារ៉ា ដែល​ធ្លាប់​ជា​អ្នក​សារព័ត៌មាន​ស៊ើបអង្កេត​ដ៏​លេចធ្លោ​មួយ​រូប​ឲ្យ​កាសែត​ភ្នំពេញ​ប៉ុស្តិ៍ អះអាង​ថា បើ​តាម​ការ​សង្កេត​របស់​លោក គឺ​អ្នក​សារព័ត៌មាន​វិជ្ជាជីវៈ​ភាគច្រើន​នៅតែ​មិន​អាច​បំពេញ​ការងារ​បាន​ដោយ​រលូន​នោះ​ឡើយ។

លោក​ថា តាម​បទពិសោធន៍​របស់​លោក​កន្លង​ទៅ សារព័ត៌មាន​ដែល​អាច​មាន​ភាព​រលូន​ទៅ​មុខ​បាន គឺ​អាស្រ័យ​ទៅ​លើ​ស្ថានភាព​នយោបាយ។ លោក​បន្ត​ថា បើ​ស្ថានភាព​នយោបាយ​មិន​អំណោយ​ផល​ទេ នោះ​អ្នក​សារព័ត៌មាន​ដែល​មាន​ជំហរ​ឯករាជ្យ នឹង​មាន​ការ​លំបាក។

លោក ម៉ៃ ទិត្យថារ៉ា អះអាង​ថា ចាប់តាំងពី​បោះឆ្នោត​ជាតិ​ឆ្នាំ​២០២៣ កន្លង​មក ក្រោយពី​បិទ​វិទ្យុ VOD លោក​សង្កេត​ឃើញ​ព័ត៌មាន​នៅ​តាម​មូលដ្ឋាន ជាពិសេស​នៅ​តំបន់​ដែល​មាន​ការ​អភិវឌ្ឍ រំលោភ​បំពាន​សិទ្ធិ​ពលរដ្ឋ កម្រ​ឃើញ​ស្ថាប័ន​សារព័ត៌មាន​ក្នុង​ស្រុក​យក​ផ្សព្វផ្សាយ​ណាស់ ជាក់ស្តែង​ដូចជា​ករណី​នៅ​ក្នុង​ខេត្ត​ព្រះវិហារ ជាដើម។

បន្ទប់​ស្ទូឌីយូ​ថត​សំឡេង​របស់​វិទ្យុ​សំឡេង​ប្រជាធិបតេយ្យ វីអូឌី (VOD) នៅ​ថ្ងៃទី​១៣ ខែ​កុម្ភៈ ឆ្នាំ​២០២៣។ TANG CHHIN Sothy / AFP

លោក​ថា នៅ​ពេល​ណា​ដែល​បាត់​សារព័ត៌មាន​ឯករាជ្យ ពលរដ្ឋ​រងគ្រោះ​នឹង​ពិបាក​ក្នុង​ការ​បញ្ជូន​សំឡេង​របស់​ពួកគេ​ទៅ​ដល់​ថ្នាក់​ដឹកនាំ ដើម្បី​ជួយ​រក​ដំណោះស្រាយ ចំណែក​ថ្នាក់​ដឹកនាំ​វិញ​ទទួល​បាន​តែ​ព័ត៌មាន​មួយ​ជ្រុង​តែប៉ុណ្ណោះ។

លោក ម៉ៃ ទិត្យថារ៉ា បាន​ថ្លែង​ថា បើ​តាម​ការ​អង្កេត​របស់​លោក គឺ​ស្ថានភាព​សារព័ត៌មាន​នៅ​កម្ពុជា លោក​មិន​រំពឹង​ថា​នឹង​មាន​ភាព​ប្រសើរ​ឡើង​ដូច​កាលពី​ឆ្នាំ​១៩៩៣ នោះ​ទេ ពីព្រោះ​លោក​ពុំ​ឃើញ​មាន​សញ្ញា​ណា​មួយ​នៃ​ការ​បើក​លំហ​សេរីភាព​សារព័ត៌មាន​នោះ​ទេ ក្រៅតែ​ពី​ការ​ព្យាយាម​បង្ហាញ​ចំនួន​ស្ថាប័ន​សារព័ត៌មាន​ច្រើន ជាពិសេស​ប្រភេទ​សារព័ត៌មាន​អនឡាញ​ដែល​ពេល​ខ្លះ​លោក​សង្កេត​ឃើញ​ថា គ្រាន់តែ​ទីតាំង​ដែល​ខ្លួន​កំពុង​ធ្វើ​សេចក្តី​រាយការណ៍​ក៏​ពុំ​ដឹង​ថា​ស្ថិត​នៅ​ក្នុង​ខេត្ត​ណា​ផង​នោះ ក្រៅតែ​ពី​ការ​សួរ​ប្រភព​ដដែលៗ​រហូត​ពេល​ខ្លះ​គាត់​បាន​តាំង​ខ្លួនឯង​ជា​ព្រះរាជអាជ្ញា ឬ​ជា​ចៅក្រម​ថែម​ទៀត។

ទាក់ទង​ទៅ​នឹង​បញ្ហា​សេរីភាព​សារព័ត៌មាន​នេះ មជ្ឈមណ្ឌល​សិទ្ធិមនុស្ស​កម្ពុជា (CCHR) បាន​ចេញ​សេចក្តី​ថ្លែងការណ៍​កាលពី​ថ្ងៃទី​២៩ ខែ​មេសា ឆ្នាំ​២០២៤ ថា ជា​ការ​គួរ​ឱ្យ​សោកស្តាយ​ដោយ​សង្កេត​ឃើញ​ថា ប្រព័ន្ធ​ផ្សព្វផ្សាយ និង​អ្នក​សារព័ត៌មាន​ឯករាជ្យ​នៅ​កម្ពុជា នៅតែ​បន្ត​ប្រឈម​នឹង​ឧបសគ្គ​ជាច្រើន​នៅ​ក្នុង​ការ​បំពេញ​វិជ្ជាជីវៈ​របស់​ខ្លួន​ដោយ​សេរី និង​គ្មាន​ការ​ដាក់​កំហិត​សិទ្ធិ​របស់​ខ្លួន​នោះ។

ក្រុម​នគរបាល និង​កង​សន្តិសុខ​ហាម​អ្នកកាសែត​មិន​ឱ្យ​ទៅ​ជិត​កន្លែង​ធ្វើ​កូដកម្ម​របស់​កូដករ​ក្រុមហ៊ុន​ណាហ្គា​វើលដ៍ (Naga World) និង​ហាម​ថត​រូបភាព ព្រមទាំង​គំរាម​ដកហូត​កាមេរ៉ា​ប្រសិនបើ​មិន​ធ្វើ​តាម នៅ​ថ្ងៃ​ទី​២៤ ខែ​កុម្ភៈ ឆ្នាំ​២០២២។ (Photo: CCHR)

CCHR អះអាង​ថា ការ​បន្ត​ដៅ​មុខសញ្ញា​ទៅ​លើ​ប្រព័ន្ធ​ផ្សព្វផ្សាយ និង​អ្នក​សារព័ត៌មាន​ឯករាជ្យ​ក្នុង​ការ​អនុវត្ត​សិទ្ធិ​សេរីភាព​ខាង​ការ​បញ្ចេញមតិ ដែល​ជា​សិទ្ធិ​មូលដ្ឋាន​របស់​ពួកគេ នៅតែ​បន្ត​កើត​មាន​នៅ​ក្នុង​សង្គម​កម្ពុជា។

ប្រភព​ដដែល​លើកឡើង​ថា នៅ​ចន្លោះ​ថ្ងៃទី​០១ ខែ​កញ្ញា ឆ្នាំ​២០២២ ដល់​ថ្ងៃទី​៣១ ខែ​សីហា ឆ្នាំ​២០២៣ អ្នក​សារព័ត៌មាន​ច្រើន​ជាង ១៦​នាក់​រង​ការ​យាយី​តាម​ប្រព័ន្ធ​តុលាការ ដោយសារតែ​ការ​រាយការណ៍​ព័ត៌មាន​របស់​ខ្លួន ហើយ​អាជ្ញាបណ្ណ​ប្រព័ន្ធ​ផ្សព្វផ្សាយ​ចំនួន ៥ ត្រូវ​បាន​ដកហូត។

រហូត​មក​ដល់​ពេលនេះ អាជ្ញាធរ​កម្ពុជា​នៅតែ​ខកខាន​ក្នុង​ការ​ស៊ើបអង្កេត​ប្រកប​ដោយ​ប្រសិទ្ធភាព ឯករាជ្យ និង​តម្លាភាព​ចំពោះ​ករណី​ស្លាប់​របស់​អ្នក​សារព័ត៌មាន​ចំនួន ១៥​រូប ដែល​ត្រូវ​បាន​សម្លាប់​ក្នុង​រយៈពេល ២​ទសវត្ស​ចុងក្រោយ​នេះ ហើយ​ជនល្មើស​ក៏​មិន​ទាន់​ត្រូវ​ចាប់​មក​ផ្ដន្ទាទោស​ឱ្យ​ស្រប​តាម​ស្តង់ដារ​សិទ្ធិមនុស្ស​អន្តរជាតិ​នៅឡើយ។

មជ្ឈមណ្ឌល​សិទ្ធិមនុស្ស​កម្ពុជា​អះអាង​ថា នៅ​ក្នុង​បរិបទ​នៃ​ការ​បន្ត​ធ្លាក់​ចុះ​នៃ​បរិយាកាស​ប្រព័ន្ធ​ផ្សព្វផ្សាយ​នៅ​កម្ពុជា ទិវា​សេរីភាព​សារព័ត៌មាន​កាន់តែ​មាន​សារសំខាន់​ក្នុង​ការ​រំលឹក​ថា បើ​គ្មាន​ប្រព័ន្ធ​ផ្សព្វផ្សាយ​សេរី និង​ឯករាជ្យ​នោះ​ទេ លទ្ធិប្រជាធិបតេយ្យ​ក៏​មិន​អាច​រីកចម្រើន​បាន​ដែរ។

ស្រដៀង​គ្នា​នេះ​ដែរ នាយករង​ទទួល​បន្ទុក​ឃ្លាំមើល​សិទ្ធិមនុស្ស​អង្គការ​លីកាដូ លោក អំ សំអាត​ធ្លាប់​ឲ្យ​ដឹង​ថា ស្ថានភាព​សារព័ត៌មាន​នៅ​កម្ពុជា​បន្ត​ស្ថិត​ក្នុង​ស្ថានភាព​គួរ​ឱ្យ​ព្រួយបារម្ភ​នៅឡើយ ក្រោយ​ស្ថាប័ន​កាសែត​ឯករាជ្យ​មួយ​ចំនួន​ត្រូវ​បាន​បិទ ដោយសារ​ការ​បាត់បង់​អាជ្ញាបណ្ណ និង​ផ្អាក​សកម្មភាព​នៅ​ក្នុង​ឆ្នាំ​២០១៧។

លោក អំ សំអាត បាន​លើកឡើង​ថា រដ្ឋាភិបាល​កម្ពុជា​គួរតែ​កែលំអ និង​លើក​កម្ពស់​វិស័យ​សារព័ត៌មាន ដើម្បី​អាច​ឱ្យ​វិស័យ​នេះ​ចូលរួម​ចំណែក​ក្នុង​ការ​អភិវឌ្ឍ​ប្រទេស​ជាតិ ក៏ដូចជា​លើក​កម្ពស់​សិទ្ធិមនុស្ស​នៅ​កម្ពុជា។

លោក អំ សំអាត ​​​ប្រធាន​​​ផ្នែក​​​ឃ្លាំ​​​មើល​​​និង​​​ការ​​​ពារ​​​សិទ្ធិ​​​មនុស្ស​​​នៃ​​​អង្គការ​​​លីកាដូ និយាយ​​​ទៅកាន់​​​អ្នកកាសែត​​​នៅ​​​ខាង​​​ក្រៅ​​​សាលា​​​ដំបូង​​​រាជធានីភ្នំពេញ ​។

លោក​ថា ការ​ផ្ដល់​សេរីភាព​ពេញលេញ​សម្រាប់​ក្រុម​អ្នក​សារព័ត៌មាន​ឯករាជ្យ ជា​គ្រឹះ​ដ៏​មាន​សារសំខាន់​នៅ​ក្នុង​សង្គម​ប្រកាន់​របប​លទ្ធិប្រជាធិបតេយ្យ។ លោក​ចង់​ឱ្យ​មាន​ស្ថាប័ន​សារព័ត៌មាន​ឯករាជ្យ ធ្វើការ​ដោយ​គ្មាន​ការ​បំភិតបំភ័យ ដើម្បី​ជួយ​ឆ្លុះបញ្ចាំង​អំពី​ការពិត​នៅ​ក្នុង​សង្គម និង​ជួយ​ផ្ដល់​ព័ត៌មាន​ចម្រុះ​បែប​ដល់​រដ្ឋាភិបាល​ដោះស្រាយ​បញ្ហា​ប្រឈម​ជូន​ពលរដ្ឋ។

ទាក់ទិន​នឹង​បញ្ហា​នេះ នៅ​មុន​ការ​បោះឆ្នោត​ជាតិ​កាលពី​ខែ​កក្កដា ឆ្នាំ​២០២៣ រដ្ឋាភិបាល​កម្ពុជា​បាន​បញ្ជា​ឱ្យ​អ្នក​ផ្គត់ផ្គង់​សេវា​អ៊ីនធឺណិត​ក្នុង​ប្រទេស​កម្ពុជា រាំង​ខ្ទប់​គេហទំព័រ​សារព័ត៌មាន​មួយ​ចំនួន ដូចជា​សារព័ត៌មាន The Cambodia Daily វិទ្យុ​អាស៊ីសេរី និង​គេហទំព័រ​កំណត់ត្រា។

គេហទំព័រ​កំណត់ត្រា គឺជា​បណ្ដុំ​ព័ត៌មាន​របស់​សារព័ត៌មាន វីអូឌី ដែល​ជា​គេហទំព័រ​មួយ​ត្រូវ​បាន​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) ដាក់​ឱ្យ​ដំណើរការ​កាលពី​ខែ​មិថុនា ឆ្នាំ​២០២៣ កន្លង​ទៅ។

ការ​បិទ​សំឡេង​ជំទាស់ ឬ​សារព័ត៌មាន​ឯករាជ្យ​ចោល​នោះ បាន​នាំ​ឲ្យ​ប្រព័ន្ធ​ផ្សព្វផ្សាយ​ផ្សេង​ទៀត​នៅ​កម្ពុជា រួម​មាន​ទូរទស្សន៍ វិទ្យុ និង​កាសែត ត្រូវ​បាន​គណបក្ស​កាន់​អំណាច​គ្រប់គ្រង​យ៉ាង​ណែន​ក្នុង​ដៃ។ ក្រុមហ៊ុន​ប្រព័ន្ធ​ផ្សព្វផ្សាយ​ធំៗ​បំផុត មិន​តិច​ជាង ៥ ទេ ដែល​កំពុង​ដំណើរការ​នៅ​ក្នុង​ប្រទេស ហើយ​អ្នក​គ្រប់គ្រង​ក្រុមហ៊ុន​ទាំងនោះ​សុទ្ធសឹងតែ​ជា​មន្ត្រី​មាន​អំណាច និង​មន្ត្រី​ជំនិត​របស់​រដ្ឋាភិបាល។

ផ្ទាំង​វេបសាយ​របស់​សារព័ត៌មាន ឌឹ ខេមបូឌា ដេលី វិទ្យុ​អាស៊ីសេរី និង​វេបសាយ​កំណត់ត្រា​ដែល​ចេញ​ផ្សាយ​ដោយ CCIM។ (Screenshot)

ជាង​នេះ​ទៅ​ទៀត រដ្ឋាភិបាល​កម្ពុជា​ដែល​កំពុង​ដឹកនាំ​ដោយ​ត្រកូល​ហ៊ុន បាន​ប្រមូល​យក​អ្នក​ព័ត៌មាន​ជាច្រើន​ឲ្យ​ចូលរួម​ក្នុង​ជីវភាព​នយោបាយ​របស់​បក្ស​កាន់​អំណាច ដោយ​ការ​ផ្តល់​នូវ​តួនាទី​សំខាន់ៗ​ក្នុង​ជួរ​រដ្ឋាភិបាល។

ក្រោយ​ស្ថាប័ន​កាសែត​ឯករាជ្យ​មួយ​ចំនួន​ត្រូវ​បាន​បិទ​ដោយសារ​ការ​បាត់បង់​អាជ្ញាបណ្ណ រដ្ឋាភិបាល​បាន​សម្រុក​តែងតាំង​អ្នក​សារព័ត៌មាន​មួយ​ចំនួន​ឱ្យ​កាន់​តួនាទី​ក្នុង​ជួរ​រដ្ឋាភិបាល​ផង​ដែរ ដូចជា លោក ប៉ែន បូណា និពន្ធ​នាយក​ទូរទស្សន៍ PNN លោក តាន់ ហ្សង់ហ្វ្រង់ស័រ អតីត​នាយក​នៃ​ការ​ផ្សាយ​របស់​វិទ្យុ​បារាំង​អន្តរជាតិ (RFI) ជា​ខេមរភាសា។ អ្នក​ទាំង​ពីរ​នេះ​ត្រូវ​បាន​តែងតាំង​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​អ្នក​នាំពាក្យ​រដ្ឋាភិបាល។

លោក ប៉ែន បូណា ប្រធាន​អង្គភាព​អ្នក​នាំពាក្យ​រដ្ឋាភិបាល​កម្ពុជា។

ចំណែក​កញ្ញា អ៊ឹម រចនា អតីត​និពន្ធ​នាយករង​នៃ​វិទ្យុ​បារាំង​អន្តរជាតិ​ខេមរភាសា ត្រូវ​បាន​តែងតាំង​ជា​អនុរដ្ឋលេខាធិការ និង​ជា​អ្នក​នាំពាក្យ​ក្រសួង​កសិកម្ម និង​អ្នក​សារព័ត៌មាន​ដែល​កំពុង​បំពេញ​ការងារ​នៅ​តាម​ស្ថាប័ន​សារព័ត៌មាន​មួយ​ចំនួន ក៏​មាន​តួនាទី​ក្នុង​ស្ថាប័ន​រដ្ឋ និង​ជា​ទីប្រឹក្សា​របស់​ក្រសួង​នានា​ផង​ដែរ បន្ទាប់ពី​ព្រះមហាក្សត្រ​បាន​តែងតាំង​ទីប្រឹក្សា​ក្រសួង​ព័ត៌មាន​ចំនួន ៤១៥​នាក់ ដោយ​ក្នុង​នោះ បុគ្គល​យ៉ាងតិច ១០​នាក់​កំពុង​បម្រើ​ការ​ក្នុង​ស្ថាប័ន​សារព័ត៌មាន​ដែល​មកពី​ស្ថាប័ន​សារព័ត៌មាន Fresh News ច្រើន​ជាងគេ។

អ្នក​សារព័ត៌មាន​ទាំងនោះ​មាន​ដូចជា លោក វ៉ាន់ សារ៉ាយ លោក ស៊ន សុភក្ត្រ លោក ងួន ច័ន្ទមុនី លោក គឹម ម៉េង លោក ប៉ា ជេដ្ឋា លោក ពេជ្រ ប៊ុនសាយ លោក សួន សុភ័ក្ត្រ និង​លោក ស្រ៊ឺ រិទ្ធីយ៉ា។

ក្រៅពី​នេះ ព្រះមហាក្សត្រ​ក៏​បាន​តែងតាំង​លោក លឹម ជាវុត្ថា អគ្គនាយក​អង្គភាព​ព័ត៌មាន Fresh News ធ្វើ​ជា​ទីប្រឹក្សា​ផ្ទាល់​របស់​លោក​នាយករដ្ឋមន្ត្រី ហ៊ុន ម៉ាណែត ផង​ដែរ។ លោក មាស រិទ្ធី ដែល​កំពុង​បម្រើ​ការ​នៅ​ស្ថាប័ន​ព័ត៌មាន​ហង្ស​មាស ក៏​ត្រូវ​បាន​តែងតាំង​បន្ត​ឱ្យ​ធ្វើ​ជា​ទីប្រឹក្សា​ក្រសួង​ព័ត៌មាន​ដែរ។

លោក ស៊ឺន សាយ ជា​ចាងហ្វាង និង​ជា​អគ្គនាយក​ប្រតិបត្តិ​សារព័ត៌មាន​អនឡាញ​ខេមបូណូមីស (Cambonomist) ក៏​ត្រូវ​បាន​តែងតាំង​ជា​ទីប្រឹក្សា​ទីស្ដីការ​គណៈរដ្ឋមន្ត្រី ដែល​មាន​ឋានៈ​ស្មើ​រដ្ឋលេខាធិការ។ ក្នុង​តួនាទី​ជា​ទីប្រឹក្សា​របស់​ក្រសួង​ព័ត៌មាន និង​ស្ថាប័ន​ផ្សេង​ទៀត​របស់​រដ្ឋាភិបាល អ្នក​សារព័ត៌មាន​ទាំងនោះ​មាន​ឋានៈ​ជា «ឯកឧត្តម»។

អ្នកជំនាញ​ផ្នែក​ប្រព័ន្ធ​ផ្សព្វផ្សាយ​យល់​ថា ការ​តែងតាំង​អ្នក​សារព័ត៌មាន​ឱ្យ​ធ្វើ​ជា​ទីប្រឹក្សា​ក្រសួង​ព័ត៌មាន និង​តាម​ស្ថាប័ន​រដ្ឋ​ផ្សេង​ទៀត នឹង​មាន​ផល​អវិជ្ជមាន​ដល់​ការ​បំពេញ​តួនាទី​វិជ្ជាជីវៈ និង​ឯករាជភាព ដោយសារ​ពួកគេ​នឹង​មិន​ហ៊ាន​រាយការណ៍​ព័ត៌មាន​អំពី​ភាព​អសកម្ម​នានា​ក្នុង​សង្គម។

អ្នក​សារព័ត៌មាន​ត្រូវតែ​មាន​សិទ្ធិ​សេរីភាព​ពេញលេញ​ក្នុង​ការ​បំពេញ​វិជ្ជាជីវៈ និង​រាយការណ៍​អំពី​ផល​ប្រយោជន៍ និង​ផល​អវិជ្ជមាន​ដល់​សាធារណជន ដូច្នេះ​បើសិនជា​អ្នក​សារព័ត៌មាន និង​ថ្នាក់​ដឹកនាំ​អង្គភាព​សារព័ត៌មាន​ទទួល​បាន​តួនាទី​ក្នុង​រចនាសម្ព័ន្ធ​រដ្ឋាភិបាល នោះ​នឹង​ប៉ះពាល់​ដល់​ការ​រាយការណ៍​ព័ត៌មាន។

ការ​ឆ្លើយតប​ដែល​ជា​វប្បធម៌​មិន​ទទួលស្គាល់​ការពិត​របស់​មន្ត្រី​រដ្ឋាភិបាល​នោះ រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​អ្នក​នាំពាក្យ​រដ្ឋាភិបាល លោក ប៉ែន បូណា បាន​សរសេរ​នៅ​ក្នុង «របាយការណ៍​ស្ដីពី​សេរីភាព​សារព័ត៌មាន» ថា នៅ​កម្ពុជា សេរីភាព​សារព័ត៌មាន​រីកចម្រើន​យ៉ាង​ខ្លាំង​មិន​ធ្លាប់​មាន​ពី​មុន។ ចំនួន​ស្ថាប័ន​សារព័ត៌មាន និង​អ្នក​សារព័ត៌មាន​កើន​ឡើង​យ៉ាង​គំហុក​គួរ​ឲ្យ​កត់សម្គាល់។ ពលរដ្ឋ​មាន​ប្រភព​ព័ត៌មាន​យ៉ាង​សម្បូរ​បែប និង​មាន​ជម្រើស​ទូលំទូលាយ និង​ងាយស្រួល​ក្នុង​ការ​ទទួល​ព័ត៌មាន​លឿន​រហ័ស។ រាជរដ្ឋាភិបាល​ផ្តល់​ការ​គាំទ្រ​យ៉ាង​ពេញ​ទំហឹង​ដល់​វិស័យ​សារព័ត៌មាន។

ប្រភព​ដដែល​បាន​ផ្តល់​បទសម្ភាសន៍​ដល់​សារព័ត៌មាន​ក្នុង​ស្រុក​ថា សារព័ត៌មាន​ក្នុង​ប្រទេស​កម្ពុជា រីក​ដុះដាល​ខ្លាំង​មិន​ដែល​មាន​នៅ​ក្នុង​ប្រវត្តិសាស្ត្រ​ពី​អតីតកាល។

កាលពី​ថ្ងៃទី​៣០ ខែ​មេសា ឆ្នាំ​២០២៤ ក្នុង​ពិធី​ដាក់​បង្ហាញ​ពី​របាយការណ៍​ស្ដីពី​សេរីភាព​សារព័ត៌មាន​លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន បាន​បង្ហាញ​ជា​សាធារណៈ​ថា ស្ថានភាព​សេរីភាព​សារព័ត៌មាន​នៅ​កម្ពុជា​មាន​ភាព​ល្អ​ប្រសើរ។

ភាព​ល្អ​ប្រសើរ​នោះ គឺ​មាន​ចំនួន ៧៩,៨% នៃ​អ្នក​សារព័ត៌មាន​ដែល​ជួប​សម្ភាស​បាន​អះអាង​ថា សេរីភាព​សារព័ត៌មាន​នៅ​កម្ពុជា​ក្នុង​ពេល​បច្ចុប្បន្ន​មាន​ភាព​ល្អ​ប្រសើរ​ជាង​ពី​មុន។ ខណៈ​ករណី​នេះ​តែង​ទទួល​ការ​រិះគន់​ពី​សំណាក់​បណ្តា​អង្គការ​ក្នុង​ស្រុក និង​អន្តរជាតិ​នា​ពេល​កន្លង​មក។

ជាក់ស្តែង សម្ព័ន្ធ​អ្នក​សារព័ត៌មាន​កម្ពុជា ហៅ​កាត់​ថា ខេមបូចា បាន​រក​ឃើញ​ពី​ស្ថានភាព​សេរីភាព​សារព័ត៌មាន​នៅតែ​មិន​ទាន់​ល្អ​ប្រសើរ ហើយ​កាលពី​ឆ្នាំ​២០២៣ អង្គការ​អ្នក​រាយការណ៍​គ្មាន​ព្រំដែន​បាន​ដាក់​ចំណាត់ថ្នាក់​កម្ពុជា​នៅ​លេខ​រៀង​ទី​១៤៧ ក្នុង​ចំណោម ១៨០​ប្រទេស ដែល​សេរីភាព​សារព័ត៌មាន​ដុនដាប។ តែ​សម្រាប់​លោក នេត្រ ភក្ត្រា របាយការណ៍​របស់​ក្រសួង​ព័ត៌មាន ពេលនេះ​នឹង​ឆ្លុះបញ្ចាំង​ពី​ភាព​ពិត​នៃ​ស្ថានភាព​សេរីភាព​សារព័ត៌មាន​កម្ពុជា។

លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន

លោក នេត្រ ភក្ត្រា បាន​ថ្លែង​ថា កម្ពុជា​បាន​រៀបចំ​របាយការណ៍​នេះ​ដោយ​ខ្លួនឯង និង​វាយតម្លៃ​ដោយ​ខ្លួនឯង ដោយ​បាន​ចូលរួម​ពី​គ្រប់​ភាគី។ របាយការណ៍​នេះ​ត្រូវ​បាន​រៀបចំ​ឡើង​ដោយ​ឆ្លើយតប​ទៅ​នឹង​តម្រូវការ​ចាំបាច់​ក្នុង​វិស័យ​ព័ត៌មាន ស្រប​ពេល​ដែល​កម្ពុជា ក៏ដូចជា​ប្រទេស​ផ្សេងៗ​ទៀត​ក្នុង​តំបន់ បាន​បោះ​ជំហាន​ចូល​ដល់​ចំណុច​របត់​នៃ​បរិវត្តកម្ម​ឌីជីថល និង​ខណៈ​ពេល​ដែល​រាជរដ្ឋាភិបាល​អាណត្តិ​ទី​៧ ផ្ដោត​ការ​យកចិត្ត​ទុកដាក់​ខ្ពស់​លើ​ការ​លើក​កម្ពស់​សេរីភាព​សារព័ត៌មាន និង​សេរីភាព​នៃ​ការ​បញ្ចេញមតិ​នៅ​កម្ពុជា។

ប្រភព​ដដែល​បាន​លើកឡើង​ថា សេរីភាព​សារព័ត៌មាន​ជា​កាតាលីករ​មួយ​ដ៏​ចាំបាច់​សម្រាប់​ការ​អភិវឌ្ឍ​សង្គម​សេដ្ឋកិច្ច​របស់​កម្ពុជា សេរីភាព​នេះ​ត្រូវ​បាន​ធានា​ដោយ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា ច្បាប់​ស្ដីពី​របប​សារព័ត៌មាន​កម្ពុជា និង​លិខិត​បទដ្ឋាន​គតិយុត្តិ​ជា​ធរមាន​ផ្សេង​ទៀត។ ដូច្នេះ ក្នុង​ក្របខ័ណ្ឌ​នៃ​ការ​លើក​កម្ពស់​តម្លៃ​សង្គម​ប្រជាធិបតេយ្យ​នៅ​កម្ពុជា ការ​វាស់វែង​ស្ថានភាព​សេរីភាព​សារព័ត៌មាន​បច្ចុប្បន្ន​នៅ​កម្ពុជា មាន​សារសំខាន់​ណាស់ ដើម្បី​ឆ្លុះបញ្ចាំង​អំពី​លំហ​សេរីភាព​នៃ​ប្រព័ន្ធ​ផ្សព្វផ្សាយ សិទ្ធិ​នៃ​ការ​ទទួល​ព័ត៌មាន តួនាទី​របស់​សារព័ត៌មាន​វិជ្ជាជីវៈ​ក្នុង​ការ​ផ្តល់​ចំណេះដឹង និង​ព័ត៌មាន​ពិត និង​ជឿ​ទុកចិត្ត​បាន​សម្រាប់​ជា​ប្រយោជន៍​ដល់​ប្រជាជន អ្នក​ដឹកនាំ និង​សង្គម​ជាតិ​ទាំងមូល ក្នុង​ការ​ធ្វើ​សេចក្តី​សម្រេច​ចិត្ត និង​រួម​កម្លាំង​គ្នា​ដើម្បី​ធានា​កំណើន​សេដ្ឋកិច្ច និង​ការ​អភិវឌ្ឍ​ប្រកប​ដោយ​ចីរភាព។

រដ្ឋាភិបាល​កម្ពុជា​បាន​បង្ហាញ​របាយការណ៍​របស់​ខ្លួន​កាលពី​ពេល​កន្លង​ទៅ​ថា សព្វថ្ងៃ​នេះ អង្គភាព​សារព័ត៌មាន​ជាតិ និង​បរទេស​ដែល​បាន​ចុះបញ្ជី​នៅ​ក្រសួង​ព័ត៌មាន មាន​ចំនួន​ជាង ២​ពាន់​អង្គភាព (២១៥៤​អង្គភាព) ដែល​កំពុង​ធ្វើ​សកម្មភាព​ផ្សព្វផ្សាយ​តាម​បែប​បុរាណ និង​បែប​ទំនើប ទៅ​តាម​លទ្ធភាព​របស់​ពួកគេ​រៀងៗ​ខ្លួន។

លោក ណុប វី នាយក​ប្រតិបត្តិ​សមាគម​សម្ព័ន្ធ​អ្នក​សារព័ត៌មាន​កម្ពុជា (ខេមបូចា) បាន​សរសេរ​នៅ​ក្នុង «របាយការណ៍​ស្ដីពី​សេរីភាព​សារព័ត៌មាន» ថា សេរីភាព​សារព័ត៌មាន​នៅ​កម្ពុជា​មាន​តិចតួច និង​ដោយ​អន្លើ។

លោក​បន្ត​ថា ដើម្បី​ឲ្យ​សេរីភាព​សារព័ត៌មាន​នៅ​កម្ពុជា​កាន់តែ​ល្អ​ប្រសើរ​ឡើង ទាំងអស់​គ្នា​គួរ​រួម​គ្នា​ពិនិត្យ​មើល​លើ​ច្បាប់​នានា​ដែល​កំពុង​មាន​ក្នុង​ពេល​បច្ចុប្បន្ន ថា​តើ​នៅ​មាន​ចំណុច​ណា​ខ្លះ​ជា​ចន្លោះ​ប្រហោង ចំណុច​ណា​ខ្លះ​ប៉ះពាល់​ដល់​ការ​អនុវត្ត និង​ចំណុច​ណា​ខ្លះ​គួរ​កែលំអ ដើម្បី​ធ្វើ​ឲ្យ​ប្រសើរ​ឡើង និង​ធានា​បាន​នូវ​សេរីភាព​សារព័ត៌មាន។

សកម្មជន​ក្នុង​សហគមន៍​ក្នុង​ទីក្រុង​ឡងប៊ិច ក្នុង​ទឹកដី​សហរដ្ឋ​អាមេរិក លោក មួង ណារ៉េត ធ្លាប់​លើកឡើង​កន្លង​មក​ថា លោក​មិន​ដែល​ឃើញ​ប្រទេស​ប្រជាធិបតេយ្យ​លើ​ពិភពលោក​ចាប់​ខ្លួន​អ្នក​បញ្ចេញមតិ ឬ​អ្នក​សារព័ត៌មាន​ដែល​ចុះផ្សាយ​ពី​ការពិត​ក្នុង​សង្គម​ដើម្បី​បង្ហាញ​ពី​ចំណុច​ខ្វះខាត​របស់​រដ្ឋាភិបាល​ទេ ប៉ុន្តែ​កម្ពុជា​ជា​ប្រទេស​ដែល​ចម្លែក​ខុស​គេ ត្បិត​អ្នក​សារព័ត៌មាន​ក្នុង​ប្រទេស​នេះ​តែង​រង​នូវ​ការ​ចាប់​ខ្លួន និង​ចោទប្រកាន់​ពី​សំណាក់​រដ្ឋាភិបាល​ជា​បន្តបន្ទាប់។

ប្រភព​ដដែល​បាន​លើកឡើង​ថា រដ្ឋាភិបាល​កម្ពុជា​សព្វថ្ងៃ​នេះ​កំពុង​មោទនភាព​យ៉ាង​ខ្លាំង​លើ​វិធានការ​បង្ក្រាប​អ្នក​សារព័ត៌មាន​ឯករាជ្យ និង​ការ​បំបិទ​សិទ្ធិ​សេរីភាព​បញ្ចេញមតិ​របស់​សកម្មជន​នានា រួម​ទាំង​អ្នក​នយោបាយ​ផង ដោយ​ការ​ចាប់​ដាក់​គុក ឬ​ចោទប្រកាន់​តាម​ផ្លូវ​ច្បាប់ ដោយ​ប្រើប្រាស់​ប្រព័ន្ធ​តុលាការ​ប្រៀប​បីដូចជា​សត្វ​ខ្លា​ដែល​កំពុង​ខាំ​ហែក​សត្វ​ម្រឹគ​ដាច់​ស្បែក​រហែក​សាច់​ហូរ​ឈាម​ពេញ​ព្រៃ​គួរ​ឱ្យ​រន្ធត់​ដូច្នោះ​ដែរ។

លោក មួង ណារ៉េត អំពាវនាវ​ឱ្យ​រដ្ឋាភិបាល​កម្ពុជា​អនុវត្ត​ខ្លឹមសារ​នៃ​មាត្រា​នីមួយៗ​ដែល​មាន​ចែង​ក្នុង​រដ្ឋធម្មនុញ្ញ​ឱ្យ​បាន​ម៉ឺងម៉ាត់ ដើម្បី​ធានា​នូវ​សិទ្ធិ​មូលដ្ឋាន​របស់​ពលរដ្ឋ សិទ្ធិ​សេរីភាព​បញ្ចេញមតិ និង​សិទ្ធិ​ខាង​សារព័ត៌មាន ជាដើម មុន​នឹង​រដ្ឋាភិបាល​ចាប់​ខ្លួន​អ្នក​បញ្ចេញមតិ​ណា​ម្នាក់ ព្រោះ​ថា​កន្លង​មក ពលរដ្ឋ និង​អ្នក​សារព័ត៌មាន​ដែល​លើកឡើង​ពី​ចំណុច​ខ្វះខាត​របស់​រដ្ឋាភិបាល ក៏​ដោយសារតែ​មន្ត្រី​របស់​ខ្លួន​មិន​ស្វែងរក​ដំណោះស្រាយ​ឱ្យ​ជនរងគ្រោះ​ទាំងនោះ​ដែរ។

កាលពី​ចុង​ខែ​កញ្ញា ឆ្នាំ​២០២២ អង្គការ​ការពារ​សិទ្ធិ​ពលរដ្ឋ និង​សង្គម​ស៊ីវិល ហៅ​កាត់​ថា CIVICUS បាន​ផ្សាយ​របាយការណ៍​ស្រាវជ្រាវ​មួយ ដោយ​រក​ឃើញ​ថា «សេរីភាព​សារព័ត៌មាន​បន្ត​រង​ការ​បំពាន​ក្នុង​ប្រទេស​កម្ពុជា ដោយ​អ្នកកាសែត​រង​ការ​ធ្វើ​ទុក្ខបុកម្នេញ​តាម​ផ្លូវ​ច្បាប់ ធ្វើ​ឱ្យ​ប្រព័ន្ធ​ផ្សព្វផ្សាយ​ឯករាជ្យ​ស្ថិត​ក្នុង​ស្ថានភាព​គំរាមកំហែង​ខ្លាំង»។

រីឯ​អង្គការ​អ្នកកាសែត​គ្មាន​ព្រំដែន (Reporters Without Borders) បាន​ដាក់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា​សម្រាប់​ឆ្នាំ​២០២៣ ស្ថិត​ក្នុង​លំដាប់​លេខ​រៀង​ទី​១៤៧ ក្នុង​ចំណោម​ប្រទេស​១៨០ ដែល​ចំណាត់ថ្នាក់​នេះ​បង្ហាញ​អំពី​សេរីភាព​សារព័ត៌មាន​នៅ​កម្ពុជា​នៅតែ​មិន​អាច​ងើប​ចេញពី​ចំណាត់ថ្នាក់​ដ៏​អាក្រក់ ដោយសារតែ​គេ​រក​ឃើញ​ថា​មាន​ការ​កើន​ឡើង​នៃ​ការ​ធ្វើ​ទុក្ខបុកម្នេញ​របស់​រដ្ឋាភិបាល​លើ​ប្រព័ន្ធ​ផ្សព្វផ្សាយ​ឯករាជ្យ។

អង្គការ​អ្នក​សារព័ត៌មាន​គ្មាន​ព្រំដែន លាតត្រដាង​ថា វិស័យ​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា​ត្រូវ​បាន​បំផ្លិចបំផ្លាញ និង​បោស​សម្អាត​ដោយ​រដ្ឋាភិបាល​កម្ពុជា ចាប់តាំងពី​អំឡុង​ឆ្នាំ​២០១៧ និង​ឆ្នាំ​២០១៨ មក។

ជា​លទ្ធផល​នៃ​យុទ្ធនាការ​នេះ ពលរដ្ឋ​កម្ពុជា​សព្វថ្ងៃ​នេះ​ទទួល​បាន​ព័ត៌មាន​តែ​ពី​ស្ថាប័ន​ដែល​ស្និទ្ធ​នឹង​រដ្ឋាភិបាល​កម្ពុជា​តែប៉ុណ្ណោះ។ កាលពី​ឆ្នាំ​២០២២ បាន​វាយតម្លៃ​ថា កម្ពុជា​ទទួល​បាន​ចំណាត់ថ្នាក់​ទី​១៤២ ក្នុង​ចំណោម ១៨០​ប្រទេស ហើយ​ចំណាត់ថ្នាក់​នេះ​ឆ្លុះបញ្ចាំង​ថា សេរីភាព​សារព័ត៌មាន​នៅ​កម្ពុជា​នៅ​មិន​ទាន់​ល្អ​ប្រសើរ​នៅឡើយ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស