នាយករដ្ឋមន្ត្រីបន្តពូជថ្មីរបស់កម្ពុជាលោក ហ៊ុន ម៉ាណែត ប្រាប់ទៅរដ្ឋបរទេសមួយចំនួនថា គួរតែណែនាំអ្នកប្រព្រឹត្តល្មើសច្បាប់ឱ្យឈប់ធ្វើខុសច្បាប់ ជាជាងមកដាក់សម្ពាធលើរាជរដ្ឋាភិបាលកម្ពុជា ហើយហាមមិនឱ្យអនុវត្តច្បាប់។
នាយករដ្ឋមន្ត្រីខ្មែរលោក ហ៊ុន ម៉ាណែត លើកឡើងក្នុងពិធីប្រកាសអនុវត្តផែនទីបង្ហាញផ្លូវសម្រាប់ឆ្នាំ២០២៤-ឆ្នាំ២០៣៥ នៅថ្ងៃទី២៣ ខែឧសភា នេះថា សូមមិត្តបរទេសមួយចំនួនកុំដាក់សម្ពាធមកលើរដ្ឋាភិបាលកម្ពុជា ចំពោះការអនុវត្តច្បាប់លើបុគ្គលដែលល្មើសច្បាប់។ ផ្ទុយទៅវិញ ពួកគេគួរតែប្រាប់ទៅក្រុមប្រឆាំង កុំឱ្យពួកគេប្រព្រឹត្តខុសច្បាប់បន្តទៀតប្រសើរជាង។
លោក ហ៊ុន ម៉ាណែត លើកឡើងថា មិត្តបរទេសទាំងអស់ដែលណែនាំកម្ពុជាថាកុំឱ្យប្រើច្បាប់ដើម្បីបិទសំឡេង ឬរឹតត្បិតសេរីភាពបញ្ចេញមតិកន្លងមក ពួកគេគួរតែណែនាំអ្នកធ្វើខុសច្បាប់កុំឲ្យរំលោភច្បាប់បន្តទៀត ពីព្រោះរដ្ឋាភិបាលកម្ពុជាគាំទ្រជានិច្ចចំពោះសេរីភាពនៃការបញ្ចេញមតិ ប៉ុន្តែរដ្ឋាភិបាលគ្រាន់តែអនុវត្តច្បាប់ចំពោះអ្នកប្រព្រឹត្តបំពានច្បាប់ប៉ុណ្ណោះ។
នាយករដ្ឋមន្ត្រីកម្ពុជារូបនេះបញ្ជាក់ថា អ្នកនយោបាយនៅកម្ពុជាត្រូវតែមានស្តង់ដាត្រឹមត្រូវ និងត្រូវតែមានក្រមសីលធម៌ រួមទាំងការទទួលខុសត្រូវខ្ពស់ជាងពលរដ្ឋ ព្រោះពួកគេមិនអាចចេះតែដើរនិយាយដោយគ្មានមូលដ្ឋានច្បាប់ពិតប្រាកដនោះទេ។
លោក ហ៊ុន ម៉ាណែត បញ្ជាក់ថា ការនិយាយដោយគ្មានភស្តុតាង និងមូលដ្ឋានច្បាប់ត្រឹមត្រូវ គឺជាទង្វើនាំឲ្យពុលសង្គមទៅវិញប៉ុណ្ណោះ។
ការអះអាងនេះ ធ្វើឡើងស្របពេលដែលគេមើលឃើញថា ការអនុវត្តច្បាប់នៅកម្ពុជាគឺជាការអនុវត្តច្បាប់ដែលមានស្ដង់ដាពីរ ដែលច្បាប់នេះគេតែងឃើញមានការរឹតត្បិតតែទៅលើក្រុមប្រឆាំង និងក្រុមដែលរិះគន់ការដឹកនាំរបស់រដ្ឋាភិបាល ជាជាងមន្ត្រីបក្សកាន់អំណាច។
មន្ត្រីជាន់ខ្ពស់របស់គណបក្សកម្លាំងជាតិលោក រ៉ុង ឈុន បានលើកឡើងកាលពីពេលកន្លងទៅថា អំឡុងពេលដែលលោកត្រូវបានតុលាការឃុំខ្លួនអស់រយៈពេលជាង ១ឆ្នាំ កាលពីពេលកន្លងទៅនោះ លោកបានសង្កេតឃើញថា តុលាការនៅកម្ពុជាហាក់ដូចជាទីផ្សារទិញ-លក់រឿងក្ដីសម្រាប់អ្នកមានលុយ និងមានអំណាចប៉ុណ្ណោះ មិនមែនជាកន្លែងផ្តល់យុត្តិធម៌ឱ្យពលរដ្ឋក្រីក្រ និងស្លូតត្រង់នោះទេ។
កាលពីថ្ងៃទី៨ ខែឧសភា ឆ្នាំ២០២៤ ក្នុងកិច្ចប្រជុំដំណើរការពិនិត្យជាសកលតាមកាលកំណត់ (UNPR) របស់អង្គការសហប្រជាជាតិ បណ្ដាប្រទេសប្រកាន់របបលទ្ធិប្រជាធិបតេយ្យជាច្រើននៅលើពិភពលោក បានរិះគន់លើរដ្ឋាភិបាលកម្ពុជាយ៉ាងធ្ងន់ធ្ងរជុំវិញការរំលោភសិទ្ធិមនុស្ស និងលទ្ធិប្រជាធិបតេយ្យ។
សហគមន៍អន្តរជាតិលើកឡើងថា រដ្ឋាភិបាលកម្ពុជាបានរំលោភសិទ្ធិមនុស្សធ្ងន់ធ្ងរ ដែលជាហេតុធ្វើឱ្យសិទ្ធិសេរីភាពមូលដ្ឋានរបស់ពលរដ្ឋកាន់តែធ្លាក់ចុះ ដែលទង្វើនេះបង្ហាញថា រដ្ឋាភិបាលគ្មានឆន្ទៈពិតប្រាកដក្នុងការលើកស្ទួយការគោរពសិទ្ធិមនុស្ស និងស្ដារលទ្ធិប្រជាធិបតេយ្យនោះទេ។
បណ្តាប្រទេសដែលចូលរួមកិច្ចប្រជុំនេះ ទាមទារឱ្យរដ្ឋាភិបាលកម្ពុជាដោះលែងអ្នកទោសនយោបាយ និងអ្នកទោសមនសិការ ជាពិសេសប្រធានគណបក្សសង្គ្រោះជាតិលោក កឹម សុខា ជាដើម ព្រមទាំងទាមទារឱ្យរដ្ឋាភិបាលកម្ពុជាធានាឱ្យបាននូវការបោះឆ្នោតមួយដែលប្រកបដោយសេរី ត្រឹមត្រូវ និងយុត្តិធម៌ និងត្រូវកែលំអប្រព័ន្ធតុលាការស្របតាមស្ដង់ដាអន្តរជាតិថែមទៀត៕