អត្ថបទដោយ៖ តាំង សារ៉ាដា
រាជាណាចក្រកម្ពុជាដែលស្ថិតនៅក្រោមការគ្រប់គ្រងបក្សតែមួយជិត ៤០ឆ្នាំ ក្លាយជាប្រទេសមួយត្រូវគេមើលឃើញថា ធ្វើទុក្ខបុកម្នេញជាខ្លាំងលើប្រព័ន្ធផ្សព្វផ្សាយរលកសំឡេង និងប្រព័ន្ធផ្សព្វផ្សាយអេឡិចត្រូនិកសម័យទំនើប។
គោលដៅ គឺដើម្បីចាប់ឱ្យបានសំឡេងប្រឆាំង និងឯករាជ្យ ហើយឈានដល់ការចាត់វិធានការតាមអំណាចដែលមាននៅក្នុងដៃ។ ចុងក្រោយនេះ គណបក្សប្រជាជនកម្ពុជាដែលស្ថិតនៅក្រោមអំណាចយ៉ាងណែនក្នុងដៃរបស់លោក ហ៊ុន សែន កំពុងធ្លាក់ក្នុងជម្លោះជាមួយក្រុមហ៊ុនហ្វេសប៊ុក ឬក្រុមហ៊ុនមេតា។
ជម្លោះកើតឡើងដោយសារហ្វេសប៊ុករបស់លោក ហ៊ុន សែន បានរំលោភគោលការណ៍របស់ក្រុមហ៊ុនមេតា ដែលហាមប្រើប្រាស់សង្គ្រាមវោហារសាស្ត្រដ៏ហិង្សាដែលនាំឱ្យក្រុមប្រឹក្សាភិបាលរបស់ក្រុមហ៊ុនមេតា ស្នើឱ្យពិន័យលោក ហ៊ុន សែន ដោយព្យួរដំណើរការហ្វេសប៊ុករបស់កំពូលបុរសខ្លាំងកម្ពុជារយៈពេល ៦ខែ។
តែទីបំផុត លោក ហ៊ុន សែន មិនទទួលកំហុសនោះទេ ហើយមិនតែប៉ុណ្ណោះ បានឈានដល់ការបណ្ដេញតំណាងក្រុមហ៊ុនទៀតផង។ តែយ៉ាងណា កាសែតសហរដ្ឋអាមេរិក The New York Time បានរកឃើញបក្សកាន់អំណាចនៅកម្ពុជាសព្វថ្ងៃនេះបានបង្កើតបន្ទប់ឃ្លាំមើលអ្នកប្រើប្រាស់អ៊ីនធឺណិត ១០ឆ្នាំហើយ។
គណបក្សប្រជាជនកម្ពុជាបានបង្កើត Cyber War Room បន្ទប់ឃ្លាំមើលអ្នកប្រើប្រាស់អ៊ីនធឺណិតមួយទសវត្សមកហើយ។ គោលដៅរបស់អង្គភាពនេះ ដើម្បីគាំទ្រអំណាចរបស់លោកនាយករដ្ឋមន្ត្រី ហ៊ុន សែន តាមរយៈក្បាលម៉ាស៊ីនឃោសនានៃបណ្ដាញសង្គម។
កាសែត The New York Time របស់អាមេរិកកាលពីថ្ងៃទី១១ ខែកក្កដា បានចុះផ្សាយថា បន្ទប់ឃ្លាំមើលអ្នកប្រើប្រាស់អ៊ីនធឺណិតកំពុងគ្រប់គ្រងដោយលោក ហ៊ុន ម៉ាណែត កូនប្រុសច្បងរបស់លោក ហ៊ុន សែន ដែលជាអនាគតនាយករដ្ឋមន្ត្រីកម្ពុជាត្រៀមខ្លួនឡើងជំនួសឪពុក។
ក្នុងអង្គភាពនៃបន្ទប់ឃ្លាំមើលនេះមានក្រុមជំនាញ Troll army ឬអាខោនខ្មោច (Ghost Accounts) ដែលមានជំនាញខាងការជ្រៀតជ្រែក រុកកួនអ្នកប្រើប្រាស់បណ្ដាញសង្គម ជាពិសេសទៅលើក្រុមប្រឆាំង ដោយអង្គភាពនេះបង្កើត ឬច្នៃប្រឌិតព័ត៌មានក្លែងក្លាយ ព័ត៌មានមិនពិត ដើម្បីឱ្យលោក ហ៊ុន សែន និងក្រុមជ្រុលនិយមរបស់លោកបញ្ចេញវោហារសាស្ត្រគំរាមសម្លាប់។
ក្នុងការធ្វើដំណើរទៅរកការបោះឆ្នោតសភាខែកក្កដា នេះ បន្ទប់ឃ្លាំមើលរបស់បក្សកាន់អំណាច CPP បានកំពុងបន្ថែមសន្ទុះខ្លាំងក្នុងការចាត់វិធានការទៅលើក្រុមប្រឆាំង។
ឧត្តមសេនីយ៍ ហ៊ុន ម៉ាណែត ដែលជាអគ្គមេបញ្ជាការម្នាក់នៃកងទ័ពកម្ពុជា ហើយមើលទៅនឹងក្លាយជានាយករដ្ឋមន្ត្រី ត្រូវបានរាយការណ៍ថាជាអ្នកនៅពីក្រោយក្នុងការការពារកេរដំណែលរបស់ឪពុក និងសម្រាប់ខ្លួនឯង។
នៅកម្ពុជា ហ្វេសប៊ុកគឺជាបណ្ដាញសង្គមមួយដ៏មានប្រជាប្រិយបំផុតដែលមនុស្សជាង ១២លាននាក់ក្នុងចំណោមពលរដ្ឋជិត ១៧លាននាក់កំពុងប្រើប្រាស់យ៉ាងសកម្ម។ ភាគច្រើននៃអ្នកប្រើប្រាស់ហ្វេសប៊ុក គឺដើម្បីបានទទួលដំណឹងផ្សេងៗ ការកម្សាន្ត និងការធ្វើការប្រាស្រ័យទាក់ទងរហូតបង្កើតមុខជំនួញទៀតផង។
តែយ៉ាងណា អ្នកកាសែត និងបណ្ដាញផ្សាយព័ត៌មានឯករាជ្យដែលបង្កើតមាតិការឿងដើម្បីធ្វើសេចក្ដីរាយការណ៍ព័ត៌មានក្នុងស្រុក គឺជាមុខសញ្ញាមួយដែលបន្ទប់ឃ្លាំមើលតែងបានចាប់កំហុស និងចាត់វិធានការតាមអំណាចរបស់លោក ហ៊ុន សែន។
នៅតាមបណ្ដាប្រទេសមួយចំនួនដែលអំណាចស្ថិតក្នុងដៃរបស់បុគ្គលដ៏ខ្លាំង ឬផ្ដាច់ការ តែងតែបង្កើតបន្ទប់ឃ្លាំមើលអ្នកប្រើប្រាស់អ៊ីនធឺណិត។ ប្រទេសទាំងនោះមានដូចជា ហ្វីលីពីន អំឡុងអំណាចធ្លាក់នៅក្រោមបុរសខ្លាំង ឌ្រូឌ្រីងហ្គូ ឌូទើតេ និងប្រទេសតួកគី នៅក្រោមលោក Recep Tayyip Erdogan។
ប្រទេសទាំងពីរនេះបង្កើតក្រុម Troll ឬក្រុមអាខោនខ្មោចដែលរដ្ឋាភិបាលនៅពីក្រោយ ហើយកម្ពុជាបានបង្កើតក្រុមនេះរយៈពេល ១០ឆ្នាំមកហើយ។ តែគេថាមិនជាការភ្ញាក់ផ្អើលអ្វីទេ ដែលសម័យ Digital បច្ចេកទេសវិទ្យាសាស្ត្រគឺគេអាចច្នៃបានគ្រប់មធ្យោបាយសំដៅបង្កើតស្ថានការណ៍ និងបំផ្លាញវាទៅវិញ។
គេនៅចាំបានថា កាលពីអំឡុងជំងឺរាតត្បាតកូវីដផ្ទុះខ្លាំង ក្រុមបន្ទប់ឃ្លាំមើលដើរតួនាទីយ៉ាងសកម្មចាំផ្ដល់សញ្ញាទៅឱ្យអាជ្ញាធរ គំរាម និងចាត់ការទៅលើអ្នកលេងហ្វេសប៊ុក និងប្រព័ន្ធផ្សព្វផ្សាយដែលរិះគន់ស្ថាប័នរបស់រដ្ឋ និងបុគ្គលមានអំណាច។ គេបង្កើតក្រុមបំភ័យ ក្រុមឆបោក ក្រុមប្រឌិតព័ត៌មានមិនពិតដែលនាំទៅរកការចាប់ខ្លួន និរទេស រហូតគំរាមសម្លាប់ទៀតផង។
តើបញ្ហានេះជះឥទ្ធិពលចំពោះពលរដ្ឋខ្មែរដែរឬទេ?
អ្នកណាក៏ដឹងដែរថា ពលរដ្ឋខ្មែរនៅតែដក់ជាប់ជំងឺបាក់ស្បាត នៅតែចងចាំការភ័យខ្លាចដែលកម្ពុជាបានឆ្លងកាត់របបប្រល័យពូជសាសន៍ និងរបបផ្ដាច់ការ។
ប្រព័ន្ធផ្សព្វផ្សាយនានាដូចជា វិទ្យុ ទូរទស្សន៍ និងបណ្ដាញសង្គម រួមទាំងជីវភាពរស់នៅរបស់ប្រជាជន ត្រូវបានលោក ហ៊ុន សែន ឱបក្រសោបយកមកគ្រប់គ្រងត្រួតត្រា ហើយបើគិតទៅមានរយៈពេល ៣៨ឆ្នាំហើយ។
អំណាចរបស់គាត់មានក្នុងដៃយ៉ាងរឹងមាំ និងបានយូរឆ្នាំមកនេះ ដោយសារគាត់បានកាន់កាប់ត្រួតត្រាគ្រប់ដង្ហើមសេដ្ឋកិច្ចទាំងអស់។
គាត់គ្រប់គ្រងអំណាចណែនក្នុងដៃដោយសារតែការពង្រឹងទំនាក់ទំនង និងមុខជំនួញពឹងផ្អែកលើប្រទេសចិន បើទោះជាគាត់ដឹងថាភោគផលធម្មជាតិរេចរឹល ការប្រព្រឹត្តអំពើពុករលួយ និងការរំលោភសិទ្ធិមនុស្សកាន់តែអាក្រក់ក៏ដោយ ក៏លោក ហ៊ុន សែន មិនចាប់អារម្មណ៍កែប្រែឱ្យប្រសើរឡើងវិញឡើយ។
លោក ហ៊ុន សែន និងក្រុមអ្នកមានអំណាចមានទ្រព្យធន សុទ្ធតែកាន់កាប់ប្រព័ន្ធផ្សព្វផ្សាយ។ ពួកគេមិនចង់ឃើញប្រព័ន្ធផ្សព្វផ្សាយឯករាជ្យ និងរបស់ក្រុមប្រឆាំងមានការរីកដុះដាលនោះទេ។
ពួកគេតែងរកមធ្យោបាយដើម្បីកម្ទេច និងបិទការផ្សាយ ហើយជាពិសេសនៅមុនការបោះឆ្នោត ដែលពួកគេយល់ថាប្រព័ន្ធផ្សព្វផ្សាយឯករាជ្យ និងក្រុមប្រឆាំងជាអ្នកបង្កើតមាតិកាទប់ទល់នឹងការពង្រឹងអំណាចរបស់ខ្លួន។ ការបង្កើតព័ត៌មានមិនពិត និងព័ត៌មានក្លែងក្លាយដើម្បីចាប់កំហុស គឺជាយុទ្ធសាស្ត្រក្នុងការពង្រឹងអំណាច។
ទាំងនេះក៏លោក ហ៊ុន សែន អាចចម្លងពីប្រទេសប្រេស៊ីល ដែលប្រធានាធិបតីលោក Jair Bolsonaro ដ៏សម្អប់របស់ប្រជាជនកំពុងបង្កើតឱកាសឱ្យកូនប្រុសរបស់គាត់ឡើងកាន់អំណាចតាមរយៈការពង្រឹងប្រព័ន្ធផ្សព្វផ្សាយរបស់ខ្លួន ហើយកម្ទេចប្រព័ន្ធផ្សព្វផ្សាយរបស់ក្រុមប្រឆាំង។
ចំពោះប្រធានាធិបតីតួកគី Recep Tayyip Erdogan ដែលជាប់ឆ្នោតដ៏ចម្រូងចម្រាសបែបផ្ដាច់ការ ក៏បានទទួលឥទ្ធិពលតាមរយៈការបង្កើតបន្ទប់ឃ្លាំមើលអ្នកប្រើប្រាស់អ៊ីនធឺណិតផងដែរ។
ចំពោះប្រទេសក្នុងសមាគមអាស៊ីអាគ្នេយ៍មានដូចជាប្រទេសថៃ ដែលស្ថិតក្រោមការឡើងកាន់អំណាចរបស់ពួកយោធា ក៏ដូចប្រទេសតួកគី ដែរ។ ប្រទេសភូមា បានបង្កើត cyber-troops room ជាអង្គភាពមួយរបស់ក្រុមឧត្តមសេនីយ៍បង្កើតឡើងក្នុងគោលដៅកម្ទេចក្រុមប្រឆាំង។
បណ្ដាញសង្គមមានដូចជា Facebook, YouTube, Instagram, Twitter និងបណ្ដាញព័ត៌មានផ្សេងៗទៀតសុទ្ធតែត្រូវបានក្រុមអ្នកមានអំណាចត្រួតត្រា ហើយប្រើមាតិកាជាភាសាជាតិ និងភាសាអង់គ្លេសបំភ្លៃព័ត៌មាន បង្កើតស្ថានការណ៍វាយបំបាក់ប្រព័ន្ធផ្សព្វផ្សាយក្រុមប្រឆាំង និងឯករាជ្យ ហើយក្រុមនេះក៏ជ្រៀតចូលទៅបង្កើតមូលដ្ឋានរបស់ពួកគេនៅលើទឹកដីអាមេរិក និងលើទឹកដីរបស់ពួកបស្ចិមប្រទេសដែរ។ នេះជាការបង្កគ្រោះថ្នាក់ដល់ប្រព័ន្ធប្រជាធិបតេយ្យសកល។
ចំពោះដំណើរការបោះឆ្នោតនៅកម្ពុជា នាថ្ងៃទី២៣ ខែកក្កដា សប្ដាហ៍នេះ គឺលោក ហ៊ុន សែន ត្រូវគេមើលឃើញថា លេចធ្លោជាងគេក្នុងតំបន់ដែលភ័យខ្លាចពីការរីកលូតលាស់ខ្លាំងនៃប្រព័ន្ធផ្សព្វផ្សាយឯករាជ្យ និងក្រុមអ្នករិះគន់លើប្រព័ន្ធដឹកនាំ ទើបឈានដល់ការរឹតបន្តឹងក្រោមការត្រួតពិនិត្យរបស់ក្រុមបន្ទប់ឃ្លាំមើលអ៊ីនធឺណិតដែលដាក់ឈ្មោះថា Cyber War Room នេះ។
ក្រុមអ្នកសារព័ត៌មានវិជ្ជាជីវៈ អ្នកសារព័ត៌មានពលរដ្ឋ អ្នកស្រាវជ្រាវ និស្សិត បញ្ញាជន សកម្មជនសង្គម ក្រុមសង្គមស៊ីវិល សុទ្ធតែស្ថិតនៅក្នុងគោលដៅនៃការលាបពណ៌ ហើយចោទតាមផ្លូវច្បាប់ដោយក្រុមបន្ទប់ឃ្លាំមើលអ៊ីនធឺណិត ឬ Cyber War Room ដែលកំពុងគ្រប់គ្រងដោយលោក ហ៊ុន ម៉ាណែត នេះឯង៕