សង្គ្រាមអ៊ីស្រាអែល វាយសងសឹកទៅលើពួកហាម៉ាស-ប៉ាឡេស្ទីន បានឈានចូលដល់ថ្ងៃទី១៩ ហើយ។ ប្រជាជនប៉ាឡេស្ទីន រស់នៅតំបន់ហ្កាហ្សា ដែលជាសម្បុករបស់ពួកហាម៉ាស បានបន្តស្លាប់រាប់រយនាក់ជារៀងរាល់ថ្ងៃ ដោយការវាយប្រហារពីសំណាក់យន្តហោះចម្បាំងរបស់អ៊ីស្រាអែល។
គិតត្រឹមថ្ងៃទី២៦ តុលា នេះ សង្គ្រាមផ្ទុះកំហឹងរបស់អ៊ីស្រាអែល ដែលមានរយៈពេល ១៩ថ្ងៃមកនេះ ហើយបើគិតពីប្រជាជនប៉ាឡេស្ទីនស្លាប់ក្រោមអំបែងគ្រាប់របស់អ៊ីស្រាអែល ហក់ឡើងជិត ៦ពាន់នាក់ហើយ ខណៈជនភៀសខ្លួនមានជាង ១លាននាក់ចាកចេញពីដែនដីហ្កាហ្សា។
ក្នុងស្ថានភាពដែលអ៊ីស្រាអែល មិនដកដៃបន្តិចសោះនេះ គឺកាន់តែវាយប្រហារលើពួកហាម៉ាសនៅហ្កាហ្សា គេសង្កេតឃើញមេដឹកនាំនៃប្រទេសអារ៉ាប់មួយចំនួន រួមទាំងអគ្គលេខាធិការអង្គការសហប្រជាជាតិ រហូតរុស្ស៊ី និងចិន ស្នើឱ្យអ៊ីស្រាអែល បញ្ឈប់ការវាយប្រហារ ក៏អ៊ីស្រាអែលមិនស្ដាប់ឡើយ។
តើមូលហេតុអ្វី?
គឺមកពីអ៊ីស្រាអែល ផ្ទុះកំហឹងសងសឹក ព្រោះតែពួកហាម៉ាសលួចវាយប្រហារលើអ៊ីស្រាអែល មុន កាលពីថ្ងៃទី៧ តុលា ដោយបាញ់រ៉ុក្កែត ៥ពាន់គ្រាប់ ហើយសម្លាប់ប្រជាជនអ៊ីស្រាអែល ជាង ១៤០០នាក់។
កំហឹងសងសឹកលើពួកហាម៉ាស-ប៉ាឡេស្ទីន នេះ នាយករដ្ឋមន្ត្រីអ៊ីស្រាអែល Benjamin Netanyahu បានប្រកាសថ្កោលទោស ហើយក៏ប្រកាសដាក់ប្រទេសក្នុងស្ថានភាពសង្គ្រាម។ ទាំងលោក Netanyahu រួមទាំងមេទ័ពអ៊ីស្រាអែល បានហៅពួកហាម៉ាស ថាមិនខុសគ្នាទៅនឹងក្រុមភេរវករនោះទេ ដែលត្រូវតែបោសសម្អាតពួកនេះចេញពីដែនដីហ្កាហ្សា។
ក្នុងលក្ខណៈត្រៀមសង្គ្រាមវាយចូលហ្កាហ្សា ក្រោមហេតុផលសងសឹកកាលពីថ្ងៃទី២៣ តុលា លោក Netanyahu បានបង្ហាញខ្លួននៅតំបន់ព្រំដែនអ៊ីស្រាអែល ជាប់នឹងតំបន់ហ្កាហ្សា នៃដែនដីប៉ាឡេស្ទីន។ ក្នុងដំណើរចុះពិនិត្យសភាពការណ៍នេះ លោកនាយករដ្ឋមន្ត្រីបានប្រាប់កងទ័ពអ៊ីស្រាអែល ថា ការវាយលុកដោយថ្មើរជើង នឹងមកដល់ក្នុងពេលបន្តិចទៀតខាងមុខនេះ។
ការបង្ហាញខ្លួនរបស់លោក Netanyahu ជាមួយនឹងការដាក់បញ្ជាឱ្យត្រៀមចូលលុកលុយតំបន់ហ្កាហ្សា បានកើតឡើងទន្ទឹមនឹងប្រកាសមិនទទួលយកសំណើឈប់បាញ់ ទោះជាសំណើរបស់ប្រទេសមហាអំណាចក៏ដោយ។
លោក Netanyahu បានថ្លែងថា អ៊ីស្រាអែលកំពុងតែប្រឈមមុខនឹងកិច្ចការវាយចូលហ្កាហ្សា សំដៅបោសសម្អាតពួកហាម៉ាស ព្រោះជាក្រុមភេរវកម្មបើកមុខ។
សម្រង់សម្ដីដើមរបស់លោក Netanyahu ថ្លែងទៅកាន់កងទ័ពរបស់លោកមានដូចនេះថា៖ «អស់លោកជាផ្នែកមួយនៃកងកម្លាំងទ័ពស្រួចជួរមុខ។ សម្រាប់ខ្ញុំ សូមកោតសរសើរយ៉ាងខ្លាំងចំពោះអ្វីដែលអស់លោកបានដឹងពីរបៀបបំពេញកាតព្វកិច្ចជូនជាតិ។ ស្មារតីប្រយុទ្ធរបស់អស់លោក ឆន្ទៈរបស់អស់លោក គឺដើម្បីសង្គ្រោះប្រទេសរបស់យើងចេញផុតពីក្រុមសត្វដ៏កំណាចនេះ ហើយចំពោះខ្ញុំ ច្បាស់ប្រាកដថាយើងនឹងជោគជ័យក្នុងសង្គ្រាមសងសឹកនេះ។»
លោក Netanyahu បានបន្តថា៖ «ភារកិច្ចរបស់យើង គឺមានតែមួយគត់ គឺកម្ទេចពួកហាម៉ាស និងដោយកម្ទេចក្រុមទាំងនោះចោលឱ្យអស់។ យើងនឹងមិនឈប់ឡើយ រហូតទាល់តែយើងសម្រេចកាតព្វកិច្ចនេះបានដោយជោគជ័យ។ យើងទុកចិត្តទៅលើអស់លោក ហើយប្រជាជនអ៊ីស្រាអែលក៏ជឿទុកចិត្តលើភាពក្លាហានរបស់អស់លោកដែរ។ ខ្ញុំសូមជូនពរឱ្យយុទ្ធជនយើងទាំងអស់ទទួលបានជោគជ័យសម្រាប់មាតុភូមិយើង ហើយពួកភេរវកម្មត្រូវតែបានកម្ទេច។»
ស្របពេលនេះដែរ កងកម្លាំងរថក្រោះ កងរថពាសដែក កាំភ្លើងធំ មីស៊ីល ជាមួយនឹងកម្លាំងទ័ពជាង ៤០ម៉ឺននាក់ត្រូវគេឃើញកំពុងតែស្ថិតក្នុងការរង់ចាំបទបញ្ជាការវាយលុកតំបន់ហ្កាហ្សា ព្រោះកងទ័ពទាំងនេះបានធ្វើចលនាឡោមព័ទ្ធដែនដីនេះទៅហើយ។
រដ្ឋមន្ត្រីការពារជាតិអ៊ីស្រាអែល លោក Yoav Gallant បានថ្លែងថា ក្នុងពេលមានយុទ្ធនាការដោយទ័ពថ្មើរជើងនោះ ក៏នឹងរួមមានកិច្ចសហការពីកងកម្លាំងអាកាស និងកងកម្លាំងជើងទឹកដែលនឹងត្រូវធ្វើប្រតិបត្តិការព្រមជាមួយគ្នា។
លោក Yoav Gallant បានប្រាប់មេទ័ព និងកូនទាហានរបស់លោកឱ្យត្រៀមទទួលបទបញ្ជា ដើម្បីបោលរថក្រោះចូលដែនដីហ្កាហ្សា ដែលលោកថាត្រូវបោសសម្អាតពួកភេរវកម្ម។
ជាមួយគ្នានេះ នាយសេនាធិការកងទ័ពអ៊ីស្រាអែល ឧត្តមសេនីយ៍ Herzi Halevi ដែលបញ្ជាកងទ័ពដោយផ្ទាល់ ក៏បានថ្លែងលើកទឹកចិត្តកងទ័ពថ្មើរជើងថា ពួកភេរវកម្មនឹងមិនបានជោគជ័យឡើយ។ លោកថា សូម្បីសង្គ្រាមការទូត ក៏ក្រុមនេះបរាជ័យដែរ ព្រោះជាក្រុមភេរវកម្មដែលពិភពលោកមិនគាំទ្រទេ លើកលែងតែក្រុមប្រទេសមានចរិតដូចក្រុមនេះ ទើបគាំទ្រ។
នៅឯក្រុមប្រឹក្សាសន្តិសុខអង្គការសហប្រជាជាតិរុស្ស៊ី និងចិន បានព្យាយាមឱ្យមានដំណោះស្រាយវិធានការទៅលើអ៊ីស្រាអែល ដោយបង្គាប់ឱ្យអ៊ីស្រាអែល បញ្ចប់សង្គ្រាម តែត្រូវបានសហរដ្ឋអាមេរិក អង់គ្លេស បារាំង និងប្រទេសផ្សេងទៀតជំទាស់។
ប្រទេសដែលបោះឆ្នោតវេតូសំណើរបស់រុស្ស៊ី និងចិន សុទ្ធតែគាំទ្រអ៊ីស្រាអែល ក្នុងការបោសសម្អាតពួកហាម៉ាស ព្រោះពួកគេចាត់ទុកជាកម្លាំងភេរវកម្ម។ បើដូចនេះ សម្រាប់អ៊ីស្រាអែល ទំនងមិនបញ្ឈប់ដាច់ខាតភ្លើងកំហឹងរបស់ខ្លួនរហូតការវាយបំបែកសំបុកពួកហាម៉ាស នៅតំបន់ហ្កាហ្សា បានជោគជ័យជាមុនសិន៕