29 C
Phnom Penh

ការ​បោះឆ្នោត​តាម​មូលដ្ឋាន​បាន​ចប់​កាលពី​ថ្ងៃ​អាទិត្យ​ដោយ​បក្ស​តូចៗ​ប្ដេជ្ញា​តស៊ូ​បោះឆ្នោត​រហូត

ដោយ ឌឹ ខេមបូឌា ដេលី

បទវិភាគ

គណបក្ស​កម្លាំង​ជាតិ ប្រកាស​បន្ត​ស្មារតី​តស៊ូ​នយោបាយ​តាម​បែប​ប្រជាធិបតេយ្យ ដើម្បី​នាំ​មក​នូវ​សាមគ្គីភាព ឯកភាព​ជាតិ ការ​គោរព​សិទ្ធិមនុស្ស យុត្តិធម៌​សង្គម និង​ប្រជាធិបតេយ្យ សេរី​ពហុបក្ស​ពិតប្រាកដ​នៅ​ប្រទេស​កម្ពុជា ដើម្បី​ឆ្ពោះ​ទៅ​សម្រេច​គោលដៅ​រួម​ក្នុង​ការ​ផ្លាស់ប្ដូរ​ជា​វិជ្ជមាន​តាមរយៈ​ការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌​នៅ​ឆ្នាំ​២០២៧ និង​ឆ្នាំ​២០២៨ ខាងមុខ។

គណបក្ស​កម្លាំង​ជាតិ ចេញ​សេចក្តី​ថ្លែងការណ៍​ស្តីអំពី​ការ​បោះឆ្នោត​ជ្រើសរើស​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ នៅ​ថ្ងៃទី​២៧ ខែ​ឧសភា ឆ្នាំ​២០២៤ នេះ​ថា គណបក្ស​គោរព​នូវ​ការ​សម្រេច​ចិត្ត​របស់​សមាជិក​ក្រុមប្រឹក្សា​ឃុំ-សង្កាត់​ទាំង​ជាង ២​ពាន់​នាក់ (២១៩៨​នាក់) ដែល​ជា​អង្គ​បោះឆ្នោត​សម្រាប់​ការ​បោះឆ្នោត​ជ្រើសរើស​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ​អាណត្តិ​ថ្មី​នេះ។

កាលពី​ថ្ងៃទី​២៦ ខែ​ឧសភា ឆ្នាំ​២០២៤ គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) បាន​រៀបចំ​ឱ្យ​មាន​ការ​បោះឆ្នោត​ជ្រើសរើស​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ដែល​មាន​គណបក្ស​នយោបាយ​ចំនួន ៥ ចូលរួម ដូចជា​គណបក្ស​កម្លាំង​ជាតិ គណបក្ស​ប្រជាជន​កម្ពុជា គណបក្ស​ឆន្ទៈ​ខ្មែរ គណបក្ស​ខ្មែរ​រួបរួម​ជាតិ និង​គណបក្ស​ហ៊្វុនស៊ិនប៉ិច។

ទន្ទឹម​នឹង​នេះ គណបក្ស​ឆន្ទៈ​ខ្មែរ ចេញ​សេចក្តី​ថ្លែងការណ៍​នៅ​ថ្ងៃទី​២៧ ឧសភា នេះ​ថា គណបក្ស​នឹង​បន្ត​បេសកកម្ម​បង្រួបបង្រួម​អ្នក​ប្រជាធិបតេយ្យ​ដើម្បី​ត្រៀម​ចូលរួម​ប្រកួតប្រជែង​ការ​បោះឆ្នោត​នៅ​ឆ្នាំ​២០២៧ និង​ឆ្នាំ​២០២៨ ខាងមុខ។

ចំណែកឯ​គណបក្ស​ភ្លើង​ទៀន ក៏​បាន​ចេញ​សេចក្តី​ថ្លែងការណ៍​នៅ​ថ្ងៃ​ដដែល​នេះ​ដែរ ដោយ​អំពាវនាវ​ឱ្យ​មាន​ការ​បង្រួបបង្រួម​អ្នក​ប្រជាធិបតេយ្យ ដើម្បី​ទទួល​បាន​ជោគជ័យ​ក្នុង​ការ​បោះឆ្នោត​ទាំង​ថ្នាក់​ក្រោម​ជាតិ និង​ថ្នាក់​ជាតិ​ក្នុង​រយៈពេល ៥​ឆ្នាំ​ខាងមុខ​នេះ។

ជុំវិញ​ការ​បោះឆ្នោត​នេះ គណបក្ស​ប្រជាជន​កម្ពុជា មាន​បេក្ខជន​ឈរឈ្មោះ​ជិត ៩​ពាន់​នាក់ (៨៦០៩​នាក់) គណបក្ស​ឆន្ទៈ​ខ្មែរ មាន​បេក្ខជន​ឈរឈ្មោះ​ជិត ៨​ពាន់​នាក់ (៧៩១១​នាក់) គណបក្ស​កម្លាំង​ជាតិ មាន​បេក្ខជន​ឈរឈ្មោះ​ប្រមាណ​ជា ៤​ពាន់​នាក់ (៤០០១​នាក់) គណបក្ស​ហ៊្វុនស៊ិនប៉ិច មាន​បេក្ខជន​ឈរឈ្មោះ​ជាង ៥​ពាន់​នាក់ (៥៣៥៨​នាក់) និង​គណបក្ស​ខ្មែរ​រួបរួម​ជាតិ មាន​បេក្ខជន​ឈរឈ្មោះ​ជាង ៣​ពាន់​នាក់ (៣២៦៧​នាក់)។

ក្រោយ​ការ​បោះឆ្នោត​បញ្ចប់​ទៅ គណៈកម្មាធិការ​ជាតិ​រៀបចំ​ការ​បោះឆ្នោត បាន​ចេញ​សេចក្តី​ប្រកាស​ព័ត៌មាន​ថា អង្គ​បោះឆ្នោត​នៅ​ទូទាំង​ប្រទេស​ទាំង ៥​គណបក្ស បាន​ទៅ​ចូលរួម​បោះឆ្នោត​ជាង ១​ម៉ឺន​នាក់ (១១៥៩៨​នាក់) ក្នុង​ចំណោម​អង្គ​បោះឆ្នោត​ក្នុង​បញ្ជី​សរុប ១១៦៣៣​នាក់ ដែល​ត្រូវ​ទៅ​បោះឆ្នោត​នៅ​តាម​ការិយាល័យ​ទាំង ២០៩ នៅ​ទូទាំង​ប្រទេស។ សម្រាប់​ការ​បោះឆ្នោត​ជ្រើសរើស​ក្រុមប្រឹក្សា​អាណត្តិ​ទី​៤ នេះ ប្រទេស​កម្ពុជា​មាន​ឃុំ-សង្កាត់​នៅ​ទូទាំង​ប្រទេស​កើន​ឡើង​ចំនួន ៦​ឃុំ-សង្កាត់ ខណៈ​អាណត្តិ​ទី​៣ គឺ​មាន​ត្រឹមតែ​ចំនួន ១៦៤៦​ឃុំ-សង្កាត់​ប៉ុណ្ណោះ។

ចំណែក​ឯ​សមាជិក​ក្រុមប្រឹក្សា​ឃុំ-សង្កាត់​ដែល​ជា​អង្គ​បោះឆ្នោត​បាន​កើន​ឡើង​ចំនួន ៥០​នាក់ ខណៈ​អាណត្តិ​ទី​៣ គឺ​មាន​ត្រឹមតែ ១១៥៧២​នាក់​ប៉ុណ្ណោះ។ ដោយឡែក​ចំនួន​ក្រុង ស្រុក ខណ្ឌ​ទូទាំង​ប្រទេស​បាន​កើន​ឡើង​ចំនួន ១ ខណៈ​អាណត្តិ​ទី​៣ គឺ​មាន​ចំនួន​២០៨។

ចំពោះ​ចំនួន​អាសនៈ​សមាជិក​ក្រុមប្រឹក្សា​រាជធានី-ខេត្ត​អាណត្តិ​ទី​៤ នេះ គឺ​រក្សា​ដូច​អាណត្តិ​ទី​៣ ដដែល គឺ​មាន​ចំនួន ៥៥៩​អាសនៈ ប៉ុន្តែ​ចំនួន​អាសនៈ​សមាជិក​ក្រុមប្រឹក្សា​ក្រុង ស្រុក ខណ្ឌ អាណត្តិ​ទី​៤ នេះ បាន​កើន​ឡើង​ចំនួន ៥​អាសនៈ ខណៈ​អាណត្តិ​ទី​៣ មាន​ចំនួន ៣៦៣៦​អាសនៈ។

ក្រោយ​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ប្រទេស​កម្ពុជា​បាន​អនុវត្ត​ការ​បោះឆ្នោត​តាម​បែប​ឧបកិច្ច​ថា​ប្រជាធិបតេយ្យ​ចំនួន ៤​ដំណាក់កាល គឺ​ការ​បោះឆ្នោត​ជ្រើសរើស​តំណាងរាស្ត្រ ឬ​រើស​សមាជិក​រដ្ឋសភា ការ​បោះឆ្នោត​ជ្រើសរើស​សមាជិក​ក្រុមប្រឹក្សា​ឃុំ-សង្កាត់ ការ​បោះឆ្នោត​ជ្រើសរើស​សមាជិក​ព្រឹទ្ធសភា និង​ការ​បោះឆ្នោត​ជ្រើសរើស​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ។

ការ​បោះឆ្នោត​នីមួយៗ​ត្រូវ​ធ្វើ​ឡើង​រៀងរាល់ ៥​ឆ្នាំ​ម្តង ប្លែក​តែ​ការ​បោះឆ្នោត​ជ្រើសរើស​សមាជិក​ព្រឹទ្ធសភា​ប៉ុណ្ណោះ ដែល​ត្រូវ​ធ្វើ​ឡើង ៦​ឆ្នាំ​ម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស