29 C
Phnom Penh

អតីត​អ្នកទោស​នយោបាយ​លោក មាជ សុវណ្ណារ៉ា ក្លាយ​ជា​ប្រធាន​គណបក្ស​ជំនាន់​ថ្មី​ដែល​ទើប​បង្កើត​ថ្មី

ដោយ ឌឹ ខេមបូឌា ដេលី

បទវិភាគ

គណបក្ស​ជំនាន់​ថ្មី សម្រេច​ជ្រើសរើស​អតីត​អ្នកទោស​នយោបាយ និង​ជា​អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា ជា​ប្រធាន​គណបក្ស ដែល​ធ្វើឡើង​ក្នុង​ពិធី​សមាជ​លើកដំបូង​របស់​ខ្លួន​នៅ​ថ្ងៃ​អង្គារ នេះ ចំ​ថ្ងៃ​ដែល​បារាំង​កាត់​ទឹកដី​កម្ពុជា​ក្រោម​ឲ្យ​ទៅ​វៀតណាម កាលពី ៧៥​ឆ្នាំ​មុន។

គណបក្ស​ជំនាន់​ថ្មី ប្រារព្ធ​ពិធី​សមាជ​លើកដំបូង​របស់​ខ្លួន​នៅ​ថ្ងៃទី​៤ ខែ​មិថុនា ឆ្នាំ​២០២៤ នេះ ដើម្បី​ប្រកាស​សកម្មភាព​នយោបាយ​ជា​ផ្លូវការ និង​ការ​ប្រកាស​សមាសភាព​គណៈកម្មាធិការ​អចិន្ត្រៃយ៍ សមាសភាព​គណៈកម្មាធិការ​នាយក និង​លក្ខន្តិកៈ​របស់​គណបក្ស ជូន​អង្គ​សមាជ​អនុម័ត​ផង​ដែរ ស្រប​ពេល​ដែល​លោក មាជ សុវណ្ណារ៉ា ក៏​ត្រូវ​បាន​អង្គ​សមាជ​ផ្តល់​សេចក្តី​ទុកចិត្ត​ជា​ឯកច្ឆន្ទ​ជ្រើសរើស​ជា​ប្រធាន​គណបក្ស​ថ្មី​នេះ។

ក្នុង​ពិធី​សមាជ​នេះ ក្រៅពី​អនុម័ត​សមាសភាព​សមាជិក​អចិន្ត្រៃយ៍ ១៥​នាក់ និង​សមាជិក​គណៈកម្មាធិការ​នាយក ៥៣​នាក់ អង្គ​សមាជ​គណបក្ស​ជំនាន់​ថ្មី ក៏​បាន​អនុម័ត​គោលនយោបាយ​គន្លឹះ ១០​ចំណុច​របស់​គណបក្ស​ផង​ដែរ ដូចជា ការ​លើកស្ទួយ​ការ​គោរព​សិទ្ធិមនុស្ស និង​ប្រជាធិបតេយ្យ, ការ​បង្រួបបង្រួម និង​ឯកភាព​ជាតិ, ការ​ពង្រឹង​យុត្តិធម៌​សង្គម, ការ​បញ្ចប់​នូវ​នយោបាយ​លាប​ពណ៌ និង​ការ​ការពារ​បូរណភាព​ទឹកដី ជាដើម។

គណបក្ស​ជំនាន់​ថ្មី ត្រូវ​បាន​ចុះឈ្មោះ​ក្នុង​បញ្ជី​គណបក្ស​នយោបាយ​នៅ​ក្រសួង​មហាផ្ទៃ​ជា​ផ្លូវការ កាលពី​ថ្ងៃទី​១២ ខែ​មេសា ឆ្នាំ​២០២៤ បន្ទាប់ពី​គណបក្ស​នេះ​បាន​បំពេញ​លក្ខខណ្ឌ​គ្រប់គ្រាន់​តាម​ច្បាប់​ស្ដីពី​គណបក្ស​នយោបាយ ដូចជា ការ​ប្រមូល​ស្នាម​មេដៃ​របស់​អ្នកគាំទ្រ​គ្រប់​ចំនួន​តាម​លក្ខខណ្ឌ​ច្បាប់ ជាដើម។

ប្រធាន​គណបក្ស​ជំនាន់​ថ្មី​លោក មាជ សុវណ្ណារ៉ា លើកឡើង​នៅ​ក្នុង​ពិធី​សមាជ​របស់​ខ្លួន​ថា អត្ថន័យ​ឈ្មោះ​គណបក្ស​ជំនាន់​ថ្មី គឺ​សំដៅ​ដល់​សកម្មភាព​នយោបាយ​របស់​គណបក្ស​សម្រាប់​ក្មេង​ជំនាន់​ក្រោយ ដែល​ពួកគេ​ត្រូវតែ​ចូលរួម​ក្នុង​កិច្ចការ​សង្គម ដើម្បី​ឯករាជភាព​ជាតិ បូរណភាព​ទឹកដី និង​អធិបតេយ្យភាព​ជាតិ​របស់​ខ្មែរ។

លោក មាជ សុវណ្ណារ៉ា លើកឡើង​ថា ការ​ជ្រើសរើស​យក​ថ្ងៃទី​៤ ខែ​មិថុនា ដើម្បី​ប្រារព្ធ​ពិធី​សមាជ​នេះ គឺ​ដើម្បី​ដាស់​ស្មារតី​ដល់​ពលរដ្ឋ​ខ្មែរ​គ្រប់​រូប​រំលឹក​ឡើងវិញ​នូវ​ប្រវត្តិសាស្ត្រ​របស់​ខ្លួន​ដែល​បាន​បាត់បង់​ទឹកដី​ទៅ​បរទេស​ជិតខាង​កាលពី​ជាង ៧០​ឆ្នាំ​មុន គឺ​នៅ​ថ្ងៃទី​៤ ខែ​មិថុនា ឆ្នាំ​១៩៤៩ ឱ្យ​នាំ​គ្នា​ក្រោក​ឡើង​ដើម្បី​ការពារ​ទឹកដី​របស់​ខ្លួន​កុំ​ឱ្យ​បាត់បង់​បន្ត​ទៀត។

ប្រធាន​គណបក្ស​ជំនាន់​ថ្មី​រូប​នេះ​បញ្ជាក់​ថា គណបក្ស​ថ្មី​នេះ​នឹង​ប្រកាន់​គោលជំហរ​នយោបាយ​អព្យាក្រឹត្យ បង្រួបបង្រួម​ជាតិ ឆ្ពោះ​ទៅ​រក​ការ​សាមគ្គីភាព​រវាង​ខ្មែរ និង​ខ្មែរ លើក​កម្ពស់​សេរីភាព យុត្តិធម៌ និង​សន្តិភាព ក្នុង​បំណង​ដើម្បី​លើកស្ទួយ​ប្រជាធិបតេយ្យ​តាម​រដ្ឋធម្មនុញ្ញ និង​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ ដែល​មាន​ចែង​ពី​របប​ប្រជាធិបតេយ្យ​សេរី​ពហុបក្ស​នោះ។

ជុំវិញ​ការ​បង្កើត​គណបក្ស​ថ្មីៗ​សព្វថ្ងៃ​នេះ ត្រូវ​គេ​សង្កេត​ឃើញ​ថា បន្ទាប់ពី​គណបក្ស​សង្គ្រោះ​ជាតិ ត្រូវ​បាន​តុលាការ​កំពូល​ប្រកាស​រំលាយ​កាលពី​ចុង​ឆ្នាំ​២០១៧ កន្លង​ទៅ ហើយ​សមាជិក​ជាន់ខ្ពស់​របស់​បក្ស​ប្រឆាំង​មួយ​នេះ​បាន​នាំគ្នា​ចេញ​ទៅ​បង្កើត​គណបក្ស​នយោបាយ​រៀងៗ​ខ្លួន​ចាប់តាំងពី​ឆ្នាំ​២០២០ មក។

ជាក់ស្តែង ដូចជា គណបក្ស​កែទម្រង់​កម្ពុជា, គណបក្ស​ឆន្ទៈ​ខ្មែរ, គណបក្ស​ខ្មែរ​អភិរក្ស, គណបក្ស​កម្ពុជា​និយម, គណបក្ស​ភ្លើង​ទៀន និង​គណបក្ស​ខ្មែរ​ស្រឡាញ់​ជាតិ ដែល​បាន​ប្រកាស​រំលាយ​ខ្លួនឯង​ទៅ​ចុះចូល​ជាមួយ​គណបក្ស​ប្រជាជន​កម្ពុជា កាលពី​ពេល​ថ្មីៗ​នេះ ជាដើម។

ប៉ុន្តែ​ក្នុង​រយៈពេល​ចុងក្រោយ​នេះ មាន​គណបក្ស​ពីរ​ទៀត​ដែល​ទើប​នឹង​បង្កើត​ថ្មី​ក្រោម​ការ​ផ្ដួចផ្ដើម​ពី​អតីត​សមាជិក​ជាន់ខ្ពស់​គណបក្ស​សង្គ្រោះ​ជាតិ គឺ​គណបក្ស​កម្លាំង​ជាតិ ដែល​ត្រូវ​បាន​បង្កើត​ឡើង​ដោយ​លោក ស៊ុន ចន្ធី ភាគី​លោក សម រង្ស៊ី និង​គណបក្ស​ជំនាន់​ថ្មី ដែល​ត្រូវ​បាន​បង្កើត​ដោយ​លោក មាជ សុវណ្ណារ៉ា ភាគី​លោក កឹម សុខា ដែល​ត្រូវ​បាន​ជ្រើសរើស​ជា​ប្រធាន​គណបក្ស​នៅ​ពេលនេះ។

របាយការណ៍​ក្រសួង​មហាផ្ទៃ បាន​បង្ហាញ​ថា យ៉ាងហោច​ណាស់​មាន​គណបក្ស​នយោបាយ​ជាង ៤០​ហើយ​ដែល​បាន​ចុះបញ្ជី​នៅ​ក្រសួង​មហាផ្ទៃ ដើម្បី​ធ្វើ​សកម្មភាព​នយោបាយ​នៅ​ក្នុង​ប្រទេស​កម្ពុជា។

ទោះបីជា​មាន​គណបក្ស​នយោបាយ​ច្រើន​ក៏ដោយ ក៏​គេ​កត់សម្គាល់​ឃើញ​ថា គណបក្ស​នយោបាយ​ដែល​ធ្វើ​សកម្មភាព​ជាក់ស្តែង​គឺ​មាន​តែ​ជាង ១០​គណបក្ស​ប៉ុណ្ណោះ។

ក្នុង​ចំណោម​គណបក្ស​នយោបាយ​ទាំង​ជាង ១០ នេះ គេ​ក៏​សង្កេត​ឃើញ​ផង​ដែរ​ថា គណបក្ស​ដែល​ធ្វើ​សកម្មភាព និង​រិះគន់​រដ្ឋាភិបាល​មាន​ចំនួន​តិចតួច​ប៉ុណ្ណោះ ដូចជា​គណបក្ស​ភ្លើង​ទៀន និង​គណបក្ស​កម្លាំង​ជាតិ ជាដើម ខណៈ​គណបក្ស​ជំនាន់​ថ្មី ដែល​ទើប​នឹង​ប្រកាស​ធ្វើ​សមាជ​នៅ​ពេលនេះ គេ​មិន​ទាន់​ដឹង​ច្បាស់​ពី​ជំហរ​នយោបាយ​របស់​គណបក្ស​នេះ​ថា​បែប​ណា​នៅឡើយ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស