សាលាដំបូងរាជធានីភ្នំពេញ បន្តសាកសួរអំពីរចនាសម្ព័ន្ធ ដំណើរការសកម្មភាព និងប្រភពថវិការបស់ក្រុមសកម្មជនចលនាមាតាធម្មជាតិ ក្នុងសវនាការលើកទី៣ ករណីចោទប្រកាន់ពីបទ រួមគំនិតក្បត់ និងប្រមាថអង្គព្រះមហាក្សត្រ នៅថ្ងៃអង្គារនេះ។
សវនាការលើសំណុំរឿងសកម្មជនចលនាមាតាធម្មជាតិ ពីបទរួមគំនិតក្បត់ និងប្រមាថអង្គព្រះមហាក្សត្រ នៅថ្ងៃទី១១ ខែមិថុនា គឺជាការសួរដេញដោល និងអានរបាយការណ៍ផ្សេង។ នៅក្រោយការបញ្ចប់ការសាកសួរ សកម្មជនចលនាមាតាធម្មជាតិបានប៉ះទង្គិចជាមួយក្រុមសន្តិសុខដែលយាមកាមនៅខាងក្រៅរបងតុលាការ ដោយសារក្រុមសន្តិសុខទាំងនោះរារាំងមិនឲ្យក្រុមសកម្មជនទាំងនោះចាកចេញពីបរិវេណតុលាការ។
សកម្មជនបរិស្ថានដែលមានវត្តមានក្នុងសវនាការរួមមាន លោក ថុន រដ្ឋា លោក យឹម លាងហ៊ី លោក លី ចាន់ដារ៉ាវុត កញ្ញា ភួន កែវរស្មី និងកញ្ញា ឡុង គន្ធា ចំណែកសកម្មជនបរិស្ថាន ៥នាក់ផ្សេងទៀតដូចជា កញ្ញា ស៊ុន រដ្ឋា លោក ពក ខឿយ លោក ប៉ិញ ពិសិដ្ឋ អ្នកស្រី រ៉ី រក្សា និងលោក អាឡិច ហាន់ដ្រូ ហ្គន់សាឡេស ដេវិតសុន (Alejandro Gonzalez Davidson) មិនមានអវត្តមានក្នុងសវនាការនេះទេ។
សកម្មជនចលនាមាតាធម្មជាតិលោក យឹម លាងហ៊ី បានលើកឡើងក្រោយពេលបិទបញ្ចប់សវនាការថា ការសួរដេញដោលរបស់តុលាការអំពីរចនាសម្ព័ន្ធ ដំណើរការសកម្មភាព និងប្រភពថវិការបស់ក្រុមចលនាមាតាធម្មជាតិ គឺជារឿងមិនសមហេតុសមផល ពីព្រោះសកម្មភាពរបស់ចលនាមាតាធម្មជាតិកន្លងមក មិនមែនជាការបំផ្លាញធនធានធម្មជាតិរបស់ប្រទេសនោះទេ ផ្ទុយទៅវិញ គឺជាការចូលរួមថែរក្សាការពារសម្បត្តិធម្មជាតិរបស់ខ្មែរប៉ុណ្ណោះ។
ចំណែកលោក ថុន រដ្ឋា លើកឡើងអំឡុងពេលចូលរួមសវនាការដែរថា សកម្មភាពរបស់ចលនាមាតាធម្មជាតិដែលបានធ្វើកន្លងមក មិនមែនជាទង្វើក្បត់ជាតិនោះទេ ពីព្រោះការដង្ហែញត្តិទៅស្ថាប័នពាក់ព័ន្ធដើម្បីសុំកិច្ចអន្តរាគមន៍ទប់ស្កាត់បទល្មើសព្រៃ លុបបឹង ជីករ៉ែ លក់ខ្សាច់ និងការបង្ហូរទឹកកខ្វក់ចូលទន្លេ និងសមុទ្រ ជាដើម សុទ្ធតែជាសកម្មភាពត្រឹមត្រូវតាមច្បាប់ និងជាសកម្មភាពជួយការពារសម្បត្តិជាតិខ្មែរទាំងអស់។
សវនាការលើសំណុំរឿងសកម្មជនចលនាមាតាធម្មជាតិ នៅថ្ងៃអង្គារនេះ គឺជាសវនាការលើកទី៣ ហើយសម្រាប់ឆ្នាំ២០២៤ នេះ បន្ទាប់ពីសវនាការលើកទី១ ត្រូវលើកពេល និងសវនាការលើកទី២ ត្រូវបានសកម្មជនចលនាមាតាធម្មជាតិ ធ្វើពហិការមិនចូលរួម ដោយសារតែតុលាការដាក់រនាំងហាមឃាត់អ្នកសារព័ត៌មាន និងអ្នកគាំទ្រពួកគេមិនឱ្យចូលរួមស្តាប់សវនាការនោះ។
ជុំវិញបញ្ហានេះ អង្គការលើកលែងទោសអន្តរជាតិ បានចេញសេចក្តីប្រកាសព័ត៌មានមួយកាលពីថ្ងៃទី៥ ខែមិថុនា ឆ្នាំ២០២៤ នេះ ដោយជំរុញឱ្យរដ្ឋាភិបាលក្រុងភ្នំពេញ ទម្លាក់ចោលរាល់ការចោទប្រកាន់ទាំងអស់លើសកម្មជនចលនាមាតាធម្មជាតិ និងត្រូវបើកសេរីភាពឲ្យមានការចូលរួមពីសង្គមស៊ីវិលលើកិច្ចការពារបរិស្ថានផងដែរ។
ចំណែកអតីតមន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា បានលើកឡើងកាលពីពេលថ្មីៗនេះថា បទចោទដែលតុលាការចោទប្រកាន់លើក្រុមយុវជនចលនាមាតាធម្មជាតិ គឺជាបទចោទដែលមិនសមាមាត្រនឹងសកម្មភាពដែលពួកគេបានធ្វើនោះទេ ព្រោះសកម្មភាពរបស់សកម្មជនបរិស្ថានកន្លងមក មិនបានបំផ្លាញសម្បត្តិធនធានធម្មជាតិកម្ពុជា ឬរំលោភបំពានលើច្បាប់ស្ដីពីបរិស្ថានណាមួយរបស់កម្ពុជានោះទេ។
សកម្មជនចលនាមាតាធម្មជាតិទាំង ៥នាក់ អាចប្រឈមមុខនឹងទោសជាប់ពន្ធនាគាររហូតទៅដល់ ១០ឆ្នាំ ប្រសិនបើត្រូវបានតុលាការផ្ដន្ទាទោសលើភាពសកម្មនិយមអហិង្សាក្នុងកិច្ចការពារបរិស្ថានរបស់ពួកគេនាពេលកន្លងមកនោះ។
ក្រុមយុវជនចលនាមាតាធម្មជាតិ គឺជាក្រុមយុវជនសកម្មផ្នែកកិច្ចការពារបរិស្ថាននៅកម្ពុជាដែលបានចូលរួមការពារការលុបបឹងក្នុងរាជធានីភ្នំពេញ ការកាប់បំផ្លាញព្រៃឈើ និងការបំផ្លិចបំផ្លាញធនធានធម្មជាតិនានា។ ដោយសារសកម្មភាពទាំងនេះ ក្រុមយុវជនទាំងនោះបានទទួលពានរង្វាន់ Right Livelihood ឆ្នាំ២០២៣ កន្លងទៅផងដែរ៕
© 2024, ឌឹ ខេមបូឌា ដេលី. All rights reserved.