អ្នកឃ្លាំមើលលើកឡើងថា សមាគមឧកញ៉ាកម្ពុជា បរិច្ចាគថវិកាឱ្យកាកបាទក្រហមកម្ពុជាក្នុងជំនួយសប្បុរស គឺជាការបំភ័ន្ត និងស្ដារកេរ្តិ៍ឈ្មោះអាស្រូវរបស់ក្រុមឧកញ៉ាដែលប្រព្រឹត្តអំពើទុច្ចរិតនៅក្នុងសង្គមបច្ចុប្បន្ននេះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២១ ខែមិថុនា ថា ការបរិច្ចាគថវិកានេះដោយលោកសង្ស័យថាជាការលាងលុយកខ្វក់ដែលបានមកពីអំពើពុករលួយ និងបំផ្លាញធនធានធម្មជាតិរបស់ក្រុមឧកញ៉ាទាំងនោះ។ មួយវិញទៀត ការបរិច្ចាគនេះ ក៏ជាការស្ដារកេរ្តិ៍ឈ្មោះឱ្យក្រុមឧកញ៉ាមួយចំនួនដែលប្រព្រឹត្តអំពើទុច្ចរិត និងប្រព្រឹត្តបទល្មើសឃាតកម្ម ជាដើម។
លោកបន្តថា ការបរិច្ចាគលុយក្នុងរូបភាពសប្បុរសធម៌ទៅកាន់កាកបាទក្រហមកម្ពុជានេះ គឺមិនអាចលាងកេរ្តិ៍ឈ្មោះអាស្រូវរបស់ក្រុមឧកញ៉ាដែលពាក់ព័ន្ធនឹងការរំលោភសិទ្ធិមនុស្ស ឆបោកលុយប្រជាពលរដ្ឋ និងប្រព្រឹត្តឃាតកម្មលើមនុស្សឡើយ ពីព្រោះទង្វើរបស់ក្រុមឧកញ៉ាទាំងនោះបានបង្ហាញឱ្យប្រជាពលរដ្ឋខ្មែរឃើញ ហើយថែមទាំងល្បីដល់សហគមន៍អន្តរជាតិផងដែរ។
ទាក់ទងនឹងអំពើ និងទង្វើរបស់ពួកឧកញ៉ានេះ កាលពីថ្ងៃទី១៧ ខែមិថុនា កន្លងទៅ ឧកញ៉ា ស្រី ស៊ីណា បានបាញ់សម្លាប់មនុស្ស ២នាក់ដែលជាគូដណ្ដឹងនឹងគ្នានៅបុរី ប៉េង ហួត បឹងស្នោ រាជធានីភ្នំពេញ។ ក្រោយពីករណីឃាតកម្មនោះ ប្រធានសមាគមឧកញ៉ា លោក លី យ៉ុងផាត់ ដែលជាប់ឈ្មោះអាក្រក់នៅលើឆាកអន្តរជាតិពាក់ព័ន្ធនឹងរឿងបណ្ដេញពលរដ្ឋនៅខេត្តកំពង់ស្ពឺ និងខេត្តកោះកុង ចេញពីលំនៅឋានទាំងបង្ខំ ហើយបានប្រើប្រាស់ប្រព័ន្ធតុលាការដើម្បីដាក់សម្ពាធលើពលរដ្ឋ បានបរិច្ចាគថវិកាចំនួនជាង ១ ៥៥៥ ៥៥៥ដុល្លារ ទៅកាន់កាកបាទក្រហមកម្ពុជានៅក្នុងខួបទី១៦១ នៃទិវាពិភពលោកកាកបាទក្រហម និងអឌ្ឍចន្ទក្រហម ថ្ងៃទី៨ ខែឧសភា ឆ្នាំ២០២៤ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» នៅថ្ងៃទី២១ ខែមិថុនា។
រីឯឧកញ៉ាមួយចំនួនទៀត ដូចជា អតីតឧកញ៉ា ហ៊ី គឹមហុង អតីតឧកញ៉ា ឡេង ចាន់ណា និងឧកញ៉ា ជា សារ៉ន ជាដើម បានឆបោកលុយប្រជាពលរដ្ឋរាប់លានដុល្លារ ហើយមកដល់បច្ចុប្បន្ន រាជរដ្ឋាភិបាលដឹកនាំដោយកូនប្រុសលោក ហ៊ុន សែន គឺលោក ហ៊ុន ម៉ាណែត មិនទាន់មានដំណោះស្រាយជូនប្រជាពលរដ្ឋនៅឡើយទេ៕
© 2024, ឌឹ ខេមបូឌា ដេលី. All rights reserved.