 បានប្រកាសពីការចាប់ផ្ដើមបញ្ជូនយន្តហោះចម្បាំង F-16 ទៅឱ្យអ៊ុយក្រែន ហើយ តាមសំណើរបស់ប្រទេសអ៊ុយក្រែន។){kind=link}
សម្ព័ន្ធមិត្តអង្គការយោធាណាតូ (NATO) បានប្រកាសពីការចាប់ផ្ដើមបញ្ជូនយន្តហោះចម្បាំង F-16 ទៅឱ្យអ៊ុយក្រែន ហើយ តាមសំណើរបស់ប្រទេសអ៊ុយក្រែន។
ការប្រកាសពីការបញ្ជូនយន្តហោះចម្បាំង F-16 ទៅឱ្យអ៊ុយក្រែន ត្រូវបានធ្វើឡើងដោយផ្ទាល់ពីប្រធានាធិបតីសហរដ្ឋអាមេរិក លោក ចូ បៃដិន ដែលលោកបានថ្លែងនៅចំពោះមុខមេដឹកនាំ NATO នៅក្រុងវ៉ាស៊ីនតោន។ លោក បៃដិន បានបន្ថែមទៀតថា ប្រទេសដាណឺម៉ាក និងហុឡង់ដ៍ បានចាប់ផ្ដើមបញ្ជូនយន្តហោះចម្បាំង F-16 ផលិតដោយសហរដ្ឋអាមេរិកទៅឱ្យអ៊ុយក្រែន ហើយ។
បន្ថែមពីលើនេះ រដ្ឋមន្ត្រីការបរទេសសហរដ្ឋអាមេរិក លោក Antony Blinken ក៏បានអះអាងដែរថា ការបញ្ជូនយន្តហោះចម្បាំង F-16 ទៅឱ្យអ៊ុយក្រែន គឺជាការបញ្ជូនសារមួយយ៉ាងច្បាស់ទៅកាន់លោក ពូទីន។
ប្រទេសដាណឺម៉ាក បានសន្យាឱ្យយន្តហោះចម្បាំង F-16 ចំនួន ១៩គ្រឿង ហើយប្រទេសហុឡង់ដ៍ ថាឱ្យចំនួន ២៤គ្រឿង។ ចំណែកប្រទេសន័រវែស កាលពីថ្ងៃពុធក៏បានប្រកាសផ្ដល់យន្តហោះ F-16 ចំនួន ៦គ្រឿងទៅឱ្យអ៊ុយក្រែន ផងដែរ។
ចំណែកប្រទេសបែលហ្សិក ក៏បានសន្យាបញ្ជូន F-16 ទៅឱ្យអ៊ុយក្រែន ដែរ តែមិនទាន់ប្រកាសថានឹងបញ្ជូនចំនួនប៉ុន្មានគ្រឿងនោះទេ។ តែគេដឹងថា ប្រទេសទាំង ៤ នេះ អាចបញ្ជូនយន្តហោះ F-16 ជិត ៧០គ្រឿងទៅឱ្យអ៊ុយក្រែន។
តាមលោក Antony Blinken យន្តហោះចម្បាំង F-16 នឹងចាប់ផ្ដើមប្រតិបត្តិការនៅលើលំហអាកាសអ៊ុយក្រែន នៅប៉ុន្មានថ្ងៃទៀតនេះ។
សង្គ្រាមក្នុងទឹកដីអ៊ុយក្រែន បានឈានដល់ជាង ២៨ខែហើយគិតត្រឹមថ្ងៃទី១១ ខែកក្កដា ឆ្នាំ២០២៤។ ការប្រយុទ្ធនៅលើសមរភូមិ មិនទាន់ឃើញថាមានការប្រែប្រួលនោះទេ។ ភាគីទាំងពីរនៅតែរុញច្រានគ្នាទៅវិញទៅមក បើទោះជារុស្ស៊ី មានប្រៀបជាងអ៊ុយក្រែន ក៏ដោយ។ គេថារុស្ស៊ី មានប្រៀបជាងអ៊ុយក្រែន តែនៅលើសមរភូមិលំហអាកាសតែប៉ុណ្ណោះ ព្រោះរុស្ស៊ី មានមីស៊ីលរយៈចម្ងាយឆ្ងាយបាលីស្ទិក ដែលអាចបាញ់គ្រប់គោលដៅទៅលើប្រទេសអ៊ុយក្រែន ខណៈមហាអំណាចនេះមានយន្តហោះចម្បាំងទំនើបៗរាប់រយគ្រឿងវាយប្រហារអ៊ុយក្រែន។
ចុងក្រោយនេះ រុស្ស៊ីបាញ់មីស៊ីលល្បឿនលឿនជាងសំឡេង និងមីស៊ីលបាលីស្ទិក ដោយវាយប្រហារចុះមូលដ្ឋានទ័ពអាកាសរបស់អ៊ុយក្រែន នៅភាគខាងលិចប្រទេស ដែលធ្វើឱ្យលោកប្រធានាធិបតីអ៊ុយក្រែន វូឡូឌីមៀ ហ្សេឡេនស្គី ប្រកាសអាសន្នពីការចាំបាច់ត្រូវមានប្រព័ន្ធការពារដែនអាកាសមួយរឹងមាំ ដើម្បីប្រឆាំងនឹងគ្រាប់មីស៊ីលរបស់រុស្ស៊ី។
ប្រធានាធិបតីអ៊ុយក្រែន នៅមុនថ្ងៃបើកកិច្ចប្រជុំកំពូលអង្គការ NATO បានថ្លែងថា ប្រទេសរបស់លោកបានខ្វះខាតប្រព័ន្ធការពារដែនអាកាស។ លោកបានស្នើជួយផ្តល់បន្ថែមទៀតនូវប្រព័ន្ធមីស៊ីល Patriot។
លោកបានលើកឡើងនូវករណីវាយប្រហារតាមផ្លូវអាកាសចុងក្រោយរបស់រុស្ស៊ី នូវអាវុធមីស៊ីលកន្លងមកនេះដែលបណ្តាលឱ្យមានមនុស្សស្លាប់ជាច្រើនសិបនាក់ និងការខូចខាតហេដ្ឋារចនាសម្ព័ន្ធ ក្នុងនោះមានទាំងមន្ទីរពេទ្យកុមារមួយនៅទីក្រុងគៀវ រងការវាយប្រហារយ៉ាងធ្ងន់ធ្ងរបំផុត។
ឆ្លើយតបនឹងសេចក្ដីត្រូវការបន្ទាន់ មេដឹកនាំអង្គការ NATO បានប្រកាសពីការបញ្ជូនប្រព័ន្ធមីស៊ីល Patriot ចំនួន ៥គ្រឿង និងប្រព័ន្ធមីស៊ីលផ្សេងៗទៀតដែលអាចមានជាង ២០គ្រឿង។
តើយន្តហោះចម្បាំង F-16 អាចរុញរុស្ស៊ី ថមថយការវាយលុកឬទេ?
អ្នកជំនាញថានៅពេល F-16 បើកប្រតិបត្តិការនៅលើលំហអាកាសអ៊ុយក្រែន កងទ័ពអ៊ុយក្រែនអាចមានសមត្ថភាព និងឱកាសវាយលុកចូលទីតាំងកងទ័ពរុស្ស៊ី ហើយអាចរុញទ័ពរុស្ស៊ី ចេញពីខ្សែជួរមុខបានទៀតផង។
ឧត្តមសេនីយ៍ប៉ូឡូញម្នាក់ គឺលោក Jaroslaw Kraszewski បាននិយាយថា ការមកដល់យន្តហោះ F-16 នឹងធ្វើឱ្យអ៊ុយក្រែន មានតុល្យភាពនៃការវាយប្រហារដោយទ័ពអាកាសជាមួយនឹងរុស្ស៊ី ដែលយ៉ាងហោចណាស់ ទ័ពរុស្ស៊ី អាចគិតពីការងាយគ្រោះថ្នាក់ចំពោះទីតាំងរបស់ខ្លួន ទាំងនៅក្នុងទឹកដីអ៊ុយក្រែន និងខាងក្នុងទឹកដីរុស្ស៊ី។
ឧត្ដមសេនីយ៍ប៉ូឡូញបញ្ជាក់ថា ដើម្បីការពារលំហអាកាសអ៊ុយក្រែន បានរឹងមាំ ហើយអាចផ្ដល់ឱកាសឱ្យ F-16 ងាយវាយប្រហារចូលទីតាំងរបស់កងទ័ពរុស្ស៊ី គឺមូលដ្ឋានទ័ពសម្រាប់ F-16 ត្រូវតែមានសុវត្ថិភាព។
តាមឧត្តមសេនីយ៍ប៉ូឡូញរូបនេះ យន្តហោះ F-16 អាចនឹងជួយអន្តរាគមន៍ទ័ពជើងគោករបស់អ៊ុយក្រែន ដែលត្រូវវាយបកដើម្បីរុញច្រានទ័ពរុស្ស៊ី។ មិនតែប៉ុណ្ណោះ អតីតដែនដីគ្រីមៀរ របស់អ៊ុយក្រែន ក៏ F-16 អាចវាយប្រហារ ហើយអ៊ុយក្រែន អាចលើកទ័ពវាយរំដោះដែនដីនេះពីរុស្ស៊ី មកវិញផងដែរ។
ជាមួយគ្នានេះ ឧត្តមសេនីយ៍ចូលនិវត្តន៍សហរដ្ឋអាមេរិក លោក Ben Hodges ក៏បាននិយាយថា រុស្ស៊ី នឹងព្យាយាមដោយលំបាកក្នុងវាយប្រហារចូលទឹកដីអ៊ុយក្រែន នៅពេលដែល F-16 ទៅដល់អ៊ុយក្រែន។
លោក Ben Hodges បានផ្ដល់យោបល់ទៅអ៊ុយក្រែន វាយប្រហារចូលជ្រោយឧបទ្វីបគ្រីមៀរ ជាមួយការធ្វើអន្តរាគមន៍ដោយ F-16 និងមីស៊ីលរយៈចម្ងាយឆ្ងាយដែលជំនួយរបស់សហរដ្ឋអាមេរិក និងប្រទេសសមាជិកណាតូ៕