 បញ្ឈប់ការគប់គិតជាមួយរដ្ឋាភិបាលកម្ពុជាបណ្តេញពលរដ្ឋចេញពីតំបន់រមណីយដ្ឋានអង្គរបន្តទៀត។){kind=link}
អង្គការក្រៅរដ្ឋាភិបាលជាច្រើនដែលមានមូលដ្ឋាននៅក្រៅស្រុក បាននាំគ្នាចេញធ្វើបាតុកម្មទាមទារឱ្យអង្គការយូណេស្កូ (UNESCO) បញ្ឈប់ការគប់គិតជាមួយរដ្ឋាភិបាលកម្ពុជាបណ្តេញពលរដ្ឋចេញពីតំបន់រមណីយដ្ឋានអង្គរបន្តទៀត។
អង្គការសង្គ្រោះកម្ពុជា (Save Cambodia) រួមជាមួយសហព័ន្ធខ្មែរចំណាកស្រុក ព្រមទាំងក្រុមប្រឹក្សា «២៣ តុលា ១៩៩១» នៅថ្ងៃសុក្រ ទី២៦ ខែកក្កដា នេះ បាននាំគ្នាចេញធ្វើបាតុកម្មតវ៉ាទាមទារក្រោមពាក្យស្លោកថា «សង្គ្រោះអង្គរ ឬ Save Angkor» ដោយជំរុញឱ្យអង្គការយូណេស្កូចេញមុខទាមទារទៅកាន់រដ្ឋាភិបាលកម្ពុជា ឱ្យផ្តល់លំនៅឋានក្នុងតំបន់រមណីយដ្ឋានអង្គរ ដល់ពលរដ្ឋដែលត្រូវបានបណ្ដេញចេញ ឲ្យត្រឡប់មកភូមិកំណើតរបស់ពួកគេវិញ ហើយត្រូវផ្តល់សំណងសមរម្យដល់ជនរងគ្រោះទាំងអស់នោះថែមទៀត។
អង្គការសង្គ្រោះកម្ពុជា ជំរុញឱ្យអង្គការយូណេស្កូ រួមទាំងរបបក្រុងភ្នំពេញ ត្រូវគោរពកិច្ចព្រមព្រៀងបេតិកភណ្ឌអង្គរដែលខ្លួនបង្កើតឡើងរួមគ្នានាពេលកន្លងមក។
ក្រុមអង្គការដដែលនេះបញ្ជាក់ថា ក្រៅពីតំបន់អង្គរ រដ្ឋាភិបាលកម្ពុជាក៏ត្រូវបញ្ឈប់ជាបន្ទាន់នូវការរំលោភយកដីធ្លីគ្រប់ទីកន្លែងទាំងអស់នៅក្នុងប្រទេសកម្ពុជាផងដែរ ដើម្បីធានាការរស់នៅក្នុងភាពថ្លៃថ្នូរក្នុងនាមជាមនុស្សសម្រាប់ពលរដ្ឋរបស់ខ្លួន។
ប្រភពដដែលបន្ទោសថា អង្គការយូណេស្កូមានតួនាទីសំខាន់ណាស់ក្នុងការការពារតំបន់រមណីយដ្ឋានអង្គរ ប៉ុន្តែអង្គការមួយនេះបែរជាសមគំនិតជាមួយរបបក្រុងភ្នំពេញក្នុងការបណ្តេញពលរដ្ឋដែលមានកំណើតកើតជាក្នុងតំបន់នេះ ឱ្យទៅរស់នៅទាំងអនាថានៅកន្លែងផ្សេងដោយគ្មានការទទួលខុសត្រូវទៅវិញ។
អង្គការសង្គ្រោះកម្ពុជា (Save Cambodia) រួមជាមួយសហព័ន្ធខ្មែរចំណាកស្រុក ព្រមទាំងក្រុមប្រឹក្សា «២៣ តុលា ១៩៩១» នាំគ្នាធ្វើបាតុកម្មនៅមុខទីស្នាក់ការអង្គការយូណេស្កូ ក្នុងទីក្រុងប៉ារីស ប្រទេសបារាំង (Denfert-Rochereau 875014 Paris) នៅវេលាម៉ោង ២រសៀល ថ្ងៃទី២៦ ខែកក្កដា ឆ្នាំ២០២៤។
ក្រុមអ្នកចូលរួមបាតុកម្ម នាំគ្នាកាន់បដាដែលមានសរសេរពាក្យផ្សេងៗ ដូចជា៖
- ផ្ដល់លំនៅឋានដល់ពលរដ្ឋវិញ
- បញ្ឈប់ការបណ្ដេញពលរដ្ឋចេញពីលំនៅឋានក្នុងតំបន់អង្គរ
- ប្រាសាទអង្គរ និងពលរដ្ឋនៅក្នុងភូមិកំណើតដើម គឺជាបេតិកភណ្ឌជាតិ
- គ្មានភូមិកំណើតដើម គឺគ្មានបេតិកភណ្ឌ និងគ្មានអាជ្ញាធរអប្សរា
- អង្គការយូណេស្កូ ត្រូវបំពេញកាតព្វកិច្ចរបស់ខ្លួន
- រួមទាំងពាក្យថា ភូមិកំណើតដើមក្នុងតំបន់អង្គរ ត្រូវតែថែរក្សាការពារឲ្យបានផងដែរ។
អង្គការសង្គ្រោះកម្ពុជា (Save Cambodia) បញ្ជាក់ថា អង្គរគឺជាចំណុចចាប់ផ្តើមក្នុងការតស៊ូមតិស្វែងរកដំណោះស្រាយដីធ្លីដែលកំពុងរងនូវការរំលោភបំពាននៅទូទាំងប្រទេសសព្វថ្ងៃនេះ ព្រោះថាគ្មាននរណាម្នាក់ចង់ចាកចេញពីលំនៅឋានរបស់ខ្លួនឡើយ។
ជុំវិញបញ្ហានេះ នាយកអង្គការសង្គ្រោះកម្ពុជា កញ្ញា ស៊ិន ថាវី បានអះអាងថា រដ្ឋាភិបាលកម្ពុជាកំពុងរៀបចំឯកសារកុហកគណៈកម្មាធិការបេតិកភណ្ឌពិភពលោក ជុំវិញការបណ្តេញពលរដ្ឋដោយបង្ខំនៅតំបន់រមណីយដ្ឋានអង្គរចេញពីលំនៅឋានប្រមាណជា ៣០០ទំព័រ មុននឹងកិច្ចប្រជុំរបស់គណៈកម្មាធិការនេះចាប់ផ្តើមធ្វើឡើងនៅទីក្រុងញូវដេលី ប្រទេសឥណ្ឌា នៅចុងខែកក្កដា នេះ។
កាលពីអំឡុងខែកក្កដា ឆ្នាំ២០២២ រដ្ឋាភិបាលកម្ពុជាបានបណ្តេញពលរដ្ឋដែលរស់នៅក្នុងតំបន់រមណីយដ្ឋានអង្គរ ចេញពីលំនៅឋានដោយបង្ខំ ក្នុងនោះ អតីតនាយករដ្ឋមន្ត្រីកម្ពុជាលោក ហ៊ុន សែន គំរាមថា បើពលរដ្ឋទាំងនោះមិនចាកចេញតាមផែនការរបស់រដ្ឋាភិបាលទេ ពួកគេនឹងមិនទទួលបានសំណងអ្វីទាំងអស់។
យ៉ាងណាក៏ដោយ បន្ទាប់ពីពលរដ្ឋទាំងនោះចាកចេញពីលំនៅឋានតាមការបង្ខំរបស់រដ្ឋាភិបាល សំណងដែលពួកគេទទួលបាន គឺមានតែស័ង្កសី ១០សន្លឹក មី ១កេស ត្រីខ ១យួរ នំបុ័ងម្នាក់ ១ដើម បណ្ណក្រីក្រ ដីទំហំ ២០ម៉ែត្រគុណនឹង ៣០ម៉ែត្រក្នុង ១គ្រួសារ រួមទាំងថវិកាបន្តិចបន្តួចប៉ុណ្ណោះ។
របាយការណ៍របស់អង្គការលើកលែងទោសអន្តរជាតិ (Amnesty International) បានបង្ហាញថា ពលរដ្ឋដែលជម្លៀសចេញពីតំបន់អង្គរ ឱ្យទៅរស់នៅទីតាំងថ្មី មានចំនួនប្រមាណជា ១ម៉ឺនគ្រួសារ ខណៈរបាយការណ៍របស់រដ្ឋាភិបាលបង្ហាញថាមានត្រឹមតែជាង ៤ពាន់គ្រួសារប៉ុណ្ណោះ៕