អ្នកឃ្លាំមើលស្ថានការណ៍កម្ពុជា លើកទឹកចិត្តឱ្យអង្គសមាជរបស់គណបក្សកម្លាំងជាតិ ពិនិត្យសមាសភាពមេដឹកនាំ និងកំណត់សកម្មភាពនយោបាយឱ្យបានត្រឹមត្រូវ ដើម្បីចៀសផុតពីការធ្វើទុក្ខបុកម្នេញរបស់បក្សកាន់អំណាចក្នុងគោលដៅបម្រើនយោបាយរបស់ពួកគេ។
ប្រធានក្រុមប្រឹក្សាឃ្លាំមើលកម្ពុជា និងជាអនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១២ កញ្ញា នេះថា ក្នុងស្ថានភាពដ៏តឹងតែងដែលកំពុងរងនូវការគាបសង្កត់ពីបក្សកាន់អំណាចនៅពេលនេះ គណបក្សកម្លាំងជាតិ ត្រូវតែរួបរួមកម្លាំងផ្ទៃក្នុងរបស់ខ្លួនជាមួយនឹងពលរដ្ឋឱ្យកាន់តែខ្លាំង។ លោកថា នៅពេលនេះ គណបក្សប្រជាជនកម្ពុជាកំពុងព្យាយាមធ្វើឱ្យបែកបាក់សាមគ្គីភាពរបស់បក្សនេះយ៉ាងគំហុក។
លោក ម៉ែន ណាត លើកឡើងថា ភស្តុតាងជាក់ស្តែង មន្ត្រីជាន់ខ្ពស់នៃបក្សកម្លាំងជាតិ ត្រូវបានរដ្ឋាភិបាលចាប់ឃុំខ្លួនជាបន្តបន្ទាប់ ដោយប្រើប្រព័ន្ធតុលាការជាឧបករណ៍ ដូចជា ការចាប់ខ្លួនលោក ស៊ុន ចន្ធី លោក ម៉ី សេងហ៊រ និងលោក អ៊ុំ វីរៈរដ្ឋ រួមទាំងព្យាយាមឃាត់ឃាំងសកម្មភាពនយោបាយរបស់លោក រ៉ុង ឈុន នៅពេលនេះ ជាដើម។
ប្រធានក្រុមប្រឹក្សាឃ្លាំមើលកម្ពុជារូបនេះ អំពាវនាវឱ្យរដ្ឋាភិបាលកម្ពុជាដែលកំពុងរងនូវការរិះគន់ពីមជ្ឈដ្ឋានជាតិ និងអន្តរជាតិជុំវិញការរំលោភសិទ្ធិមនុស្ស សិទ្ធិបញ្ចេញមតិ សិទ្ធិនយោបាយ បញ្ឈប់ការរឹតត្បិតលើសេរីភាពពលរដ្ឋជាបន្ទាន់ ដើម្បីធានាលំហសេរីភាពនយោបាយរបស់ពលរដ្ឋខ្មែរ និងបក្សនយោបាយដែលមានគំនិតផ្ទុយ ដើម្បីលើកកម្ពស់នីតិរដ្ឋនៅកម្ពុជា។
គណបក្សកម្លាំងជាតិ បានចេញសេចក្តីប្រកាសព័ត៌មាន កាលពីថ្ងៃទី១១ ខែកញ្ញា ឆ្នាំ២០២៤ នេះ ដោយកំណត់យកថ្ងៃទី១៥ ខែកញ្ញា ឆ្នាំ២០២៤ រៀបចំសមាជវិសាមញ្ញរបស់ខ្លួននៅទីស្នាក់ការគណបក្សដែលស្ថិតនៅភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ជុំវិញបញ្ហានេះ រដ្ឋបាលរាជធានីភ្នំពេញបានចេញសេចក្តីជូនដំណឹងមួយកាលពីថ្ងៃទី១១ ខែកញ្ញា ទៅកាន់គណបក្សកម្លាំងជាតិ ដែលបានស្នើសុំប្រារព្ធពិធីសមាជវិសាមញ្ញនៅពាក់កណ្តាលខែកញ្ញា នេះថា គណបក្សនេះអាចដំណើរការសមាជវិសាមញ្ញរបស់ខ្លួនបាន ប៉ុន្តែមិនឱ្យមានអ្នកចូលរួមលើសពី ២០០នាក់ដាច់ខាត។
រដ្ឋបាលរាជធានីភ្នំពេញ បញ្ជាក់ថា ដើម្បីឱ្យពិធីសមាជនេះប្រព្រឹត្តទៅដោយរលូន ចៀសវាងប៉ះពាល់ដល់ការធ្វើចរាចរណ៍របស់ប្រជាពលរដ្ឋ និងសណ្ដាប់ធ្នាប់សាធារណៈ គណបក្សត្រូវតែសហការជាមួយអាជ្ញាធរមូលដ្ឋានឱ្យបានល្អប្រសើរ។
កាលពីថ្ងៃទី៤ ខែកញ្ញា កន្លងទៅ គណបក្សកម្លាំងជាតិ បានចេញលិខិតមួយទៅកាន់សាលាក្រុងភ្នំពេញ ដើម្បីជូនដំណឹងអំពីការប្រារព្ធសមាជវិសាមញ្ញរបស់ខ្លួននៅថ្ងៃទី១៥ កញ្ញា ខាងមុខនេះ ដោយកំណត់អ្នកចូលរួមចំនួន ៣០០នាក់។
យ៉ាងណាក៏ដោយ ក្រោយទទួលបានសេចក្តីជូនដំណឹងរបស់គណបក្សកម្លាំងជាតិ សាលារាជធានីភ្នំពេញ បានចេញកំណត់ហេតុប្រជុំរបស់ខ្លួនកាលពីថ្ងៃទី១០ ខែកញ្ញា ថា គណបក្សនេះអាចដំណើរការពិធីសមាជបាន តែតម្រូវឱ្យមានសមាជិកចូលរួមតែ ២០០នាក់ប៉ុណ្ណោះ ហើយករណីដែលគណបក្សនេះមិនគោរពតាម នឹងត្រូវទទួលខុសត្រូវចំពោះមុខច្បាប់ជាកំហិត។
គណបក្សកម្លាំងជាតិ ធ្លាប់បានជូនដំណឹងពីការធ្វើសមាជវិសាមញ្ញរបស់ខ្លួនម្តងរួចមកហើយកាលពីអំឡុងខែសីហា ប៉ុន្តែត្រូវបានអាជ្ញាធរហាមឃាត់ ក្រោមហេតុផលថា ដោយសារមានការប៉ុនប៉ងផ្តួលរំលំរដ្ឋាភិបាលកម្ពុជា ដូច្នេះគណបក្សកម្លាំងជាតិ បានពន្យារពេលជាបន្តបន្ទាប់រហូតដល់ពេលនេះ៕
© 2024, ឌឹ ខេមបូឌា ដេលី. All rights reserved.