អង្គការចលនាមាតាធម្មជាតិ អះអាងថា ការបាត់បង់សិទ្ធិសេរីភាពអស់រយៈពេល ១០០ថ្ងៃរបស់សកម្មជនបរិស្ថានដែលកំពុងឃុំខ្លួនក្នុងពន្ធនាគារ គឺបង្ហាញយ៉ាងច្បាស់ពីការស្លាប់បាត់បង់ប្រព័ន្ធយុត្តិធម៌នៅកម្ពុជា។
អង្គការចលនាមាតាធម្មជាតិ សរសេរលើទំព័រហ្វេសប៊ុករបស់ខ្លួននៅថ្ងៃទី១០ តុលា នេះ ដោយភ្ជាប់រូបថតសកម្មជនបរិស្ថានដែលកំពុងត្រូវបានឃុំខ្លួនក្នុងពន្ធនាគារទាំង ៥នាក់ថា ការឈានជើងចូលក្នុងគុករហូតដល់ទៅពីរដងរបស់យុវជនចលនាមាតាធម្មជាតិ មិនមែនជាកំហុសរបស់ពួកគេ ប៉ុន្តែជាកំហុសដ៏ធំរបស់ក្បាលម៉ាស៊ីនដឹកនាំដែលដាច់ធម៌មេត្តា ផ្ដាច់សំឡេងពួកគេមិនឲ្យនិយាយពីបរិស្ថានបន្តទៀតប៉ុណ្ណោះ។
អង្គការចលនាមាតាធម្មជាតិ បញ្ជាក់ថា ការជំរុញឱ្យរដ្ឋាភិបាលពិចារណាដោះលែងសកម្មជនទាំង ៥នាក់នេះ មិនមែនជាការអង្វរកររបស់អង្គការចលនាមាតាធម្មជាតិឡើយ ប៉ុន្តែវាជាកាតព្វកិច្ចរបស់រដ្ឋាភិបាលប៉ុណ្ណោះ ត្បិតរយៈពេល ១០០ថ្ងៃ ចាប់តាំងពីយុវជនការពារបរិស្ថានត្រូវបានបិទសិទ្ធិសេរីភាព គឺបញ្ជាក់យ៉ាងច្បាស់ថា ប្រព័ន្ធយុត្តិធម៌នៅកម្ពុជាបានស្លាប់ជាលើកទីពីររួចទៅហើយ។
សាលាដំបូងរាជធានីភ្នំពេញ កាលពីថ្ងៃទី២ ខែកក្កដា ឆ្នាំ២០២៤ បានប្រកាសសាលក្រមផ្ដន្ទាទោសលើសកម្មជនចលនាមាតាធម្មជាតិ ១០នាក់ ក្រោមបទចោទប្រកាន់រួមគំនិតក្បត់ និងប្រមាថព្រះមហាក្សត្រដើម្បីផ្តួលរំលំរដ្ឋាភិបាល កាលពីឆ្នាំ២០២១ ដែលត្រូវផ្ដន្ទាទោសឱ្យជាប់ពន្ធនាគារចន្លោះពី ៦ឆ្នាំទៅ ៨ឆ្នាំ។
ក្នុងចំណោមយុវជនបរិស្ថានទាំង ១០នាក់ មាន ៥នាក់ត្រូវបានចាប់បញ្ជូនទៅឃុំខ្លួននៅពន្ធនាគារតាមបណ្ដាខេត្តផ្សេងៗពីគ្នា ក្នុងនោះលោក យីម លាងហ៊ី ត្រូវឃុំខ្លួននៅពន្ធនាគារខេត្តកំពង់ស្ពឺ លោក លី ចាន់ដារ៉ាវុត ត្រូវឃុំខ្លួននៅពន្ធនាគារខេត្តកណ្តាល លោក ថុន រដ្ឋា ត្រូវឃុំខ្លួននៅពន្ធនាគារខេត្តត្បូងឃ្មុំ កញ្ញា ភួន កែវរស្មី ត្រូវឃុំខ្លួននៅពន្ធនាគារខេត្តពោធិ៍សាត់ ខណៈកញ្ញា ឡុង គន្ធា ត្រូវឃុំខ្លួននៅពន្ធនាគារខេត្តព្រះវិហារ។
គិតមកទល់នឹងថ្ងៃទី១០ ខែតុលា ឆ្នាំ២០២៤ នេះ សកម្មជនបរិស្ថានទាំងនេះត្រូវបានកាត់ទោសទាំងអយុត្តិធម៌ដាក់ពន្ធនាគារអស់រយៈពេល ១០០ថ្ងៃហើយ។
ក្រោយសកម្មជនបរិស្ថានលោក ថុន រដ្ឋា ត្រូវបានសមត្ថកិច្ចឃុំខ្លួនបានប៉ុន្មានថ្ងៃ ភរិយារបស់លោកបានរៀបរាប់លើបណ្ដាញសង្គមហ្វេសប៊ុកថា កូនៗរបស់លោកបានសួររកប៉ារបស់គេ ខណៈខ្លួនជាម្តាយខំទប់ទឹកភ្នែកមិនហ៊ានយំ និងកុហកប្រាប់កូនៗខ្លួនថា ប៉ាទៅខេត្តទៅរកលុយ និងទៅរៀនបន្ត។
ចំណែកអ្នកការពារសិទ្ធិមនុស្ស និងបរិស្ថាន លោក សាន់ ម៉ាឡា ធ្លាប់បានលើកឡើងតាមការអះអាងរបស់កញ្ញា ភួន កែវរស្មី កាលពីពេលថ្មីៗនេះថា នៅពេលនាងត្រូវបានប៉ូលិសនាំខ្លួនតាមរថយន្តទៅកាន់ខេត្តពោធិ៍សាត់ ដោយនាងពុំដឹងថានាងមានទោសអ្វីឡើយ និងត្រូវតុលាការសម្រេចឃុំខ្លួនប៉ុន្មានឆ្នាំនោះដែរ។ ដំបូងឡើយ គេបានដឹកនាងទៅកាន់ពន្ធនាគារ ម៤ ដែលជាតំបន់ដាច់ស្រយាលក្នុងភូមិសាស្ត្រស្រុកភ្នំក្រវ៉ាញ តាមការបង្គាប់បញ្ជារបស់តុលាការ។
នៅថ្ងៃទី១០ តុលា នេះ អង្គការក្រៅរដ្ឋាភិបាលជាច្រើន ដូចជា មជ្ឈមណ្ឌលសិទ្ធិមនុស្សកម្ពុជា (CCHR) សមាគមធាងត្នោត និងអង្គការលីកាដូ ជាដើម បង្ហោះសារលើបណ្ដាញសង្គមហ្វេសប៊ុកព្រោងព្រាតជុំវិញការជាប់ឃុំរបស់សកម្មជនបរិស្ថានទាំង ៥នាក់ អស់រយៈពេល ១០០ថ្ងៃកន្លងមកនេះ៕
© 2024, ឌឹ ខេមបូឌា ដេលី. All rights reserved.