នាយករដ្ឋមន្ត្រីអ៊ីស្រាអែល លោក Benjamin Netanyahu បានជំរុញឲ្យអង្គការសហប្រជាជាតិ ដកកងរក្សាសន្តិភាពហៅថាទ័ពមួកខៀវរបស់ខ្លួន ចេញពីប្រទេសលីបង់។ នេះបើយោងតាមការចេញផ្សាយរបស់បណ្ដាញផ្សាយព័ត៌មាន CBS News កាលពីថ្ងៃទី១៣ ខែតុលា។
លោក Netanyahu និយាយថា អ៊ីស្រាអែលបានស្នើសុំឱ្យអង្គការសហប្រជាជាតិ ជម្លៀសកងទ័ពរក្សាសន្តិភាពម្តងហើយម្តងទៀតចេញពីមុខកាំភ្លើងរបស់អ៊ីស្រាអែល ហើយថាវត្តមានរបស់ក្រុមកងទ័ពមួកខៀវនេះ ធ្វើឱ្យពួកគេក្លាយជាចំណាប់ខ្មាំងរបស់ក្រុមហេសបូឡា។
លោកនាយករដ្ឋមន្ត្រីអ៊ីស្រាអែល បានបញ្ជាក់ថា ការដកចេញពីប្រទេសលីបង់ ជាបន្ទាន់ វាល្អជាងបន្តរក្សាទុកពួកគេនៅក្នុងស្ថានភាពជាចំណាប់ខ្មាំងរបស់ពួកហេសបូឡា។
កាលពីថ្ងៃទី១២ តុលា កងកម្លាំងរក្សាសន្តិភាពយ៉ាងតិចណាស់ ១៥នាក់ បានរងរបួសនៅចំពោះមុខកងទ័ពអ៊ីស្រាអែល កំពុងពង្រីកប្រតិបត្តិការវាយប្រហារប្រឆាំងនឹងក្រុមហេសបូឡា នៅភាគខាងត្បូងលីបង់។
ជាមួយគ្នានេះ រដ្ឋមន្ត្រីថាមពលអ៊ីស្រាអែល លោក Eli Cohen បានចោទប្រកាន់កងទ័ពមួកខៀវរបស់អង្គការសហប្រជាជាតិ ដែលឈរជើងនៅភាគខាងត្បូងប្រទេសលីបង់ ថាជាកងកម្លាំងឥតប្រយោជន៍ ព្រោះតែបរាជ័យក្នុងការការពារប្រជាជនអ៊ីស្រាអែល ពីការវាយប្រហាររបស់ក្រុមហេសបូឡា ហើយក៏បានអំពាវនាវឱ្យកងកម្លាំងរក្សាសន្តិភាព UN នេះដកចេញពីលីបង់។
លោក Cohen បានបង្ហោះសារលើបណ្ដាញសង្គម X ថា ប្រទេសអ៊ីស្រាអែល នឹងធ្វើគ្រប់យ៉ាងដើម្បីធានាសុវត្ថិភាពពលរដ្ឋខ្លួន ហើយប្រសិនបើអង្គការសហប្រជាជាតិ មិនអាចជួយអ្វីទេនោះ យ៉ាងហោចណាស់គួរតែកុំមកលូកដៃជ្រៀតជ្រែក ហើយត្រូវតែចល័តកងកម្លាំងរបស់ខ្លួនចេញឱ្យឆ្ងាយពីតំបន់ប្រយុទ្ធគ្នា។
អង្គការសហប្រជាជាតិ បានឱ្យដឹងថា រថក្រោះរបស់អ៊ីស្រាអែល បានទម្លុះចូលមកតាមខ្លោងទ្វារនៃបន្ទាយរបស់កងរក្សាសន្តិភាពនៅភាគខាងត្បូងប្រទេសលីបង់ កាលពីថ្ងៃអាទិត្យចុងសប្តាហ៍កន្លងទៅ។
កងកម្លាំងបណ្ដោះអាសន្ននៃអង្គការសហប្រជាជាតិប្រចាំប្រទេសលីបង់ បានចេញសេចក្តីថ្លែងការណ៍មួយថា រថក្រោះអ៊ីស្រាអែល Merkava ពីរគ្រឿង បានសម្រុកបើកចូលតាមខ្លោងទ្វារធំ ហើយពេលរថក្រោះបើកទៅផុត គ្រាប់ផ្លោងក៏ផ្ទុះឡើងចម្ងាយប្រហែល ១០០ម៉ែត្រ ដោយបញ្ចេញផ្សែងហុយពេញមូលដ្ឋាន នាំឱ្យកងរក្សាសន្តិភាពស្ថិតភាពស្រឡាំងកាំងដែលពួកគេខ្លះបានរងរបួស។
កងទ័ពអ៊ីស្រាអែល និយាយថា ក្រុមហេសបូឡា គាំទ្រដោយអ៊ីរ៉ង់ បានបាញ់មីស៊ីលប្រឆាំងរថក្រោះមកលើកងទ័ពអ៊ីស្រាអែល ដោយធ្វើឱ្យទ័ពអ៊ីស្រាអែល ២៥នាក់រងរបួស ដោយសារតែការវាយប្រហារនេះកើតឡើងនៅជិតប៉ុស្តិ៍របស់កងទ័ពមួកខៀវ ហើយរថក្រោះត្រូវបានប្រើប្រាស់សម្រាប់ជម្លៀសអ្នករបួស ទើបឆ្លងកាត់ប៉ុស្តិ៍យាមរបស់ទ័ពមួកខៀវ។
អ្នកនាំពាក្យសម្រាប់កិច្ចការអន្តរជាតិនៃកងទ័ពអ៊ីស្រាអែល វរសេនីយ៍ទោ Nadav Shoshani បានប្រាប់អ្នកយកព័ត៌មានថា នេះមិនមែនជាការវាយលុក ឬព្យាយាមចូលមូលដ្ឋានទ័ពក្រុមមួកខៀវនោះទេ គឺជារថក្រោះដែលស្ថិតនៅក្រោមការបាញ់ប្រហារយ៉ាងធ្ងន់ធ្ងរពីពួកហេសបូឡា ទើបត្រូវគេចចេញពីគ្រោះថ្នាក់។
លោកបញ្ជាក់ថា កងទ័ពអ៊ីស្រាអែល បានបាញ់ផ្សែងដើម្បីជម្លៀសកងទ័ពរបស់ខ្លួនដែលរងរបួស ហើយថាសកម្មភាពនោះមិនបានបង្កគ្រោះថ្នាក់ដល់កងរក្សាសន្តិភាពឡើយ។
ពាក់ព័ន្ធនឹងកងរក្សាសន្តិភាពអង្គការសហប្រជាជាតិនៅលីបង់ មាន ១៥នាក់ បានកើតមានឡើងបន្ទាប់ពីអ៊ីស្រាអែល និងក្រុមហេសបូឡា បង្កើនការប្រយុទ្ធគ្នា ទាំងផ្លូវអាកាស និងជើងគោក។
កាលពីថ្ងៃអាទិត្យ ទី១៣ តុលា លោកនាយករដ្ឋមន្ត្រីអ៊ីស្រាអែល បានផ្ញើលិខិតទៅលោក Antonio Guterres អគ្គលេខាធិការអង្គការសហប្រជាជាតិ ដែលរៀបរាប់ថា គួរដកកងរក្សាសន្តិភាពចេញពីបន្ទាយទ័ពមួកខៀវនៅលីបង់ ដោយព្រមានថា អ៊ីស្រាអែលមិនអាចទទួលខុសត្រូវឡើយចំពោះសុវត្ថិភាពរបស់កងទ័ពមួកខៀវទាំងនោះ។
ចំពោះការវាយចូលបន្ទាយរបស់កងរក្សាសន្តិភាពអង្គការសហប្រជាជាតិ យ៉ាងតិចមាន ៤០ប្រទេសបានថ្កោលទោសអ៊ីស្រាអែល តែក្នុងនោះប្រធានគោលនយោបាយកិច្ចការបរទេសសហភាពអឺរ៉ុប តំណាង ២៧ប្រទេស លោក Josep Borrell និយាយថា សហភាពអឺរ៉ុបសូមថ្កោលទោសចំពោះការវាយប្រហារប្រឆាំងនឹងបេសកកម្មរបស់អង្គការសហប្រជាជាតិដូចករណីកំណត់គោលដៅលើកងកម្លាំងបណ្ដោះអាសន្នរបស់អង្គការសហប្រជាជាតិនៅលីបង់ ពីសំណាក់កងទ័ពអ៊ីស្រាអែល ជាដើម។
លោក Borrell បញ្ជាក់ថា ការវាយប្រហារលើកងរក្សាសន្តិភាពអង្គការសហប្រជាជាតិ គឺជាការរំលោភបំពានយ៉ាងធ្ងន់ធ្ងរនៃច្បាប់អន្តរជាតិ ដែលមិនអាចទទួលយកបានឡើយ។ លោកទទូចថា ត្រូវតែបញ្ឈប់ជាបន្ទាន់។
តាមលោក Borrell ភាគីពាក់ព័ន្ធទាំងអស់ក្នុងជម្លោះមានកាតព្វកិច្ចធានាសុវត្ថិភាព និងសន្តិសុខរបស់បុគ្គលិក ក៏ដូចជាទ្រព្យសម្បត្តិអង្គការសហប្រជាជាតិ។
តែចំពោះនាយករដ្ឋមន្ត្រីអ៊ីស្រាអែល បានវាយបកវិញថា កងទ័ពមួកខៀវទាំងនោះកំពុងក្លាយជាខែលការពារដល់ក្រុមហេសបូឡាទៅវិញទេ។
ជិត ៥០ប្រទេស បានបញ្ជូនកងទ័ពរបស់ពួកគេទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិនៅលីបង់ មានដល់ទៅ ១០៥០០នាក់៕
© 2024, ឌឹ ខេមបូឌា ដេលី. All rights reserved.