អគ្គនាយកក្រុមហ៊ុន Maritime Group លោក ហេង សិទ្ធី ដែលកំពុងរងបណ្តឹងពីក្រុមឧក្រិដ្ឋជន អះអាងថា ការទម្លាយរឿងឧក្រិដ្ឋកម្ម និងអំពើពុករលួយរបស់ត្រកូលហ៊ុន រួមទាំងមន្ត្រីជាន់ខ្ពស់ក្នុងជួររដ្ឋាភិបាលកម្ពុជា គឺមិនមែនដើម្បីបង្វែរព្រឹត្តិការណ៍ពីការទាមទារកោះគុតឡើយ ខណៈមន្ត្រីក្រោមបង្គាប់របស់លោក ស សុខា កំពុងនាំគ្នាប្រតិកម្មថាអតីតអ្នកឧកញ៉ារូបនេះប្រឌិតរឿងស្រមើស្រមៃទាក់ទងរឿងលោក ស សុខា នៅពីក្រោយក្រុមឧក្រិដ្ឋជន។
អគ្គនាយកក្រុមហ៊ុន Maritime Group លោក ហេង សិទ្ធី សរសេរលើគណនីហ្វេសប៊ុករបស់ខ្លួនកាលពីយប់ថ្ងៃទី៦ ខែមករា ឆ្នាំ២០២៥ នេះថា អាថ៌កំបាំងត្រកូលហ៊ុន និងមន្ត្រីជាន់ខ្ពស់ក្នុងជួររដ្ឋាភិបាលដែលលោកបានទម្លាយជាបន្តបន្ទាប់មកនេះ មិនមែនជារឿងកំប្លុកកំប្លែងទេ ហើយក៏មិនមែនដើម្បីបង្វែរការយកចិត្តទុកដាក់ចំពោះបញ្ហាទឹកដីប្រទេសជាតិ ជាពិសេសរឿងកោះគុតនោះទេ។
លោក ហេង សិទ្ធី បញ្ជាក់ថា លោកនឹងប្រមូលឯកសារដើម្បីសិក្សាពីភាពជាក់ស្តែងដោយផ្នែកច្បាប់រវាងកម្ពុជា និងថៃ ជុំវិញបញ្ហាកោះគុត បន្ទាប់ពីលោកបកអាក្រាត និងបោសសម្អាតឧក្រិដ្ឋជនតាមអនឡាញនៅកម្ពុជា ដើម្បីស្ដារមុខមាត់ប្រទេសឡើងវិញជាមុនសិន ព្រោះការបោសសម្អាតអំពើឧក្រិដ្ឋទាំងនេះ គឺជារឿងចាំបាច់ដំបូងបំផុតដែលលោកត្រូវតែធ្វើក្នុងពេលនេះ។
កាលពីថ្ងៃទី៦ ខែមករា ឆ្នាំ២០២៥ ម្ចាស់គណនីហ្វេសប៊ុកឈ្មោះ Mounh Sarath ដែលគេស្គាល់ថាជាសកម្មជនបក្សប្រឆាំង បានសរសេរលើគណនីហ្វេសប៊ុករបស់ខ្លួនដោយភ្ជាប់រូបថតលោក ហ៊ុន តូ លោក ហ៊ុន ជា និងលោក ហ៊ុន ម៉ាណែត ថាគេគ្រាន់តែបង្វែរព្រឹត្តិការណ៍ប៉ុណ្ណោះ ដូច្នេះសូមកុំងាករេតាមការបង្វែររបស់គេឱ្យសោះ ព្រោះរឿងធំសម្រាប់ខ្មែរនៅពេលនេះ គឺទៅប្តូររបបផ្ដាច់ការ និងការពារអ្នកប្រជាធិបតេយ្យ។
ចាប់តាំងពីដើមខែធ្នូ ឆ្នាំ២០២៤ មក អតីតអ្នកឧកញ៉ា ហេង សិទ្ធី បានទម្លាយអាថ៌កំបាំងរបស់ឧក្រិដ្ឋជនជនជាតិសិង្ហបុរីសញ្ជាតិខ្មែរឈ្មោះ Phua Gek Seng ហៅ Tak ថាបានប្រើប្រាស់ប្រទេសកម្ពុជា ដើម្បីប្រតិបត្តិការកាស៊ីណូអនឡាញ និងលាងលុយ ក្នុងនោះលោកក៏បានទម្លាយសមាសភាពមន្ត្រីនគរបាលនៃក្រសួងមហាផ្ទៃ ៣នាក់ផងដែរ គឺលោក ង៉េង ជួ ប្រធាននាយកដ្ឋាននគរបាលព្រហ្មទណ្ឌ លោក ប៉ុល រតនា អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ និងលោក វុធ ស៊ែរ អនុប្រធាននាយកដ្ឋាននគរបាលព្រហ្មទណ្ឌ ដែលធ្វើជាខ្នងបង្អែកឱ្យជនជាតិសិង្ហបុរីរូបនោះ។
បន្ទាប់មក លោកចាប់ផ្តើមទម្លាយការគប់គិតគ្នារវាងបុរសជនជាតិសិង្ហបុរីសញ្ជាតិខ្មែរម្នាក់នោះជាមួយអគ្គស្នងការនគរបាលជាតិ លោក ស ថេត ដែលបានទទួលសំណូកជាលុយសុទ្ធចំនួន ៥លានដុល្លារអាមេរិក ជាថ្នូរនឹងការបិទការស្រាវជ្រាវលើអាជីវកម្មអនឡាញរបស់គេដែលកំពុងប្រតិបត្តិការនៅកម្ពុជាសព្វថ្ងៃនេះ។
ដោយសារគ្មានការអនុវត្តច្បាប់ លោក ហេង សិទ្ធី ក៏បានប្តឹងទៅនាយករដ្ឋមន្ត្រីលោក ហ៊ុន ម៉ាណែត រដ្ឋមន្ត្រីក្រសួងយុត្តិធម៌ លោក កើត រិទ្ធ និងអង្គភាពប្រឆាំងអំពើពុករលួយ ឱ្យស៊ើបអង្កេតលើលោក ស សុខា និងលោក ស ថេត តែម្តង ក្នុងនោះក៏មានរដ្ឋលេខាធិការក្រសួងមហាផ្ទៃ លោក សុខ ផល ដែរ ដែលជាប់ពាក់ព័ន្ធក្នុងរឿងនេះ។
ទាក់ទងទៅនឹងការចោទប្រកាន់នេះ អ្នកនាំពាក្យអគ្គនាយកដ្ឋានពន្ធនាគារ នៅថ្ងៃទី០៧ ខែមករា ឆ្នាំ២០២៥ នេះ បានបដិសេធ និងបំភ្លឺជុំវិញខ្លឹមសារក្នុងពាក្យបណ្ដឹងរបស់លោក ហេង សិទ្ធី ដែលបានរំលេចត្រង់ចំណុចទី១ ដោយបានចោទប្រកាន់លើលោក ស សុខា ថា “គាបសង្កត់មន្ត្រីថ្នាក់ក្រោមគ្រប់អគ្គនាយកដ្ឋាន ដើម្បីរកលុយឱ្យខ្លួនក្នុងពេលបំពេញការងារ និងប្រព្រឹត្តបទល្មើសជាប្រព័ន្ធក្នុងការការពារឧក្រិដ្ឋជនខុសច្បាប់នៅក្នុងព្រះរាជាណាចក្រកម្ពុជា» ថាជាការចោទប្រកាន់ដែលគ្មានមូលដ្ឋាន បែបស្រមើស្រមៃ។
យ៉ាងណាក៏ដោយ បន្ទាប់ពីលោក ហេង សិទ្ធី ទម្លាយរឿងនេះជាបន្តបន្ទាប់ អ្នកនាំពាក្យក្រសួងយុត្តិធម៌ លោក សេង ឌីណា បានច្រានចោលពាក្យបណ្ដឹងទាំងនោះកាលពីថ្ងៃទី៦ មករា នេះថា អ្វីៗដែលលោក ហេង សិទ្ធី បានផ្សព្វផ្សាយលើបណ្ដាញសង្គម គ្រាន់តែជាព័ត៌មានសម្រាប់ក្រសួងពិនិត្យ និងវិភាគប៉ុណ្ណោះ ពុំមែនជាបណ្តឹងផ្លូវការដែលត្រូវតែចាត់ការទៅតាមនីតិវិធីនោះទេ។
បែបនេះក្តី លោក ហេង សិទ្ធី បានប្រតិកម្មតបត្រឡប់ទៅវិញកាលពីថ្ងៃទី៦ មករា នេះ ដោយចោទជាសំណួរថា បើជនរងគ្រោះត្រូវរងនូវការគាបសង្កត់ពីអ្នកមានអំណាចនៅកម្ពុជា តើនឹងត្រូវដាក់ពាក្យបណ្ដឹងទៅក្រសួងយុត្តិធម៌ ដោយផ្ទាល់ខ្លួនតាមរបៀបណា?៕
© 2025, ឌឹ ខេមបូឌា ដេលី. All rights reserved.