មន្ត្រីជាន់ខ្ពស់គណបក្សសង្គ្រោះជាតិ លាតត្រដាងថា បុរសម្នាក់ដែលមានឈ្មោះ ពេជ្រ គឹមស្រ៊ិន ហៅ Mr Pich ដែលគេសង្ស័យថាជាប់ពាក់ព័ន្ធនឹងអំពើឃាតកម្មលើតំណាងរាស្ត្របក្សប្រឆាំង លោក លិម គិមយ៉ា គឺជាប្អូនប្រុសពៅបង្កើតរបស់លោក ពេជ្រ ស្រស់ ប្រធានគណបក្សយុវជនកម្ពុជា។
ឈ្មោះ ពេជ្រ គិមស្រ៊ិន ក្នុងខណៈនេះកំពុងត្រូវបានតុលាការប្រទេសថៃ ចេញដីកាតាមចាប់ខ្លួន។
អតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា បានសរសេរលើគណនីហ្វេសប៊ុករបស់លោកនៅថ្ងៃទី១០ មករា នេះថា ជនសង្ស័យឈ្មោះ ពេជ្រ គឹមស្រ៊ិន គ្រាន់តែជាអ្នកទទួលបញ្ជាពីមេធំដែលនៅពីក្រោយនៃការអនុវត្តផែនការធ្វើឃាតលោក លិម គិមយ៉ា តែប៉ុណ្ណោះ។
ជនសង្ស័យ ពេជ្រ គឹមស្រ៊ិន មានឈ្មោះក្រៅហៅ អាទីត កើតនៅថ្ងៃទី២០ ខែឧសភា ឆ្នាំ២០០១ ដែលមានអាយុ ២៤ឆ្នាំ និងមានទីកន្លែងកំណើតនៅភូមិចក ឃុំចក ស្រុកអូររាំងឪ ខេត្តត្បូងឃ្មុំ គឺត្រូវជាប្អូនប្រុសពៅបង្កើតរបស់លោក ពេជ្រ ស្រស់ ប្រធានគណបក្សយុវជនកម្ពុជា។
ឈ្មោះ ពេជ្រ គឹមស្រ៊ិន រូបនេះមានតួនាទីជាអនុប្រធានគណៈកម្មការផ្សារកណ្តាល និងជាអ្នកកាសែតអនឡាញនៃស្ថាប័នសារព័ត៌មាន Fast news ដែលកាសែតនេះគឺជាកម្មសិទ្ធិរបស់លោក ពេជ្រ ស្រស់ ហើយលោក ពេជ្រ ស្រស់ ក៏ធ្លាប់ជាដើមបណ្តឹងដែលបានប្តឹងសុំរំលាយគណបក្សសង្គ្រោះជាតិ កាលពីថ្ងៃទី១៧ ខែវិច្ឆិកា ឆ្នាំ២០១៧ កន្លងទៅផងដែរ។
លោក មុត ចន្ថា លើកឡើងថា តុលាការព្រហ្មទណ្ឌប្រទេសថៃ បានសម្រេចចេញដីកាចាប់ខ្លួនឃាតករ និងអ្នកសមគំនិត ពេជ្រ គឹមស្រ៊ិន ហៅអាទីត ហើយនៅពេលនេះ ដូច្នេះសូមពលរដ្ឋខ្មែររង់ចាំមើលថាតើអាជ្ញាធរកម្ពុជាហ៊ានចាប់ខ្លួនជនសង្ស័យ ពេជ្រ គឹមស្រ៊ិន បញ្ជូនទៅឱ្យតុលាការថៃ ស៊ើបអង្កេត និងកាត់ទោសដែរឬក៏អត់។
មន្ត្រីបក្សប្រឆាំងរូបនេះបន្តថា ក្នុងករណីកម្ពុជាមិនអនុវត្តដីកាស្វែងរកចាប់ខ្លួនជនសង្ស័យដែលជាប់ពាក់ព័ន្ធក្នុងការសមគំនិតក្នុងអំពើឃាតកម្មនេះទេ គឺគេអាចដឹងកាន់តែច្បាស់ហើយថានរណាជាមេធំនៅពីក្រោយខ្នងជនសង្ស័យឈ្មោះ ពេជ្រ គឹមស្រ៊ិន នេះ។
លោក មុត ចន្ថា បញ្ជាក់ថា បក្សប្រឆាំងនៅប្រទេសថៃ កំពុងរៀបចំតវ៉ាទៅកាន់រដ្ឋាភិបាលដែលដឹកនាំដោយអ្នកស្រី ផែថងថាន ស៊ីណាវ៉ាត់ ដែលត្រូវជាកូនស្រីបង្កើតរបស់លោក ថាក់ស៊ីន ស៊ីណាវ៉ាត់ ឱ្យទាមទារទៅកាន់រដ្ឋាភិបាលកម្ពុជាក្នុងការបញ្ជូនខ្លួនជនសង្ស័យឈ្មោះ ពេជ្រ គឹមស្រ៊ិន ទៅប្រទេសថៃ ដើម្បីស៊ើបអង្កេត មុននឹងអនុវត្តនីតិវិធីច្បាប់ជាធរមាន។
ជនសង្ស័យឈ្មោះ ពេជ្រ គឹមស្រ៊ិន ហៅ Mr Pich ត្រូវគេដឹងថាជាមនុស្សជិតស្និទ្ធក្រោមបង្គាប់របស់អភិបាលក្រុងភ្នំពេញ លោក ឃួង ស្រេង និងអភិបាលរងក្រុងភ្នំពេញ លោក ឃ្លាំង ហួត ផងដែរ ហើយបុគ្គលរូបនេះក៏ជាសមាជិកអង្គភាពសារព័ត៌មាន Fast News ដែលគេស្គាល់ថាជាសារព័ត៌មានដែលមាននិន្នាការគាំទ្របក្សកាន់អំណាច។
ចំណែកលោក ពេជ្រ ស្រស់ ដែលមានអាយុ ៤៦ឆ្នាំ ត្រូវជាកូនទី៤ ក្នុងគ្រួសារ បានកើតនៅថ្ងៃទី៦ ខែតុលា ឆ្នាំ១៩៧៩ និងមានទីកន្លែងកំណើតនៅភូមិចក ឃុំចក ស្រុកអូររាំងឪ ខេត្តត្បូងឃ្មុំ ដូចលោក ពេជ្រ គឹមស្រ៊ិន ដែរ។
លោក ពេជ្រ ស្រស់ ត្រូវគេស្គាល់ថាជាប្រធានគណបក្សយុវជនកម្ពុជា និងត្រូវបានតែងតាំងជាសមាជិកឧត្ដមក្រុមប្រឹក្សាពិគ្រោះ និងផ្តល់យោបល់ ដែលមានឋានស្មើនឹងទេសរដ្ឋមន្ត្រី ហើយលោកក៏ជាម្ចាស់អង្គភាពសារព័ត៌មាន Fast News ដែលតែងតែផ្សាយគាំទ្ររដ្ឋាភិបាលរហូតមក។
ជុំវិញបញ្ហានេះ គេនៅមិនទាន់ឃើញលោក ពេជ្រ ស្រស់ ចេញមុខបំភ្លឺលើករណីដែលប្អូនប្រុសរបស់លោកត្រូវជាប់សង្ស័យក្នុងអំពើឃាតកម្មនេះនៅឡើយទេរហូតដល់ពេលនេះ ខណៈសារព័ត៌មាន The Cambodia Daily ក៏មិនអាចទាក់ទងលោកសុំការបំភ្លឺបានដែរ។
ជុំវិញបញ្ហានេះ កាសែតបារាំងឈ្មោះ France Diplomatie បានចុះផ្សាយកាលពីថ្ងៃទី៩ មករា នេះថា រដ្ឋមន្ត្រីក្រសួងការបរទេសបារាំង លោក Jean-Noel Barrot បានចេញសេចក្តីថ្លែងការណ៍ថ្កោលទោសចំពោះឃាតកម្មលើលោក លិម គិមយ៉ា ដែលជាពលរដ្ឋបារាំង និងជាសមាជិកបក្សប្រឆាំង បន្ទាប់ពីត្រូវបានសម្លាប់ក្នុងប្រទេសថៃ។
រដ្ឋមន្ត្រីក្រសួងការបរទេសបារាំងរូបនេះបញ្ជាក់ថា ប្រទេសបារាំងនឹងតាមដានយ៉ាងដិតដល់នូវការស៊ើបអង្កេតរបស់អាជ្ញាធរថៃ ដើម្បីរកការពិតពេញលេញលើករណីនេះ៕
© 2025, ឌឹ ខេមបូឌា ដេលី. All rights reserved.