គណបក្សកម្លាំងជាតិ ស្នើបណ្តាទូតលោកខាងលិច ជួយពិនិត្យស្ថានភាពសិទ្ធិមនុស្ស និងប្រជាធិបតេយ្យនៅប្រទេសកម្ពុជា ដោយសារតែមានការគំរាមកំហែង និងចាប់ខ្លួនសំឡេងប្រឆាំងជាបន្តបន្ទាប់នារយៈពេលចុងក្រោយនេះ។
ទីប្រឹក្សាគណបក្សកម្លាំងជាតិ លោក រ៉ុង ឈុន បានដឹកនាំសមាជិកបក្សទៅជួបជាមួយបណ្ដាស្ថានទូតនានាប្រចាំនៅប្រទេសកម្ពុជា ដូចជា បានជួបជាមួយស្ថានទូតសហរដ្ឋអាមេរិក កាលពីថ្ងៃទី១៣ មករា និងជួបជាមួយស្ថានទូតសហភាពអឺរ៉ុប នៅថ្ងៃទី១៤ មករា។
លោក រ៉ុង ឈុន បានឲ្យដឹងថា នៅក្នុងជំនួបទាំងពីរ តំណាងគណបក្សកម្លាំងជាតិ បានលើកឡើងពីក្តីបារម្ភរបស់ខ្លួនជុំវិញបញ្ហាសិទ្ធិមនុស្ស និងប្រជាធិបតេយ្យកម្ពុជាដែលនៅតែបន្តមានការគំរាមកំហែង និងចាប់ខ្លួនសំឡេងប្រឆាំងជាបន្តបន្ទាប់នារយៈពេលចុងក្រោយនេះ។
ប្រភពដដែលអះអាងថា បន្ទាប់ពីស្ថានទូតសហរដ្ឋអាមេរិក និងសហភាពអឺរ៉ុប លោកនឹងបន្តលើកយកបញ្ហាសិទ្ធិមនុស្ស និងប្រជាធិបតេយ្យក្នុងប្រទេសកម្ពុជា ទៅជជែកជាមួយស្ថានទូតប្រទេសផ្សេងទៀត ដូចជា ជប៉ុន អូស្ត្រាលី និងស្ថានទូតនៃបណ្តាប្រទេសជាសមាជិកអាស៊ានផងដែរ។
លោក រ៉ុង ឈុន អះអាងថា ស្ថានទូតសហរដ្ឋអាមេរិក និងសហភាពអឺរ៉ុប បានស្តាប់ការលើកឡើងរបស់គណបក្សកម្លាំងជាតិ និងសន្យាតាមដានយ៉ាងយកចិត្តទុកដាក់ ដើម្បីជួយលើកកម្ពស់សិទ្ធិមនុស្ស និងប្រជាធិបតេយ្យក្នុងប្រទេសកម្ពុជាឲ្យប្រសើរឡើង។
ប្រធានអង្គការប្រជាធិបតេយ្យខ្មែរដែលមានមូលដ្ឋានក្នុងរដ្ឋវិចតូរីយ៉ា ប្រទេសអូស្ត្រាលី លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៥ មករា នេះថា ការរំលោភសិទ្ធិមនុស្ស គឺជាកត្តាដ៏ចម្បងនាំទៅដល់ការបញ្ចប់វាសនាដឹកនាំរដ្ឋាភិបាល ខណៈការបាត់បង់ផលប្រយោជន៍ដល់ប្រទេសកម្ពុជាដែលនឹងទទួលបានពីសហគមន៍អន្តរជាតិ ក៏កើតចេញពីការរំលោភសិទ្ធិពលរដ្ឋផងដែរ។
ប្រភពដដែលលើកឡើងថា ពលរដ្ឋសម្ដែងមតិមិនពេញចិត្តនឹងរដ្ឋាភិបាលដែលស្របទៅនឹងមាត្រាដែលមានចែងក្នុងរដ្ឋធម្មនុញ្ញ គឺជាសកម្មភាពស្របច្បាប់ដែលគួរតែត្រូវបានលើកទឹកចិត្ត។
កាលពីថ្ងៃទី៣០ ខែសីហា ឆ្នាំ២០២៤ សមាជិកសភាអាស៊ានដើម្បីសិទ្ធិមនុស្ស (APHR) បានចេញសេចក្តីថ្លែងការណ៍ថា ការវាយប្រហារឥតឈប់ឈរលើអង្គការសង្គមស៊ីវិល រួមទាំងសកម្មជននានា បានបង្ហាញឱ្យឃើញថា វឌ្ឍនភាពនៃលទ្ធិប្រជាធិបតេយ្យនៅកម្ពុជាស្ថិតនៅវែងឆ្ងាយ ហើយពិបាកសម្រេចបាននៅឡើយទេ។
សេចក្តីថ្លែងការណ៍ដដែលនេះបញ្ជាក់ថា ចាប់តាំងពីខែកក្កដា ឆ្នាំ២០២៤ មក មានមនុស្សយ៉ាងតិច ៩៤នាក់ត្រូវបានចាប់ខ្លួនពីបទរិះគន់ផែនការតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម (CLV-DTA) ក្នុងនោះមនុស្សចំនួន ៥៩នាក់ រួមទាំងកុមារផង នៅតែត្រូវបានឃុំខ្លួនដោយខុសច្បាប់ និងត្រូវបានចោទប្រកាន់ពីបទរៀបចំផែនការផ្តួលរំលំរដ្ឋាភិបាល និងញុះញង់៕
© 2025, ឌឹ ខេមបូឌា ដេលី. All rights reserved.