ជនជាតិវៀតណាម ចំនួន ១៧៧នាក់ ត្រូវបានអាជ្ញាធរកម្ពុជាបញ្ជូនទៅកាន់ប្រទេសរបស់ពួកគេ ក្រោយពីពួកគេរស់នៅលើទឹកដីកម្ពុជាដោយខុសច្បាប់ ប្រព្រឹត្តការឆបោកតាមអនឡាញ និងមានទំនាក់ទំនងផ្លូវភេទជាមួយកុមារ។
ជនជាតិវៀតណាម ចំនួន ១៧៧នាក់ ក្នុងនោះមានស្ត្រី ១៩នាក់ ត្រូវបានបញ្ជូនចេញតាមច្រកព្រំដែនបាវិត និងម៉ុកបៃ របស់វៀតណាម កាលពីថ្ងៃទី៧ ខែកុម្ភៈ កន្លងទៅ។
អគ្គនាយករងនៃអគ្គនាយកដ្ឋានអន្តោប្រវេសន៍ ទទួលបន្ទុកនាយកដ្ឋានជនបរទេស លោក សុខ សុមនា ឱ្យដឹងថា ជនជាតិវៀតណាម ទាំងអស់នេះបានឆ្លងដែនមកកម្ពុជាដោយខុសច្បាប់ និងធ្វើការងារខុសច្បាប់ដោយគ្មានបណ្ណការងារ។ លោកថា ពួកគេនឹងត្រូវទទួលទោសដោយយោងទៅតាមច្បាប់របស់ប្រទេសវៀតណាម។
យោងតាមការចុះផ្សាយរបស់សារព័ត៌មានវៀតណាម Vietnam Plus បានឲ្យដឹងថា ក្នុងចំណោមជនជាតិវៀតណាម ទាំង ១៧៧នាក់ដែលត្រូវបានបញ្ជូនចេញពីកម្ពុជានោះ អាជ្ញាធររកឃើញថាមាន ១៧៦នាក់បានធ្វើការក្នុងទីតាំងឆបោកប្រាក់តាមប្រព័ន្ធអនឡាញ ដែលមានទីតាំងក្នុងអគារលេខ១១ ជិតច្រកព្រំដែនបាវិត ខេត្តស្វាយរៀង។ រីឯម្នាក់ទៀត គឺជាអ្នកដឹកជញ្ជូនដែលជាប់ពាក់ព័ន្ធតែការស្នាក់នៅខុសច្បាប់លើទឹកដីកម្ពុជា។
យោងតាមសារព័ត៌មានដដែល បានឲ្យដឹងថា ពលរដ្ឋវៀតណាមទាំងនោះក៏បានលាតត្រដាងពីទីតាំង និងរបៀបដែលក្រុមឆបោកអនឡាញធ្វើប្រតិបត្តិការឆបោកប្រាក់ពីជនរងគ្រោះ ដូចជា៖
- តាមរយៈការជំរុញឱ្យជនរងគ្រោះដាក់ប្រាក់លេងហ្គេមលើវេបសាយ
- ការបោកប្រាស់តាមរបៀបដាក់ប្រាក់លើគម្រោងវិនិយោគខ្យល់ ឬកម្មវិធីជួញដូរភាគហ៊ុនក្លែងក្លាយ
- និងការបោកប្រាស់ជារូបភាពស្នេហា។
កាសែតដដែលបានអះអាងថា ក្រោយការចាប់បញ្ជូនចេញពីកម្ពុជា អាជ្ញាធរវៀតណាមក៏បានផ្ទៀងផ្ទាត់ព័ត៌មានផ្ទាល់ខ្លួនរបស់ពលរដ្ឋខ្លួន ដោយបានរកឃើញថាមានពលរដ្ឋខ្លួនចំនួន ៦នាក់មិនមានទិន្នន័យអ្វីទាំងអស់ និងថាមានម្នាក់បានផ្តល់ព័ត៌មានផ្ទាល់ខ្លួនខុស ហើយម្នាក់ទៀតមានឈ្មោះដូចគ្នាទៅនឹងជនល្មើសដែលអាជ្ញាធរវៀតណាម កំពុងតាមចាប់ខ្លួន។
អនុប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បានថ្លែងថា ការបង្ក្រាបទីតាំងឆបោកអនឡាញមានភាពស្មុគស្មាញច្រើន ព្រោះទីតាំងមួយចំនួនជ្រកក្រោមផ្លាកអាជីវកម្មស្របច្បាប់។ ម្យ៉ាង ជនបរទេសដែលធ្វើដំណើរមកកម្ពុជា មិនបានបញ្ជាក់ពីគោលបំណងច្បាស់លាស់របស់ពួកគេ ដែលជាហេតុធ្វើឱ្យការគ្រប់គ្រងមានភាពលំបាក។
ពាក់ព័ន្ធនឹងបញ្ហានេះដែរ កាលពីខែមេសា ឆ្នាំ២០២៤ កន្លងមក អាជ្ញាធរខេត្តព្រះសីហនុ បានបណ្តេញជនជាតិវៀតណាម ចំនួន ២៣១នាក់ចេញពីប្រទេសកម្ពុជា តាមច្រកអន្តរជាតិព្រែកចាក។
ការបណ្តេញជនជាតិវៀតណាម ទាំងនោះ ក្រោយពីសមត្ថកិច្ចរកឃើញថាពួកគេមានជាប់ពាក់ព័ន្ធពីបទល្មើសឆបោកតាមអនឡាញ ដែលប្រព្រឹត្តនៅតាម ៣ទីតាំងផ្សេងគ្នាក្នុងខេត្តព្រះសីហនុ៕
© 2025, ឌឹ ខេមបូឌា ដេលី. All rights reserved.