ក្រសួងមហាផ្ទៃ រំឭកជាលើកទី៤ ដល់សង្គមស៊ីវិលក្នុងស្រុកឱ្យបំពេញកាតព្វកិច្ចតាមការកំណត់ដោយច្បាប់ស្តីអំពីសមាគម និងអង្គការមិនមែនរដ្ឋាភិបាល ដោយដាក់កំហិតត្រូវដាក់សេចក្តីរាយការណ៍ប្រចាំឆ្នាំរៀងខ្លួនទៅកាន់ក្រសួងមហាផ្ទៃ កុំឱ្យហួសដំណាច់ខែកុម្ភៈ។
តាមរយៈសេចក្តីជូនដំណឹងនៅថ្ងៃទី១៩ ខែកុម្ភៈ ឆ្នាំ២០២៥ ក្រសួងមហាផ្ទៃ បានតម្រូវឲ្យសមាគម និងអង្គការក្រៅរដ្ឋាភិបាលក្នុងស្រុក ជូនដំណឹងជាលាយលក្ខណ៍អក្សរពីព័ត៌មានរាល់គណនីដែលបានបើកសម្រាប់ប្រតិបត្តិការរបស់ខ្លួននៅធនាគារក្នុងប្រទេសកម្ពុជា មកក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ យ៉ាងយូររយៈពេល ៣០ថ្ងៃ គិតចាប់ពីថ្ងៃចុះបញ្ជី។ ក្រសួងក៏តម្រូវឲ្យរាយការណ៍អំពីសកម្មភាពការងារប្រចាំឆ្នាំរបស់គេទៅក្រសួងផងដែរ។
ប្រភពដដែលបានលើកឡើងថា ចំពោះសមាគម និងអង្គការក្រៅរដ្ឋាភិបាលក្នុងស្រុកដែលខកខានក្នុងការជូនដំណឹងនាពេលកន្លងមក ត្រូវជូនដំណឹងឱ្យបានមុនដំណាច់ខែមីនា ឆ្នាំ២០២៥ ជាកំហិត។
តាមក្រសួងមហាផ្ទៃដដែល ក្នុងករណីសមាគម ឬអង្គការក្រៅរដ្ឋាភិបាលណាដែលទទួលបានការគាំទ្រហិរញ្ញវត្ថុពីម្ចាស់ជំនួយនោះ គឺត្រូវផ្ញើរបាយការណ៍ដោយចម្លងចេញពីឯកសារដើមដែលបានផ្ញើទៅម្ចាស់ជំនួយ ហើយភ្ជាប់មកជាមួយនឹងឯកសារគម្រោងកម្មវិធីការងារ និងកិច្ចព្រមព្រៀងហិរញ្ញប្បទានដែលម្ចាស់ជំនួយបានយល់ព្រមផងដែរ។
ប្រភពដដែលបន្ថែមថា សមាគម និងអង្គការក្រៅរដ្ឋាភិបាលក្នុងស្រុក ពុំត្រូវបានអនុញ្ញាតឲ្យធ្វើសកម្មភាពណាមួយដែលមានគោលដៅស្វែងរកប្រាក់ចំណេញផ្ទាល់ខ្លួន ឬយកកម្រៃចែកគ្នានោះទេ ព្រោះសកម្មភាពទាំងនេះអាចធ្វើឲ្យប៉ះពាល់ដល់សន្តិសុខ និងសណ្ដាប់ធ្នាប់សាធារណៈ ឬបង្កអន្តរាយដល់សន្តិសុខជាតិ និងទំនៀមទម្លាប់ល្អរបស់សង្គមជាតិកម្ពុជា។
ក្រសួងមហាផ្ទៃ បានកត់សម្គាល់ឃើញថា សមាគម និងអង្គការមិនមែនរដ្ឋាភិបាលក្នុងស្រុកមួយចំនួននៅតែបន្តខកខានពុំបានមកបំពេញកាតព្វកិច្ចស្របតាមបទប្បញ្ញត្តិនៃច្បាប់នៅឡើយ ទោះបីជាកន្លងមក ក្រសួងមហាផ្ទៃបានចេញសេចក្តីជូនដំណឹងរំឭកជាបន្តបន្ទាប់ចំនួន ៣លើករួចមកហើយក្ដី។
ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា បានឱ្យដឹងថា សមាគម និងអង្គការក្រៅរដ្ឋាភិបាលដែលកំពុងមានសកម្មភាពនៅកម្ពុជា គឺសុទ្ធតែបានដាក់របាយការណ៍របស់ខ្លួនទៅក្រសួងមហាផ្ទៃជាប្រចាំ ព្រោះបានគោរពទៅតាមគោលការណ៍លក្ខន្តិកៈនានាដូចគ្នា ប៉ុន្តែលោកបារម្ភថា ក្រសួងអាចយកការយឺតយ៉ាវរបស់អង្គការទាំងអស់នោះដើម្បីធ្វើទុក្ខបុកម្នេញដល់ពួកគេ។
បើតាមក្រសួងមហាផ្ទៃ បច្ចុប្បន្ននេះមានអង្គការ-សមាគមក្នុងស្រុកសរុបមានចំនួន ៦២៧៩ ត្រូវបានចុះបញ្ជីនៅក្រសួងមហាផ្ទៃ និងអាចធ្វើសកម្មភាពដោយសេរីស្របតាមច្បាប់។ ក្នុងចំណោមអង្គការសមាគមទាំងនេះ មានមួយចំនួនត្រូវបានក្រសួងមហាផ្ទៃគូសបញ្ជាក់ថា បានបំពេញកាតព្វកិច្ចស្របតាមច្បាប់ស្ដីពីសមាគម និងអង្គការមិនមែនរដ្ឋាភិបាលរួចហើយ៕
© 2025, ឌឹ ខេមបូឌា ដេលី. All rights reserved.