រដ្ឋាភិបាលចិន ប្រកាសថាទំនាក់ទំនងយោធារវាងកម្ពុជា និងចិន មិនមានអ្វីអាចមកបំបែកបានឡើយ។ ការប្រកាសនេះ ធ្វើឡើងក្រោយពីមានការចុះផ្សាយកន្លងមកថា ទំនាក់ទំនងយោធារវាងកម្ពុជា និងចិន កំពុងជួបភាពរកាំរកូស។
អ្នកនាំពាក្យក្រសួងការពារជាតិចិន លោក វ៉ូ ឆៀន (Wu Qian) បាននិយាយនៅក្នុងសេចក្ដីថ្លែងការណ៍របស់ខ្លួនកាលពីថ្ងៃព្រហស្បតិ៍ ទី២៧ ខែកុម្ភៈ ថា រាល់ការប៉ុនប៉ងបំបែកបំបាក់ទំនាក់ទំនងយោធាកម្ពុជា និងចិន នឹងត្រូវបរាជ័យ ព្រោះថាទំនាក់ទំនងយោធារវាងកម្ពុជា និងចិន ជាទំនាក់ទំនងបងប្អូន និងរឹងមាំមិនអាចបំបែកបាន។
ប្រភពដដែលអះអាងថា ប៉ុន្មានឆ្នាំចុងក្រោយនេះ មេដឹកនាំប្រទេសទាំងពីរមានទំនាក់ទំនងកិច្ចសហប្រតិបត្តិការយោធាកាន់តែជិតស្និទ្ធ និងកាន់តែរីកចម្រើនលើគ្រប់វិស័យ និងថាភាគីទាំងពីរបានធ្វើសមយុទ្ធនាគមាសរួមគ្នាចំនួន ៦លើក ធ្វើលំហាត់វេជ្ជសាស្ត្រយោធា និងការផ្លាស់ប្ដូររវាងបណ្ឌិត្យសភាយោធា ជាដើម។
នៅក្នុងសេចក្តីថ្លែងការណ៍បានលើកឡើងថា នៅក្នុងឆ្នាំ២០២៥ យោធាចិន នឹងចាប់ដៃជាមួយយោធាកម្ពុជា ដើម្បីជំរុញឱ្យទំនាក់ទំនងរវាងយោធានៃប្រទេសទាំងពីរកើនដល់កម្រិតថ្មីមួយទៀត។
ចំណែកអ្នកនាំពាក្យក្រសួងការពារជាតិកម្ពុជា លោក ឈុំ សុជាត បានបង្ហោះសារមួយលើទំព័រហ្វេសប៊ុករបស់លោកនៅថ្ងៃទី២៨ ខែកុម្ភៈ នេះថា កម្ពុជានិងចិន គឺជាមិត្តដែកថែប ជាបងប្អូនរួមសុខរួមទុក្ខជាមួយគ្នា និងគាំទ្រគ្នាទៅវិញទៅមកនៅលើឆាកអន្តរជាតិ ហើយទំនាក់ទំនងយោធាកម្ពុជា-ចិន ក៏ប្រព្រឹត្តទៅដោយល្អប្រកបដោយផ្លែផ្កាដែរ។
លោក ឈុំ សុជាត អះអាងថា កងទ័ពប្រទេសទាំងពីរកន្លងមកបានបង្កើតឲ្យមានសមយុទ្ធរួមគ្នាជាច្រើន ក្នុងគោលបំណងចែករំលែកចំណេះដឹង បទពិសោធន៍ និងបច្ចេកវិទ្យាយោធា ក្នុងនោះផងដែរមានសមយុទ្ធនាគមាសដែលធ្វើឡើងចំនួន ៦លើកចាប់តាំងពីឆ្នាំ២០១៦ និងសមយុទ្ធសុខាភិបាលយោធារួមគ្នាឈ្មោះថា «ទេវតាសន្តិភាព ឆ្នាំ២០២៣» ជាដើម។
កាលពីឆ្នាំ២០២៤ កន្លងទៅថ្មីៗនេះ «សមយុទ្ធនាគមាស» ត្រូវបានពង្រីកវិសាលភាពបន្ថែមលើការហ្វឹកហ្វឺននៅលើគោក ដោយបន្តធ្វើនៅលើទឹកថែមទៀតក្រោមប្រធានបទ «ប្រតិបត្តិការរំដោះចំណាប់ខ្មាំងពីក្រុមភេរវករចាប់ជំរិតនាវាដឹកទំនិញ»។
ចំណែកឯសមយុទ្ធនាគមាសសម្រាប់ឆ្នាំ២០២៥ ខាងមុខនេះវិញ កម្ពុជានិងចិន គ្រោងធ្វើឡើងកាន់តែធំជាងបណ្តាឆ្នាំមុនៗទៀត ទាំងខ្លឹមសារ ចំនួនកងទ័ពចូលរួម យុទ្ធោបករណ៍កាន់តែច្រើន និងទំនើបជាងមុន ដើម្បីឱ្យសមស្របទៅនឹងទំហំនៃកិច្ចសហប្រតិបត្តិការរវាងកងទ័ពនៃប្រទេសទាំងពីរដែលកាន់តែរីកចម្រើន និងស៊ីជម្រៅជាលំដាប់លើគ្រប់វិស័យ៕
© 2025, ឌឹ ខេមបូឌា ដេលី. All rights reserved.