 ដែលថៅកែក្រុមហ៊ុនណាហ្គាវើលដ៍ មិនចេញមុខដោះស្រាយសូម្បីតែមួយចំណុចចំពោះលក្ខខណ្ឌទាំង ៨ ដែលកម្មកររងគ្រោះបានស្នើសុំ។){kind=link}
ក្រុមកូដករណាហ្គាវើលដ៍ ត្អូញត្អែរថា អស់រយៈពេលជាង ១ពាន់ថ្ងៃហើយ (១១៧៤ថ្ងៃ) ដែលថៅកែក្រុមហ៊ុនណាហ្គាវើលដ៍ មិនចេញមុខដោះស្រាយសូម្បីតែមួយចំណុចចំពោះលក្ខខណ្ឌទាំង ៨ ដែលកម្មកររងគ្រោះបានស្នើសុំ។
ក្រុមកូដករណាហ្គាវើលដ៍ចេញធ្វើកូដកម្មតវ៉ាទាមទារសិទ្ធិការងារនៅមុខក្រុមហ៊ុនណាហ្គាវើលដ៍២ នៅថ្ងៃទី៦ ខែមីនា ឆ្នាំ២០២៥ នេះ ដោយការលើកផ្ទាំងបដាដែលមានសរសេរលក្ខខណ្ឌទាមទារចំនួន ៨ចំណុច បន្ទាប់ពីពួកគេរងភាពអយុត្តិធម៌ដោយសារការរំលោភសិទ្ធិការងារអស់រយៈពេលជាង ៣ឆ្នាំកន្លងមកនេះ។
ក្រុមកូដករទាំងនេះលើកឡើងថា ជាង ៣ឆ្នាំនៃការទាមទារពីកម្មករមិនមែនជាការស៊ីឈ្នួលទេ ហើយក៏មិនមែនដើម្បីញុះញង់ដែរ ប៉ុន្តែដើម្បីទទួលបានដំណោះស្រាយតែប៉ុណ្ណោះ ដូចជា ការទាមទារឱ្យថៅកែណាហ្គាវើលដ៍ទទួលយកថ្នាក់ដឹកនាំសហជីព និងសមាជិកឲ្យចូលធ្វើការវិញ និងត្រូវគិតប្រាក់បំណាច់បញ្ចប់កិច្ចសន្យាការងារឲ្យបានត្រឹមត្រូវតាមច្បាប់ ជាដើម។ បន្ថែមពីនេះទៀត ថៅកែក្រុមហ៊ុនក៏ត្រូវតែគិតប្រាក់បញ្ចប់កិច្ចសន្យាការងារបន្ថែមឲ្យបានត្រឹមត្រូវសម្រាប់កម្មករដែលត្រូវបានបញ្ឈប់ក្នុងឆ្នាំ២០២០ និងដើមឆ្នាំ២០២១ ផងដែរ។
លើសពីនេះ ក្រុមហ៊ុនក៏ត្រូវផ្ដល់ប្រាក់បំណាច់អតីតភាពការងារ និងប្រាក់រំលឹកអតីតភាពការងារឲ្យបានត្រឹមត្រូវតាមច្បាប់ថែមទៀត ខណៈប្រាក់ឈ្នួលគោលក៏ត្រូវតែតំឡើងឱ្យបាន ៧% លើប្រាក់ឈ្នួលបច្ចុប្បន្នផងដែរ។
ប្រភពដដែលបន្តថា ថៅកែក្រុមហ៊ុនត្រូវតែបញ្ឈប់ការកេងប្រវ័ញ្ចតាមរយៈការប្រើបុគ្គលិកក្រោមស្លាកកម្មសិក្សាជាថ្នូរឱ្យពួកគេក្លាយជាបុគ្គលិកពេញសិទ្ធិឱ្យខាងតែបាន។ បន្ថែមលើនេះទៀត ក្រុមហ៊ុនក៏ត្រូវបញ្ឈប់ប្រធានផ្នែកកាស៊ីណូ លោក Florian Pastiu ផងដែរ ព្រមទាំងត្រូវផ្តល់ប្រាក់ឈ្នួលគោលស្មើគ្នារវាងបុគ្គលិកក្នុងស្រុកប្រៀបនឹងបុគ្គលិកក្រៅស្រុកដែលមានឋានៈ និងផ្នែកដូចគ្នាថែមទៀត។
ក្រុមកូដកររងគ្រោះទាំងនេះបញ្ជាក់ថា ពួកគេគ្រាន់តែចង់បានដំណោះស្រាយពីថៅកែក្រុមហ៊ុនក្នុងភាពយុត្តិធម៌ដែលម្ចាស់បនល្បែងស៊ីសងមួយនេះបានរំលោភសិទ្ធិការងារលើពួកគេ និងរំលោភច្បាប់ការងារនៃប្រទេសកម្ពុជាប៉ុណ្ណោះ។
ក្រុមកូដករណាហ្គាវើលដ៍ អំពាវនាវឱ្យក្រសួងពាក់ព័ន្ធ ជាពិសេសក្រសួងការងារពិចារណាបញ្ហារំលោភសិទ្ធិការងារក្នុងក្រុមហ៊ុននេះឡើងវិញ ដើម្បីសងភាពស្អាតស្អំដល់ពួកគេដែលជាកម្មកររងគ្រោះ។
គិតចាប់តាំងពីចុងខែធ្នូ ឆ្នាំ២០២១ ដែលក្រុមកូដករបាននាំគ្នាចេញតវ៉ាទាមទាររកយុត្តិធម៌ បន្ទាប់ពីថៅកែក្រុមហ៊ុនណាហ្គាវើលដ៍បានបញ្ឈប់ពួកគេពីការងារដោយរំលោភច្បាប់ គឺមានរយៈពេល ៣ឆ្នាំ ២ខែ ១៩ថ្ងៃហើយ (១១៧៤ថ្ងៃ) ប៉ុន្តែភាពអយុត្តិធម៌នេះនៅតែបន្ត ខណៈក្រសួងការងារមិនដែលអើពើរកដំណោះស្រាយឱ្យពួកគេឡើយ។
មានសេចក្តីរាយការណ៍កន្លងមកថា ក្រុមហ៊ុនបនល្បែងកាស៊ីណូណាហ្គាវើលដ៍ពីជំនាន់ថៅកែមហាសេដ្ឋីសញ្ជាតិម៉ាឡេស៊ី ឆិន លិប គឹង នៅរស់ មានភាគហ៊ុនក្រុមគ្រួសារត្រកូលហ៊ុន ហើយលោកជាទីប្រឹក្សាសេដ្ឋកិច្ចឲ្យលោក ហ៊ុន សែន។ រាជរដ្ឋាភិបាលក្រោមកិច្ចដឹកនាំដោយលោក ហ៊ុន សែន បានផ្តល់អាជ្ញាបណ្ណដល់ក្រុមហ៊ុនល្បែងស៊ីសងណាហ្គាថិរវេលា ៧០ឆ្នាំ គឺរហូតដល់ឆ្នាំ២០៦៥៕
© 2025, ឌឹ ខេមបូឌា ដេលី. All rights reserved.