កងកម្លាំងនៃអគ្គស្នងការដ្ឋាននគរបាលជាតិ និងស្នងការខេត្តមណ្ឌលគិរី បង្ក្រាបអំពើឆបោកតាមអនឡាញនៅអគារ មេគង្គ៧៤ ក្រុងសែនមនោរម្យ ខេត្តមណ្ឌលគិរី ដោយឃាត់ខ្លួនជនបរទេស ២៥៨នាក់ បន្ទាប់ពីមានការរាយការណ៍ចូលទំព័រហ្វេសប៊ុកនៃក្រសួងមហាផ្ទៃ។
យោងតាមសេចក្តីរាយការណ៍ពីអគ្គស្នងការដ្ឋាននគរបាលជាតិ បានចុះផ្សាយនៅថ្ងៃទី៨ មីនា ថា កាលពីថ្ងៃទី៦ ខែមីនា កម្លាំងនគរបាលនៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាបនៅអគារ មេគង្គ៧៤ ក្រុងសែនមនោរម្យ ខេត្តមណ្ឌលគិរី ឃាត់ខ្លួនជនបរទេស ២៥៨នាក់ ក្នុងនោះជនជាតិចិន ចំនួន ២៤៧នាក់ មីយ៉ាន់ម៉ា ឬភូមា ៩នាក់ ម៉ាឡេស៊ី ម្នាក់ និងវៀតណាម ម្នាក់។
បើតាមអគ្គស្នងការដ្ឋាននគរបាលជាតិ ជនបរទេសទាំងនោះសុទ្ធតែពាក់ព័ន្ធនឹងអំពើឆបោកតាមប្រព័ន្ធអនឡាញ។ ក្រោយប្រតិបត្តិការបង្ក្រាបរបស់កងកម្លាំងសមត្ថកិច្ច រកឃើញថាមានជនបរទេសខ្លះហាក់មានសញ្ញាជាជនរងគ្រោះដោយការប្រើអំពើហិង្សា និងការចាប់បង្ខំឱ្យធ្វើការ។
ប្រភពដដែលអះអាងថា កម្លាំងជំនាញបានបញ្ជូនជនសង្ស័យចំនួន ១៤នាក់ និងជនជាតិចិនម្នាក់ដែលអគ្គស្នងការចាត់ទុកថាជាជនរងគ្រោះ ទៅកាន់ស្នងការដ្ឋានខេត្តមណ្ឌលគិរី ដើម្បីសាកសួរបន្ត។ ដោយឡែកជនបរទេសចំនួន ២៤៣នាក់ផ្សេងទៀត ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ដើម្បីបន្តនីតិវិធីតាមច្បាប់។
ក្រុមអ្នកឃ្លាំមើលសង្គមបានលើកឡើងថា បទល្មើសអនឡាញកំពុងរីករាលដាលនៅអាស៊ី ដោយទីក្រុងឆបោកតាមអនឡាញដ៏ធំមួយត្រូវបានគេរកឃើញថាមានទីតាំងនៅប្រទេសភូមា ជាប់ព្រំដែនថៃ។ ចំណែកនៅប្រទេសកម្ពុជា មិនអាចលុបបំបាត់បទល្មើសអនឡាញបានទេ ព្រោះបទល្មើសទាំងនេះមិនមែនត្រឹមតែឧក្រិដ្ឋជនធម្មតាជាអ្នកប្រព្រឹត្តទេ គឺមន្ត្រីជាន់ខ្ពស់ក្នុងជួររដ្ឋាភិបាលជាអ្នកនៅពីក្រោយអំពើខុសច្បាប់នេះតែម្តង។
ក្នុងឆ្នាំ២០២៤ គណៈកម្មាធិការជាតិប្រឆាំងអំពើជួញដូរមនុស្ស បានរាយការណ៍ថា សមត្ថកិច្ចប្រទេសកម្ពុជាបង្ក្រាបបានបទល្មើសឆបោកតាមអនឡាញ និងជួញដូរមនុស្សជាក់ស្តែងក្នុងរាជាណាចក្រនេះប្រមាណ ២០% ក្នុងចំណោមបទល្មើសជាង ៤០០ករណី។
កាលពីអំឡុងខែកញ្ញា ឆ្នាំ២០២៤ ការិយាល័យគ្រប់គ្រងទ្រព្យសកម្មបរទេសនៃក្រសួងហិរញ្ញវត្ថុសហរដ្ឋអាមេរិក បានប្រកាសដាក់ទណ្ឌកម្មបង្កកទ្រព្យសម្បត្តិសមាជិកព្រឹទ្ធសភាបក្សកាន់អំណាច លោក លី យ៉ុងផាត់ និងអាជីវកម្មរបស់លោកមួយចំនួនដែលជាប់ពាក់ព័ន្ធនឹងការជួញដូរមនុស្ស ការលាងលុយកខ្វក់ ការបង្ខំឲ្យធ្វើពលកម្មដោយខុសច្បាប់ និងការបោកប្រាស់តាមបណ្ដាញអ៊ីនធឺណិត ជាដើម៕
© 2025, ឌឹ ខេមបូឌា ដេលី. All rights reserved.