 ដែលបានស្នើឱ្យជួយសម្រួលដល់ពលរដ្ឋវៀតណាម ដែលកំពុងរស់នៅដោយខុសច្បាប់ក្នុងប្រទេសកម្ពុជាបន្តទៀត។){kind=link}
កូនប្រុសមេដឹកនាំខ្មែរដែលត្រូវវៀតណាម លើកបន្តុប លោក ហ៊ុន ម៉ាណែត ទទួលយកសំណើនាយករដ្ឋមន្ត្រីវៀតណាម លោក ផាម មិញជីញ (Pham Minh Chinh) ដែលបានស្នើឱ្យជួយសម្រួលដល់ពលរដ្ឋវៀតណាម ដែលកំពុងរស់នៅដោយខុសច្បាប់ក្នុងប្រទេសកម្ពុជាបន្តទៀត។
ទីភ្នាក់ងារសារព័ត៌មានវៀតណាម (VNA) បានចេញចុះផ្សាយកាលពីថ្ងៃទី២៦ ខែឧសភា ឆ្នាំ២០២៥ នេះថា ក្នុងជំនួបរវាងប្រមុខរដ្ឋាភិបាលវៀតណាម កម្ពុជា និងឡាវ អំឡុងពេលចូលរួមកិច្ចប្រជុំកំពូលអាស៊ានក្នុងទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែឧសភា នាយករដ្ឋមន្ត្រីវៀតណាម បានស្នើឱ្យកម្ពុជា និងឡាវ ផ្តល់ការគាំទ្រដល់ពលរដ្ឋវៀតណាមខុសច្បាប់ដែលកំពុងរស់នៅក្នុងប្រទេសរបស់ពួកគេបន្តទៀត។
ប្រភពដដែលអះអាងថា នាយករដ្ឋមន្ត្រីវៀតណាម លោក ផាម មិញជីញ បានសម្ដែងនូវការអរគុណដល់រដ្ឋាភិបាលកម្ពុជា និងឡាវ ចំពោះការយកចិត្តទុកដាក់លើពលរដ្ឋវៀតណាមខុសច្បាប់ដែលកំពុងរស់នៅក្នុងប្រទេសទាំងពីរនេះនាពេលកន្លងមក។
សារព័ត៌មានវៀតណាម បញ្ជាក់ថា នាយករដ្ឋមន្ត្រីវៀតណាម លោក ផាម មិញជីញ បានស្នើលោក ហ៊ុន ម៉ាណែត និងប្រមុខរដ្ឋាភិបាលឡាវ លោក សនសៃ ស៊ីផាន់ដន ឱ្យបន្តផ្តល់ការគាំទ្រដល់ប្រជាជនកម្ពុជា និងឡាវ ដើមកំណើតវៀតណាម ដែលកំពុងរស់នៅប្រទេសរបស់ខ្លួន និងបញ្ចូលជនជាតិវៀតណាម ទាំងនោះ ឱ្យអាចរស់នៅក្នុងសង្គមកម្ពុជា និងឡាវ ដូចម្ចាស់ប្រទេស (សមាហរណកម្ម) ទៅថ្ងៃមុខផងដែរ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន នៅសរសេរលើទំព័រហ្វេសប៊ុករបស់ខ្លួននៅថ្ងៃទី២៧ ឧសភា នេះថា មេដឹកនាំនៃប្រទេសទាំងបីតែងតែជួបប្រជុំគ្នារាល់កិច្ចប្រជុំអន្តរជាតិពុំដែលខកខានម្តងណាឡើយ ក្នុងគោលដៅធ្វើសមាហរណកម្មជាបណ្តើរៗទៅបង្កើតសហព័ន្ធឥណ្ឌូចិន នាពេលអនាគត តាមក្តីសុបិននៃដំណើរឆ្ពោះទៅទិសខាងលិចរបស់មេដឹកនាំវៀតណាម លោក ហូ ជី មិញ។
លោក អ៊ុំ សំអាន បញ្ជាក់ថា ដំណើរឆ្ពោះទៅទិសខាងលិចរបស់លោក ហូ ជី មិញ បានបោះពួយយ៉ាងលឿនក្រោមការដឹកនាំរបស់លោក ហ៊ុន ម៉ាណែត តាមរយៈការពន្លឿនក្នុងការផ្តល់បណ្ណស្នាក់នៅអចិន្ត្រៃយ៍ និងផ្តល់សញ្ជាតិខ្មែរដល់ជនជាតិវៀតណាម ទាំងនោះ រួមទាំងការបញ្ជូនជនជាតិវៀតណាម បន្ថែមទៀត ឱ្យទៅរស់នៅកម្ពុជា និងបញ្ចូលជនជាតិវៀតណាម ទាំងនោះ ទៅក្នុងស្ថាប័នរដ្ឋ ដូចជា ប៉ូលិស និងទាហាន ជាដើម។
កាលពីថ្ងៃទី១១ ខែធ្នូ ឆ្នាំ២០២៣ ក្រោយពេលលោក ហ៊ុន ម៉ាណែត ត្រូវបានតែងតាំងជាអនុប្រធានគណបក្សប្រជាជនកម្ពុជា មេដឹកនាំកំពូលៗជាច្រើនរបស់វៀតណាម បានស្នើឱ្យលោក ហ៊ុន ម៉ាណែត ជួយអនុវត្តនូវសំណើគ្រប់បែបយ៉ាងរបស់រដ្ឋាភិបាលវៀតណាម ដូចជា ការផ្តល់សញ្ជាតិដល់ជនជាតិវៀតណាម ដែលកំពុងរស់នៅលើទឹកដីកម្ពុជាដោយខុសច្បាប់ ឱ្យមកជារស់នៅដោយស្របច្បាប់វិញ ជាដើម។
ជាងនេះទៀត ក៏បានស្នើឱ្យលោក ហ៊ុន ម៉ាណែត ជួយពន្លឿនការធ្វើឱ្យស្របច្បាប់នូវឯកសារនានាដែលលោក ហ៊ុន សែន ឪពុករបស់គាត់ធ្លាប់បានយល់ព្រមជាមួយរដ្ឋាភិបាលវៀតណាម ផងដែរ ខណៈសំណើទាំងនោះមិនត្រូវបានលោក ហ៊ុន ម៉ាណែត បដិសេធឡើយ៕
© 2025, ឌឹ ខេមបូឌា ដេលី. All rights reserved.