អ្នកឃ្លាំមើលស្ថានការណ៍កម្ពុជា ចាត់ទុកដំណើរទស្សនកិច្ចរបស់លោក ហ៊ុន ម៉ាណែត ទៅប្រទេសបារាំង ក្នុងការចូលរួមសន្និសីទរបស់អង្គការសហប្រជាជាតិ ស្ដីពីមហាសមុទ្រនាពេលនេះ ជាដំណើរទស្សនកិច្ចឥតប្រយោជន៍។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី០៩ មិថុនា នេះថា ទោះលោក ហ៊ុន ម៉ាណែត បង្អួតពីការជួបជាមួយមេដឹកនាំប្រទេសផ្សេង រួមទាំងប្រធានគណៈកម្មាធិការអឺរ៉ុបក៏ដោយ គឺគ្រាន់តែដើម្បីកុហកពលរដ្ឋខ្មែរថាមេដឹកនាំប្រទេសទាំងនោះទទួលស្គាល់ខ្លួនប៉ុណ្ណោះ ប៉ុន្តែជាលទ្ធផល ពេលគាត់ត្រឡប់ទៅកម្ពុជា នឹងគ្មានទទួលបានប្រយោជន៍អ្វីទាំងអស់។
លោក ម៉ែន ណាត និយាយថា វត្តមានរបស់លោក ហ៊ុន ម៉ាណែត នៅប្រទេសបារាំង គឺដើម្បីយកឱកាសថតរូបជាមួយមេដឹកនាំប្រទេសផ្សេងៗប៉ុណ្ណោះ។
លោក ម៉ែន ណាត លើកឡើងថា ក្នុងស្ថានភាពពេលនេះ កម្ពុជាកំពុងប្រឈមនឹងការកំណត់ពន្ធខ្ពស់កប់ពពកពីសហរដ្ឋអាមេរិក ដូច្នេះកិច្ចការអាទិភាពសម្រាប់លោក ហ៊ុន ម៉ាណែត ត្រូវធ្វើ គឺចរចាជាមួយប្រធានគណៈកម្មាធិការអឺរ៉ុប ដើម្បីស្នើសុំការអនុគ្រោះពន្ធសម្រាប់កម្ពុជា ២០% ដែលត្រូវបានព្យួរកាលពីចុងឆ្នាំ២០២០ កន្លងទៅ។
អ្នកឃ្លាំមើលសង្គមរូបនេះបញ្ជាក់ថា កន្លងមក រឿងដែលត្រូវធ្វើដើម្បីជាតិ និងប្រជាជន លោក ហ៊ុន ម៉ាណែត មិនដែលធ្វើទេ ប៉ុន្តែរឿងដែលបំផ្លាញមុខមាត់ជាតិ គាត់ធ្វើគ្រប់ទាំងអស់ ដូចជាការបំផ្លាញសិទ្ធិមនុស្ស ការជាន់ឈ្លីប្រជាធិបតេយ្យ និងការបោះឆ្នោតមិនត្រឹមត្រូវ ជាដើម ខណៈទង្វើទុច្ចរិតទាំងនេះគឺផ្ទុយទៅនឹងគោលការណ៍គណៈកម្មការអឺរ៉ុបទាំងស្រុង។
កាលពីថ្ងៃទី៨ ខែមិថុនា ឆ្នាំ២០២៥ លោក ហ៊ុន ម៉ាណែត រួមជាមួយមន្ត្រីរដ្ឋាភិបាលរបស់ខ្លួនមួយចំនួន ទៅចូលរួមសន្និសីទអង្គការសហប្រជាជាតិ ស្ដីពីមហាសមុទ្រលើកទី៣ (UNOC3) ដែលមានរយៈពេល ៣ថ្ងៃនៅទីក្រុងនីស ប្រទេសបារាំង គឺចាប់ពីថ្ងៃទី០៨ ដល់ថ្ងៃទី១១ ខែមិថុនា ឆ្នាំ២០២៥ នេះ ក្រោមប្រធានបទ «ការពន្លឿនសកម្មភាព និងការកៀរគរគ្រប់តួអង្គដើម្បីរក្សា និងប្រើប្រាស់មហាសមុទ្រប្រកបដោយចីរភាព»។
ជុំវិញបញ្ហានេះ គណបក្សសង្គ្រោះជាតិសាខាប្រទេសបារាំង កាលពីថ្ងៃទី៧ មិថុនា បានផ្ញើញត្តិទៅកាន់ប្រធានាធិបតីសាធារណរដ្ឋបារាំង លោក Emmanuel Macron ឱ្យជួយជំរុញលោក ហ៊ុន ម៉ាណែត គោរពកិច្ចព្រមព្រៀងសន្តិភាពទីក្រុងប៉ារីស ដើម្បីស្ដារលទ្ធិប្រជាធិបតេយ្យ និងលើកស្ទួយសិទ្ធិមនុស្សឡើងវិញ។
គណបក្សសង្គ្រោះជាតិ បញ្ជាក់ថា ការដាក់ញត្តិនេះ ក៏ដើម្បីរំឭកប្រធានាធិបតីបារាំង ពីកាតព្វកិច្ចក្នុងការអនុវត្តកិច្ចព្រមព្រៀងសន្តិភាពទីក្រុងប៉ារីស ឱ្យបានពេញលេញ រួមទាំងជំរុញឲ្យលោក ហ៊ុន ម៉ាណែត ប្រើយន្តការអន្តរជាតិដើម្បីដោះស្រាយជម្លោះព្រំដែន ដោយប្តឹងថៃ ទៅតុលាការអន្តរជាតិ (ICJ) និងផ្តល់សច្ចាប័នច្បាប់សមុទ្រ (UNCLOS) ដើម្បីបានជាខែលអន្តរជាតិការពារបូរណភាពទឹកដីកម្ពុជាផងដែរ៕
© 2025, ឌឹ ខេមបូឌា ដេលី. All rights reserved.