កាលពីថ្ងៃព្រហស្បតិ៍ ទី១២ ខែមិថុនា ទីភ្នាក់ងារសារព័ត៌មានមជ្ឈិមបក្សកូរ៉េ KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បាននិយាយក្នុងសារមួយផ្ញើទៅកាន់ប្រធានាធិបតីរុស្ស៊ី លោក វ្ល៉ាឌីមៀ ពូទីន ដោយអះអាងឡើងវិញថា ប្រទេសលោកត្រូវឈរនៅជាមួយទីក្រុងមូស្គូ ជានិច្ច គាំទ្រ និងជួយរហូតក្រុងមូស្គូ ឈ្នះសង្គ្រាមនៅប្រទេសអ៊ុយក្រែន។ នេះបើតាមការចេញផ្សាយដោយសារព័ត៌មាន Euro News ចុះផ្សាយនៅថ្ងៃទី១២ មិថុនា នេះ។
ក្នុងសារអបអរឱកាសបុណ្យឯករាជ្យជាតិរបស់ប្រទេសរុស្ស៊ី លោក គីម បានហៅលោក ពូទីន ថាជាមហាមិត្តសម្លាញ់ដ៏គួរគោរព ជាមួយនឹងការអបអរសាទរទំនាក់ទំនងទ្វេភាគីដោយលើកឡើងថាជាទំនាក់ទំនងពិតប្រាកដ គឺស្គាល់ចិត្តគ្នាជា «សមមិត្តរួមអាវុធ»។
បើតាម KCNA លោក គីម លើកឡើងថា៖ រដ្ឋាភិបាលនៃសាធារណរដ្ឋប្រជាមានិតប្រជាធិបតេយ្យកូរ៉េ ឬកូរ៉េខាងជើង និងរូបលោកផ្ទាល់ មានឆន្ទៈយ៉ាងមុតមាំជាទីបំផុតដើម្បីបន្តទំនាក់ទំនងកូរ៉េខាងជើង-រុស្ស៊ី ក្នុងយុគសម័យដ៏ទំនើបនេះ។
កាលពីចុងខែមេសា ឆ្នាំនេះ ទីក្រុងព្យុងយ៉ាង បានទទួលស្គាល់ជាលើកដំបូងថា ខ្លួនពិតជាបានបញ្ជូនកងទ័ពទៅជួយរុស្ស៊ី ប្រយុទ្ធក្នុងសង្គ្រាមប្រឆាំងអ៊ុយក្រែន តាមការបញ្ជាផ្ទាល់របស់លោក គីម ជុងអ៊ុន ហើយតាមភ្នាក់ងារចារកម្មរបស់កូរ៉េខាងត្បូង ទីក្រុងព្យុងយ៉ាង បានបញ្ជូនគ្រាប់កាំភ្លើងទៅឱ្យរុស្ស៊ី ប្រមាណជាង ៥លានគ្រាប់ ក្នុងនោះមានទាំងគ្រាប់មីស៊ីលបាលិស្ទិក និងគ្រាប់កាំភ្លើងធំ។
ក្នុងឱកាសខួបឯករាជ្យរបស់ប្រទេសរុស្ស៊ី រដ្ឋមន្ត្រីការបរទេសអាមេរិក លោក Marco Rubio បាននិយាយថា សេតវិមានមានបំណងចូលរួមក្នុងន័យស្ថាបនាជាមួយសហព័ន្ធរុស្ស៊ី ដើម្បីនាំមកនូវសន្តិភាពយូរអង្វែងរវាងរុស្ស៊ី-អ៊ុយក្រែន ព្រោះជាក្តីសង្ឃឹមរបស់សហរដ្ឋអាមេរិក ដែលថាសន្តិភាពនឹងជំរុញទំនាក់ទំនងដែលមានផលប្រយោជន៍ទៅវិញទៅមករវាងក្រុងវ៉ាស៊ីនតោន និងក្រុងមូស្គូ។
ទំនាក់ទំនងរវាងទីក្រុងមូស្គូ និងវ៉ាស៊ីនតោន មានភាពប្រសើរឡើងវិញ ចាប់តាំងពីលោក ដូណាល់ ត្រាំ ចូលកាន់តំណែងជាប្រធានាធិបតីអាមេរិកនៅថ្ងៃទី២០ ខែមករា ឆ្នាំ២០២៥។ តែដំណាលពេលគ្នានេះ កាលពីថ្ងៃពុធ ទី១១ ខែមិថុនា សេតវិមានបាននិយាយថាលោកប្រធានាធិបតី ដូណាល់ ត្រាំ បង្ហាញការស្វាគមន៍ទំនាក់ទំនងជាមួយមេដឹកនាំកូរ៉េខាងជើង លោក គីម ជុងអ៊ុន បន្ទាប់ពីធ្លាប់មានទំនាក់ទំនងមិត្តភាពនឹងគ្នាជាមួយលោក គីម កាលពីអាណត្តិទី១ របស់លោក។ លោក ត្រាំ និងលោក គីម ធ្លាប់បានជួបគ្នាចំនួន ៣លើក អំឡុងអាណត្តិទី១ របស់លោក ពីឆ្នាំ២០១៧ ដល់ឆ្នាំ២០២១។
តែបើតាមអ្នកនាំពាក្យសេតវិមាន អ្នកស្រី Karoline Leavitt លោក ត្រាំ បានស្នើឱ្យលោក គីម បញ្ឈប់ការគាំទ្ររុស្ស៊ី ដែលអ្នកស្រីថាលោក ត្រាំ ចង់ឱ្យកូរ៉េខាងជើង កុំព្យាយាមប្រឈមមុខនឹងសម្ពាធរបស់សហគមន៍អន្តរជាតិ ព្រោះតែជួយរុស្ស៊ី ធ្វើសង្គ្រាមនៅប្រទេសអ៊ុយក្រែន។
តែក្នុងស្ថានភាពសង្គ្រាមដែលមិនអាចរកទីបញ្ចប់ និងចំពេលកូរ៉េខាងជើង នៅបន្តបញ្ជូនគ្រាប់កាំភ្លើង និងអាវុធផ្សេងៗជួយរុស្ស៊ី ក្រសួងការបរទេសអ៊ុយក្រែន ប្រកាសពីការទម្លាក់លុយដល់ ៥ម៉ឺនលានដុល្លារដើម្បីទិញអាវុធពីរដ្ឋការលោក ដូណាល់ ត្រាំ។
តាមសេចក្ដីប្រកាសព័ត៌មានពីទីក្រុងគៀវ ដែលត្រូវបានប្រព័ន្ធផ្សព្វផ្សាយអ៊ុយក្រែន ផ្សាយជាសាធារណៈក្នុងទំហំសាច់ប្រាក់ ៥ម៉ឺនលានដុល្លារ ទីក្រុងគៀវ ត្រូវការប្រព័ន្ធខែលការពារប៉ាទ្រីយ៉ុតចំនួន ១០គ្រឿង ក្រៅពីនេះ មានគ្រាប់មីស៊ីល ប្រព័ន្ធកាំភ្លើងធំ គ្រាប់កាំភ្លើងធំ និងមានទាំងរថក្រោះរថពាសដែកទៀត។
តាមសេចក្ដីប្រកាសព័ត៌មានរបស់ក្រសួងការបរទេសអ៊ុយក្រែន សំណើពីក្រុងគៀវ កំពុងស្ថិតលើតុចរចា ហើយសេតវិមានកំពុងតែសិក្សាឡើងវិញថា តើសំណើនេះអាចឆ្លើយតបជាវិជ្ជមាន ឬអវិជ្ជមាន ប៉ុន្តែទីក្រុងគៀវ ចាត់ទុកថាវាពុំមែនជាសំណើសុំជំនួយយោធានោះទេ គឺជាការស្នើទិញ ដែលក្រុងគៀវ មានលុយគ្រប់គ្រាន់ គឺគ្មានជំពាក់អ្វីឡើយ។
កាលពីចុងខែឧសភា ប្រទេសជាមហាអំណាចអឺរ៉ុប ដូចជាបារាំង អង់គ្លេស និងអាល្លឺម៉ង់ ប្រកាសឲ្យមានការដាក់ទណ្ឌកម្មលើរុស្ស៊ី រឹតតែខ្លាំងថែមទៀត ប្រសិនបើលោក ពូទីន មិនព្រមឈប់បាញ់ទេ។
ប្រធានាធិបតីបារាំង អេម៉ាញូអែល ម៉ាក្រុង គឺជាអ្នកចេញមុខជាងគេក្នុងការអំពាវនាវឲ្យដាក់សម្ពាធខ្លាំងលើទីក្រុងមូស្គូ។ ក្នុងបទសម្ភាសន៍ជាមួយទូរទស្សន៍បារាំង លោក ម៉ាក្រុង និយាយថា៖ គោលដៅអឺរ៉ុប គឺត្រូវដាក់ទណ្ឌកម្មរុស្ស៊ី ថែមទៀត បើក្រុងមូស្គូ នៅតែរឹងទទឹងមិនព្រមឈប់បាញ់។
តាមប្រធានកិច្ចការនយោបាយការបរទេសអឺរ៉ុប អ្នកស្រី Kaja Kallas (កយយ៉ា កល់ឡះ) នាយករដ្ឋមន្ត្រីប្រទេសអេស្តូនី អឺរ៉ុបកំពុងពិចារណាផ្ដោតសំខាន់នៃការដាក់ទណ្ឌកម្មកញ្ចប់ទី១៨ ទៅលើវិស័យហិរញ្ញវត្ថុ តម្លៃប្រេងឆៅ និងឧស្ម័នរុស្ស៊ី ដែលទាញទម្លាក់តម្លៃប្រេងឆៅរបស់រុស្ស៊ី មកត្រឹម ៤៥ដុល្លារក្នុងមួយបារ៉ែល ឬ ១៥៩លីត្រ៕
© 2025, ឌឹ ខេមបូឌា ដេលី. All rights reserved.