ភាពតានតឹងនៅមជ្ឈិមបូព៌ា កំពុងឡើងខ្ពស់មួយកម្រិតទៀត ចាប់តាំងពីល្ងាចថ្ងៃអាទិត្យ ទី១៥ ខែមិថុនា ខណៈប្រព័ន្ធផ្សព្វផ្សាយរដ្ឋរបស់អ៊ីរ៉ង់ រាយការណ៍អំពីការផ្ទុះជាច្រើនបានអង្រួនរដ្ឋធានីតេហេរ៉ង់ ហើយដែលត្រូវគេជឿថាជាការវាយប្រហារតាមផ្លូវអាកាសរបស់អ៊ីស្រាអែល។
នេះបើយោងតាមការចេញផ្សាយដោយបណ្ដាញផ្សាយព័ត៌មាន Al-Jazeera នៅថ្ងៃទី១៥ ខែមិថុនា ឆ្នាំ២០២៥។
ស្របពេលជាមួយគ្នានេះ យោធាអ៊ីស្រាអែល បានប្រកាសថា រលកថ្មីនៃមីស៊ីលបាលិស្ទិកពីសំណាក់អ៊ីរ៉ង់ បានបង្កឲ្យមានសំឡេងស៊ីរ៉ែនបន្លឺឡើងយ៉ាងទ្រហឹងនៅទូទាំងប្រទេសអ៊ីស្រាអែល ជាពិសេសតម្រង់ទៅកាន់ទីក្រុង Tel Aviv ដែលបណ្តាលឲ្យប្រជាជនរាប់ម៉ឺននាក់រត់រកទីជម្រក។
សេចក្តីរាយការណ៍ពីទីក្រុងតេហេរ៉ង់ បានពិពណ៌នាអំពីសំឡេងផ្ទុះដ៏ខ្លាំងក្លាជាច្រើន ដែលបង្កឲ្យមានការភ្ញាក់ផ្អើល និងភ័យខ្លាចយ៉ាងខ្លាំង។ ទោះបីជាមិនទាន់មានការអះអាងទទួលខុសត្រូវជាផ្លូវការភ្លាមៗពីអ៊ីស្រាអែល ក៏ដោយ តែព្រឹត្តិការណ៍នេះកើតឡើងបន្ទាប់ពីយោធាអ៊ីស្រាអែល បានចេញសេចក្តីព្រមានឲ្យប្រជាជនអ៊ីរ៉ង់ ដែលរស់នៅក្បែរទីតាំងផលិតអាវុធ និងទីតាំងយុទ្ធសាស្ត្រនានា ត្រូវតែធ្វើការជម្លៀសខ្លួន។
ក្រសួងសុខាភិបាលអ៊ីរ៉ង់ បានឱ្យដឹងកាលពីថ្ងៃអាទិត្យ ទី១៥ ខែមិថុនា ថា ការវាយប្រហារតាមផ្លូវអាកាសរបស់អ៊ីស្រាអែល ក្នុងរយៈពេលជាង ៣ថ្ងៃមកនេះលើប្រទេសរបស់ខ្លួន បានសម្លាប់មនុស្ស ២២៤នាក់ និងជាង ១២០០នាក់រងរបួស។
អ្នកនាំពាក្យក្រសួងសុខាភិបាលអ៊ីរ៉ង់ លោក Hossein Kermanpour បានបង្ហោះសារលើបណ្ដាញទំនាក់ទំនងសង្គម X ដោយបានរៀបរាប់ថា ក្រោយការឈ្លានពានរយៈពេល ៦៥ម៉ោងដោយរបប Zionist អ៊ីស្រាអែល មានមនុស្ស ១២៧៧នាក់ បានរងរបួស ហើយមនុស្សមានទាំងបុរស ស្ត្រី និងកុមារចំនួន ២២៤នាក់បានស្លាប់។ ចំណែកខាងអ៊ីស្រាអែល វិញ មនុស្ស ១៤នាក់បានស្លាប់ និង ៣៩០នាក់ បានរងរបួសនៅក្នុងការវាយប្រហាររបស់អ៊ីរ៉ង់ ចាប់តាំងពីយប់ថ្ងៃសុក្រមក។
នៅប្រទេសអ៊ីស្រាអែល វិញ សំឡេងស៊ីរ៉ែនបានបន្លឺឡើងមិនឈប់ បង្ខំឲ្យពលរដ្ឋស្វែងរកទីសុវត្ថិភាពជាបន្ទាន់។ យោធាអ៊ីស្រាអែល បានបញ្ជាក់ថា ប្រព័ន្ធការពារដែនអាកាសរបស់ខ្លួនកំពុងដំណើរការយ៉ាងសកម្ម ដើម្បីស្ទាក់ចាប់មីស៊ីលដែលបាញ់ចេញពីអ៊ីរ៉ង់។
ជាមួយនឹងការវាយប្រហារគ្នាទៅវិញទៅមកដែលមិនមានសញ្ញាថមថយ និងការគំរាមកំហែងកាន់តែខ្លាំងពីមេដឹកនាំទាំងសងខាង ពិភពលោកកំពុងតាមដានដោយក្តីព្រួយបារម្ភយ៉ាងខ្លាំងចំពោះហានិភ័យនៃសង្គ្រាមទ្រង់ទ្រាយធំដែលអាចនឹងផ្ទុះឡើងនៅមជ្ឈិមបូព៌ា។
អ៊ីស្រាអែល កាលពីថ្ងៃសុក្រសប្ដាហ៍មុន បានបើកការវាយប្រហារតាមផ្លូវអាកាសទ្រង់ទ្រាយធំលើអ៊ីរ៉ង់ ក្នុងគោលបំណងដែលក្រុមមន្ត្រីអ៊ីស្រាអែល អះអាងថាដើម្បីបញ្ឈប់កម្មវិធីនុយក្លេអ៊ែររបស់អ៊ីរ៉ង់ បន្ទាប់ពីចារកម្មអ៊ីស្រាអែល អះអាងថាតេហេរ៉ង់មានសារធាតុអ៊ុយរ៉ាញ៉ូមគ្រប់គ្រាន់ ដើម្បីផលិតអាវុធនុយក្លេអ៊ែរ។
ក្នុងស្ថានភាពនេះ ប្រធានាធិបតីរុស្ស៊ី វ៉្លាឌីមៀ ពូទីន បានសន្ទនាតាមទូរសព្ទជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu និងប្រធានាធិបតីអ៊ីរ៉ង់ Masoud Pezeshkian បន្ទាប់ពីអ៊ីស្រាអែល បានបើកការវាយប្រហារទ្រង់ទ្រាយធំទៅលើអ៊ីរ៉ង់។ រុស្ស៊ី ត្រូវបានគេមើលឃើញថា គឺជាសម្ព័ន្ធមិត្តដ៏សំខាន់មួយរបស់អ៊ីរ៉ង់ នៅលើឆាកពិភពលោក។ ការវាយប្រហារនេះ បានបង្ហាញពីការកើនឡើងនៅក្នុងភាពតានតឹងដ៏យូរអង្វែងរវាងសត្រូវទាំងពីរ ដោយជំរុញឱ្យមានការព្រួយបារម្ភអំពីសង្គ្រាមកាន់តែគ្រោះថ្នាក់ ជាពិសេសអំពីការចូលរួមដែលអាចកើតមានរបស់សហរដ្ឋអាមេរិកដែលមានមូលដ្ឋានយោធានៅក្នុងទឹកដីអ៊ីស្រាអែល។
វិមានក្រឹមឡាំង បានបញ្ជាក់ពីទំនាក់ទំនងតាមរយៈការហៅតាមទូរសព្ទរបស់លោក ពូទីន ជាមួយមេដឹកនាំនៃប្រទេសទាំងពីរនៅក្នុងសេចក្តីថ្លែងការណ៍មួយដែលបានបង្ហោះតាមអ៊ីនធឺណិតកាលពីថ្ងៃសុក្រ ទី១៣ ខែមិថុនា។
វិមានក្រឹមឡាំង បានលើកឡើងនៅក្នុងសេចក្តីថ្លែងការណ៍មួយដោយបានបង្ហោះនៅលើគេហទំព័ររបស់ខ្លួនថា ប្រធានាធិបតីរុស្ស៊ី បានសង្កត់ធ្ងន់ក្នុងការអំពាវនាវរបស់គាត់ជាមួយមេដឹកនាំអ៊ីស្រាអែល លោក Netanyahu ពីសារសំខាន់នៃការបន្តការចរចា និងការដោះស្រាយបញ្ហាណាមួយដែលទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ ទាំងស្រុង តាមរយៈមធ្យោបាយនយោបាយ និងការទូត។
ថ្លែងទៅកាន់ Pezeshkian លោក Putin បានសង្កត់ធ្ងន់ថា រុស្ស៊ីបានថ្កោលទោសចំពោះសកម្មភាពរបស់អ៊ីស្រាអែល ដែលបានប្រព្រឹត្តទៅដោយរំលោភលើធម្មនុញ្ញអង្គការសហប្រជាជាតិ និងច្បាប់អន្តរជាតិ។
ភាគីរុស្ស៊ី បាននិងកំពុងគាំទ្រយ៉ាងពេញទំហឹងចំពោះកិច្ចខិតខំប្រឹងប្រែងដើម្បីដោះស្រាយស្ថានការណ៍ជុំវិញកម្មវិធីនុយក្លេអ៊ែរអ៊ីរ៉ង់ ដោយសន្តិវិធី និងបានស្នើឱ្យមានគំនិតផ្ដួចផ្ដើមជាក់ស្តែងសំដៅឈានដល់កិច្ចព្រមព្រៀងដែលអាចទទួលយកបានទៅវិញទៅមក។
លោក ពូទីន ក៏នឹងរក្សាទំនាក់ទំនងជិតស្និទ្ធជាមួយអាជ្ញាធរនៅក្នុងប្រទេសទាំងពីរ ក្នុងគោលបំណងដើម្បីដោះស្រាយស្ថានភាពបច្ចុប្បន្ន ដែលពោរពេញដោយផលវិបាកដ៏មហន្តរាយបំផុតសម្រាប់តំបន់ទាំងមូល។
ជាមួយគ្នា ប្រទេសចិន ដែលជាសម្ព័ន្ធភាពនឹងអ៊ីរ៉ង់ បាននិយាយថា ក្រុងប៉េកាំង មានការព្រួយបារម្ភយ៉ាងខ្លាំងចំពោះការវាយប្រហាររបស់អ៊ីស្រាអែល ទៅលើអ៊ីរ៉ង់ ហើយចិន បានប្រកាសថាខ្លួនមានឆន្ទៈក្នុងការដើរតួនាទីជួយកាត់បន្ថយភាពតានតឹងនៃស្ថានការណ៍ ដែលធ្វើឱ្យមានការគំរាមកំហែងនៅតំបន់មជ្ឈិមបូព៌ាធ្លាក់ចូលទៅក្នុងសង្គ្រាមទាំងស្រុង។
ជាការឆ្លើយតបទៅនឹងការវាយប្រហាររបស់អ៊ីស្រាអែល លោក Lin Jian អ្នកនាំពាក្យក្រសួងការបរទេសចិន បាននិយាយថា យោងតាមប្រព័ន្ធផ្សព្វផ្សាយរដ្ឋ ប្រទេសចិន មានការព្រួយបារម្ភយ៉ាងខ្លាំងចំពោះការវាយប្រហាររបស់អ៊ីស្រាអែល មកលើប្រទេសអ៊ីរ៉ង់ និងព្រួយបារម្ភយ៉ាងខ្លាំងអំពីផលវិបាកធ្ងន់ធ្ងរដែលអាចកើតមាននៃសកម្មភាពទាំងនេះ។
លោក Lin ក៏បាននិយាយផងដែរថា ទីក្រុងប៉េកាំង ដែលបាននិងកំពុងបង្កើតទំនាក់ទំនងកាន់តែជិតស្និទ្ធជាមួយទីក្រុង Tehran រួមទាំងកិច្ចព្រមព្រៀងសហប្រតិបត្តិការរយៈពេល ២៥ឆ្នាំ គឺចេញមុខប្រឆាំងរាល់ការរំលោភលើអធិបតេយ្យភាព សន្តិសុខ និងបូរណភាពទឹកដីរបស់អ៊ីរ៉ង់ និងប្រឆាំងនឹងសកម្មភាពដែលបង្កើនភាពតានតឹង និងពង្រីកជម្លោះ។
លោកបានបន្តលើកឡើងថា ការកើនឡើងយ៉ាងខ្លាំងជាថ្មីនៃស្ថានភាពក្នុងជម្លោះរវាងអ៊ីស្រាអែល និងអ៊ីរ៉ង់ ក្នុងតំបន់ គឺមិនស្ថិតក្នុងផលប្រយោជន៍របស់ភាគីណាមួយឡើយ។
ប្រទេសចិន ជំរុញឱ្យភាគីពាក់ព័ន្ធទាំងអស់ឱ្យស្វែងកដំណោះស្រាយដោយការលើកកម្ពស់សន្តិភាព និងស្ថិរភាពក្នុងតំបន់ និងដើម្បីជៀសវាងការកើនឡើងនៃភាពតានតឹងបន្ថែមទៀត។ ប្រទេសចិន មានឆន្ទៈក្នុងការដើរតួនាទីស្ថាបនាក្នុងការជួយបន្ថយស្ថានការណ៍តែប៉ុណ្ណោះ។
មេដឹកនាំអ៊ីស្រាអែល បាននិយាយថា ការវាយប្រហារនេះគឺមានគោលបំណងរារាំងអ៊ីរ៉ង់ ពីការបង្កើនការផលិតអាវុធនុយក្លេអ៊ែរ ខណៈដែលប្រទេសនេះកំពុងតែបង្កើនសារធាតុអ៊ុយរ៉ាញ៉ូម។
ទន្ទឹមនឹងនេះ ប្រធានាធិបតី Donald Trump បានជំរុញឱ្យអ៊ីរ៉ង់ ឈានដល់កិច្ចព្រមព្រៀងជាមួយសហរដ្ឋអាមេរិកស្ដីពីកម្មវិធីនុយក្លេអ៊ែររបស់ខ្លួន ដោយព្រមានថាការវាយប្រហាររបស់អ៊ីស្រាអែល នឹងកាន់តែអាក្រក់ទៅៗ ប្រសិនបើអ៊ីរ៉ង់ នៅតែបន្តទាត់ចោលកិច្ចព្រមព្រៀងស្ដីពីកម្មវិធីអាវុធនុយក្លេអ៊ែរនេះ។ ជាមួយគ្នានេះ លោក ត្រាំ ត្រូវបានគេដឹងថា លោកធ្លាប់បាននិយាយថា អាមេរិកមិនបានពាក់ព័ន្ធនឹងការវាយប្រហារនោះទេ។
ប្រធានាធិបតី ដូណាល់ ត្រាំ បានថ្លែងកាលពីព្រឹកព្រលឹមថ្ងៃអាទិត្យថា ប្រសិនបើអ៊ីរ៉ង់ ហ៊ានវាយប្រហារសហរដ្ឋអាមេរិកតាមមធ្យោបាយណាមួយនោះ ក្រុងតេហេរ៉ង់ នឹងត្រូវប្រឈមមុខនឹងកម្លាំងយោធារបស់សហរដ្ឋអាមេរិក «ក្នុងកម្រិតមួយដែលមិនធ្លាប់មានពីមុនមក»។
នៅលើបណ្ដាញសង្គម Truth Social លោក ត្រាំ បានអះអាងថា អាមេរិកមិនមានជាប់ពាក់ព័ន្ធអ្វីទាំងអស់ជាមួយនឹងការវាយប្រហារទៅលើអ៊ីរ៉ង់ កាលពីយប់ថ្ងៃទី១៥ ខែមិថុនា នោះទេ។
លោក ត្រាំ បន្ថែមថា លោកបានស្នើឱ្យលោក ពូទីន ជួយសម្រុះសម្រួលជាបន្ទាន់ជម្លោះអ៊ីរ៉ង់ និងអ៊ីស្រាអែល។
ប៉ុន្តែប្រធានាធិបតីបារាំង លោក Emmanuel Macron បានច្រានចោលទាំងស្រុងនូវគំនិតរបស់ប្រធានាធិបតីអាមេរិក ដូណាល់ ត្រាំ ដែលថាមេដឹកនាំរុស្ស៊ី វ្ល៉ាឌីមៀ ពូទីន អាចចូលខ្លួនធ្វើជាអ្នកសម្រុះសម្រួលក្នុងជម្លោះដែលកំពុងកើនឡើងរវាងអ៊ីស្រាអែល និងអ៊ីរ៉ង់ ជុំវិញកម្មវិធីអាវុធនុយក្លេអ៊ែរ។
លោក Macron បាននិយាយថា លោកមិនជឿថា ប្រទេសរុស្ស៊ី ដែលឥឡូវនេះកំពុងជាប់ពាក់ព័ន្ធក្នុងជម្លោះដ៏ខ្លាំងក្លាមួយ និងមិនបានគោរពធម្មនុញ្ញអង្គការសហប្រជាជាតិអស់រយៈពេលជាច្រើនឆ្នាំមកនេះ អាចក្លាយជាអ្នកសម្រុះសម្រួលនោះទេ។ ទន្ទឹមនោះ លោក Macron ក៏បញ្ជាក់យ៉ាងច្បាស់ដែរថា បារាំងមិនបានចូលដៃចូលជើងជាមួយអ៊ីស្រាអែល ជុំវិញប្រតិបត្តិការយោធាប្រឆាំងនឹងអ៊ីរ៉ង់ កាលពីសប្ដាហ៍មុនឡើយ។
យ៉ាងណា មេដឹកនាំអ៊ីស្រាអែល នាយករដ្ឋមន្ត្រីលោក Netanyahu សច្ចាវាយឱ្យដួលរលំរបបផ្ដាច់ការមានអាយុ ៤៤ឆ្នាំនៅក្រោមការដឹកនាំរបស់កំពូលបុរសផ្ដាច់ការ អាយ៉ាតុឡាខេមេនី។
លោក Netanyahu ក៏បានអំពាវនាវឱ្យប្រជាជនអ៊ីរ៉ង់ ត្រូវងើបឡើងបញ្ចប់របបផ្ដាច់ការនិយមនៅប្រទេសអ៊ីរ៉ង់៕
© 2025, ឌឹ ខេមបូឌា ដេលី. All rights reserved.