នាយករដ្ឋមន្ត្រីខ្មែរ លោក ហ៊ុន ម៉ាណែត លើកឡើងថា ទាល់តែខ្មែរមានស្មារតីសាមគ្គីជាតិ ឯកភាពជាតិ ទើបធ្វើឱ្យប្រទេសកម្ពុជាខ្លាំងក្នុងការប្ដូរផ្ដាច់ការពារទឹកដី និងអធិបតេយ្យភាពជាតិពីការឈ្លានពានរបស់បរទេសជិតខាង។
លោក ហ៊ុន ម៉ាណែត ថ្លែងក្នុងពិធីបិទកិច្ចប្រជុំគណៈកម្មាធិការកណ្ដាលសហភាពសហព័ន្ធយុវជនកម្ពុជា (ស.ស.យ.ក.) នៅថ្ងៃទី២៣ ខែមិថុនា ឆ្នាំ២០២៥ នេះថា ស្មារតីជាតិនិយម និងស្មារតីស្នេហាជាតិ គឺជាស្មារតីត្រឹមត្រូវ និងពិតប្រាកដរបស់ប្រជាជនកម្ពុជា ដែលមិនមានអ្នកណាអាចបំបែកបំបាក់ស្មារតីទាំងនេះបានឡើយ ទោះបីជាកម្ពុជាជាប្រទេសតូចក៏ដោយ។
លោក ហ៊ុន ម៉ាណែត អះអាងថា រាជរដ្ឋាភិបាលកម្ពុជាមិនបានបំផុសចលនាជាតិនិយមឡើយ ប៉ុន្តែប្រជាជនកម្ពុជាមានចលនាជាតិនិយមដោយខ្លួនឯង ដើម្បីចូលរួមការពារជាតិ និងបូរណភាពទឹកដីរបស់ខ្លួន ហើយក្នុងកាលៈទេសៈនេះ ប្រជាជនកម្ពុជាមានស្មារតីជាតិនិយម និងស្មារតីស្នេហាជាតិខ្ពស់បំផុត។
នាយករដ្ឋមន្ត្រីកម្ពុជារូបនេះបញ្ជាក់ថា ក្នុងពេលដែលប្រទេសជាតិរងនូវការឈ្លានពានពីបរទេសជិតខាង ប្រជាជនកម្ពុជាបានបង្ហាញពីស្មារតីស្នេហាជាតិ និងសាមគ្គីភាពជាតិ ក្នុងការគាំទ្ររាជរដ្ឋាភិបាល និងកងទ័ពកម្ពុជា ដែលកំពុងការពារអធិបតេយ្យ បូរណភាពទឹកដី និងកិត្តិយសជាតិនាពេលនេះ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៣ មិថុនា នេះថា សាមគ្គីជាតិពិតប្រាកដមិនមែនគ្រាន់តែយករូបភាពអ្នកគាំទ្រគណបក្សប្រជាជនកម្ពុជា ដែលគាំទ្ររដ្ឋាភិបាលជុំវិញជម្លោះព្រំដែនកម្ពុជា-ថៃ ធ្វើជាសំអាងដើម្បីបង្ហាញពលរដ្ឋខ្មែរថាកម្ពុជាមានសាមគ្គីភាពនោះទេ ប៉ុន្តែផ្សះផ្សានយោបាយផ្ទៃក្នុងជាតិឱ្យរឹងមាំពីគ្រប់និន្នាការទាំងអស់ ទើបកម្ពុជាខ្លាំងពិតប្រាកដ។
លោក អ៊ុំ សំអាន លើកឡើងថា ទាល់តែរដ្ឋាភិបាលដោះលែងអ្នកទោសមនសិការទាំងអស់ឱ្យរួចផុតពីការចោទប្រកាន់ដោយអយុត្តិធម៌ នោះទើបជាដំណើរទៅរកសាមគ្គីជាតិ ប៉ុន្តែបើនិន្នាការនយោបាយសម្រាប់បក្សប្រឆាំងនៅតែត្រូវបានរើសអើង នោះសាមគ្គីជាតិពិតប្រាកដក៏មិនអាចកើតមានដែរ។
មន្ត្រីបក្សប្រឆាំងរូបនេះបញ្ជាក់ថា បើកម្ពុជាអាចដើរដល់ដំណាក់កាលផ្សះផ្សានយោបាយ បង្រួបបង្រួមជាតិ និងឯកភាពជាតិតែមួយ នោះទើបបរទេសខាងក្រៅមិនហ៊ានឈ្លានពានទឹកដីកម្ពុជា។ ផ្ទុយទៅវិញ បើរដ្ឋាភិបាលនៅតែធ្វើទុក្ខបុកម្នេញអ្នកដែលមាននិន្នាការនយោបាយផ្ទុយពីខ្លួន នោះបរទេសជិតខាងនៅតែមើលស្រាលកម្ពុជាដដែល៕
© 2025, ឌឹ ខេមបូឌា ដេលី. All rights reserved.