មេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីរុស្ស៊ី លោក វ៉្លាឌីមៀ ពូទីន ត្រូវបានគេមើលឃើញថា មេដឹកនាំផ្ដាច់ការទាំងពីរនេះបានចាប់ដៃលោក ស៊ី ជីនពីង ប្រធានាធិបតីចិន ជាបន្តបន្ទាប់គ្នា។
ទាំងប្រទេសចិន និងកូរ៉េខាងជើង ជារដ្ឋកុម្មុយនីស្តផ្ដាច់ការ។ ចំណែករុស្ស៊ី ជាប្រទេសផ្ដាច់ការនិយមបែបកុម្មុយនីស្ត។
ការបង្ហាញមិត្តភាពជាសាធារណៈរវាងមេដឹកនាំទាំងបីនេះ ជាមោទនភាពការទូតដ៏មានអត្ថន័យសំខាន់សម្រាប់ទីក្រុងប៉េកាំង ជាការបញ្ជូនសាររឹងមាំទៅកាន់លោកខាងលិច។ ក្នុងព្រឹត្តិការណ៍មិនធ្លាប់មានពីមុន លោក ស៊ី ជីនពីង បានដើរទៅលើកម្រាលព្រំក្រហម ហើយចាប់ដៃជាមួយលោក ពូទីន នៅខាងស្ដាំ និងលោក គីម នៅខាងឆ្វេង ដែលជាការបង្ហាញនូវនិមិត្តសញ្ញានៃមិត្តភាពដ៏ស៊ីជម្រៅទាំងបីប្រទេសនេះ។
ព្រឹត្តិការណ៍ដែលមានរយៈពេលប្រមាណ ៩០នាទីនេះ ត្រូវបានរៀបចំដើម្បីរលឹកខួប ៨០ឆ្នាំនៃការបញ្ចប់សង្គ្រាមលោកលើកទីពីរ នៅថ្ងៃពុធ ទី៣ ខែកញ្ញា នេះ នៅទីក្រុងប៉េកាំង តែជាមួយគ្នានេះក៏ជាព្រឹត្តិការណ៍ដើម្បីបង្ហាញសមត្ថភាពកងទ័ព និងសព្វាវុធរបស់ចិន ហើយក៏ជាការប្រមូលផ្ដុំសម្ព័ន្ធមិត្តប្រឆាំងលោកខាងលិចដែរ។
ក្នុងសុន្ទរកថាបើកក្បួនព្យុហយាត្រាកងទ័ព លោក ស៊ី បានព្រមានថា ពិភពលោកនៅតែប្រឈមមុខនឹងជម្រើសនៃសន្តិភាព ឬសង្គ្រាម។
ការបង្ហាញព្រឹត្តិការណ៍ដ៏អស្ចារ្យនេះ បាននាំឲ្យមានប្រតិកម្មខ្លាំងពីប្រធានាធិបតីអាមេរិក លោក ដូណាល់ ត្រាំ (Donald Trump) ដែលបានចោទប្រកាន់ថាមេដឹកនាំទាំងបីប្រទេសនេះថាកំពុងរៀបចំផែនការប្រឆាំងនឹងសហរដ្ឋអាមេរិក។ នៅលើបណ្ដាញសង្គម Truth Social លោក ត្រាំ បានសរសេរដោយប្រើភាសាក្នុងន័យរិះគន់ថា៖ «សូមថ្លែងអំណរគុណយ៉ាងកក់ក្តៅចំពោះលោក វ៉្លាឌីមៀ ពូទីន និងលោក គីម ជុងអ៊ុន ដែលអ្នកទាំងពីរកំពុងឃុបឃិតគ្នាជាមួយចិន ប្រឆាំងនឹងសហរដ្ឋអាមេរិក។»
ការបង្ហាញនូវក្បួនព្យុហយាត្រាជាមួយនឹងសព្វាវុធយោធា បានជំរុញឱ្យប្រជាជនចិន រលឹកដល់ប្រវត្តិសាស្ត្រជាតិចិន ដ៏រឹងមាំ។
នៅក្នុងព្រឹត្តិការណ៍បង្ហាញកម្លាំងយោធាទ្រង់ទ្រាយធំនៅទីក្រុងប៉េកាំង ប្រធានាធិបតី ស៊ី ជីនពីង បានត្រួតពិនិត្យកងទ័ព និងគ្រឿងសព្វាវុធជាច្រើនពីលើរថយន្ត limousine បើកដំបូលចំហ ដែលបានធ្វើដំណើរចុះលើវិថីដ៏ធំមួយ មុនពេលត្រឡប់ទៅចូលរួមជាមួយភ្ញៀវរបស់លោកនៅក្នុងកន្លែងអង្គុយនៅលើវេទិកា ដែលស្ថិតនៅក្បែររូបសំណាកអតីតមេដឹកនាំចិន ម៉ៅ សេទុង នៅលើទីលាន Tiananmen ដែលជាច្រកទ្វារដែលមានន័យសំខាន់ជាប្រវត្តិសាស្ត្រនៅក្នុងទីក្រុងប៉េកាំង។
កងទ័ព រថក្រោះ ប្រព័ន្ធមីស៊ីល និងអាវុធធុនធ្ងន់យុទ្ធសាស្ត្ររបស់ចិន ត្រូវបានបង្ហាញឲ្យឥស្សរជនទស្សនា ដោយមានទាហាន និងស្ត្រីរាប់ពាន់នាក់ដើរតាមជាជួរៗ និងបង្ហាញទំនៀមទម្លាប់យោធាក្នុងរូបភាពល្អឥតខ្ចោះ។
កងទាហានដែលបានសម្ដែងលោតចូល និងចេញពីយានជំនិះ និងយន្តហោះចម្បាំងផ្សេងៗ ត្រូវបានប្រព័ន្ធផ្សព្វផ្សាយធ្វើការផ្សាយបន្តផ្ទាល់សម្រាប់ប្រជាជននានាបានទស្សនា។
ប្រជាជនទីក្រុងប៉េកាំង បានចេញមើលទិដ្ឋភាពបង្ហាញនេះ ហើយការបង្ហាញយន្តហោះ និងឧទ្ធម្ភាគចក្រជាច្រើន បានជំរុញឲ្យអារម្មណ៍ប្រជាជនទាំងនោះនឹកឃើញពីអនុស្សាវរីយ៍ប្រវត្តិសាស្ត្រជាតិ និងភាពរឹងមាំរបស់ប្រជាជនជាលើកដំបូង ចាប់តាំងពីសង្គ្រាមលោកលើកទីពីរ បានបិទបញ្ចប់នៅខែកញ្ញា ឆ្នាំ១៩៤៥។
ការបង្ហាញនេះ ក៏មានន័យយ៉ាងសំខាន់ផងដែរទៅលើប្រវត្តិសាស្ត្រជាតិចិន ពីព្រោះប្រជាជនចិន រាប់លាននាក់ បានស្លាប់ក្នុងសង្គ្រាមជាមួយអធិរាជជប៉ុន ក្នុងទសវត្សរ៍ឆ្នាំ១៩៣០ និងឆ្នាំ១៩៤០ ដែលពាក់ព័ន្ធនឹងសង្គ្រាមពិភពលោក បន្ទាប់ពីជប៉ុន បើកការវាយប្រហារលើកំពង់ផែ Pearl Harbor ក្នុងឆ្នាំ១៩៤១។
សប្តាហ៍ដ៏មានអត្ថន័យទូលំទូលាយរបស់ចិន បានបង្ហាញពីការរួបរួមនយោបាយរវាងមេដឹកនាំកុម្មុយនីស្តទាំងបីរូប គឺរុស្ស៊ី ចិន និងកូរ៉េខាងជើង ជាមួយនឹងការរំលឹកពីប្រវត្តិសាស្ត្រដ៏រឹងមាំរបស់ចិន។
នៅក្នុងព្រឹត្តិការណ៍នៃការបង្ហាញកម្លាំងយោធានៅទីក្រុងប៉េកាំង ការផ្សាយព័ត៌មានអំពីរូបភាព និងកិច្ចសន្ទនាវាងប្រធានាធិបតីចិន ស៊ី ជីនពីង ប្រធានាធិបតីរុស្ស៊ី វ៉្លាឌីមៀ ពូទីន និងមេដឹកនាំកូរ៉េខាងជើង គីម ជុងអ៊ុន ត្រូវបានគ្រប់គ្រងយ៉ាងម៉ត់ចត់ ដោយប្រព័ន្ធផ្សព្វផ្សាយរដ្ឋចិន បង្ហាញតែរូបភាពជាផ្លូវការ និងការរួបរួមគ្នារវាងមេដឹកនាំទាំងបីរូប ខណៈដែលអ្នកកាសែតបរទេសត្រូវបានអនុញ្ញាតឱ្យឈរពីចម្ងាយ ហើយមិនអាចថតរូប ឬថតវីដេអូរបស់មេដឹកនាំបាននោះទេ។
ព្រឹត្តិការណ៍នេះក្លាយជាចំណុចសំខាន់សម្រាប់លោក ស៊ី ក្នុងវេទិកានៃអង្គការសហប្រតិបត្តិការសៀងហៃ SCO នៅទីក្រុង Tianjin ដែលបង្ហាញអំណាចនយោបាយសម្ព័ន្ធភាព រួមទាំងប្រធានាធិបតីបេឡារុស្ស លោក Alexander Lukashenko និងប្រធានាធិបតីកូរ៉េខាងជើង លោក គីម ជុងអ៊ុន ដែលជាលើកដំបូងរបស់លោកក្នុងជំនួបជាមួយលោក ស៊ី និងលោក ពូទីន នៅក្នុងព្រឹត្តិការណ៍រៀបចំដោយប្រទេសចិន។
ទោះបីជាយ៉ាងណា មេដឹកនាំសំខាន់ៗពីប្រទេសលោកខាងលិច មិនត្រូវបានអញ្ជើញឱ្យចូលរួមក្នុងព្រឹត្តិការណ៍នេះទេ ហើយទំនាក់ទំនងអន្តរជាតិសំខាន់ៗត្រូវបានគ្រប់គ្រងយ៉ាងម៉ត់ចត់ និងមានសន្តិសុខរឹតបន្តឹងពីការបិទផ្លូវនៅពាសពេញទីក្រុងប៉េកាំង និងទីក្រុង Tianjin។
ការបង្ហាញនេះ ផ្ដោតលើភាពរួបរួមអំណាចនយោបាយរបស់ចិន និងភាពជាដៃគូរបស់លោក គីម ជុងអ៊ុន ជាមួយលោក ស៊ី និងលោក ពូទីន ដែលបង្ហាញថា កូរ៉េខាងជើងមានមិត្តដ៏មានឥទ្ធិពលនៅក្នុងតំបន់។
លោក Lam Peng Er អ្នកស្រាវជ្រាវនៃវិទ្យាស្ថានអាស៊ីបូព៌ា នៅសាកលវិទ្យាល័យជាតិសិង្ហបុរី យល់ថា ដំណើរទស្សនកិច្ចរបស់លោក គីម ជុងអ៊ុន នៅប៉េកាំង ក្នុងព្រឹត្តិការណ៍ដ៏សំខាន់នេះ បង្ហាញថាគាត់មានមិត្តចិន និងរុស្ស៊ី ដ៏មានឥទ្ធិពល និងគោរពគាត់ ខណៈដែលលោក ស៊ី ក៏បង្ហាញថាលោកអាចកោះប្រជុំជាមួយមេដឹកនាំប្រទេសមានអំណាច និងឥទ្ធិពលនយោបាយ ក្នុងនោះមានទាំងលោក គីម ជុងអ៊ុន និងលោក ពូទីន រួមគ្នាមកជួបលោក៕
© 2025, ឌឹ ខេមបូឌា ដេលី. All rights reserved.