ប្រភពព័ត៌មានពីប្រទេសលោកខាងលិច បានឱ្យដឹងថា អនុប្រធានគណៈកម្មាធិការយោធាមជ្ឈិមបក្សនៃបក្សកុម្មុយនីស្តចិន ឧត្ដមសេនីយ៍ Zhang Yuxia និងសមាជិកម្នាក់ទៀតក្នុងគណៈកម្មាធិការយោធាមជ្ឈិម គឺឧត្ដមសេនីយ៍ Liu Zhenli ត្រូវបានចោទថាបានបញ្ជូនកងទ័ពមួយក្រុមក្នុងចំនួន ១០០នាក់ ឬច្រើនជាងនេះ ទៅកាន់សណ្ឋាគារ Yingxi របស់រដ្ឋាភិបាលដែលស្ថិតនៅភាគខាងលិចនៃទីក្រុងប៉េកាំង ដែលនៅទីនោះ ក្រុមកម្លាំងបះបោរមានផែនការចាប់ខ្លួនលោកប្រធានាធិបតី ស៊ី ជីនពីង ដែលគេថាប៉ុនប៉ងធ្វើរដ្ឋប្រហារ។
ទោះជាយ៉ាងណាក្ដី ផែនការផ្តួលរំលំលោក ស៊ី និងការបាញ់ប្រហារគ្នានៅទីក្រុងប៉េកាំង បានផ្ទុះឡើងកាលពីល្ងាចថ្ងៃទី១៨ ខែមករា ឆ្នាំ២០២៦ គឺជាផែនការធ្វើរដ្ឋប្រហារទម្លាក់លោក ស៊ី ខណៈដែលលោក ស៊ី កំពុងស្នាក់នៅសណ្ឋាគារ Jingxi ដែលស្ថិតនៅភាគខាងលិចទីក្រុងប៉េកាំង ប៉ុន្តែជាអកុសល ផែនការនេះត្រូវបានលេចធ្លាយប្រហែលពីរ ឬបីម៉ោងមុនពេលកម្លាំងរដ្ឋប្រហារចាប់ផ្ដើមធ្វើសកម្មភាពចាប់ខ្លួនលោក ស៊ី ជីនពីង។
ដោយទទួលបានព័ត៌មានសម្ងាត់ភ្លាម លោក ស៊ី បានចាកចេញពីសណ្ឋាគារ Jingxi ហើយបានបើកការវាយប្រហារតបតដោយសម្ងាត់ដើម្បីចាប់ខ្លួនលោក Zhang Youxia និង Liu Zhenli ដែលអ្នកទាំងពីរអាចមិនដឹងថាផែនការនេះត្រូវបានបែកធ្លាយទៅដល់ដៃលោក ស៊ី។
លោក ស៊ី ក៏បានបញ្ជាទៅកាន់ឧត្ដមសេនីយ៍ Chao Yi ប្រធានការិយាល័យកងសន្តិសុខបក្សកុម្មុយនីស្តចិន ឱ្យបើកការវាយឆ្មក់ទៅលើកងកម្លាំងរបស់ឧត្ដមសេនីយ៍ Zhang Yuxia និងលោក Liu Zhenli។
នៅពេលដែលកម្លាំងទាំងពីរប៉ះទង្គិចគ្នានៅសណ្ឋាគារ Jingxi នៅខណៈនោះការបាញ់ប្រហារមួយបានផ្ទុះឡើងរវាងកងកម្លាំងរបស់ឧត្ដមសេនីយ៍ Zhang Youxia និងកងអង្គភាពសន្តិសុខដែលស្មោះត្រង់នឹងលោក ស៊ី ជីនពីង។
យោងតាមប្រភពព័ត៌មាន អង្គរក្សជិតស្និទ្ធរបស់លោក ស៊ី ចំនួនប្រាំបួននាក់ត្រូវបានស្លាប់ ហើយជាមួយគ្នានេះ កងអង្គរក្សរបស់លោក Zhang Youxia រាប់សិបនាក់ ក៏ត្រូវបានបាញ់ស្លាប់ដែរ។
បន្ទាប់ពីរត់គេចពីការវាយប្រហារ លោក ស៊ី ជីនពីង បានបញ្ជាឱ្យចាប់ខ្លួនលោក Zhang Youxia និងលោក Liu Zhenli ភ្លាមៗ រួមទាំងអ្នកពាក់ព័ន្ធជាច្រើនទៀត។
នៅទូទាំងប្រទេសចិន ត្រូវបានគេដឹងថា កងទ័ពបះបោរក្រោមបង្គាប់ឧត្ដមសេនីយ៍ Zhang Yuxia នេះ ត្រូវបានហាមឃាត់ខ្លួន និងមន្ត្រីពាក់ព័ន្ធត្រូវបានឃុំខ្លួនក្នុងមន្ទីរឃុំឃាំង។
ព្រឹត្តិការណ៍នេះត្រូវបានគេចាត់ទុកថាជារដ្ឋប្រហារដែលត្រូវបានគេបង្ហោះពាសពេញបណ្ដាញអ៊ីនធឺណិតក្នុងរយៈពេលប៉ុន្មានម៉ោងមកនេះ។
ប្រសិនបើរឿងនេះគឺជាការពិត វានឹងក្លាយជារឿងអាស្រូវយោធាគួរឱ្យអាម៉ាស់បំផុតចាប់តាំងពីការស្លាប់នៃមេបញ្ជាការកងទ័ពរបស់ប្រធាន ម៉ៅ សេទុង គឺឧត្ដមសេនីយ៍ Lin Biao ក្នុងឆ្នាំ១៩៧២ បន្ទាប់ពីបានប៉ុនប៉ងធ្វើឃាតសមមិត្ត ម៉ៅ សេទុង មិនបានសម្រេច។
ដោយមិនបញ្ជាក់យ៉ាងច្បាស់លាស់ពីការប៉ុនប៉ងធ្វើរដ្ឋប្រហារ ឬយ៉ាងណា ប្រព័ន្ធផ្សព្វផ្សាយរដ្ឋចិន បានឱ្យដឹងថា ឧត្ដមសេនីយ៍ Zhang Yuxia និងសមាជិកម្នាក់ទៀតនៃគណៈកម្មការយោធាកណ្តាល គឺលោក Liu Zhenli ត្រូវបានចាប់ខ្លួនពីបទរំលោភវិន័យ និងបំពានច្បាប់សន្តិសុខជាតិយ៉ាងធ្ងន់ធ្ងរ។
ប្រទេសចិន ត្រូវបានគេដឹងថាកំពុងជួបប្រទះនូវបញ្ហាអំពើពុករលួយនៅពេលដែលលោក ស៊ី ជីនពីង ឡើងកាន់អំណាច។ ទោះយ៉ាងណា លោក ស៊ី ខ្លួនលោកផ្ទាល់ក៏ត្រូវបានចោទប្រកាន់ថាបានប្រើយុទ្ធនាការប្រឆាំងអំពើពុករលួយ ដើម្បីបង្កើនអំណាចផ្ទាល់ខ្លួន និងកម្ទេចគូប្រជែងដែលមានឥទ្ធិពល។
កន្លងមក មន្ត្រីជាន់ខ្ពស់ក្នុងជួរបក្សកុម្មុយនីស្ត រួមទាំងរដ្ឋមន្ត្រីការពារជាតិ នាយករដ្ឋមន្ត្រី ត្រូវបានដកហូតតំណែង ដែលគេថាសុទ្ធតែជាការកម្ចាត់គូប្រជែងនយោបាយ ឬមន្ត្រីរដ្ឋាភិបាលណាដែលមិនបង្ហាញភាពស្មោះត្រង់ពេញលេញចំពោះលោក ស៊ី។ ព្រឹត្តិការណ៍នេះបង្ហាញថា ការត្រួតពិនិត្យអំណាច និងការគ្រប់គ្រងយុទ្ធសាស្ត្រប្រឆាំងអំពើពុករលួយ កំពុងក្លាយជាឧបករណ៍នយោបាយដ៏មានឥទ្ធិពលដើម្បីរក្សាអំណាចកំពូលរបស់លោក ស៊ី សម្រាប់ច្រើនឆ្នាំទៅមុខទៀត។
ជាមួយគ្នានេះ បើយោងតាមសេចក្តីរាយការណ៍ព័ត៌មានក្នុងកាសែតអាមេរិកាំង The Wall Street Journal ឧត្ដមសេនីយ៍កំពូលនៃប្រទេសចិន ទាំងពីររូប ត្រូវបានចាប់ខ្លួនបានហើយ។ ពួកគាត់ក៏ត្រូវបានចោទប្រកាន់ពីបទលេចធ្លាយអាថ៌កំបាំងនុយក្លេអ៊ែរទៅសហរដ្ឋអាមេរិក។
ក្រសួងការពារជាតិប្រទេសចិន កំពុងប្រឈមមុខនឹងការត្រួតពិនិត្យឡើងវិញ បន្ទាប់ពីមានសេចក្តីរាយការណ៍ថាមន្ត្រីយោធាជាន់ខ្ពស់ពីររូបនេះកំពុងស្ថិតក្រោមការស៊ើបអង្កេតលើការចោទប្រកាន់ពីបទ ផ្តល់ព័ត៌មានអំពីអាវុធនុយក្លេអ៊ែរដល់សហរដ្ឋអាមេរិក។ ឧត្ដមសេនីយ៍ទាំងពីររូប អាចប្រឈមមុខនឹងទោសក្បត់ជាតិ ប្រសិនមានកំហុសដូចការចោទប្រកាន់មែននោះ៕
© 2026, ឌឹ ខេមបូឌា ដេលី. All rights reserved.