ក្រុមសង្គមស៊ីវិលជិត ៣០ស្ថាប័ន ស្នើឱ្យរដ្ឋាភិបាលពិចារណាដំឡើងប្រាក់ឈ្នួលអប្បបរមា ២៣២ដុល្លារអាមេរិកសម្រាប់ឆ្នាំ២០២៦ ដោយសារប្រាក់ឈ្នួលបច្ចុប្បន្នមានកម្រិតទាប និងមិនគ្រប់គ្រាន់សម្រាប់ការចំណាយប្រចាំថ្ងៃរបស់កម្មករ។
យោងតាមសេចក្តីថ្លែងការណ៍រួមចុះថ្ងៃទី២ ខែកញ្ញា ឆ្នាំ២០២៥ ក្រុមសង្គមស៊ីវិលចំនួន ២៧ស្ថាប័នបានស្នើឱ្យរដ្ឋាភិបាលដំឡើងប្រាក់ឈ្នួលអប្បបរមាដល់ ២៣២ដុល្លារក្នុង ១ខែសម្រាប់កម្មករក្នុងវិស័យកាត់ដេរ ផលិតផលស្បែកជើង និងផលិតផលធ្វើដំណើរ។ ពួកគេអះអាងថា ប្រាក់ឈ្នួលដែលមានចំនួនតែ ២០៨ដុល្លារនាពេលបច្ចុប្បន្នមានកម្រិតទាប និងមិនគ្រប់គ្រាន់សម្រាប់ការចំណាយប្រចាំថ្ងៃ។
សេចក្តីថ្លែងការណ៍ដដែល បានឱ្យដឹងទៀតថា គម្លាតរវាងប្រាក់ឈ្នួល និងការចំណាយនេះ បន្តរុញច្រានកម្មករនិយោជិតឱ្យកាន់តែធ្លាក់ក្នុងបំណុល និងភាពក្រីក្រ និងបង្ខំឱ្យពួកគេកាត់បន្ថយការចំណាយលើថ្លៃអាហារ ការថែទាំសុខភាព និងការអប់រំ។
ប្រភពដដែលអះអាងថា ជារឿងពុំសមទំនងឡើយនៅពេលកម្មករនិយោជិតដែលជាឆ្អឹងខ្នងសេដ្ឋកិច្ចរបស់ជាតិ ពុំទទួលបាននូវស្ថានភាពរស់នៅប្រកបដោយសេចក្តីថ្លៃថ្នូរ ក្នុងពេលដែលវិស័យនេះបន្តទាក់ទាញការវិនិយោគអន្តរជាតិ និងផ្តល់ប្រាក់ចំណេញច្រើនដល់ក្រុមហ៊ុនម៉ាកយីហោ និងនិយោជក។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា បានប្រាប់ក្រុមអ្នកសារព័ត៌មានថា ក្រសួងនឹងចាត់ចែងឱ្យតំណាងភាគីកម្មករ និងថៅកែលើកយកតួលេខប្រាក់ឈ្នួលរៀងៗខ្លួន រួចផ្គូផ្គងតួលេខទាំងនោះដើម្បីកំណត់យកចំនួនជាក់ស្តែងដែលអាចចរចាបាន។
សហជីព និងអង្គការទាំងនោះ លើកឡើងពីរបាយការណ៍ស្រាវជ្រាវរបស់សម្ព័ន្ធប្រាក់ឈ្នួលអាស៊ី ចេញផ្សាយក្នុងឆ្នាំ២០២៤ បង្ហាញថា កម្មករនិយោជិតចំណាយប្រចាំខែជាមធ្យមចំនួន ៤០៨ដុល្លារលើអាហារ និងក្រៅពីអាហារ ដែលស្ទើរតែទ្វេដងនៃប្រាក់ចំណូលជាមធ្យមរបស់កម្មករដែលមានត្រឹមតែចំនួន ២៥០ដុល្លារ។
វិទ្យាស្ថានស្រាវជ្រាវ Anker បានធ្វើការប៉ាន់ប្រមាណក្នុងឆ្នាំ២០២៤ ថា កម្មករនិយោជិតម្នាក់ដែលរស់នៅក្នុងគ្រួសារនៅតំបន់នានានៃប្រទេសកម្ពុជា ត្រូវទទួលបានប្រាក់ចំណូលចំនួន ២៣២ដុល្លារ ចំណែកកម្មករនិយោជិតក្នុងគ្រួសាររស់នៅទីប្រជុំជន ត្រូវទទួលបានប្រាក់ចំណូលចំនួន ៤១៧ដុល្លារក្នុងមួយខែ ទើបគ្រប់គ្រាន់សម្រាប់ការចំណាយលើការរស់នៅក្នុងជីវភាពសមរម្យ និងលើតម្រូវការសំខាន់ផ្សេងៗទៀត ក្នុងនោះរួមទាំងរបបសន្តិសុខសង្គម។
ប្រាក់ឈ្នួលអប្បបរមាសម្រាប់ឆ្នាំ២០២៥ ត្រូវបានក្រុមប្រឹក្សាជាតិប្រាក់ឈ្នួលអប្បបរមាកំណត់ត្រឹម ២០៦ដុល្លារ ចាប់ពីថ្ងៃទី១ ខែមករា ឆ្នាំ២០២៥។ តែក្រោយមក នាយករដ្ឋមន្ត្រីកម្ពុជា លោក ហ៊ុន ម៉ាណែត បានប្រកាសផ្តល់ ២ដុល្លារបន្ថែមទៀត ធ្វើឱ្យប្រាក់ឈ្នួលសរុបកើនឡើងដល់ចំនួន ២០៨ដុល្លារសម្រាប់កម្មករម្នាក់ៗ៕
© 2025, ឌឹ ខេមបូឌា ដេលី. All rights reserved.