ក្រុមយុវជននៃចលនា GenZ នៅលើដែនកោះនៃប្រទេស Madagascar កំពុងប្រែក្លាយបាតុកម្មទៅទាញទម្លាក់ប្រធានាធិបតី Andry Rajoelina ពីតំណែង ក្រោយពីបានជោគជ័យនៃការរុញទម្លាក់នាយករដ្ឋមន្ត្រី Christian Ntsay។
កាលពីថ្ងៃចន្ទ ទី៦ ខែតុលា លោកប្រធានាធិបតី Andry Rajoelina បានតែងតាំងឧត្ដមសេនីយ៍ Ruphin Fortunat Zafisambo ជានាយករដ្ឋមន្ត្រីស្តីទី ជំនួសលោក Christian Ntsay ដែលត្រូវបានបណ្ដេញចេញពីតំណែងតាមគំនាបរបស់បាតុករនៃចលនា GenZ។ តែនៅថ្ងៃអង្គារ ទី៧ ខែតុលា នេះ បាតុករនៃចលនា GenZ ដែលចម្លងពីប្រទេសនេប៉ាល់ បានដាក់ចុះផែនការរបស់ខ្លួនមួយដំណាក់កាលទៀត គឺទម្លាក់លោក Andry Rajoelina ពីតំណែងប្រធានាធិបតី។
បើតាមការចុះផ្សាយដោយសារព័ត៌មាន Strait News Global និងទីភ្នាក់ងារសារព័ត៌មាន Reuters បាតុកម្មនៃចលនា GenZ បានកំពុងផ្ទុះខ្លាំងពាសពេញប្រទេសដែនកោះ Madagasca ខណៈលោកប្រធានាធិបតី Andry Rajoelina បានបញ្ជូនសារភ្លាមឱ្យក្រុមចលនា GenZ មកកាន់តុចរចា ដើម្បីកែលម្អស្ថានការណ៍ និងរកដំណោះស្រាយរួមគ្នា ដើម្បីស្ដារសន្តិសុខប្រទេស និងស្ដារនីតិរដ្ឋមួយដែលមានទំនុកចិត្តដល់ប្រជាជនដែនកោះ Madagasca ជាង ៣១លាននាក់នេះ។
Madagasca មានឈ្មោះជាផ្លូវការថា សាធារណរដ្ឋ Madagasca គឺជាប្រទេសដែនកោះមួយស្ថិតនៅក្នុងមហាសមុទ្រឥណ្ឌា ដែលមានចម្ងាយប្រមាណ ៤០០គីឡូម៉ែត្រពីឆ្នេរសមុទ្រនៃតំបន់អាហ្វ្រិកខាងកើត។ ដែនកោះនេះមានក្រឡាផ្ទៃសរុបជាង ៥ម៉ឺន ៩ពាន់គីឡូម៉ែត្រការ៉េ។ Madagasca គឺជាប្រទេសដែនកោះធំជាងគេទី៤ នៅលើពិភពលោក តែជាប្រទេសក្រីក្រ និងពោរពេញដោយអំពើពុករលួយតាំងពីមន្ត្រីថ្នាក់លើដល់ថ្នាក់មូលដ្ឋានឃុំ-សង្កាត់។
ដោយសារតែភាពក្រីក្រ និងអំពើពុករលួយមិនអាចកាត់បន្ថយបាន ដែលនាំឱ្យមានការងើបឡើងបះបោរផ្ដួលមេដឹកនាំ។
អំពើបះបោរកាន់តែខ្លាំងនៅទូទាំងប្រទេស ជាពិសេសនៅរដ្ឋធានី Antananarivo បន្ទាប់ពីអាជ្ញាធរបាញ់បង្ក្រាបបាតុករ ២២នាក់ និងចាប់ខ្លួនបាតុករជាង ១០០នាក់ តែប៉ូលិសនៅទីក្រុង Antananarivo បានច្រានចោល ដោយចោទថាបាតុករកំពុងប្រើលេសបញ្ចប់ទាំងអំណាចរបស់ប្រធានាធិបតី Andry Rajoelina ទើបអស់ចិត្ត។ តែយ៉ាងណា តួលេខនេះគឺជារបាយការណ៍របស់អង្គការសហប្រជាជាតិ។
បាតុកម្មបានផ្ទុះឡើងតាំងពីចុងខែកញ្ញា ដែលជាការបង្ហាញការមិនអាចទទួលយកបាន ការខ្វះទឹកស្អាតប្រើប្រាស់ និងការកាត់បន្ថយបរិមាណនៃការប្រើប្រាស់អគ្គិសនីតាមដងផ្លូវ និងនៅគេហដ្ឋានឯកជន បែរជាភូមិគ្រឹះរបស់ពួកមន្ត្រីជាន់ខ្ពស់ប្រើភ្លើងអគ្គិសនីយ៉ាងព្រោងព្រាត ដែលពួកបាតុករនៃចលនា GenZ ចាត់ទុកថានេះជាអំពើពុករលួយមួយផងដែរនៃសង្គមដ៏អយុត្តិធម៌នៃប្រទេសដែនកោះ Madagasca ដ៏ធំមួយនៅតំបន់សមុទ្រឥណ្ឌា។
នៅថ្ងៃទី៧ តុលា នេះ បាតុករភាគច្រើនសុទ្ធតែនិស្សិត សិស្សសាលា បានកំពុងស្រែកឱ្យមានការរំលាយរដ្ឋាភិបាលភ្លាមៗជាមួយនឹងការទាមទារឱ្យមានប្រធានាធិបតីថ្មីដែលមិនមាននិន្នាការនឹងរដ្ឋាភិបាលពុករលួយ។
ប្រធានាធិបតី Andry Rajoelina បានថ្លែងនៅក្នុងសុន្ទរកថារបស់លោកទៅកាន់ជនរួមជាតិនៃដែនកោះ Madagasca ដោយស្នើឱ្យបាតុករទទួលយកសំណើរបស់លោក ដែលលោកចង់បើកការចរចាជាមួយបាតុករ តែក្រុមបាតុករនៃចលនា GenZ មិនព្រមស្ដាប់នោះទេ។ ពួកបាតុករវ័យក្មេងនៅតែទាមទារឱ្យមានការរំលាយរដ្ឋាភិបាល និងការចុះចេញពីតំណែងរបស់ប្រធានាធិបតី Andry Rajoelina។
ការិយាល័យអ្នកនាំពាក្យប្រធានាធិបតី បានចេញសេចក្ដីថ្លែងការណ៍ថា លោកប្រធានាធិបតី Andry Rajoelina នៅតែទទូចឱ្យបាតុករនៃចលនា GenZ សម្រួលអារម្មណ៍ និងបន្ថយកំហឹង ទើបអាចរកឃើញដំណោះស្រាយ។
តាមការិយាល័យអ្នកនាំពាក្យប្រធានាធិបតី អង្គការសង្គមស៊ីវិលជាច្រើនបានជួបលោកប្រធានាធិបតី Andry Rajoelina ដោយបានប្រឹក្សាគ្នាជាច្រើនម៉ោង តែមិនបានបង្ហាញថាតើដំណោះស្រាយដូចម្ដេច ទើបក្រុមចលនា GenZ អាចទទួលយកបាននោះទេ។
តែបើតាមសេចក្ដីថ្លែងការណ៍របស់អង្គការសង្គមស៊ីវិល ការដោះលែងបាតុករទាំងអស់ដែលអាជ្ញាធរចាប់ខ្លួន គឺជាជម្រើសមួយដែលក្រុមចលនា GenZ អាចសម្រួលជំហរព្រមចរចា។
ក្នុងស្ថានភាពនេះ អ្នកសង្កេតការណ៍យល់ថា ដែនកោះ Madagasca កំពុងទាល់ច្រក ព្រោះបាតុករឈានដល់ការទាមទារទម្លាក់ប្រធានាធិបតីពីអំណាច ក្រោយពីទម្លាក់នាយករដ្ឋមន្ត្រីបានជោគជ័យ ព្រោះថានាយករដ្ឋមន្ត្រីស្ដីទី ឧត្ដមសេនីយ៍ Ruphin Fortunat Zafisambo ដែលទើបត្រូវបានតែងតាំងដោយប្រធានាធិបតី Andry Rajoelina ពុំមានគណៈរដ្ឋមន្ត្រីរបស់ខ្លួននៅឡើយទេ។
តើគណៈរដ្ឋមន្ត្រីថ្មី នឹងបង្កើតបានរូបរាងដូចម្ដេចនឹងកើត បើប្រធានាធិបតីកំពុងតែស្ថិតក្នុងគំនាបឱ្យចុះចេញពីតំណែង?
ផ្លូវដើរតែមួយគត់ គឺនាយករដ្ឋមន្ត្រីស្ដីទីត្រូវពិនិត្យឡើងវិញអំណាចនៃរដ្ឋធម្មនុញ្ញ ថាតើបានចែងឬទេឱ្យនាយករដ្ឋមន្ត្រីស្ដីទីរំលាយសភា ហើយប្រកាសថ្ងៃបោះឆ្នោតសភាឡើងវិញ ដែលជាការលើកទឹកចិត្តបាតុករនៃចលនា GenZ អាចព្រមបញ្ចប់បាតុកម្មរបស់ខ្លួន ជាមួយនឹងការដោះលែងបាតុករទាំងអស់ដែលអាជ្ញាធរចាប់ខ្លួន។
ប៉ុន្តែបើតាមបណ្ដាញផ្សាយព័ត៌មាន BBC ក្រុមបាតុករនៃចលនា GenZ បានកំពុងពង្រីកការតវ៉ារបស់ខ្លួនដោយមិនទទួលស្គាល់ឧត្ដមសេនីយ៍ Ruphin Fortunat Zafisambo ជានាយករដ្ឋមន្ត្រីស្ដីទីនោះទេ។
អ្វីជាការកត់សម្គាល់ ការធ្វើបាតុកម្មរបស់ចលនា GenZ ដែលកំពុងផ្ទុះនៅលើដែនកោះ Madagasca និងបាតុកម្មរបស់ចលនា GenZ ២១២ ដែលកំពុងផ្ទុះនៅពាសពេញប្រទេសម៉ារ៉ុក នៃទ្វីបអាហ្វ្រិកខាងជើង សុទ្ធតែជាចំហាយនៃឥទ្ធិពលនៃចលនា GenZ នេប៉ាល់ ដែលបានទាញទម្លាក់រដ្ឋាភិបាលពុករលួយរបស់នាយករដ្ឋមន្ត្រី Khadga Prasad Sharma Oli ពីអំណាចកាលពីថ្ងៃទី៩ ខែកញ្ញា កន្លងទៅនេះ៕
© 2025, ឌឹ ខេមបូឌា ដេលី. All rights reserved.