អ្នកឃ្លាំមើលសង្គម ស្នើឱ្យតុលាការផ្ដន្ទាទោសក្នុងកម្រិតខ្ពស់បំផុតលើអតីតមន្ត្រីស្នងការដ្ឋាននគរបាលជាតិ លោក ហ៊ុន ហេង ដែលបង្កគ្រោះថ្នាក់ចរាចរណ៍បណ្តាលឲ្យមានមនុស្សស្លាប់ ដើម្បីពង្រឹងការអនុវត្តច្បាប់ឱ្យមានប្រសិទ្ធភាព។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៥ តុលា នេះថា ផ្អែកតាមច្បាប់ចរាចរណ៍ផ្លូវគោក បានចែងថា ជនណាដែលបើកបរបង្កឱ្យស្លាប់ដល់អ្នកដទៃ ត្រូវផ្ដន្ទាទោសដល់កម្រិតអតិបរមា ដូចជា ក្នុងករណីបើកបរស្ថិតក្នុងស្ថានភាពស្រវឹង ជាដើម។
លោក សេក សុជាតិ លើកឡើងថា ច្បាប់នេះបានកំណត់ការផ្ដន្ទាទោសដាក់ពន្ធនាគារពីមួយ (១) ឆ្នាំ ទៅបី (៣) ឆ្នាំ ដូច្នេះករណីលោក ហ៊ុន ហេង គួរតែត្រូវបានអនុវត្តទោសកម្រិតអតិបរមា ដោយសារតែគាត់គឺជាមន្ត្រីអនុវត្តច្បាប់ តែបែរជាប្រព្រឹត្តល្មើសច្បាប់ដោយចេតនាទៅវិញ ព្រោះថាបុគ្គលដែលស្រវឹង ហើយកាន់ដៃចង្កូត គឺស្មើនឹងប្រព្រឹត្តល្មើសច្បាប់រួចទៅហើយ។
អ្នកឃ្លាំមើលសង្គមរូបនេះ អំពាវនាវឱ្យតុលាការអនុវត្តច្បាប់ឱ្យបានត្រឹមត្រូវ ដើម្បីផ្តល់យុត្តិធម៌ដល់ជនរងគ្រោះ និងដើម្បីលើកកម្ពស់ការអនុវត្តច្បាប់ឱ្យមានប្រសិទ្ធភាព។ បន្ថែមពីនេះ ក៏ដើម្បីផ្តល់ទំនុកចិត្តដល់ពលរដ្ឋចំពោះតុលាការ និងរដ្ឋាភិបាលលើប្រព័ន្ធយុត្តិធម៌របស់កម្ពុជាឡើងវិញផងដែរ។
សាលាដំបូងរាជធានីភ្នំពេញ កាលពីថ្ងៃទី១៤ ខែតុលា ឆ្នាំ២០២៥ បានប្រកាសសាលក្រមផ្ដន្ទាទោសលោក ហ៊ុន ហេង ដាក់ពន្ធនាគារកំណត់ ៣ឆ្នាំ តែតម្រូវឲ្យអនុវត្តក្នុងពន្ធនាគារត្រឹមតែ ០១ឆ្នាំប៉ុណ្ណោះ ខណៈទោសនៅសល់ត្រូវបានអនុញ្ញាតឱ្យព្យួរ និងពិន័យជាទឹកប្រាក់ចូលថវិការដ្ឋចំនួន ៤លានរៀលផងដែរ។
ការប្រកាសសាលក្រមនេះ ធ្វើឡើងបន្ទាប់ពីតុលាការបានបើកសវនាការលើសំណុំរឿងលោក ហ៊ុន ហេង កាលពីថ្ងៃទី៨ ខែតុលា នេះ ពីបទបើកបរបង្កគ្រោះថ្នាក់ចរាចរណ៍បណ្តាលឲ្យស្លាប់ និងរបួស។
យ៉ាងណាក៏ដោយ ចៅក្រមជំនុំជម្រះសាលាដំបូងរាជធានីភ្នំពេញ លោក តុប ឈុនសុង និងព្រះរាជអាជ្ញារង តំណាងអយ្យការ លោក លឹម ប៊ុនហេង បញ្ជាក់ថា សាលក្រមនេះបានបើកផ្លូវ និងទុកពេលតាមការកំណត់សម្រាប់ភាគីណាមួយប្តឹងឧទ្ធរណ៍ បើមិនសុខចិត្តចំពោះការកាត់ក្តីនេះ។
កាលពីថ្ងៃទី១៥ ខែឧសភា ឆ្នាំ២០២៥ ប្រធានការិយាល័យភស្តុភារនៃស្នងការដ្ឋាននគរបាលរាជធានីភ្នំពេញ លោក ហ៊ុន ហេង បានបើករថយន្តក្នុងល្បឿនលឿនក្រោមស្ថានភាពស្រវឹង និងបានបុករះទៅលើរ៉ឺម៉កកង់បី (PassUp) ចំនួន ៣គ្រឿង ម៉ូតូ ១គ្រឿង និងរថយន្ត ១គ្រឿងពីខាងក្រោយ ក្នុងខណ្ឌចំការមន ដែលបណ្តាលឱ្យបុរសម្នាក់ស្លាប់នៅនឹងកន្លែង ខណៈមនុស្ស ៥នាក់ផ្សេងទៀតត្រូវរងរបួសធ្ងន់ និងស្រាល។
ជុំវិញករណីនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា បានអះអាងកាលពីថ្ងៃទី១៥ ខែឧសភា ថា អ្នកបើកបរបង្កគ្រោះថ្នាក់បានរកឃើញថាមានកម្រិតអាល់កុល ០,៤៥មិល្លីក្រាមក្នុង ១លីត្រខ្យល់ ប៉ុន្តែនៅព្រឹកថ្ងៃបន្ទាប់ ក្រុមការងារប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានចេញសេចក្តីប្រកាសព័ត៌មានថា ជនបង្កមានជាតិអាល់កុលត្រឹមតែ ០,៣៥មិល្លីក្រាមក្នុង ១លីត្រខ្យល់ប៉ុណ្ណោះ មិនមែន ០,៤៥មិល្លីក្រាមក្នុង ១លីត្រខ្យល់នោះទេ៕
© 2025, ឌឹ ខេមបូឌា ដេលី. All rights reserved.