អ្នកឃ្លាំមើលចាត់ទុកសន្ទស្សន៍ស្ដីពីសេរីភាពសារព័ត៌មានដែលចេញដោយក្រសួងព័ត៌មាន សម្រាប់ឆ្នាំ២០២៥ គឺជាលទ្ធផលមួយជ្រុងសម្រាប់ប្រទេសកម្ពុជា ខ្លួនឯងប៉ុណ្ណោះ ព្រោះសេចក្តីរាយការណ៍នេះនៅមានចន្លោះប្រហោង និងមានលក្ខណៈផ្ទុយគ្នាពីសេចក្តីរាយការណ៍អន្តរជាតិឯករាជ្យដែលគេបានរកឃើញ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣ វិច្ឆិកា ថា ការវាយតម្លៃលើសេរីភាពសារព័ត៌មាននៅប្រទេសកម្ពុជា មិនត្រូវធ្វើឡើងសម្រាប់តែខ្លួនឯងប៉ុណ្ណោះទេ ប៉ុន្តែត្រូវតែជាសេចក្តីរាយការណ៍ដែលផ្តល់ជាមូលដ្ឋានពេញលេញសម្រាប់អន្តរជាតិផងដែរ។
លោក សេក សុជាតិ លើកឡើងថា សម្រាប់ក្រសែភ្នែកអន្តរជាតិក្នុងពេលនេះ ប្រទេសកម្ពុជាបានបាត់បង់នូវស្ថាប័នសារព័ត៌មានឯករាជ្យទាំងស្រុងទៅហើយ ដូច្នេះទោះបីជារាជរដ្ឋាភិបាលអះអាងថាសន្ទស្សន៍ស្ដីពីសេរីភាពសារព័ត៌មានរបស់ខ្លួនមានភាពល្អប្រសើរអស្ចារ្យក៏ដោយ ក៏មជ្ឈដ្ឋានអន្តរជាតិមិនអាចទទួលយកបានដែរ។
អ្នកឃ្លាំមើលសង្គមរូបនេះបញ្ជាក់ថា មុននឹងក្រសួងសាមីចេញផ្សាយសន្ទស្សន៍ស្ដីពីសេរីភាពសារព័ត៌មាន គួរតែពិនិត្យផ្ទៀងផ្ទាត់ជាមួយសេចក្តីរាយការណ៍ពីមជ្ឈដ្ឋានអន្តរជាតិជាមុនសិន ដើម្បីឱ្យសេចក្តីរាយការណ៍របស់ខ្លួនអាចទទួលយកបានពីមជ្ឈដ្ឋានទូទៅ ព្រោះការធ្វើបែបនេះ ក៏ដើម្បីលុបបំបាត់នូវការចោទប្រកាន់ជុំវិញការរឹតត្បិតសេរីភាពសារព័ត៌មានមកលើប្រទេសកម្ពុជាខ្លួនឯងពីសំណាក់រដ្ឋាភិបាលដែរ។
អ្នកនាំពាក្យក្រសួងព័ត៌មាន លោក ទេព អស្នារិទ្ធ បានអះអាងកាលពីថ្ងៃទី២ ខែវិច្ឆិកា ឆ្នាំ២០២៥ នេះថា ស្ថានភាពសេរីភាពសារព័ត៌មាននៅកម្ពុជា ឆ្នាំ២០២៥ មានភាពល្អប្រសើរដែលកើនឡើងដល់ ៨៦% ខណៈឆ្នាំ២០២៤ កន្លងទៅ គឺកើនឡើងត្រឹមតែ ៧៩,៨% ប៉ុណ្ណោះ។
អ្នកនាំពាក្យរូបនេះអះអាងថា អ្នកសារព័ត៌មានជាង ៨៦% បានអះអាងថាខ្លួនមានសេរីភាពពេញលេញក្នុងការប្រកបអាជីពជាអ្នកសារព័ត៌មានដោយមានសុវត្ថិភាព គ្មានការយាយី និងមានបរិយាកាសងាយស្រួលក្នុងការប្រមូលព័ត៌មានពីប្រភពផ្សេងៗសម្រាប់ការផ្សព្វផ្សាយរបស់ខ្លួន។
លោក ទេព អស្នារិទ្ធ បញ្ជាក់ថា រយៈពេល ៨ឆ្នាំចុងក្រោយនេះ មិនមានអ្នកសារព័ត៌មានណាម្នាក់ត្រូវគេសម្លាប់ក្នុងពេលបំពេញការងារប្រកបដោយវិជ្ជាជីវៈក្រមសីលធម៌ជាអ្នកសារព័ត៌មាននោះទេ។
ទោះជាយ៉ាងណាក៏ដោយ ក្នុងទិវាបញ្ចប់និទណ្ឌភាពលើអ្នកសារព័ត៌មានថ្ងៃទី២ ខែវិច្ឆិកា ឆ្នាំ២០២៥ នេះ អង្គការសង្គមស៊ីវិលជាតិ និងអន្តរជាតិចំនួន ១១ស្ថាប័ន បានចេញសេចក្តីថ្លែងការណ៍រួមមួយដោយស្នើឱ្យរាជរដ្ឋាភិបាលចាត់វិធានការជាបន្ទាន់លើឧក្រិដ្ឋកម្មទាំងអស់ដែលប្រឆាំងអ្នកសារព័ត៌មាន និងអ្នកការពារសិទ្ធិមនុស្សនៅប្រទេសកម្ពុជា។
សារព័ត៌មាន The Diplomat កាលពីសប្តាហ៍មុន ផ្សាយអំពីការដាក់ទណ្ឌកម្មលើឧក្រិដ្ឋជនធ្វើសកម្មភាពឆបោកក្នុងប្រទេសកម្ពុជា ថារាជរដ្ឋាភិបាលដឹងច្បាស់អំពីមុខរបរខ្មៅងងឹតនេះតាំងពីឆ្នាំ២០២២ តាមរយៈសេចក្តីរាយការណ៍ពីសារព័ត៌មានជាតិ និងបរទេស ប៉ុន្តែអ្នកកាសែតខ្មែរណាហ៊ានសរសេរផ្សាយការពិតទាំងនោះ នឹងត្រូវរដ្ឋអំណាចតាមប្រមាញ់ ចាប់ដាក់គុក ឬបង្ខំឲ្យសារភាពទទួលកំហុសឆ្គង និងឈប់និយាយឈប់ផ្សាយតទៅទៀត។
ប្រភពដដែល អះអាងថា គិតតាំងពីឆ្នាំ១៩៩៤ មក អ្នកសារព័ត៌មានក្នុងប្រទេសកម្ពុជា យ៉ាងហោចណាស់ ១៥នាក់ត្រូវបានសម្លាប់ជុំវិញការរាយការណ៍អំពីបញ្ហានយោបាយ និងបញ្ហារសើបស្រៀវនានាដែលធ្វើឱ្យប៉ះពាល់ដល់អ្នកមានអំណាច៕
© 2025, ឌឹ ខេមបូឌា ដេលី. All rights reserved.