អគ្គនាយកដ្ឋានអន្តោប្រវេសន៍ ឱ្យដឹងថា ជនជាតិចិន ៣១៩នាក់ទៀតដែលពាក់ព័ន្ធឧក្រិដ្ឋកម្មឆបោកតាមអនឡាញ ត្រូវបានបណ្ដេញចេញពីប្រទេសកម្ពុជា តាមរយៈយន្តហោះពិសេស ក្រោមកិច្ចសហការរវាងអាជ្ញាធរកម្ពុជា ជាមួយស្ថានទូតចិននៅកម្ពុជា។
សាធារណជនសង្កេតឃើញថា ការចាប់ខ្លួនក៏ច្រើន ការបញ្ជូនខ្លួនបណ្តេញចេញក៏ច្រើន ប៉ុន្តែឧក្រិដ្ឋជនឆបោកនៅតែមានក្នុងស្រុកខ្មែរមិនចេះអស់។ គេសួរថា តើមានប៉ុន្មានសែននាក់ទៅចាប់តាំងពីឆ្នាំ២០១៥ មកនោះ?
អគ្គនាយកអន្តោប្រវេសន៍ បានឲ្យដឹងថា ការបណ្ដេញចេញជនជាតិចិន ទាំងនេះ គឺបញ្ជាក់ពីកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យារបស់រាជរដ្ឋាភិបាលកម្ពុជា ដែលបានដាក់ចេញនូវវិធានការ និងយុទ្ធនាការយ៉ាងម៉ឺងម៉ាត់ ធ្វើយ៉ាងណា ធានា និងការពារសុវត្ថិភាពជូនពលរដ្ឋ និងប្រឆាំងដាច់ខាតដោយគ្មានការលើកលែងឡើយចំពោះមេខ្លោងដែលនៅពីក្រោយ។
ប្រភពខាងលើអះអាងថា យុទ្ធនាការបោសសំអាត និងលុបបំបាត់ឧក្រិដ្ឋកម្មតាមអនឡាញរបស់រាជរដ្ឋាភិបាលកម្ពុជា ក៏នឹងជួយសង្គ្រោះជនរងគ្រោះដែលត្រូវបានបោកបញ្ឆោតឱ្យមកប្រព្រឹត្តឧក្រិដ្ឋកម្មនេះ ឱ្យមានសេរីភាព និងអាចវិលត្រឡប់ទៅប្រទេសពួកគេវិញ។
នៅក្នុងឆ្នាំ២០២៦ ចាប់តាំងពីដើមឆ្នាំមកដល់ដើមខែកុម្ភៈ សមត្ថកិច្ចកម្ពុជា បានបើកប្រតិបត្តិការបង្ក្រាបបទល្មើសឆបោកតាមអនឡាញនៅ ១៩០ទីតាំង ក្នុងរាជធានី-ខេត្តចំនួន ៨ ផ្សេងទៀត ដោយឃាត់ខ្លួនជនសង្ស័យជាជនបរទេសបានជាង ២៥០០នាក់ ក្នុងនោះមានជនជាតិចិន នេប៉ាល់ ម៉ាឡេស៊ី ឡាវ ឥណ្ឌា ប៉ាគីស្ថាន និងបង់ក្លាដេស។
ប្រតិបត្តិការបង្ក្រាបជាបន្តបន្ទាប់នៅដើមឆ្នាំនេះ បានធ្វើឱ្យជនបរទេសជាង ១១ម៉ឺននាក់ មានចិន វៀតណាម ឥណ្ឌូនេស៊ី ឥណ្ឌា បង់ក្លាដេស និងប៉ាគីស្ថាន ចាកចេញពីកម្ពុជា ផងដែរ។
តាមការចុះផ្សាយរបស់អគ្គនាយកដ្ឋានអន្តោប្រវេសន៍ បានឲ្យដឹងថា នៅប៉ុន្មានថ្ងៃចុងក្រោយនេះ មានជនជាតិចិន ប្រមាណជិត ១០០០នាក់ដែលពាក់ព័ន្ធក្នុងឧក្រិដ្ឋកម្មឆបោកតាមប្រព័ន្ធបច្ចេកវិទ្យា ត្រូវបានបណ្តេញចេញពីកម្ពុជា ក្នុងនោះចំនួន ២៤១នាក់ ត្រូវបានបណ្តេញកាលពីថ្ងៃទី៥ ខែកុម្ភៈ ហើយ ១១០នាក់ ត្រូវបានបណ្តេញចេញនៅថ្ងៃទី៧ ខែកុម្ភៈ និងចំនួន ៣១២នាក់ ត្រូវបានបណ្តេញចេញកាលពីថ្ងៃទី៨ ខែកុម្ភៈ។
អ្នកនាំពាក្យរងក្រសួងមហាផ្ទៃ លោក ទូច សុឃៈ បានឲ្យដឹងកន្លងមកថា ប្រតិបត្តិការបោសសំអាតខ្នាតធំ (XXL) រដ្ឋាភិបាលបានកំណត់យកខែមេសា ឆ្នាំ២០២៦ ជាពេលវេលាចុងក្រោយដើម្បីបោសសំអាតទីតាំងប្រព្រឹត្តបទល្មើសឆបោកអនឡាញឱ្យអស់ពីទឹកដីកម្ពុជា។ បើសិនជានៅតាមបណ្តារាជធានី-ខេត្តណាត្រូវរកឃើញមានទីតាំងប្រព្រឹត្តបទល្មើសឆបោកតាមអនឡាញ មន្ត្រីគ្រប់គ្រងរាជធានី-ខេត្តនោះ គឺត្រូវទទួលខុសត្រូវចំពោះមុខរដ្ឋាភិបាល។
នៅថ្ងៃទី១០ ខែកុម្ភៈ នេះដែរ មេបញ្ជាការយោធភូមិភាគទី២ ថៃ ឧត្ដមសេនីយ៍ វីរយុទ្ធ សីល្ប៍ បានអមដំណើរមេបញ្ជាការកងកម្លាំងប្រដាប់អាវុធហ្វីលីពីន ឧត្ដមសេនីយ៍ Romeo S. Brawner ទៅពិនិត្យអគារ ៦ជាន់ ជាទីតាំងឆបោកនៅបញ្ឆិតច្រកអន្តរជាតិអូស្មាច់ ខាងដីថៃ ហៅថាចងឆម ស្រុកកាប់ឈើង ក្រោយពីបាននាំក្រុមមន្ត្រីមានសមត្ថកិច្ចអាមេរិកាំង រួមទាំងអ្នកកាសែតបរទេសផងទៅពិនិត្យទីនោះ។
ក្រសួងមហាផ្ទៃ បានអះអាងថា ក្នុងរយៈពេល ៩ខែឆ្នាំ២០២៥ សមត្ថកិច្ចនគរបាលជាតិ បានបើកប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យាបានចំនួន ៤៨លើក ឃាត់ខ្លួនបញ្ជូនទៅតុលាការចំនួន ១៦៨នាក់ និងបណ្ដេញចេញពីកម្ពុជា ទៅប្រទេសកំណើត ចំនួន ២៧២២នាក់៕
© 2026, ឌឹ ខេមបូឌា ដេលី. All rights reserved.