ក្រុមហ៊ុនស្រាវជ្រាវទិន្នន័យអន្តរជាតិមួយឈ្មោះ 60 Decibels បានរកឃើញថា កម្ពុជានៅតែស្ថិតក្នុងចំណាត់ថ្នាក់ជាប្រទេសដែលមានពលរដ្ឋជំពាក់បំណុលមីក្រូហិរញ្ញវត្ថុច្រើនជាងគេក្នុងតំបន់អាស៊ីអាគ្នេយ៍ ដែលបណ្តាលឲ្យពលរដ្ឋកាត់បន្ថយការចំណាយលើអាហារ។
របាយការណ៍របស់ក្រុមហ៊ុនស្រាវជ្រាវទិន្នន័យអន្តរជាតិ 60 Decibels បានចេញនៅខែវិច្ឆិកា នេះថា ក្នុងចំណោមពលរដ្ឋខ្មែរចំនួន ១៣៩៨នាក់ ដែលក្រុមហ៊ុននេះបានសម្ភាស ឲ្យដឹងថា យ៉ាងហោចណាស់មាន ៣២% កំពុងជួបបញ្ហាធុញថប់ក្នុងការបង់ប្រាក់សងត្រឡប់ ខណៈ ៧៥% ទៀត អះអាងថា ពួកគេពុំមានបញ្ហាបង់ប្រាក់ឡើយ។
របាយការណ៍ដដែលបន្តថា ក្នុងឆ្នាំ២០២៤ នេះ អតិថិជនដែលបង្ខំចិត្តកាត់បន្ថយការចំណាយលើថ្លៃម្ហូបអាហារប្រចាំថ្ងៃដើម្បីសន្សំប្រាក់ទុកបង់មីក្រូហិរញ្ញវត្ថុមានចំនួន ២៤% គឺធ្លាក់ចុះ បើធៀបនឹងឆ្នាំ២០២២ និងឆ្នាំ២០២៣។ ក្រុមហ៊ុនស្រាវជ្រាវស្ថិតិ 60 Decibels ប៉ាន់ប្រមាណថា នៅកម្ពុជាអាចមានមនុស្សជាង ៤ម៉ឺននាក់ (៤២០០០នាក់) ដែលអាចលក់ទ្រព្យសម្បត្តិសងបំណុលមីក្រូហិរញ្ញវត្ថុ។
ការស្រាវជ្រាវនេះឱ្យដឹងទៀតថា ស្ថានភាពនេះបាននាំឱ្យមានការព្រួយបារម្ភយ៉ាងខ្លាំងអំពីស្ថានភាពនៃវិស័យមីក្រូហិរញ្ញវត្ថុនៅកម្ពុជា ដោយអំពាវនាវឱ្យមានការយកចិត្តទុកដាក់ចំពោះតម្រូវការសម្រាប់ការការពារអតិថិជនឱ្យកាន់តែរឹងមាំ ការអនុវត្តការផ្ដល់ប្រាក់កម្ចីប្រកបដោយនិរន្តរភាព និងការត្រួតពិនិត្យបទប្បញ្ញត្តិកាន់តែតឹងរ៉ឹង។
សារព័ត៌មាន ឌឹ ខេមបូឌា ដេលី មិនទាន់អាចសុំការឆ្លើយតបរឿងនេះពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេរហូតដល់ម៉ោងចេញផ្សាយនេះ។
អ្នកនាំពាក្យសមាគមមីក្រូហិរញ្ញវត្ថុ លោក កាំង តុងងី បានប្រាប់សារព័ត៌មានក្នុងស្រុកថា ការចេញផ្សាយរបាយការណ៍របស់ស្ថាប័នស្រាវជ្រាវហិរញ្ញវត្ថុអន្តរជាតិ 60 Decibels បានបង្ហាញទាំងផលវិជ្ជមាន និងអវិជ្ជមាន ដែលជាធាតុផ្សំក្នុងការដោះស្រាយបញ្ហាប្រឈម។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត បានមានប្រសាសន៍ប្រាប់អ្នកសារព័ត៌មានក្នុងស្រុកថា របាយការណ៍នេះដូចគ្នានឹងការរកឃើញរបស់អង្គការលីកាដូដែរ។ លោកថា ការជាប់បំណុលធ្ងន់ធ្ងរនេះបានធ្វើឱ្យមានករណីកេងប្រវ័ញ្ចកម្លាំងពលកម្មកុមារ ការធ្វើចំណាកស្រុក ការបង្ខំលក់ផ្ទះសម្បែង និងការកាត់បន្ថយអាហារបរិភោគជាដើម។
កាលពីថ្ងៃទី០៧ ខែឧសភា ឆ្នាំ២០២៤ អង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូ បានចេញសេចក្តីថ្លែងការណ៍មួយដោយស្នើឱ្យរដ្ឋាភិបាលកម្ពុជា ចាត់វិធានការបញ្ចប់ការរំលោភសិទ្ធិមនុស្សក្នុងវិស័យមីក្រូហិរញ្ញវត្ថុ។ អង្គការលីកាដូបានរកឃើញថា ក្នុងរយៈពេល ២ឆ្នាំចុងក្រោយនេះ យ៉ាងហោចណាស់ ៦% នៃអ្នកខ្ចីប្រាក់ បានលក់ដីដើម្បីសងបំណុលខ្នាតតូច និងថាចន្លោះពីឆ្នាំ២០១៧ ដល់ឆ្នាំ២០២២ ពលរដ្ឋខ្មែរប្រមាណ ១សែន ៦ម៉ឺន ៧ពាន់នាក់ បានលក់ដីដើម្បីសងកម្ចីមីក្រូហិរញ្ញវត្ថុ។
ក្រៅពីនេះ លីកាដូក៏រកឃើញថា ១៨,៣% នៃក្រុមគ្រួសារដែលមានកម្ចី បានអះអាងថា ពួកគេបានកាត់បន្ថយការហូបចុកបន្ទាប់ពីពួកគេបានខ្ចីប្រាក់ ហើយពលរដ្ឋប្រមាណ ៨,៥% បានរាយការណ៍ថា គ្រួសារពួកគេមិនមានអាហារបរិភោគគ្រប់គ្រាន់នោះទេ៕
© 2024, ឌឹ ខេមបូឌា ដេលី. All rights reserved.