 មកហើយ។){kind=link}
ប្រធានសភាពាណិជ្ជកម្មអាមេរិកប្រចាំកម្ពុជា អះអាងថា សហរដ្ឋអាមេរិកបានដើរតួជាប្រភពចំណូលដែលអាចពឹងផ្អែកបានដ៏រឹងមាំសម្រាប់ប្រទេសកម្ពុជា អស់រយៈពេលជាង ២ទសវត្សរ៍ (ជាង ២៦ឆ្នាំ) មកហើយ។
លោកបញ្ជាក់ថា បច្ចុប្បន្ននេះ សហរដ្ឋអាមេរិកកំពុងរង់ចាំតែរដ្ឋសភាខ្មែរផ្តល់សច្ចាប័នលើកិច្ចព្រមព្រៀងពាណិជ្ជកម្មទៅវិញទៅមក (reciprocal trade agreement) ដែលបានធ្វើឡើងកាលពីខែតុលា ឆ្នាំ២០២៥ កន្លងទៅប៉ុណ្ណោះ។
ប្រធានសភាពាណិជ្ជកម្មអាមេរិកាំងប្រចាំប្រទេសកម្ពុជា លោក Casey Barnett បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៩ ខែមករា នេះថា ទីផ្សារសហរដ្ឋអាមេរិកនៅតែជាមូលដ្ឋានដ៏រឹងមាំ និងអាចទុកចិត្តបាន ដោយផ្តល់ចំណូលស្ថិតស្ថេរជាបន្តបន្ទាប់សម្រាប់កំណើនសេដ្ឋកិច្ចប្រទេសកម្ពុជា ទោះបីជាប្រទេសកម្ពុជារងនូវការវាយប្រហារពីប្រទេសថៃ កាលពីឆ្នាំ២០២៥ កន្លងទៅក៏ដោយ។
ប្រធានសភាពាណិជ្ជកម្មអាមេរិក រូបនេះ លើកឡើងថា កាលពីឆ្នាំ២០២៥ កម្ពុជាបាននាំចេញទៅសហរដ្ឋអាមេរិកកើនឡើងដល់ជាង ១២ពាន់លានដុល្លារអាមេរិក (១២,៧ពាន់លានដុល្លារ) ស្មើនឹង ២៨% ក្នុងនោះការនាំចេញស្បែកជើងកើនឡើងដល់ជាង ៨០០លានដុល្លារអាមេរិក (៨៦៩លានដុល្លារ) ស្មើនឹង ៥២%។ ចំណែកឯការនាំចេញសម្បកកង់ក៏បានកើនឡើងដល់ជាង ១ពាន់លានដុល្លារអាមេរិកដែរ (១,១ពាន់លានដុល្លារ) ដែលស្មើនឹង ៤៥%។
លោក Casey Barnett បញ្ជាក់ថា តាមលក្ខណៈរដូវកាល ការនាំទំនិញចេញពីប្រទេសកម្ពុជា ទៅសហរដ្ឋអាមេរិក ជាទូទៅគឺធ្លាក់ចុះនៅត្រីមាសទី៤ ដែលមានន័យថា ធ្លាក់ចុះនៅរាល់ចុងឆ្នាំ ព្រោះអ្នកលក់រាយអាមេរិក ស្តុកសម្លៀកបំពាក់ច្រើននៅត្រីមាសទី៣ ដើម្បីត្រៀមសម្រាប់ក្នុងរដូវកាលត្រឡប់ទៅសាលារៀន និងរដូវកាលលក់ពេលថ្ងៃបុណ្យចុងឆ្នាំ។
ការអះអាងនេះ ធ្វើឡើងស្របពេលដែលគេមើលឃើញថា ទំនាក់ទំនងពាណិជ្ជកម្មរវាងកម្ពុជា និងអាមេរិក មានភាពល្អប្រសើរឡើងវិញខ្លះក្រោយការចរចាកិច្ចព្រមព្រៀងពាណិជ្ជកម្មទៅវិញទៅមករវាងប្រទេសទាំងពីរកាលពីចុងឆ្នាំ២០២៥ កន្លងទៅ។
ក្នុងពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃ កាលពីថ្ងៃទី២៦ ខែតុលា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាជាផ្លូវការលើពន្ធបដិការ ១៩% សម្រាប់កម្ពុជា ខណៈកម្ពុជា ក៏សម្រេចយកពន្ធសូន្យ (០%) លើមុខទំនិញរបស់អាមេរិកខាងវិស័យកសិកម្ម និងខាងវិស័យឧស្សាហកម្មនាពេលនោះដែរ។
ជុំវិញបញ្ហានេះ នាយករដ្ឋមន្ត្រីកម្ពុជា លោក ហ៊ុន ម៉ាណែត បានអះអាងកាលពីដើមខែវិច្ឆិកា ឆ្នាំ២០២៥ ថា កម្ពុជា និងសហរដ្ឋអាមេរិក បានឯកភាពគ្នាបន្តពង្រីកកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅលើវិស័យគន្លឹះមួយចំនួន ដូចជា ពាណិជ្ជកម្ម វិនិយោគ ការពារជាតិ និងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាដើម បន្ទាប់ពីប្រទេសទាំងពីរបានចុះកិច្ចព្រមព្រៀងពាណិជ្ជកម្មបដិការកាលពីចុងខែតុលា កន្លងទៅ។
ទាក់ទងនឹងកំណើនសេដ្ឋកិច្ចជាតិក្នុងប្រទេសជាប់នឹងប្រទេសកម្ពុជា សាធារណរដ្ឋសង្គមនិយមយៀកណាម បានងាកទៅចុះកិច្ចព្រមព្រៀងដៃគូគ្រប់ជ្រុងជ្រោយជាមួយនឹងសហភាពអឺរ៉ុប វិញ ដោយប្រទះបញ្ហាជាមួយទីផ្សារសហរដ្ឋអាមេរិករឿងអត្រាពន្ធទំនិញនាំចូលទីផ្សារអាមេរិកាំង ដោយហេតុថាមិនអាចសង្ឃឹមលើផ្សារសហរដ្ឋអាមេរិកទាំងស្រុងបាន។
ប្រទេសថៃឡង់ដ៍ វិញ ក្នុងវេទិកាសេដ្ឋកិច្ចពិភពលោក ក្រុងដាវ៉ូស ប្រទេសស្វីស ឆ្នាំ២០២៦ រដ្ឋមន្ត្រីក្រសួងហិរញ្ញវត្ថុថៃ បាននាំក្រុមហ៊ុនវិនិយោគទុនបរទេសទៅដាក់ទុនស្រុកសៀម មានទឹកប្រាក់ស្មើនឹង ១៦ពាន់លានដុល្លារសហរដ្ឋអាមេរិក។
ចំណែកឯគណៈប្រតិភូខ្មែរដែលមានលោក សុក ស៊ីផាន់ណា និងលោក ស៊ុន ចាន់ថុល ជាអ្នកដឹកនាំ ពុំមានកាសែតណាផ្សាយថាបាននាំវិនិយោគទុនបរទេសចូលដាក់ទុនស្រុកខ្មែរមានទឹកប្រាក់ចំនួនប៉ុន្មានទេ។
ចំណែកមន្ត្រីជាន់ខ្ពស់គណបក្សសង្គ្រោះជាតិ លោក ហ៊ីង សុខសាន្ត បានលើកឡើងកាលពីពេលថ្មីៗនេះថា ទីផ្សារសហរដ្ឋអាមេរិកនៅតែជាខ្នងបង្អែកដ៏រឹងមាំសម្រាប់កម្ពុជា ក្នុងការជំរុញសេដ្ឋកិច្ចជាតិរបស់ខ្លួន។ លោកបន្តថា កាលពីឆ្នាំ២០២៤ កន្លងទៅ កម្ពុជានាំទំនិញទៅអាមេរិក ក្នុងទំហំទឹកប្រាក់ជាង ៩ពាន់លានដុល្លារអាមេរិក (៩,៩១៦ពាន់លានដុល្លារ) ដែលស្មើនឹង ៩៧% ខណៈទំនិញដែលនាំពីអាមេរិកទៅកម្ពុជា វិញ គឺមានត្រឹមតែជាង ២០០លានដុល្លារប៉ុណ្ណោះ (២៥៦លានដុល្លារ) ដែលស្មើនឹង ៣%។
លោក ហ៊ីង សុខសាន្ត បញ្ជាក់ថា ក្នុងទំហំពាណិជ្ជកម្មបែបនេះ បង្ហាញឱ្យឃើញថា កម្ពុជាបានចំណេញពីការនាំចូលទំនិញទៅកាន់ទីផ្សារអាមេរិក រហូតដល់ជាង ៩ពាន់លានដុល្លារអាមេរិក (៩,៦៥២ពាន់លានដុល្លារ) ដែលស្មើនឹង ៩៧% ឯណោះ។
ជុំវិញបញ្ហានេះ អគ្គនាយកដ្ឋានគយ និងរដ្ឋាករកម្ពុជា បានចេញរបាយការណ៍របស់ខ្លួនកាលពីអំឡុងខែវិច្ឆិកា ឆ្នាំ២០២៥ ថា ក្នុងរយៈពេល ១០ខែឆ្នាំ២០២៥ ការធ្វើពាណិជ្ជកម្មរវាងកម្ពុជា និងសហរដ្ឋអាមេរិក មានទឹកប្រាក់ជាង ១០,៧ពាន់លានដុល្លារ កើនឡើង ២៧% បើធៀបនឹងរយៈពេលដូចគ្នាកាលពីឆ្នាំ២០២៤ ដែលមានទំហំទឹកប្រាក់ជាង ៨,២ពាន់លានដុល្លារ។
អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា សហរដ្ឋអាមេរិកនៅតែជាទីផ្សារចម្បងសម្រាប់កម្ពុជា លើវិស័យកាត់ដេរសម្លៀកបំពាក់ ស្បែកជើង និងគ្រឿងបង្គំផ្សេងៗ៕
© 2026, ឌឹ ខេមបូឌា ដេលី. All rights reserved.