អាជ្ញាធរកម្ពុជាបានបណ្ដេញជនជាតិចិន ១៥៦ នាក់ចេញពីប្រទេស ក្រោយរកឃើញថាពួកគេបានស្នាក់នៅ និងធ្វើការដោយខុសច្បាប់ពាក់ព័ន្ធនឹងសកម្មភាពឆបោកតាមប្រព័ន្ធអនឡាញ (online scams) ខណៈអង្គការសិទ្ធិមនុស្សអន្តរជាតិ Amnesty International បានចោទជាសំណួរអំពីប្រសិទ្ធភាពនៃយុទ្ធនាការបង្ក្រាបបទល្មើសប្រភេទនេះនៅកម្ពុជា។
អគ្គនាយកដ្ឋានអន្តោប្រវេសន៍បានឱ្យដឹងថា ជនជាតិចិនទាំង ១៥៦ នាក់ត្រូវបានបណ្ដេញចេញតាមយន្តហោះពិសេសកាលពីថ្ងៃទី១០ ខែមិថុនា តាមច្រកអាកាសយានដ្ឋានអន្តរជាតិតេជោ។ អាជ្ញាធរអះអាងថា ការបណ្ដេញចេញនេះជាផ្នែកមួយនៃយុទ្ធនាការរបស់រដ្ឋាភិបាលក្នុងការបោសសម្អាត និងលុបបំបាត់បណ្ដាញឆបោកតាមប្រព័ន្ធបច្ចេកវិទ្យាដែលកំពុងប្រតិបត្តិការនៅក្នុងប្រទេស។
អគ្គនាយកដ្ឋានអន្តោប្រវេសន៍បញ្ជាក់ថា កម្ពុជាកំពុងអនុវត្តវិធានការច្បាប់យ៉ាងតឹងរ៉ឹងចំពោះជនបរទេសដែលពាក់ព័ន្ធនឹងបទល្មើសអនឡាញ ដោយមានគោលបំណងការពារសុវត្ថិភាពប្រជាពលរដ្ឋ និងសហការក្នុងការទប់ស្កាត់ឧក្រិដ្ឋកម្មឆ្លងដែន។
តាមទិន្នន័យរបស់អាជ្ញាធរ ចាប់ពីដើមឆ្នាំ២០២៥ ដល់ខែមេសា ឆ្នាំ២០២៦ ជនបរទេសជាង ១៣,០០០ នាក់ ត្រូវបានបណ្ដេញចេញពីកម្ពុជាដោយសារពាក់ព័ន្ធនឹងការឆបោកតាមអនឡាញ ក្នុងនោះមានស្ត្រីប្រមាណ ១,៥០០ នាក់។ អាជ្ញាធរក៏អះអាងដែរថា ក្នុងអំឡុងពេលដូចគ្នានេះ ជនបរទេសជាង ២៤០,០០០ នាក់ដែលជាប់ពាក់ព័ន្ធ ឬសង្ស័យពាក់ព័ន្ធនឹងបទល្មើសប្រភេទនេះ បានចាកចេញពីកម្ពុជាដោយខ្លួនឯង។
ប៉ុន្តែនៅក្នុងរបាយការណ៍មួយដែលចេញផ្សាយកាលពីថ្ងៃទី៨ ខែមិថុនា អង្គការ Amnesty International បានលើកឡើងថា ទោះបីរដ្ឋាភិបាលកម្ពុជាអះអាងពីជោគជ័យនៃយុទ្ធនាការបង្ក្រាបក៏ដោយ ក៏មជ្ឈមណ្ឌលឆបោកជាច្រើននៅតែបន្តប្រតិបត្តិការ ហើយជនរងគ្រោះជាច្រើនមិនទទួលបានការការពារ និងជំនួយគ្រប់គ្រាន់នោះទេ។
អង្គការនេះអះអាងថា ខ្លួនបានកំណត់អត្តសញ្ញាណទីតាំងមជ្ឈមណ្ឌលឆបោកចំនួន ៨៦ កន្លែងនៅកម្ពុជា គិតត្រឹមខែមេសា ឆ្នាំ២០២៦ ក្នុងនោះមាន ៣៣ កន្លែងដែលទើបត្រូវបានរកឃើញថ្មី។ អ្នកស្រាវជ្រាវរបស់អង្គការបានសម្ភាសជនរងគ្រោះចំនួន ៧៣ នាក់មកពី ១៦ ប្រទេស ដែលរាយការណ៍អំពីការជួញដូរមនុស្ស ពលកម្មដោយបង្ខំ ការធ្វើទារុណកម្ម អំពើហិង្សាផ្លូវភេទ និងការឃុំខ្លួនដោយខុសច្បាប់នៅក្នុងបរិវេណដែលពួកគេអះអាងថាជាមជ្ឈមណ្ឌលឆបោក។
Amnesty International ក៏បានចោទប្រកាន់ថា មានការឃុបឃិតគ្នារវាងមន្ត្រីអនុវត្តច្បាប់មួយចំនួន និងក្រុមឧក្រិដ្ឋជន ដែលអាចជួយឱ្យបណ្ដាញឆបោកគេចផុតពីការបង្ក្រាប។ អង្គការនេះបន្ថែមថា ជនរងគ្រោះដែលខ្លួនបានសម្ភាស មិនមាននរណាម្នាក់ត្រូវបានកំណត់អត្តសញ្ញាណជាជនរងគ្រោះនៃការជួញដូរមនុស្សដោយអាជ្ញាធរកម្ពុជាឡើយ។
រដ្ឋាភិបាលកម្ពុជាមិនទាន់ឆ្លើយតបជាសាធារណៈចំពោះការចោទប្រកាន់ចុងក្រោយរបស់ Amnesty International នៅឡើយទេ ប៉ុន្តែកន្លងមកធ្លាប់បានបដិសេធការចោទប្រកាន់ស្រដៀងគ្នា និងអះអាងថា ខ្លួនកំពុងបន្តពង្រឹងវិធានការបង្ក្រាបបទល្មើសឆបោកអនឡាញនៅទូទាំងប្រទេស៕
© 2026, ឌឹ ខេមបូឌា ដេលី. All rights reserved.