TAG
topstory
ប្រេសិតអង្គការសហប្រជាជាតិមើលឃើញស្មារតីសហការគ្នាទោះជាមានភាពជូរចត់ក៏ដោយ
បើទោះជាមានសង្រ្គាមពាក្យសម្តីជូរចត់ខ្លាំងឡើងរវាងគណបក្សប្រជាជនកំពុងកាន់អំណាច និងគណបក្សសង្គ្រោះជាតិក៏ដោយ ក៏លោក សុរិយា ស៊ូបេឌី (Surya Subedi) ប្រេសិតសិទ្ធិមនុស្សអង្គការសហប្រជាជាតិបានមានប្រសាសន៍កាលពីថ្ងៃអង្គារថា លោកមានសុទិដ្ឋិនិយម ថាគណបក្សទាំងពីរបន្តធ្វើការជាមួយគ្នាប្រកបដោយការស្ថាបនាដើម្បីធ្វើឲ្យប្រទេសចម្រើនលូតលាស់។
លោក ស៊ូបេឌី បានប្រាប់អ្នកយកព័ត៌មានបន្ទាប់ពីជួបប្រជុំជាមួយថ្នាក់ដឹកនាំបក្សប្រឆាំង លោក សម រង្ស៊ី និងលោក កឹម សុខា នៅសភាថា "ខ្ញុំរីករាយណាស់ដែលឮថា ការសុន្ទនាកំពុងធ្វើបន្តដើម្បីអនុវត្តកំណែទម្រង់ដែលចាំបាច់ ដើម្បីធ្វើឲ្យលទ្ធិប្រជាធិបតេយ្យរឹងមាំឡើង ធ្វើឲ្យមាននីតិរដ្ឋពិតប្រាកដថែមទៀត និងធ្វើឲ្យមានការគោរពសិទ្ធិមនុស្សច្រើនឡើងក្នុងប្រទេសនេះ"។
ទើបតែមួយថ្ងៃមុននេះប៉ុណ្ណោះ លោកនាយករដ្ឋមន្ត្រី...
អង្គការអន្តរជាតិទេសន្តរប្រវេសន៍ត្រៀមជួយតាំងទីលំនៅដល់ជនភៀសខ្លួនមកពីប្រទេសណូរូ
អង្គការអន្តរជាតិទេសន្តរប្រវេសន៍បានលើកឡើងកាលពីម្សិលមិញថា ខ្លួនត្រៀមជួយសម្របសម្រួលផែនការដ៏ចម្រូងចម្រាសក្នុងការតាំងទីលំនៅថ្មីនៅក្នុងប្រទេសកម្ពុជាដល់ជនភៀសខ្លួន ដែលបច្ចុប្បន្ននេះប្រទេសអូស្ត្រាលីកំពុងឃុំខ្លួនពួកគេនៅក្នុងប្រទេសណូរូជាប្រទេសដែនកោះបាស៊ីហ្វិកខាងត្បូង បន្ទាប់ពីក្រុមមន្ត្រីកម្ពុជា បានធ្វើទស្សនកិច្ចទៅកាន់កោះនោះរយៈពេលមួយសប្តាហ៍។
កាលពីខែកញ្ ញាប្រទេសកម្ពុជាបានចុះហត្ថលេខាលើកិច្ចព្រមព្រៀងជាមួយប្រទេសអូស្ត្រាលី ដែលរងការរិះគន់យ៉ាងខ្លាំងក្នុងការទទួលយកជនភៀសខ្លួនក្នុងចំនួនមិនជាក់លាក់នៅក្នុងប្រទេសណូរូជាថ្នូរនឹងប្រាក់ជំនួយពីប្រទេសអូស្ត្រាលីចំនួន៣៥លានដុល្លារបន្ថែមទៀតក្នុងរយៈពេលបួនឆ្នាំក្រោយ។
ប្រទេសកម្ពុជាមិនទាន់បានទទួលយកជនភៀសខ្លួនម្នាក់នៅឡើយទេ ហើយការធ្វើដំណើរទៅកាន់កោះនោះកាលពីសប្តាហ៍មុន គឺជាលើកទី១ហើយរបស់មន្ត្រីកម្ពុជាចាប់តាំងពីកិច្ចព្រមព្រៀងនេះត្រូវបានចុះហត្ថលេខា។
បើទោះណាជាប្រទេសអូស្ត្រាលីបានព្រមព្រៀងរ៉ាប់រងការចំណាយទាំងអស់ក៏ដោយ ក៏អង្គការអន្តរជាតិទេសន្តរប្រវេសន៍លើកឡើងថា ប្រទេសកម្ពុជាបានទាក់ទងអង្គការរបស់ខ្លួនកាលពីខែតុលាដើម្បីសុំជំនួយផងដែរ។
កាលពីម្សិលមិញ លោក ចូ ឡូរី អ្នកនាំពាក្យអង្គការអន្តរជាតិទេសន្តរប្រវេសន៍ប្រចាំតំបន់បានមានប្រសាសន៍ថា អង្គការនេះនឹងជួយ ឲ្យតែប្រទេសកម្ពុជាព្រមព្រៀងចំពោះលក្ខខណ្ឌខ្លះៗ។
លោក ឡូរី បានមានប្រសាសន៍ថា "អង្គការអន្តរជាតិទេសន្តរប្រវេសន៍បានឆ្លើយតបចំពោះសំណើររបស់រដ្ឋាភិបាលកម្ពុជា ដោយបង្ហាញថា ខ្លួនត្រៀមខ្លួនក្នុងតួនាទីតាំងទីលំនៅថ្មីដល់ជនភៀសខ្លួនពីប្រទេសណូរូ"។
លោកបានបន្ថែមថា "លក្ខខណ្ឌទាំងនេះត្រូវបានទំនាក់ទំនងទៅរដ្ឋាភិបាលកម្ពុជាហើយ ហើយកំពុងស្ថិតក្នុងការពិចារណា។ បញ្ហានេះគឺជារឿងសម្ងាត់រវាងរដ្ឋអធិបតេយ្យ និងអង្គការអន្តរជាតិ ហើយយើងនឹងមិនប្រកាសជាសាធារណៈឡើយ"។
លោក ឡូរី បានមានប្រសាសន៍ថា អង្គការអន្តរជាតិទេសន្តរប្រវេសន៍នឹងបញ្ជាក់អំពីតួនាទីរបស់ខ្លួននៅពេលព័ត៌មានលម្អិតត្រូវបានដោះស្រាយ។
អង្គការអន្តរជាតិទេសន្តរប្រវេសន៍បានចូលរួមក្នុងដំណើរទស្សនកិច្ចរបស់ប្រតិភូកម្ពុជាទៅកាន់ប្រទេសណូរូក្នុងនាមជាអ្នកសង្កេតការណ៍ ប៉ុន្តែ បានបដិសេធមិនធ្វើអត្ថាធិប្បាយអំពីដំណើរទស្សនកិច្ចនោះឡើយ។
អ្នកនាំពាក្យសម្ព័ន្ធជនភៀសខ្លួន ជាអង្គការតស៊ូមតិដែលមានមូលដ្ឋានក្នុងទីក្រុងស៊ីដនីបានទាក់ទងជាមួយមនុស្សក្នុងប្រទេសណូរូបានមានប្រសាសន៍ថា គណៈប្រតិភូកម្ពុជាបានទៅពិនិត្យមើលកន្លែងឃុំខ្លួនរបស់ប្រទេសអូស្ត្រាលីនៅលើកោះនោះ ប៉ុន្តែ បានចាកចេញវិញដោយមិនបានជួបជាមួយជនភៀសខ្លួនណាម្នាក់ឡើយ។
អ្នកនាំពាក្យរូបនេះបានមានប្រសាសន៍ថា អ្នកស្វែងរកសិទ្ធិជ្រកកោនទាំងនោះត្រូវបានផ្តល់ឱកាសឲ្យនិយាយជាមួយគណៈប្រតិភូទាំងនោះ ប៉ុន្តែ ពួកគេបានបដិសេធ។
ប្រទេសកម្ពុជា និងប្រទេសអូស្ត្រាលីបានចរចាអំពីកិច្ចព្រមព្រៀងជាសម្ងាត់នេះកាលពីខែកញ្ញា ហើយមានការស្ទាក់ស្ទើរសូម្បីការជូនដំណឹងអំពីដំណើរទស្សនកិច្ចថ្មីៗរបស់ប្រតិភូកម្ពុជាទៅកាន់ប្រទេសណូរូ។
កាលពីសប្តាហ៍មុន អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍ថា លោក កែម សារិន ប្រធានការិយាល័យជនភៀសខ្លួនរបស់នាយកដ្ឋាននេះបានដឹកនាំដំណើរទស្សនកិច្ចនោះ។
ទោះជាយ៉ាងណា នៅពេលត្រូវបានទាក់ទងកាលពីម្សិលមិញ លោក សារិន មិនបានបញ្ជាក់ ឬក៏បដិសេធថា លោកនៅលើកោះនោះឡើយ។ លោកបានមានប្រសាសន៍ថា "ខ្ញុំបានទៅប្រទេសអូស្ត្រាលីដើម្បីបំពេញទស្សនកិច្ច មិនមែនទៅចរចាអំពីជនភៀសខ្លួនក្នុងប្រទេសណូរូឡើយ"៕សារុន (រាយការណ៍បន្ថែមដោយ អូន ភាព)
ការតវ៉ាដោយអហិង្សាត្រូវបានរារាំងមិនឲ្យចូលទៅកាន់ទីលានប្រជាធិបតេយ្យ
កងសន្តិសុខខណ្ឌដូនពេញប្រហែល៥០នាក់ និងនគរបាលបង្ក្រាបបាតុកម្មក្នុងចំនួនប្រហែលគ្នានេះបានរារាំងអ្នកតវ៉ាប្រឆាំងការបណ្តេញចេញប្រមាណ១០០នាក់ មិនឲ្យជួបជុំគ្នានៅទីលានប្រជាធិបតេយ្យក្នុងរាជធានីភ្នំពេញកាលពីម្សិលមិញ បន្ទាប់ពីសាលារាជធានីបានចាត់ទុកការប្រមូលផ្តុំគ្នានេះថា ជាការប្រមូលផ្តុំខុសច្បាប់។
អ្នកតវ៉ា គឺសុទ្ធតែមកពីសហគមន៍មួយចំនួនដែលរងការបណ្តេញចេញរួមមានដូចជាមកពីតំបន់បឹងកក់ និងតំបន់បុរីកីឡាក្នុងរាជធានីភ្នំពេញ ព្រមទាំងសហគមន៍មួយចំនួនទៀតក្នុងខេត្តព្រះវិហារផងដែរ។
ក្រុមអ្នកតវ៉ាទាំងនេះចង់ឲ្យរដ្ឋាភិបាលដោះស្រាយវិវាទដីធ្លីរបស់ខ្លួន និងទាមទារឲ្យមានការដោះលែងសកម្មជនចំនួន១០នាក់ដែលកំពុងជាប់ពន្ធនាគារក្នុងនោះមានប្រាំបួននាក់មកពីតំបន់បឹងកក់ និងម្នាក់មកពីតំបន់បុរីកីឡា។
អ្នកតវ៉ាបានចាប់ផ្តើមហែក្បួនពីស្ថានទូតអាមេរិកក្នុងខណ្ឌដូនពេញនៅម៉ោងប្រហែល៩ និង៣០នាទី។ ប៉ុន្តែ នៅពេលក្រុមអ្នកតវ៉ាបានទៅដល់ទីលានប្រជាធិបតេយ្យ កងសន្តិសុខខណ្ឌ និងនគរបាលបង្ក្រាបបាតុកម្ម ដែលប្រដាប់ដោយខែល និងដំបងបានយករបាំងមកបិទផ្លូវលេខ៥១នៅខាងមុខទីលានប្រជាធិបតេយ្យ ហើយបដិសេធមិនឲ្យក្រុមអ្នកតវ៉ាចូលទៅក្នុងទីលានប្រជាធិបតេយ្យនោះ។
ទីបំផុតក្រុមអ្នកតវ៉ាបានទៅប្រមូលផ្តុំគ្នានៅសួនមួយទៀតក្បែរនោះ ហើយបានតវ៉ារហូតដល់ម៉ោងប្រហែល៣និង៣០នាទីរសៀល មុនពេលបំបែកគ្នា។
នៅពេលទាក់ទងតាមក្រោយនៅថ្ងៃដដែលនោះ លោក ឃួង ស្រេង អភិបាលរងរាជធានីភ្នំពេញបានលើកឡើងថា សាលារាជធានីបានសម្រេចបដិសេធមិនឲ្យអ្នកតវ៉ាចូលទៅកាន់ទីលានប្រជាធិបតេយ្យ ព្រោះពួកគេធ្លាប់ធ្វើឲ្យកើតមានអំពើហិង្សាកាលពីលើកមុនៗ។
លោក ឃួង ស្រេង បានមានប្រសាសន៍ថា "អ្វីដែលពួកគេធ្វើគឺវាហួសពីព្រំដែនប្រជាធិបតេយ្យ ព្រោះវានឹងបង្កឲ្យមានភាពអនាធិបតេយ្យ។វាខុសច្បាប់ ហើយពួកគេគ្មានកម្មសិទ្ធិផ្តាច់មុខលើទីលានប្រជាធិបតេយ្យនេះឡើយ"។
លោកបានបន្ថែមថា អ្នកតវ៉ាត្រូវបានរារាំងព្រោះសហគមន៍មួយចំនួនដែលមានមុខនៅក្នុងក្រុមអ្នកតវ៉ាមិនបានសហការជាមួយសាលារាជធានីឡើយ។
លោក ឃួង ស្រេង បានមានប្រសាសន៍បន្ថែមថា "សាលារាជធានីកំពុងតែធ្វើការដើម្បីដោះស្រាយបញ្ហានៅតំបន់បឹងកក់ និងតំបន់បុរីកីឡាហើយ។ ប៉ុន្តែ ពួកគេមិនបានមកដោះស្រាយបញ្ហានេះឡើយ ហើយពួកគេនៅតែបន្តការតវ៉ា ហេតុដូច្នេះសាលារាជធានីមិនអនុញ្ញាតឲ្យពួកគេធ្វើដូច្នេះនោះទេ"។
អភិបាលរងរាជធានីរូបនេះបានលើកឡើងទៀតថា ការទាមទាររបស់ក្រុមអ្នកតវ៉ាឲ្យមានការដោះលែងសកម្មជនទាំង១០នាក់ គឺមិនសមហេតុផលឡើយ។ លោកបានមានប្រសាសន៍ថា "ពួកគេបានស្នើឲ្យតុលាការដោះលែងអ្នកទោស ប៉ុន្តែ វាមិនមែនជាសិទ្ធិរបស់ពួកគេទេ គឺវាជាសិទ្ធិរបស់តុលាការ"។
លោក ឃួង ស្រេង បានលើកឡើងបន្ថែមថា គម្រោងសម្រាប់ការតវ៉ារយៈមួយខែដែលក្រុមអ្នកតវ៉ាបានជូនដំណឹងដល់សាលារាជធានីកាលពីដើមសប្តាហ៍នេះ គឺវាមិនយុត្តិធម៌ទេចំពោះអ្នកតវ៉ាផ្សេងៗទៀតដែលប្រហែលជាចង់ប្រើប្រាស់ទីលានប្រជាធិបតេយ្យដែរនោះ។
លោកបានមានប្រសាសន៍បន្ថែមថា "នៅក្នុងច្បាប់ស្តីពីការធ្វើបាតុកម្ម មិនមានចែងថា ពួកគេអាចធ្វើការតវ៉ាបានរយៈពេលមួយខែនោះឡើយ។ យើងជាអាជ្ញាធរ ហើយយើងបានកំណត់ពេលវេលាព្រោះវាមិនមែនគ្រាន់តែពួកគេទេ ដែលចង់បញ្ចេញមតិរបស់ខ្លួននោះ"។
ច្បាប់ស្តីពីការជួបជុំគ្នាដោយអហិង្សាចែងថា ការធ្វើបាតុកម្មដែលធ្វើឡើងក្នុងទីលានប្រជាធិបតេយ្យណាមួយនៅកម្ពុជាអាចធ្វើឡើងចន្លោះពីម៉ោង៦ព្រឹកដល់ម៉ោង៦ល្ងាច។ វាមិនបានកំណត់ពេលវេលាថា តើបាតុកម្មអាចធ្វើឡើងក្នុងរយៈពេលប៉ុន្មានថ្ងៃនោះឡើយ។
លោកស្រី ចក់ សុភាព នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជាបានលើកឡើងតាមរយៈអីុម៉េលមួយកាលពីម្សិលមិញថា ការមិនអនុញ្ញាតឲ្យមានការធ្វើបាតុកម្មនៅទីលានប្រជាធិបតេយ្យគឺវាប្រាសចាកនឹងចំណុចនៅក្នុងច្បាប់ស្តីពីការធ្វើបាតុកម្មនេះ។
លោកស្រី សុភាព បានមានប្រសាសន៍ថា "ការរឹតបន្តឹងចំពោះរយៈពេលនៃការធ្វើបាតុកម្មដោយអហិង្សាវាបង្ហាញយ៉ាងច្បាស់ថា ផ្ទុយទៅនឹងគោលបំណងនៃច្បាប់នេះ ដែលធានាអំពីសេរីភាពនៃការបញ្ចេញមតិរបស់ពលរដ្ឋតាមរយៈការប្រើសិទ្ធិសេរីភាពនៃការជួបជុំរបស់ខ្លួន"។
លោកស្រីបានបន្ថែមទៀតថា "អ្វីដែលកើតឡើងក្នុងថ្ងៃនេះនៅទីលានប្រជាធិបតេយ្យ គឺជាការដាក់កំហិតដ៏អយុត្តិធម៌ដោយគ្មានមូលដ្ឋានច្បាប់ចំពោះការប្រើប្រាស់សិទ្ធិមូលដ្ឋាន "។
អ្នកស្រី យ៉ោម បុប្ផា សកម្មជនប្រឆាំងការបណ្តេញម្នាក់មកពីតំបន់បឹងកក់បានលើកឡើងថា ក្រុមអ្នកតវ៉ារបស់អ្នកស្រីជ្រើសរើសការធ្វើបាតុកម្ម ដែលមានរយៈពេលជាប់ៗគ្មានៅក្នុងទីលានប្រជាធិបតេយ្យនេះ គឺដោយសារតែមិនចង់ធ្វើឲ្យប៉ះពាល់ដល់ប្រជាពលរដ្ឋផ្សេងៗទៀត។
អ្នកស្រីបានប្រាប់ទៅកាន់កងសន្តិសុខថា "ដោយសារយើងមិនចង់ហែក្បួននៅតាមផ្លូវ ហើយមិនចង់ឲ្យអាជ្ញាធរចោទប្រកាន់យើងថា ធ្វើឲ្យប៉ះពាល់ដល់សណ្តាប់ធ្នាប់នោះ យើងបានសម្រេចចិត្តធ្វើការតវ៉ានៅទីលានប្រជាធិបតេយ្យ។ ប្រសិនបើអ្នកឯងមិនអនុញ្ញាតឲ្យយើងធ្វើការតវ៉ានៅទីលានប្រជាធិបតេយ្យទេ អ៊ីចឹងតើអ្នកឯងអនុញ្ញាតឲ្យយើងធ្វើនៅកន្លែងណាទៅ?”។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូបានលើកឡើងថា សាលារាជធានីបិទផ្លូវមិនឲ្យមានការចូលទៅកាន់ទីលានប្រជាធិបតេយ្យនេះ គឺដោយសារតែភាពតានតឹងផ្អែកនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិកំពុងតែមានភាពតានតឹងឡើងវិញម្តងទៀតហើយ។
លោកបានមានប្រសាសន៍ថា "ទីលានប្រជាធិបតេយ្យគឺជាទីកន្លែងសម្រាប់ការជួបជុំគ្នា និងសម្រាប់ការបញ្ចេញមតិយោបល់ដោយអហិង្សា។ ប៉ុន្តែ នៅក្នុងប្រទេសរបស់យើងរដ្ឋាភិបាលបានចាប់ផ្តើមរឹតបន្តឹងសេរីភាព និងសិទ្ធិរបស់ពលរដ្ឋនៅពេលនយោបាយមានភាពតានតឹង"។
កាលពីថ្ងៃច័ន្ទ លោកនាយករដ្ឋមន្ត្រី ហ៊ុន សែន បានព្រមានគណបក្សសង្គ្រោះជាតិថា សមាជិកសភាចំនួនប្រាំពីររូបក្នុងចំណោមសមាជិកសភាទាំងអស់របស់គណបក្សសង្គ្រោះជាតិដែលប្រឈមនឹងការចោទប្រកាន់ពីបទញុះញង់ និងបង្កកុបកម្ម អំឡុងការតវ៉ាកាលពីខែកក្កដា ដើម្បីទាមទារឲ្យមានការបើកទីលានប្រជាធិបតេយ្យ ដោយធ្វើឲ្យអំពើហិង្សាកើតឡើងនោះ នឹងនៅតែអាចប្រឈមនឹងការជាប់ពន្ធនាគារដដែល ថ្វីបើពួកគេមានអភ័យឯកសិទ្ធតំណាងរាស្ត្រក៏ដោយ៕ស៊ុយឈាង(រាយការណ៍បន្ថែមដោយ Chris Mueller)
លោក សម រង្ស៊ី ប្រយ័ត្នប្រយែងពាក្យសម្តី ខណៈលោក ហ៊ុន សែន គំរាមចាប់តំណាងរាស្ត្រដាក់ពន្ធនាគារ
កាលពីម្សិលមិញលោក សម រង្ស៊ី ប្រធានគណបក្សសង្គ្រោះជាតិ មិនបានធ្វើអត្ថាធិប្បាយទេជុំវិញការប្រកាសរបស់លោកនាយករដ្ឋមន្ត្រី ហ៊ុន សែន ថា តំណាងរាស្ត្រ៧រូបមកពីគណបក្សប្រឆាំងរបស់លោកនៅតែត្រូវទទួលការផ្ដន្ទាទោសពីបទ "ដឹកនាំកុបកម្ម" ថ្វីបើលោកមានអភ័យឯកសិទ្ធិតំណាងរាស្ត្រដែលអាចការពារខ្លួនពីការផ្ដន្ទាទោសក្ដី។
លោក ហ៊ុន សែន បានមានប្រសាសន៍កាលពីថ្ងៃច័ន្ទថា តំណាងរាស្ត្រគណបក្សសង្គ្រោះជាតិដែលត្រូវបានដោះលែងពីពន្ធនាគារកាលពីថ្ងៃទី២២ ខែកក្កដា ដើម្បីអនុញ្ញាតឲ្យពួកគាត់ស្បថចូលកាន់មុខតំណែងនៅក្នុងសភា នៅតែប្រឈមការជាប់ពន្ធនាគារដដែលប្រសិនបើគណបក្សប្រឆាំងមិនបញ្ឈប់ការវាយប្រហាររដ្ឋាភិបាលដោយពាក្យសម្ដីទេនោះ ពីព្រោះការចោទប្រកាន់ទាំងនោះធ្វើឡើងមុនពេលពួកគាត់ទទួលបានអភ័យឯកសិទ្ធិតំណាងរាស្ត្រ។
លោកនាយករដ្ឋមន្ត្រីបានព្រមានគណបក្សសង្គ្រោះជាតិថា "តំណាងរាស្ត្រប្រាំពីររូបនៅតែជាប់គុកដដែលហ្នឹង ព្រោះអភ័យឯកសិទ្ធិអ្នកឯងទទួលបានក្រោយពេលដែលគេចោទប្រកាន់"។
នៅពេលសាកសួរអំពីការអត្ថាធិប្បាយទាំងនេះដែលទំនងជាផ្ទុយនឹងជំហររបស់គណបក្សប្រជាជនកម្ពុជា នៅពេលមានកិច្ចព្រមព្រៀងនយោបាយថ្ងៃ២២ កក្កដា...
លោក ហ៊ុន សែន ព្រមានថា តំណាងរាស្ត្រគណបក្សសង្គ្រោះជាតិ៧រូបអាចនឹងជាប់ពន្ធនាគារ
កាលពីម្សិលមិញ លោកនាយករដ្ឋមន្ត្រី ហ៊ុន សែន បានចោទប្រកាន់គណបក្សសង្គ្រោះជាតិថាបានបំពាន "វប្បធម៌នៃការចរចា" ដែលលោក និងគណបក្សប្រឆាំងបានព្រមព្រៀងគ្នាកាលពីឆ្នាំមុន ហើយបានព្រមានតំណាងរាស្ត្រប្រាំពីររូបដែលជាប់ចោទពីបទញុះញង់ និងកុបកម្មថា អភ័យឯកសិទ្ធិតំណាងរាស្ត្ររបស់ពួកគាត់មិនអាចជួយពួកគាត់ឲ្យរួចខ្លួនពីការជាប់ពន្ធនាគារបានឡើយ។
តំណាងរាស្ត្រគណបក្សសង្គ្រោះជាតិទាំងប្រាំពីររូបនេះត្រូវបានចោទប្រកាន់ជុំវិញការតវ៉ាមួយនៅឯទីលានប្រជាធិបតេយ្យកាលពីខែកក្កដា ដែលអំឡុងពេលនោះអ្នកគាំទ្រគណបក្សប្រឆាំងមួយចំនួនបានវាយដំក្រុមសន្តិសុខខណ្ឌ ធ្វើឲ្យពួកគេពីរបីនាក់រងរបួសធ្ងន់។
តំណាងរាស្ត្រទាំងេនះត្រូវបានផ្តល់អភ័យឯកសិទ្ធិតំណាងរាស្ត្រឲ្យរួចខ្លួនពីការផ្តន្ទាទោសនៅពេលក្រោយមកក្នុងឆ្នាំដដែលនោះ បន្ទាប់ពីគណបក្សសង្គ្រោះជាតិបានចុះកិច្ចព្រមព្រៀងកាលពីខែកក្កដាជាមួយគណបក្សប្រជាជនកម្ពុជា កាន់អំណាចជុំវិញការបោះឆ្នោតថ្នាក់ជាតិដ៏ចម្រូងចម្រាសកាលពីឆ្នាំ២០១៣ ហើយបានបញ្ចប់ការធ្វើពហិការមិនចូលសភារយៈពេលមួយឆ្នាំរបស់ខ្លួន។
បើមានសំឡេងបីភាគបួន សភាក៏អាចព្យួរការផ្តន្ទាទោសតំណាងរាស្ត្របានដែរ។ ប៉ុន្តែ
អំឡុងសុន្ទរកថាក្នុងពិធីប្រគល់សញ្ញាបត្រកម្រិតសាកលវិទ្យាល័យនៅក្នុងខេត្តស្វាយរៀងកាលពីម្សិលមិញ លោក ហ៊ុន សែន បានមានប្រសាសន៍ថា គណបក្សប្រជាជនកម្ពុជា ដែលមានសំឡេងភាគច្រើននៅក្នុងសភា នឹងមិនយល់ព្រមធ្វើដូច្នេះឡើយ ប្រសិនបើគណបក្សប្រឆាំងនៅតែបន្តវាយប្រហារលោក និងគណបក្សរបស់លោកតទៅទៀត។
លោកបានមានប្រសាសន៍ថា "បើលោកឯងជំហរបែបហ្នឹង គណបក្សប្រជាជនខ្ញុំប្រកាសជំហរដាច់ខាតមិនគាំទ្រឲ្យលុប ចោលទេ។ ខ្ញុំ ហ៊ុន សែន ជាតំណាងរាស្ត្រម្នាក់ ហើយជាថ្នាក់ដឹកនាំគណបក្សប្រជាជនដែលមានសមាជិក៦៨រូប មិនគាំទ្រឲ្យលុបចោលទេ។ អញ្ចឹងតំណាងរាស្ត្រប្រាំពីររូបនៅតែជាប់គុកដដែលហ្នឹង ព្រោះអភ័យឯកសិទ្ធិអ្នកឯងទទួលបានក្រោយពេលដែលគេចោទប្រកាន់ អាហ្នឹងសិក្សាផ្លូវច្បាប់។ លោកឯងខាងណោះក៏ចេះច្បាប់ដែរ ខាងណេះក៏គេចេះ គេមិនល្ងង់ជាងលោកឯងទេ ហើយលោកឯងក៏មិនល្ងង់ជាងខ្ញុំដែរ"។
លោក ហ៊ុន សែន បានព្រមានថា តំណាងរាស្ត្រទាំងនេះទំនងជាគ្មានសេរីភាពយូរទៀតឡើយ។ លោកលើកឡើងថា “លោកឯងទៅវៃគេ ដឹកនាំអំពើហិង្សា។អ្នកដែលគេឲ្យនៅក្រៅឃុំ គ្រាន់តែគេឲ្យនៅក្រៅឃុំបណ្តោះអាសន្នទេ កាត់ទោសនៅតែកាត់ទោសហ្នឹង តែអានេះជាដំណើរការរបស់តុលាការ។ តែខ្ញុំឲ្យសារជូនអ្នកឯងឲ្យហើយទៅ បើអ្នកឯងនៅតែព្រហើន សម្រុះសម្រួលៗ ហើយមកឲ្យខ្ញុំគិតឲ្យស្រួល រួចចេះតែវៃក្បាលខ្ញុំ"។
មុនពេលធ្វើការគំរាមកំហែងបែបនេះ លោកនាយករដ្ឋមន្ត្រីបានរិះគន់លោក កឹម សុខា អនុប្រធានគណបក្សសង្គ្រោះជាតិ ដែលបានរិះគន់គណបក្សប្រជាជនកម្ពុជា ក្នុងពេលថ្មីៗនេះ។
នៅក្នុងសុន្ទរកថាមួយកាលពីថ្ងៃអាទិត្យ លោក កឹម សុខា បានចោទប្រកាន់រដ្ឋាភិបាលរបស់លោក ហ៊ុន សែន ថា បានកឹបកេងធនធានធម្មជាតិរបស់ប្រទេសដើម្បីផលប្រយោជន៍ផ្ទាល់ខ្លួន។
កាលពីម្សិលមិញ លោក ហ៊ុន សែន បានវាយបកទៅវិញយ៉ាងដូច្នេះថា “ខ្ញុំតបទៅវិញថា សូមប្រើភាសាចិញ្ចើមថ្នល់ល្មមៗបានហើយ។លោកឯងធ្វើឲ្យប្រជាជនពិបាកមិនគ្រប់គ្រាន់ទេ នៅពេលលោកឯងធ្វើបាតុកម្មសម្តែងការមិនពេញចិត្តក្រោយការបោះឆ្នោត?”។
ចាប់តាំងពីមានកិច្ចព្រមព្រៀងកាលពីខែកក្កដាមក លោក ហ៊ុន សែន បានរិះគន់គណបក្សប្រឆាំងធ្ងន់ៗដូចដែលគណបក្សប្រឆាំងបានរិះគន់លោកដែរ។ គ្រាន់តែក្នុងរយៈពេលពីរបីសប្តាហ៍មកនេះ លោកបានចោទប្រកាន់លោក យឹម សុវណ្ណ តំណាងរាស្ត្រគណបក្សសង្គ្រោះជាតិថា បានផិតក្បត់ប្រពន្ធកូន ហើយបានមានប្រសាសន៍ថា អ្នកណាដែលប្រឆាំងគណបក្សប្រជាជនកម្ពុជាមានន័យថា អ្នកនោះគាំទ្ររបប ប៉ុល ពត ព្រៃផ្សៃ។
ទោះបីជាដូច្នេះក្តី ក៏លោកនាយករដ្ឋមន្ត្រីបានមានប្រសាសន៍ថា គណបក្សសង្គ្រោះជាតិបានបំពានការសន្យាដែលគណបក្សទាំងពីរបានធ្វើឡើងជាផ្នែកនៃកិច្ចព្រមព្រៀងកាលពីថ្ងៃទី២២ កក្កដា ដែលបានធ្វើឲ្យគណបក្សប្រឆាំងបញ្ចប់ការធ្វើពហិការមិនចូលសភាជាថ្នូរនឹងការសន្យារបស់គណបក្សប្រជាជនកម្ពុជាថា នឹងចាប់ផ្តើមចរចាជុំវិញកំណែទម្រង់បោះឆ្នោតជាច្រើន។
លោកបានមានប្រសាសន៍ថា “ខ្ញុំសូមផ្តាំផ្ញើទៅឯកឧត្តម សម រង្ស៊ី ថា វប្បធម៌សន្ទនារបស់ឯកឧត្តមគ្មានប្រសិទ្ធភាពទេ។ រាប់ទាំងឯកឧត្តម ឯកឧត្តមមិនត្រូវបិទមាត់ខ្ញុំ ហើយទាំងអនុរបស់ឯកឧត្តម ឥឡូវលេងគ្នាទៅ អូខេ មិនចាំបាច់សន្ទនាមិនសន្ទនាអីទេ"។
នៅពេលទាក់ទង បន្ទាប់ពីសុន្ទរកថារបស់លោកនាយករដ្ឋមន្ត្រី លោក រៀល ខេមរិន្ទ្រតំណាងរាស្ត្ររបស់គណបក្សសង្គ្រោះជាតិដែលស្ថិតក្នុងចំណោមតំណាងរាស្ត្រទាំងប្រាំពីររូបដែលជាប់ចោទពីបទកុបកម្ម បានមានប្រសាសន៍ថា គណបក្សប្រឆាំងគោរពតាមកិច្ចព្រមព្រៀងនេះ។
លោកមានប្រសាសន៍ថា "គណបក្សសង្គ្រោះជាតិគោរពកិច្ចព្រមព្រៀងនេះ១០០ភាគរយ។ គាត់ បានមានប្រសាសន៍ថា គណបក្សសង្គ្រោះជាតិមិនធ្វើអ្វីទាំងអស់ពាក់ព័ន្ធនឹងកិច្ចព្រមព្រៀង២២ កក្កដា ដែលមិនមែនជាការពិត។ គាត់ខ្លួនឯងមិនទាំងគោរពវាផង"។
លោក រៀល ខេមរិន្ទ្រ បានមានប្រសាសន៍ថា លោកនាយករដ្ឋមន្ត្រីក៏យល់ខុសដែរចំពោះការអះអាងថា អភ័យឯកសិទ្ធិតំណាងរាស្ត្រដែលលោកទទួលបានក្រោយពីទទួលយកអាសនៈសភារបស់លោក គ្មានប្រសិទ្ធិភាព។ លោកបានបន្ថែមថា "គេបានចោទប្រកាន់យើងដោយសារតែយើងគ្មានអភ័យឯកសិទ្ធិប៉ុន្តែ ពេលនេះយើងមានអភ័យឯកសិទ្ធិ តើពួកគេនៅតែអាចចោទប្រកាន់យើងបានទៀតដោយរបៀបណា"?៕សុខុម
ជនបរទេសប្រហែលជាត្រូវហាមឃាត់មិនឲ្យពាក់ព័ន្ធនៅក្នុងយុទ្ធនាការបោះឆ្នោត
លោកឧបនាយករដ្ឋមន្ត្រី ប៊ិន ឈិន បានឲ្យដឹងកាលពីម្សិលមិញថា លោកបានធ្វើសេចក្ដីព្រាងច្បាប់មួយសម្រាប់ច្បាប់បោះឆ្នោតថ្មី ដែលនឹងហាមឃាត់មិនឲ្យជនបរទេស និងអង្គការមិនមែនរដ្ឋាភិបាលបញ្ចេញមតិយោបល់ទាក់ទិននឹងរឿងនយោបាយអំឡុងការបោះឆ្នោត។
លោក ប៊ិន ឈិន កំពុងតែដឹកនាំគណបក្សប្រជាជនកម្ពុជានៅក្នុងការចរចាជាមួយគណបក្សសង្គ្រោះជាតិ ដែលមានលោក គួយ ប៊ុនរឿន ជាអ្នកដឹកនាំក្រុមចរចាដើម្បីធ្វើវិសោធនកម្មច្បាប់បោះឆ្នោតថ្មី ក្រោយកិច្ចព្រមព្រៀងកាលពីខែមុនក្នុងគោលបំណងបង្កើតគណៈកម្មាធិការជាតិរៀបចំការបោះឆ្នោតថ្មី ដែលមានសមាជិកមកពីគណបក្សទាំងពីរចូលរួម។
នៅពេលចាកចេញពីកិច្ចពិភាក្សាស្ដីអំពីកំណែទម្រង់បោះឆ្នោតកាលពីម្សិលមិញ លោក ប៊ិន ឈិន បានលើកឡើងថា គណបក្សទាំងពីរបានពិភាក្សាអំពីច្បាប់ថ្មីទាក់ទិននឹងម៉ោងដែលមន្ត្រីត្រូវមកដល់មណ្ឌលបោះឆ្នោត ប៉ុន្តែថា លោកកំពុងតែធ្វើការលើប្រធានបទមួយដែលសំខាន់ជាងនេះ។
លោកបានមានប្រសាសន៍ថា "ខ្ញុំបានសរសេរសេចក្ដីព្រាងច្បាប់ដើម្បីបញ្ជាក់ថា...
លោក កឹម សុខា រិះគន់សម័យរបស់លោក ហ៊ុន សែន ថាជាសម័យបំផ្លិចបំផ្លាញ
កាលពីម្សិលមិញលោក កឹម សុខា អនុប្រធានគណបក្សសង្គ្រោះជាតិបានធានាចំពោះអ្នកគាំទ្រថា គណបក្សសង្គ្រោះជាតិនៅតែកំពុងធ្វើការដើម្បីបណ្ដេញលោកនាយករដ្ឋមន្ត្រី ហ៊ុន សែន ចេញពីអំណាច ដោយអះអាងថា គ្មានមេដឹកនាំកម្ពុជាណាដែលបំផ្លិចបំផ្លាញបរិស្ថានដូចលោក ហ៊ុន សែន អំឡុងលោកកាន់អំណាចឡើយ។
ពេលថ្លែងនៅក្នុងវេទិការសាធារណៈមួយរបស់គណបក្សសង្គ្រោះជាតិនៅក្នុងសង្កាត់ជ្រោយចង្វារ រាជធានីភ្នំពេញ លោក កឹម សុខា បានគូសបញ្ជាក់ថា កាលពីសប្ដាហ៍មុន លោក ហ៊ុន សែន បានរំឭកខួបនៃការកាន់អំណាចបានរយៈពេល៣០ឆ្នាំរបស់លោកចាប់តាំងពីទសវត្សរ៍ឆ្នាំ១៩៨០ដែលប្រទេសកម្ពុជានៅជាប្រទេសកុម្មុយនី្តនៅឡើយមក។
លោក កឹម...
មេដឹកនាំអង្គការមិនមែនរដ្ឋាភិបាលរិះគន់ចំពោះការហាមឃាត់មិនឲ្យធ្វើអត្ថាធិប្បាយ អំឡុងយុទ្ធនាការឃោសនាបោះឆ្នោត
កាលពីម្សិលមិញមេដឹកនាំសង្គមស៊ីវិលបានអំពាវនាវដល់មេដឹកនាំគណបក្សនយោបាយធំៗទាំងពីរក្នុងប្រទេសកម្ពុជាចំពោះផែនការហាមឃាត់ពួកគេមិនឲ្យផ្តល់បទសម្ភាសតាមប្រព័ន្ធផ្សព្វផ្សាយអំឡុងយុទ្ធនាការឃោសនាបោះឆ្នោត និងមិនឲ្យចេញសេចក្តីថ្លែងការណ៍បែប "ប្រមាថ"ដល់គណបក្សណាមួយ។
លោក ប៊ិន ឈិន ឧបនាយករដ្ឋមន្ត្រីគណបក្សប្រជាជនកម្ពុជា និងលោក គួយ ប៊ុនរឿន មន្ត្រីជាន់ខ្ពស់គណបក្សសង្គ្រោះជាតិ ដែលបានដឹកនាំការចរចាដើម្បីធ្វើវិសោធនកម្មច្បាប់បោះឆ្នោតជាតិបានមានប្រសាសន៍កាលពីថ្ងៃសុក្រថា ពួកគេកំពុងពិចារណាការដាក់បម្រាមបែបនេះដើម្បីធានាថា អង្គការមិនមែនរដ្ឋាភិបាល ត្រូវនៅ "ជាអព្យាក្រឹត"។
អង្គការមិនមែនរដ្ឋាភិបាលបានដើរតួនាទីអព្យាក្រឹតជាយូរមកហើយនៅក្នុងការបោះឆ្នោតក្នុងប្រទេសកម្ពុជា ដោយធ្វើការស្រាវជ្រាវដ៏សំខាន់ៗអំពីប្រធានបទនានាចាប់ពីបញ្ជីឈ្មោះបោះឆ្នោតពុករលួយរហូតដល់ការប្រើអំពើហិង្សាពេលបោះឆ្នោត និងផ្តល់ការពិនិត្យជាប់ជានិច្ចអំពីរដ្ឋាភិបាល។
លោក ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត និងមិនលម្អៀង ដើម្បីការបោះឆ្នោតដោយសេរីនិងយុត្តិធម៌នៅកម្ពុជាបានមានប្រសាសន៍ថា ការហាមឃាត់ណាមួួយទៅលើការអត្ថាធិប្បាយរបស់សង្គមស៊ីវិលស្តីពីការបោះឆ្នោត នឹងជាធ្វើឲ្យប៉ះពាល់ដល់ក្តីសង្ឃឹមសម្រាប់លទ្ធិប្រជាធិបតេយ្យក្នុងប្រទេសកម្ពុជា។
លោក ហង្ស ពុទ្ធា បានមានប្រសាសន៍ថា ការរារាំងអង្គការសង្គមស៊ីវិលមិនឲ្យផ្ដល់យោបល់អំឡុងយុទ្ធនាការឃោសនាបោះឆ្នោត គឺជាដំណើរការដើរថយក្រោយចំពោះលទ្ធិប្រជាធិបតេយ្យក្នុងប្រទេសកម្ពុជា"។
លោកបានមានប្រសាសន៍ថា "ក្នុងនាមសង្គមស៊ីវិល យើងដឹងថា គណបក្សនយោបាយទាំងពីរកំពុងធ្វើរឿងនេះដោយសម្ងាត់ មិនបើកចំហដល់សាធារណជនឡើយ ហើយថា ពួកគេគិតអំពីផលប្រយោជន៍ផ្ទាល់ខ្លួន ដោយមិនគិតដល់សាធារណជនទូទៅឡើយ"។
លោក ហង្ស ពុទ្ធា បានបន្ថែមថា ខ្ញុំនឹងបន្តពិភាក្សាពីបញ្ហានេះ ពីព្រោះការបោះឆ្នោតមិនមែនជាកម្មសិទ្ធិរបស់គណបក្សទាំងនេះឡើយ វាជារបស់សាធារណជនទូទៅ។ តាមពិតយើងមិនដែលប្រមាថនរណាម្នាក់ឡើយ ពីព្រោះយើងមានភ័ស្តុតាងដើម្បីបង្ហាញអ្វីដែលយើងបាននិយាយ"។
លោក គល់ បញ្ញា...
ឯកអគ្គរដ្ឋទូតអាល្លឺម៉ង់ ប្រចាំកម្ពុជា រិះគន់លោក សៅ សុខា យ៉ាងខ្លាំងចំពោះការកោតសរសើរ អីុត្លែរ
កាលពីថ្ងៃសុក្រ ឯកអគ្គរដ្ឋទូតអាល្លឺម៉ង់ ប្រចាំកម្ពុជា បានរិះគន់លោក សៅ សុខា មេបញ្ជាការកងរាជអាវុធហត្ថលេើផ្ទៃប្រទេស យ៉ាងខ្លាំងចំពោះការកោតសរសើរយុទ្ធសាស្ត្ររបស់ អាដូហ្វ អីុត្លែរ មេដឹកនាំផ្តាច់ការនៃពួកណាហ្ស៊ី មកធ្វើជាគំរូសម្រាប់រក្សាសណ្តាប់ធ្នាប់សង្គម ដោយលោកបានមានប្រសាសន៍ថា "មិនដែលមានអ្នកមានសតិត្រឹមត្រូវណាចង់យកអីុត្លែរ ធ្វើជាគំរូឡើយ"។
លោក ចូអាជីម បារ៉ុន វ៉ុន ម៉ាស្កាល់ (Joachim Baron von Marschall) ដែលត្រូវបានតែងតាំងជាឯកអគ្គរដ្ឋទូតប្រចាំកម្ពុជា នៅក្នុងឆ្នាំ២០១៣ ក៏បានស្នើសុំឲ្យរដ្ឋាភិបាលកម្ពុជា ដោះស្រាយបញ្ហាសន្តិសុខជាតិ និងសន្តិសុខសាធារណៈ "ស្របតាមគោលការណ៍លទ្ធិប្រជាធិបតេយ្យ និងផ្ទុយពីវិធីដែលពួកណាហ្ស៊ី ដោះស្រាយបញ្ហាសន្តិសុខ" ផងដែរ។
អំឡុងអង្គសន្និបាតបូកសរុបការងារប្រចាំឆ្នាំនៃកងរាជអាវុធហត្ថលើផ្ទៃប្រទេសដែលធ្វើឡើងនៅក្នុងរាជធានីភ្នំពេញកាលពីថ្ងៃព្រហស្បតិ៍ នាយឧត្តមសេនីយ៍ សៅ សុខា បានមានប្រសាសន៍ថា លោកមានការស្ញប់ស្ញែងចំពោះការក្រោកឡើងបះបោររបស់អាល្លឺម៉ង់ក្រោមការដឹកនាំរបស់ អីុត្លែរ នៅក្នុងទសវត្សរ៍ឆ្នាំ១៩៣០។
លោក សៅ សុខា បានមានប្រសាសន៍យ៉ាងដូច្នេះថា "និយាយតាមត្រង់ ខ្ញុំបានរៀនសូត្រពី អីុត្លែរ។ ក្រោយសង្គ្រាមលោកលើកទី១ សហគមន៍អន្តរជាតិមិនអនុញ្ញាតឲ្យអាល្លឺម៉ង់មានទាហានលើសពី១០០.០០០នាក់ឡើយ ប៉ុន្តែ ពួកណាហ្ស៊ី និង អីុត្លែរ បានធ្វើអ្វីគ្រប់យ៉ាងដើម្បីបង្កសង្គ្រាមលោកលើកទី២"។
ពេលទាក់ទងកាលពីថ្ងៃសុក្រ លោក ចូអាជីម បារ៉ុន វ៉ុន ម៉ាស្កាល់ បានមានប្រសាសន៍ថា លោក "ភ្ញាក់ផ្អើល" ដែលមានអ្នកយកមេដឹកនាំនៃរបបណាហ្ស៊ី ដ៏ព្រៃផ្សៃ ជាអ្នកទទួលខុសត្រូវចំពោះការស្លាប់របស់ជនជាតិជ្វីហ្វ ប្រមាណ៦លាននាក់នៅហូឡូកូស (Holocaust) និងការសម្លាប់អ្នកស្រឡាញ់ភេទដូចគ្នា ជនផ្តាច់ការ ជនជាតិស្បែកសមួយក្រុមមកពីប្រទេសឥណ្ឌា ដែលគេស្គាល់ថា ហ្គីបស៊ី (Gypsy) អ្នកទោសសង្គ្រាម និងជនពិការាប់លាននាក់នៅទសវត្សរ៍ឆ្នាំ១៩៤០ យកមកធ្វើជាគំរូ។
លោកបានលើកឡើងតាមអីុម៉េលថា "ខ្ញុំសូមសារភាពដោយស្មោះថា ខ្ញុំភ្ញាក់ផ្អើលយ៉ាងខ្លាំងចំពោះពាក្យសម្តីទាំងអស់នេះ ពីព្រោះខ្ញុំធ្លាប់តែគិតថា មិនដែលអ្នកមានសតិត្រឹមត្រូវណាចង់និយាយសរសើរ អីុត្លែរ ធ្វើជាគំរូឡើយ។អ្វីដែលខ្ញុំអាចបកស្រាយបានគឺថា ខ្វះការយល់ដឹងខ្លាំងចំពោះទំហំនៃភាពព្រៃផ្សៃដែលរបបណាហ្ស៊ី បានប្រព្រឹត្តទៅលើអ្នកណាដែលគេយល់ថា រាំងផ្លូវរបស់ពួកគេ"។
លោកស្រី មូរ សុខហួរ តំណាងរាស្ត្រជាន់ខ្ពស់របស់គណបក្សប្រឆាំង បានមានប្រសាសន៍ថា លោកស្រី "ភ្ញាក់ផ្អើលយ៉ាងខ្លាំង" ចំពោះការអត្ថាធិប្បាយរបស់នាយឧត្តមសេនីយ៍ សៅ សុខា ហើយបានអំពាវនាវឲ្យដកលោកចេញពីតំណែង។
លោកស្រីបានមានប្រសាសន៍ថា "ខ្ញុំហួសពីភ្ញាក់ផ្អើលទៅទៀត។ ខ្ញុំភ័យខ្លាចចំពោះផលវិបាកដែលអ្នកតវ៉ាត្រូវប្រឈម ប្រសិនបើបុរសម្នាក់នេះនៅបន្តកាន់តំណែងជាមេបញ្ជាការកងរាជអាវុធហត្ថរបស់កម្ពុជា"។
លោកស្រីបានលើកឡើងថា ពាក្យសម្តីរបស់លោក សៅ សុខា គួរឲ្យព្រួយបារម្ភយ៉ាងខ្លាំង ពីព្រោះកម្ពុជា និងអាល្លឺម៉ង់ សុទ្ធតែមានប្រវត្តិធ្លាប់ឆ្លងកាត់អំពើប្រល័យពូជសាសន៍ដូចគ្នា។
លោកស្រីបានបន្តថា "គាត់ត្រូវតែដឹងពីផលវិបាកនៃពាក្យសម្តីរបស់គាត់ក្នុងឋានៈជាមេបញ្ជាការនៅក្នុងប្រទេសនេះ និងជាពិសេសសម្រាប់កម្ពុជា ជាប្រទេសមួយដែលបានឆ្លងកាត់អំពើប្រល័យពូជសាសន៍។ ហើយពេលនេះ ការឮថាមេបញ្ជាការម្នាក់ស្ញប់ស្ញែងចំពោះអីុត្លែរ គឺជាថ្ងៃក្រៀមក្រមសម្រាប់កម្ពុជា"។
នាយឧត្តមសេនីយ៍ សៅ សុខា មិនអាចទាក់ទងសុំការបំភ្លឺបានទេកាលពីថ្ងៃសុក្រទាក់ទិននឹងរឿងនេះ។ បុរសម្នាក់ដែលអះអាងថាខ្លួនជាអង្គរក្សរបស់នាយឧត្តមសេនីយ៍រូបនេះ បានលើកទូរស័ព្ទរបស់លោក សៅ សុខា ហើយនិយាយថា មេរបស់ខ្លួនកំពុងជាប់ប្រជុំ។
ទោះជាយ៉ាងណា លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា នាយឧត្តមសេនីយ៍ សៅ សុខា ពិតជាបានលើកឡើងអំពីមេដឹកនាំពិភពលោកល្បីៗមួយចំនួនមែននៅក្នុងសុន្ទរកថារបស់លោកកាលពីថ្ងៃព្រហស្បតិ៍ ប៉ុន្តែលោកគ្មានបំណងឲ្យអ្នកចូលរួមស្តាប់យកពួកគេធ្វើជាគំរូនោះទេ។
ឧត្តមសេនីយ៍ត្រី ខេង ទីតូ បានមានប្រសាសន៍ថា "បន្ទាប់ពីលោកបានមានប្រសាសន៍រួច លោកបានបញ្ជូនសារ កុំឲ្យយកពាក្យសម្តីរបស់លោកទៅបកស្រាយ"៕សុខុម (រាយការណ៍បន្ថែមដោយ ឃី សុវុឌ្ឍី)
អភិបាលក្រុងឡូវែល សហរដ្ឋអាមេរិក នឹងស្នើឲ្យរដ្ឋាភិបាលកម្ពុជា ពិចារណាឡើងវិញចំពោះការឃុំខ្លួនសកម្មជន
កាលពីថ្ងៃសុក្រ អភិបាលក្រុងឡូវែល(Lowell) រដ្ឋម៉ាសាជូសេត (Massachusetts) ដែលជាទីក្រុងមានពលរដ្ឋអាមេរិក ដើមកំណើតកម្ពុជា រស់នៅច្រើនបំផុតទី២ក្នុងសហរដ្ឋអាមេរិក បានទៅសួរសុខទុក្ខសកម្មជនប្រឆាំងការបណ្តេញចេញចំនួន១០នាក់នៅក្នុងពន្ធនាគារព្រៃស ដោយប្រកាសថា លោកនឹងបញ្ចុះបញ្ចូលរដ្ឋាភិបាលឲ្យដោះលែងពួកគេ។
ដោយបញ្ចប់ដំណើរទស្សនកិច្ចចំនួនប្រាំថ្ងៃនៅរាជធានីភ្នំពេញ លោក រ៉ដនី អេលីយ៉ូត (Rodney Elliott) បានចំណាយពេលប្រហែលមួយម៉ោងនៅក្នុងពន្ធនាគារដែលមានសន្តិសុខយាមកាមតឹងរឹុងបំផុតនេះ ជាកន្លែងឃុំឃាំងស្ត្រីសកម្មជនទាំងនេះចាប់តាំងពីពួកគេត្រូវបានតុលាការផ្តន្ទាទោសជុំវិញការតវ៉ាចំនួនពីរលើកកាលពីខែវិច្ឆិកាមក។ ប្រាំបួននាក់ក្នុងចំណោមស្ត្រីសកម្មជនទាំងនេះ មកពីតំបន់បឹងកក់ដែលមានប្រជាពលរដ្ឋប្រមាណ៣.០០០គ្រួសារត្រូវបានបណ្តេញចេញដោយបង្ខំដើម្បីបើកផ្លូវសម្រាប់គម្រោងអភិវឌ្ឍន៍មួយរបស់សមាជិកព្រឹទ្ធសភាមួយរូបមកពីគណបក្សកាន់អំណាច។
មុនពេលចូលទៅក្នុងពន្ធនាគារ លោក រ៉ដនី អេលីយ៉ូត បានលើកឡើងថា "សិទ្ធិមូលដ្ឋាន សិទ្ធិមនុស្សជាមូលដ្ឋានដែលយើងទទួលបាននៅក្នុងសហរដ្ឋអាមេរិក ចាំបាច់ត្រូវតែទទួលបានដូចគ្នា។ ស្ត្រីទាំងនេះ ម្ចាស់ដីទាំងនេះហាក់ដូចជាមិនទទួលបាននីតិវិធីត្រឹមត្រូវឡើយ ហើយយើងគិតថា វាជារឿងសំខាន់ដែលត្រូវយកបញ្ហានោះទៅពិចារណា"។
នៅខាងក្នុងពន្ធនាគារ អ្នកស្រី ទេព វន្នី សកម្មជនសិទ្ធិមនុស្សដ៏លេចធ្លោ បានប្រាប់លោក រ៉ដនី អេលីយ៉ូត ថា ផ្ទះរបស់ប្រជាពលរដ្ឋប្រមាណ៦០០គ្រួសារដែលកំពុងរស់នៅក្នុងតំបន់បឹងកក់នៅឡើយ តែងតែលិចទឹកជាប្រចាំដោយសារគ្មានប្រព័ន្ធលូគ្រប់គ្រាន់។
អ្នកស្រីនិយាយថា "យើងទាំងអស់គ្នាត្រូវបានចាប់ខ្លួនដាក់ពន្ធនាគារដោយសារតែយើងតវ៉ាទាមទារឲ្យសាលាក្រុងបូមទឹកចេញពីផ្ទះរបស់យើងដែលទឹកលិចលង់"។
បន្ទាប់ពីចាកចេញពីពន្ធនាគារព្រៃស លោក រ៉ដនី អេលីយ៉ូត បានមានប្រសាសន៍ទៅកាន់ក្រុមអ្នកយកព័ត៌មានថា លោកបានសម្រេចចិត្តមកសួរសុខទុក្ខសកម្មជនទាំងនេះ បន្ទាប់ពីទទួលបានសំណើជាច្រើនពីពលរដ្ឋរស់នៅក្រុងឡូវែល ដែលមានជនជាតិអាមេរិក ដើមកំណើតកម្ពុជា ប្រមាណ៣០.០០០នាក់ សុំឲ្យលោកជួយពិនិត្យមើលសុខភាព និងសុខុមាលភាពរបស់ពួកគេ។
អភិបាលក្រុងរូបនេះក៏បានមានប្រសាសន៍ដែរថា ក្រុមគណៈប្រតិភូរបស់លោកនឹងស្នើឲ្យរដ្ឋាភិបាលកែប្រែសេចក្តីសម្រេចរបស់តុលាការក្នុងការផ្តន្ទាទោស និងឃុំខ្លួនស្ត្រីទាំងនេះ។ លោកមានប្រសាសន៍ថា "យើងនឹងដាក់សំណើសុំឲ្យរដ្ឋាភិបាលពិចារណាឡើងវិញចំពោះសេចក្តីសម្រេចរបស់តុលាការ។ ផ្អែកតាមការសន្ទនារបស់យើង ពួកគាត់ មិនបានធ្វើអ្វីខុសទេក្រៅតែពីសុំបញ្ចេញមតិ ដូច្នេះការដាក់សំណើរទៅរដ្ឋាភិបាលជាអ្វីដែលយើងនឹងធ្វើ"។
ទោះជាយ៉ាងណា លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានមានប្រសាសន៍ថា រដ្ឋាភិបាលនឹងមិនពិចារណាសំណើណាមួយពីលោក រ៉ដនី អេលីយ៉ូត ឡើយ។ លោកមានប្រសាសន៍ថា "ក្តីបារម្ភគឺជារឿងល្អ ប៉ុន្តែ វាជាបញ្ហាផ្ទៃក្នុងនៅកម្ពុជា។ ខ្ញុំសោកស្តាយណាស់ពីព្រោះគាត់គ្មានឱកាសយល់ពីករណីនេះ និងអ្វីដែលជាយុត្តាធិការនៅទីនេះ។ យើងមិនចង់ធ្វើឲ្យគាត់មិនសប្បាយចិត្តទេ ប៉ុន្តែ គាត់នឹងស្វែងយល់ គាត់នឹងបញ្ជាក់រឿងនោះបានតាមក្រោយ ពេលគាត់ទៅដល់សហរដ្ឋអាេមរិកវិញ"។
លោកបានមានប្រសាសន៍បន្ថែមទៀតថា សេរីភាពបញ្ចេញមតិនៅកម្ពុជា ទូលំទូលាយជាងនៅក្នុងសហរដ្ឋអាេមរិក។ "នៅកម្ពុជា អ្នកណានិយាយអ្វីក៏បាន។ គាត់ អាចនិយាយអ្វីក៏បាននៅកម្ពុជា គឺប្រសើរជាងនៅសហរដ្ឋអាមេរិក ពីព្រោះភ្ញៀវបរទេស មិនអាចនិយាយអ្វីអំពីរដ្ឋាភិបាលបានទេ ប៉ុន្តែ នៅកម្ពុជា អ្នកអាចនិយាយអ្វីក៏បាន"។
លោក ង៉ោ គឹមជាង តំណាងរាស្ត្រមួយរូបក្នុងចំណោមតំណាងរាស្ត្រពីររូបរបស់គណបក្សសង្គ្រោះជាតិ ដែលបានអមដំណើរលោក រ៉ដនី អេលីយ៉ូត ចូលទៅក្នុងពន្ធនាគារបានមានប្រសាសន៍ថា លោកមិនភ្ញាក់ផ្អើលចំពោះប្រតិកម្មរបស់រដ្ឋាភិបាលទេ ប៉ុន្តែ ទោះជាយ៉ាងណា លោកសង្ឃឹមថា អភិបាលក្រុងរូបនេះនឹងមានឥទ្ធិពលខ្លះលើរដ្ឋាភិបាល។
លោកបានមានប្រសាសន៍ទៀតថា "យើងសង្ឃឹមថា ពាក្យសម្តីរបស់អភិបាលក្រុងរូបនេះ និងការដែលលោកមកពីសហរដ្ឋអាេមរិក ដែលជាបិតាប្រជាធិបតេយ្យ និងសិទ្ធិមនុស្ស នឹងមានឥទ្ធិពល។ ដូច្នេះសង្ឃឹមថា ពួកគេនឹងស្តាប់"៕សុខុម