កាលពីម្សិលមិញលោក សម រង្ស៊ី ប្រធានគណបក្សសង្គ្រោះជាតិ មិនបានធ្វើអត្ថាធិប្បាយទេជុំវិញការប្រកាសរបស់លោកនាយករដ្ឋមន្ត្រី ហ៊ុន សែន ថា តំណាងរាស្ត្រ៧រូបមកពីគណបក្សប្រឆាំងរបស់លោកនៅតែត្រូវទទួលការផ្ដន្ទាទោសពីបទ “ដឹកនាំកុបកម្ម” ថ្វីបើលោកមានអភ័យឯកសិទ្ធិតំណាងរាស្ត្រដែលអាចការពារខ្លួនពីការផ្ដន្ទាទោសក្ដី។
លោក ហ៊ុន សែន បានមានប្រសាសន៍កាលពីថ្ងៃច័ន្ទថា តំណាងរាស្ត្រគណបក្សសង្គ្រោះជាតិដែលត្រូវបានដោះលែងពីពន្ធនាគារកាលពីថ្ងៃទី២២ ខែកក្កដា ដើម្បីអនុញ្ញាតឲ្យពួកគាត់ស្បថចូលកាន់មុខតំណែងនៅក្នុងសភា នៅតែប្រឈមការជាប់ពន្ធនាគារដដែលប្រសិនបើគណបក្សប្រឆាំងមិនបញ្ឈប់ការវាយប្រហាររដ្ឋាភិបាលដោយពាក្យសម្ដីទេនោះ ពីព្រោះការចោទប្រកាន់ទាំងនោះធ្វើឡើងមុនពេលពួកគាត់ទទួលបានអភ័យឯកសិទ្ធិតំណាងរាស្ត្រ។
លោកនាយករដ្ឋមន្ត្រីបានព្រមានគណបក្សសង្គ្រោះជាតិថា “តំណាងរាស្ត្រប្រាំពីររូបនៅតែជាប់គុកដដែលហ្នឹង ព្រោះអភ័យឯកសិទ្ធិអ្នកឯងទទួលបានក្រោយពេលដែលគេចោទប្រកាន់”។
នៅពេលសាកសួរអំពីការអត្ថាធិប្បាយទាំងនេះដែលទំនងជាផ្ទុយនឹងជំហររបស់គណបក្សប្រជាជនកម្ពុជា នៅពេលមានកិច្ចព្រមព្រៀងនយោបាយថ្ងៃ២២ កក្កដា ដែលបានបញ្ចប់ការធ្វើពហិការមិនចូលសភារបស់គណបក្សសង្គ្រោះជាតិនោះ លោក សម រង្ស៊ី បានបដិសេធមិនធ្វើអត្ថាធិប្បាយទេ។
មេដឹកនាំគណបក្សប្រឆាំងរូបនេះបានមានប្រសាសន៍ថា ” ខ្ញុំចង់ធ្វើឲ្យស្ថានភាពស្ងាត់ស្ងៀមដើម្បីចៀសវាងការប្រឈមមុខដាក់គ្នាបន្ថែមទៀត។ ពេលនេះខ្ញុំកំពុងខិតខំអស់ពីលទ្ធភាពដើម្បីសម្រាលភាពតានតឹង”។
នៅពេលសួរថា តើលោកគិតថា ជំហរបច្ចុប្បន្នរបស់លោក ហ៊ុន សែន ផ្ទុយពីជំហររបស់គណបក្សប្រជាជនកម្ពុជា អំឡុងពេលចរចាកាលពីខែកក្កដា ឬយ៉ាងណានោះ លោក សម រង្ស៊ី បានបញ្ជាក់ជាថ្មីថា លោកមិនចង់បង្កឲ្យមានស្ថានភាពតានតឹងឡើយ។
លោកមានប្រសាសន៍ថា “មេធាវីជាច្រើនបានបញ្ចេញទស្សនៈរបស់ខ្លួនរួចហើយ ហើយវាមិនមែនជាការងាររបស់ខ្ញុំដែលត្រូវលើកឡើងពីទឡ្ហីករណ៍ផ្លូវច្បាប់របស់ពួកគាត់ឡើងវិញទេ។ ខ្ញុំគិតថា តួនាទីរបស់ខ្ញុំគឺត្រូវបញ្ចៀសការប្រឈមមុខដាក់គ្នាបន្ថែមទៀត ហើយខ្ញុំមិនចាំបាច់ធ្វើអត្ថាធិប្បាយទៀតទេលើបញ្ហានេះ”។
លោកស្រី មូរ សុខហួរ តំណាងរាស្ត្រគណបក្សសង្គ្រោះជាតិ ដែលស្ថិតក្នុងចំណោមតំណាងរាស្ត្រទាំងប្រាំពីររូបដែលជាប់ចោទពីបទ ” ដឹកនាំកុបកម្ម” ជុំវិញការតវ៉ាមួយកាលពីថ្ងៃទី១៥ ខែកក្កដា ដែលបានផ្ទុះអំពើហិង្សាវាយតប់គ្នាតាមផ្លូវ ក៏បានបដិសេធមិនធ្វើអត្ថាធិប្បាយអំពីប្រសាសន៍របស់លោកនាយករដ្ឋមន្ត្រីដែរ។
លោក ព្រំ សុខា រដ្ឋលេខាធិការក្រសួងមហាផ្ទៃ ដែលជាអ្នកនាំពាក្យរបស់គណបក្សប្រជាជនកម្ពុជា សម្រាប់កិច្ចព្រមព្រៀងថ្ងៃ២២ កក្កដា បានបដិសេធមិនធ្វើអត្ថាធិប្បាយទេកាលពីម្សិលមិញ ប៉ុន្តែនៅថ្ងៃមានកិច្ចព្រមព្រៀងនោះ លោកបានមានប្រសាសន៍ថា តំណាងរាស្ត្រគណបក្សសង្គ្រោះជាតិទាំងប្រាំពីររូបនេះនឹងមិនត្រូវបានផ្ដន្ទាទោសឡើយ។
លោកបានមានប្រសាសន៍នៅយប់ថ្ងៃមានកិច្ចព្រមព្រៀងគ្នាថា “ពួកគាត់នឹងត្រូវបានដោះលែងឲ្យនៅក្រៅឃុំជាបណ្ដោះអាសន្ន ដើម្បីឲ្យពួកគាត់ស្បថចូលកាន់មុខតំណែង ហើយបន្ទាប់មករដ្ឋសភានឹងពិចារណាអភ័យឯកសិទ្ធិរបស់ពួកគាត់ និងស្នើសុំឲ្យតុលាការមិនចាត់ការសំណុំរឿងនេះ។ ប៉ុន្តែយើងចាំបាច់ត្រូវឆ្លងកាត់ដំណើរការច្បាប់”។
នៅខែបន្ទាប់ មេធាវីតំណាងលោក កឹម សុខា អនុប្រធានគណបក្សសង្គ្រោះជាតិ ដែលមិនត្រូវបានចោទប្រកាន់ពីបទ “កុបកម្ម” ប៉ុន្តែដែលទទួលបានដីកាកោះហៅពីតុលាការសម្រាប់ការសាកសួរជុំវិញសំណុំរឿងនេះនោះ បានមានប្រសាសន៍ថា ចៅក្រម កែវ មុនី នៅសាលាដំបូងរាជធានីភ្នំពេញ ថែមទាំងបដិសេធមិនសួរលោក កឹម សុខា ទៀតផងដោយសារតែលោកមានអភ័យឯកសិទ្ធិជាតំណាងរាស្ត្រ។
លោកស្រី ម៉េង សុភារី មេធាវីតំណាងរាស្ត្រគណបក្សសង្គ្រោះជាតិ បានមានប្រសាសន៍កាលពីថ្ងៃទី១១ ខែសីហាថា “គាត់បានជូនដំណឹងមកយើងថា គាត់មិនអាចសាកសួរយើង ឬកូនក្ដីរបស់យើងបានទេ ពីព្រោះគាត់ជាតំណាងរាស្ត្រ ដូច្នេះគាត់នឹងខុសបើគាត់សាកសួរតំណាងរាស្ត្រ”។
ប៉ុន្តែលោកស្រីក៏បានមានប្រសាសន៍នៅពេលនោះដែរថា តុលាការមិនទាន់បានដកការចោទប្រកាន់លើតំណាងរាស្ត្រទាំងនេះនៅឡើយទេ គឺគ្រាន់តែមិនចាត់ការប៉ុណ្ណោះ។ លោកស្រីបានមានប្រសាសន៍ទៀតថា “ចៅក្រមស៊ើបសួរ កែវ មុនី បានប្រាប់យើងថា គាត់បានបញ្ជូនរបាយការណ៍ទៅក្រសួងយុត្តិធម៌ ដើម្បីស្នើសុំយោបល់ពីរដ្ឋសភាជុំវិញសំណុំរឿងនេះ”។ ចំណែកឯចៅក្រម កែវ មុនី មិនអាចទាក់ទងសុំការបំភ្លឺបានទេកាលពីម្សិលមិញ៕ សុខុម