កាលពីម្សិលមិញ កសិករនៅខេត្តកោះកុងម្នាក់ បានអះអាងថា គាត់ត្រូវបានគេព្រមានថា នឹងមានការប្រើកម្លាំងប្រដាប់អាវុធ ប្រសិនបើគាត់មិនព្រមទទួលយកសំណងដែលរដ្ឋាភិបាល ផ្តល់ឲ្យសម្រាប់ដីរបស់គាត់ដែលស្ថិតនៅក្នុងគម្រោងសាងសង់រមណីដ្ឋានទេសចរណ៍របស់ក្រុមហ៊ុនចិនទេនោះ។
កាលពីខែមករាលោកស៊ុនតារាអភិបាលរងខេត្តកោះកុងបានបញ្ជាក់ថា ក្រុមប្រឹក្សាអភិវឌ្ឍន៍កម្ពុជា(CDC)ដែលជាសេនាធិការផ្នែកវិនិយោគទុនបរទេសរបស់រដ្ឋាភិបាលបានអនុញ្ញាតឲ្យក្រុមហ៊ុនចិនចំនួនពីរអភិឌ្ឍរមណីយដ្ឋាននៅលើកោះ៣ក្នុងសមុទ្រនៃខេត្តនៅភាគនិរតីនេះ។
ឈ្មោះ ជា ប៊ុនអ៊ាងជាកសិករម្នាក់រស់នៅលើកោះម្នាស់ជាកោះមួយដែលមានមនុស្សរស់នៅក្នុងចំណោមកោះទាំង៣ បានអះអាងថា គាត់បានទទួលការទូរស័ព្ទ ពី លោក សុខ ណាងអគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជាកាលពីថ្ងៃអង្គារ ជំរុញឲ្យគាត់លក់ដីក្នុងតម្លៃ៣.៥០០ដុល្លារអាមេរិកក្នុងមួយហិកតា។
លោកប៊ុនអ៊ាងបាននិយាយថាគាត់មិនព្រមលក់ដីរបស់គាត់ ព្រោះគាត់មិនពេញចិត្តនឹងតម្លៃដែលគេផ្តល់ឲ្យនេះ និងមានការសង្ស័យចំពោះដំណោះស្រាយនេះ។គាត់បាននិយាយថា លោក ណាង បានប្រាប់គាត់ថា អាជ្ញាធរអាចប្រើប្រាស់ “កងកម្លាំងប្រដាប់អាវុធ”ដើម្បីបើកផ្លូវឲ្យអ្នកវិនិយោគទុនចិនធ្វើការអភិឌ្ឍលើកោះនេះ។
ឈ្មោះ ប៊ុនអ៊ាងបាននិយាយថា“ខ្ញុំអាចនិយាយថា វាគឺជាការគំរាមកំហែងដោយប្រយោលមកលើរូបខ្ញុំថាខ្ញុំនឹងចាកចេញពីទីនេះដោយដៃទទេ ហើយដំណាំរបស់ខ្ញុំនឹងត្រូវ កងកម្លាំងប្រដាប់អាវុធបំផ្លាញ”។
កសិករនៅលើកោះនេះម្នាក់ទៀតឈ្មោះ អិុត ពយ បាននិយាយថា លោក ណាងក៏បានទូរស័ព្ទប្រាប់គាត់អំពីការឲ្យតម្លៃដីដូចគ្នានេះ ហើយគាត់ក៏បានបដិសេធដូចលោក ប៊ុនអ៊ាងដែរ។ប៉ុន្តែលោកអិុតពយ បាននិយាយថា លោក ណាង ពំុបាននិយាយថានឹងប្រើប្រាស់កម្លាំងប្រដាប់អាវុធនោះទេ។ លោក ណាង បានបដិសេធថាលោកមិនបាននិយាយជាមួយកសិករទាំងពីរនាក់ទេ ។
មុនពេលបដិសេធ មិនធ្វើការអត្ថាធិប្បាយបន្ថែម និងបង្វែរសំនួរនេះទៅឲ្យមន្ត្រីថ្នាក់ខេត្តនោះលោកណាងបានមានប្រសាសន៍ថា“ពាក់ព័ន្ធជាមួយនឹងរឿងនេះ ខ្ញុំពំុបានដឹងអ្វីទាំងអស់”។
លោក ឆេង ឆែ អភិបាលស្រុកគិរីសាគរបានបញ្ចាក់ថា មានការឲ្យតម្លែដីនៅលើកោះនោះចំនួន៣.៥០០ដុល្លារអាមេរិកក្នុងមួយហិកតាមែន ប៉ុន្តែលោកបានបដិសេធថា មិនមានការលើកឡើងអំពីការប្រើកម្លាំងប្រដាប់អាវុធនោះទេ។
លោក ឆេងឆែ ឲ្យដឹងថាលោក ប៊ុនអ៊ាងគឺជាអ្នកជំទាស់តែម្នាក់គត់ក្នុងចំណោមកសិករទាំង១៦គ្រួសារនៅលើកោះនេះចំណែកឯ១៥គ្រួសារផ្សេងទៀតបានទទួលយកដំណោះស្រាយនេះជាផ្លូវការរួចហើយកាលពីថ្ងៃពុធ។ លោកបានអះអាងថា លោកពយ គឺជាសមាជិកគ្រួសាររបស់ ឈ្មោះ ប៊ុនអ៊ាង ប៉ុន្តែអ្នកទាំងពីរបាននិយាយថាពួកគេមានដីផ្សេងគ្នានិងគ្រាន់តែជាសាច់ញាតិឆ្ងាយពីគ្នាប៉ុណ្ណោះ។
លោកបាននិយាយថា ទោះបីជាគ្រួសារមួយនេះ មិនព្រមទទួលយកដំណោះស្រាយបែបនេះក៏ដោយ ក៏យើងមិនប្រើកម្លាំងប្រដាប់អាវុធឬអំពើហិង្សាដើម្បីបង្ខំឲ្យពួកគេចាកចេញពីកោះនេះដែរ។យើងនឹងបន្តសម្របសម្រួលដើម្បីរកដំណោះស្រាយមួយដោយសន្តិវិធី”។ អង្គការសិទ្ធិមនុស្សអាដហុកបានលើកឡើងថាខ្លួនកំពុងសើុបអង្កេតបញ្ហានេះ៕
ប្រែសម្រួលដោយ ហម សុផាណ្ណា