ក្រុមការងារកំណែទម្រង់ការបោះឆ្នោតមកពីគណបក្សប្រជាជនកម្ពុជានិងគណបក្សសង្គ្រោះជាតិ កាលពីថ្ងៃច័ន្ទបានបញ្ជូនការមិនព្រមព្រៀងគ្នា១០ចំណុចក្នុងការព្រាងច្បាប់បោះឆ្នោតថ្មីទៅថ្នាក់ដឹកនាំបក្សរបស់ខ្លួនដើម្បីពិភាក្សា។
កាលពីឆ្នាំមុន ក្រុមនេះបានព្រាងច្បាប់ថ្មីមួយដែលបង្កើតគណៈកម្មាធិការជាតិរៀបចំការបោះឆ្នោតទ្វេបក្សថ្មី ហើយតាំងពីពេលនោះមកបាននិងកំពុងធ្វើវិសោធនកម្មច្បាប់បោះឆ្នោតជាតិ ក្នុងបំណងបញ្ជូនច្បាប់ទាំងពីរសុំការយល់ព្រមពីសភារួមគ្នា។
លោក គួយ ប៊ុនរឿន មេដឹកនាំបក្សប្រឆាំងក្នុងការចរចា បានមានប្រសាសន៍ថា គោលដៅខែកុម្ភៈសម្រាប់ដាក់ទៅសភានឹងមិនអាចសម្រេចបានទេ ហើយថាឥឡូវនេះគណបក្សនឹងយកខែមីនាវិញ។
លោក គួយ ប៊ុនរឿន បាននិយាយថា “មែនហើយ នឹងមិនទាន់ពេលទេ។ យើងមិនទាន់បានឈានដល់ការព្រមព្រៀងលើ១០ចំណុចនៅឡើយទេ”។
ក្នុងចំណោម១០ចំណុចដែលនឹងត្រូវបញ្ជូនទៅលោកនាយករដ្ឋមន្ត្រី ហ៊ុន សែន និងលោក សម រង្ស៊ី មេដឹកនាំបក្សប្រឆាំង រួមមានមាត្រាដែលកំណត់ចំនួនសមាជិកសភា រយៈពេលធ្វើយុទ្ធនាការបោះឆ្នោត និងសន្តិសុខបោះឆ្នោត។
គណបក្សប្រឆាំងចង់បង្កើនចំនួនអាសនៈក្នុងសភាលើសពីអាសនៈ១២៣សព្វថ្ងៃ រីឯបក្សកាន់អំណាចចង់បានចំនួនអាសនៈនៅដដែល។
គណបក្សទាំងពីរនៅមិនទាន់ព្រមព្រៀងគ្នាលើរយៈពេលនៃការធ្វើយុទ្ធនាការជាផ្លូវការ ដោយគណបក្សប្រជាជនកម្ពុជាចង់បានយុទ្ធនាការមានរយៈពេល២១ថ្ងៃ ចំណែកឯគណបក្សសង្គ្រោះជាតិវិញចង់បាន២៥ថ្ងៃ។
គណបក្សសង្គ្រោះជាតិក៏ចង់បន្ថែមខមួយដែលថា “សកម្មភាពទាំងអស់សម្រាប់សន្តិសុខ មិនធ្វើឲ្យអ្នកបោះឆ្នោតនិងបេក្ខជនក្នុងការបោះឆ្នោតខ្លាចនោះទេ”។
ឧបនាយករដ្ឋមន្ត្រី លោក ប៊ិន ឈិន ដែលបានដឹកនាំគណបក្សប្រជាជនក្នុងការចរចាក៏បានបញ្ចេញឲ្យដឹងនូវជំហររបស់បក្សកាន់អំណាចទាក់ទិននឹងទោសទណ្ឌ ដែលនឹងអនុវត្តចំពោះបម្រាមដ៏ចម្រូងចម្រាសលើអង្គការមិនមែនរដ្ឋាភិបាលដែល “ប្រមាថ” គណបក្សនយោបាយក្នុងអំឡុងពេលបោះឆ្នោត។
លោកបាននិយាយថា “ទោសទណ្ឌដាក់លើអង្គការមិនមែនរដ្ឋាភិបាលពីបទប្រមាថ នឹងមានចំនួន២០លានរៀល”។
លោក ប៊ុនរឿន បានប្រាប់អ្នកកាសែតថា គណបក្សសង្គ្រោះជាតិមិនបានគាំទ្រការពិន័យធ្ងន់បែបនេះទេ ហើយនឹងបន្តពិភាក្សាអំពីបញ្ហានេះ ពេលដែលក្រុមការងារទាំងពីរជួបគ្នានៅថ្ងៃសុក្រនេះ៕ និត